Elder B. Corey Cuvelier

Ina ua faasilasila mai e Elder B. Corey Cuvelier o le a ia tuua lana galuega ina ia avea ma se peresitene o le misiona mo Le Ekalesia a Iesu Keriso o le Au Paia o Aso e Gata Ai, sa fesili ana uo, “Ua e valea?”

Fai mai Elder Cuvelier sa tauivi ana paaga ia malamalama pe aisea o le a ia laa ese ai mai lana matata faamanuiaina mo le tolu tausaga. Ae o a latou fesili o ni avanoa, na ia fai mai ai, “e faasoa atu ai pe aisea tatou te faia ai mea tatou te faia ma pe aisea tatou te talitonu ai i mea tatou te talitonu i ai ma po o ai tatou te talitonu i ai. O Iesu Keriso lena.”

Na fanau Brian Corey Cuvelier i le aso 12 Ianuari, 1969, i Los Angeles, Kalefonia, lea na vaetamaina ai o ia ma ola a’e ai. O lona tamā, o Heinz Joachim Cuvelier, o se leoleo. O lona tina, o JoAnn Leslie Jarnecke Cuvelier, na tausia le fale. O ia o le ulumatua o le fanau e toafa.

I le avea ai ma se faifeautalai talavou, sa auauna atu ai Elder Cuvelier i le Misiona a Pasila São Paulo i Saute. Sa faauu o ia mai le Iunivesite o Polika Iaga i le 1994 ma se faailoga i sootaga ma tagata lautele. Na auai o ia i le Shell Oil Company i le 1996, lea na ia galue ai i le tele o pisinisi a Amerika i Matu.

Na faaipoipo Elder Cuvelie ia Wendi Sue Manwaring i le aso 18 Iulai, 1992, i le Malumalu o Los Angeles Kalefonia. O i la’ua o matua o se fanau tama e toafa. Sa auauna atu le au Cuvelier o ni taitai misiona i le Misiona a Pasila Curitiba i Saute mai le 2016 i le 2019 ma sa nonofo i Katy, Texas, i le taimi o lona valaauga.

I le taimi muamua, sa auauna atu Elder Cuvelier o se Fitugafulu Eria i le Eria a Amerika i Matu i Sautesisifo, peresitene o le siteki, fesoasoani i le au peresitene o le siteki, fautua maualuga, epikopo, fesoasoani i le au epikopo, ma le peresitene o Alii Talavou a le uarota.