O Lou Salamo E Le Lafo Ai se Avega ia Iesu Keriso; E Faateleina Ai Lona Olioli

I nai tausaga ua mavae, i se malaga i Florida, sa ou nofo ai i fafo ma faitau se tusi. O lona autu na tauina mai ai e mafai lava ona tatou o atu i le lagi, e ui lava tatou te le o atoatoa i le taimi nei. Sa fesili mai se tamaitai sa savali ane, “E te manatu e mafai?”

Sa ou ea a’e i luga, ma le le mautonu, ona ou iloa ai lea o la sa talanoa mai e uiga i le tusi sa ou faitauina. Sa ou faia atu se tali faavalevalea e pei, “Ia, e le o toe mamao ona ou o’o lea i ai, ae o le a ou ta’u atua le iuga.”

Oka, maimau pe ana mafai ona ou toe foi i tua i lena taimi! O le a ou fai atu ia te ia, “Ioe, e mafai! Auā o le lagi e lē mo tagata ua atoatoa; e mo tagata ua faamagaloina; o ē filifilia pea lava pea Keriso.”

O le asō ou te fia tautala atu ia i tatou o ē lagona i nisi taimi, “O le salamo ma le faamagaloga e foliga e aoga mo tagata uma vagana ai a’u.” O i latou e mafaufau ifo ia i latou lava, “Talu ai ou te faia pea le mea sesē lava e tasi, atonu ona pau lava o a’u ia.” O i latou o ē faapei foi o a’u, e i ai aso e pei e matua’i a’etū i lugā le ala o feagaiga, e toetoe a pei o se savaliga sopo o feagaiga.

Sa faasoa mai e se faifeautalai lelei i Ausetalia, o Elder QaQa mai Fiti, se lagona faapena i lana molimau ina o le a malaga ese: “Ou te iloa e alofa le Atua ia te au, ae o nisi taimi ou te taumafaufau ai, ‘Pe o silafia e le Atua ou te alofa ia te Ia?’ Ona ou te le atoatoa, ma o lo o ou faia pea lava ni mea sese.”

I lena fesili e tasi faamomoiloto, e le galo, sa aotele ai e Elder QaQa le mea tonu e tele ina ou popole ai. Atonu foi o lo o outou tomanatu ai, faapea, “O lo o ou matuai taumafai malosi, ae pe o silafia e le Atua o lo o ou taumafai moni lava? Pe a ou toilalo pea lava pea, pe o silafia e le Atua ou te alofa pea ia te Ia?”

Ou te faanoanoa e faailoa atu lenei mea, ae sa masani foi ona ou fuaina la’u sootaga ma le Faaola i le tulaga atoatoa ou te ola ai. Sa ou mafaufau o se olaga usiusitai o lona uiga o le a le manaomia ai lava ona salamo. Ma a ou faia foi ni mea sese, lea e tupu i aso taitasi, sa ou faataumamaoina a’u lava mai le Atua, ma le manatu, “Ai ua matuai lē fiafia o Ia ia te au.”

E matua’i lē moni lena mea.

Sa ou aoaoina faapea afai e te faatalitali seia lava lou mamā po o lou atoatoa e te alu ai i le Faaola, e te le o malamalama i le taula’iga autu.

Ae a pe a tatou mafaufau i poloaiga ma le usiusitai i se isi itu ese?

Ou te ta’utino atu, e ui ina popole le Atua e uiga i a tatou measese, e sili atu Lona āno i le mea e tupu pe a mavae ona tatou faia o se sese. Pe o le a tatou liliu atu ma saga liliu atu pea ia te Ia? Pe o le a tatou tutumau ea i lenei sootaga o le feagaiga?

Atonu ua e faalogo i afioga a le Alii “Afai [e te] alofa mai ia te au, tausi a’u poloaiga” ma lagona ai le lotovaivai ona e te le’i tausia poloaiga uma. Sei ou faamanatu atu ia te outou o se poloaiga foi le ia salamo. O le mea moni, atonu o le poloaiga lea o loo tele ina ta’u soo mai i tusitusiga paia.

I le sa’i leotele toatasi a Alema, “E, pe ana o au o se agelu, ma mafai ona ou maua le moomooga o loʼu loto, … ma alaga atu le salamo,” sa le’i taumafai o ia e faamaasiasia i tatou e ala i le faailoa mai o a tatou mea sese. Sa manao o ia e alagaina le salamo ina ia mafai ai e oe ma a’u ona aloese mai mafatiaga i le lalolagi. O se tasi o mafuaaga na inoino ai Alema i le agasala ona e afua ai o tatou tiga.

O nisi taimi e tatau ona ou manatua, e pei o se fasipepa e tusia i lo’u muaulu, o poloaiga o le ala lea e aluese ai mai tiga. E faapena foi le salamo. Na saunoa mai lo tatou perofeta, “E alofa le Faaola ia i tatou e le aunoa aemaise lava pe a tatou salamo.”

A fetalai mai la le Alii, “Ia outou salamo, ia outou salamo!” ae a pe a e manatu ua faapea mai o Ia, “Ou te alofa ia te oe. Ou te alofa ia te oe.” Vaai faalemafaufau ia te Ia, o augani mai ina ia lafoai ese le amio o loo afua ai lou tiga, ma valaaulia oe e te la’a ese mai le pogisa ma liliu atu i Lona malamalama.

I le uarota a lo ma afafine o Carlyn, sa tootuli se ositaulaga fou e faamanuia le faamanatuga, ma nai lo le fai mai, “Ina ia latou faia i le faamanatuina o le toto o lou Alo,” ae sasi lana faapea mai, “Ina ia latou faia i le faamanatuina o le alofa o lou Alo.” Sa faatumulia mata o Carly i loimata a o gotouga ifo i lona loto na upu.

Sa loto lo tatou Faaola e talia le tiga o Lana Togiola ona e alofa o Ia ia te oe. O le mea moni, o oe “o le olioli lea sa tuu i ona luma” a o mafatia o Ia.

O le valaaulia ia salamo o se faailoaga o le alofa o le Atua.

O le fai atu ioe i lena valaaulia o se faailoaga o lo tatou alofa.

Vaai falemafaufau i le ata o Keriso e sili ona e fiafia i ai. Vaai faalemafaufau nei la ia te Ia o susulu mai Lana soisoi i le olioli i taimi taitasi e te faaaoga ai Lana meaalofa, aua o Ia o le “susulu atoatoa o le faamoemoe.”

Ioe, o lou salamo e le lafo ai se avega ia Iesu Keriso; e faateleina ai Lona olioli!

Sei o tatou aoao atua lena mea!

Ona o le salamo o la tatou talafou aupito manaia lea!

Tatou te le tumau i luga o le ala o feagaiga e ala i le lē faia lava o se mea sese. Tatou te tumau i luga o le ala i le salamo i aso uma.

Ma a tatou salamo, e faamagalo mai le Atua e aunoa ma le faamāina o i tatou, faatusatusa i tatou i se isi lava, pe ‘otegia foi i tatou ona o le mea lava lea e tasi na tatou salamo ai i le vaiaso ua te‘a.

E sagisagi fiafia o Ia i taimi uma e silasila mai ai o tatou tootutuli. E fiafia o Ia e faamagalo i tatou ona iā te Ia, o i tatou o ni tagata olioli tele!

E te lē o lagona ea e moni lena mea?

Aisea ea la e faigata tele ai ona tatou talitonu?!

O Satani, le tautuua’i sili ma le taufaasese, e faaaogaina le maasiasi e taofia ai i tatou mai le Atua. O le maasiasi o se pogisa e matuai mamafa tele ma e logona pe afai e te aveesea mai lou tino, e mafai ona lagonaina e se tagata e pei o se avega moni faaletino.

O le maasiasi o le leo faasala lea o loo faapea mai, “O le a le mea sa e mafaufau i ai?” “Pe sa’o ea se mea e te faia?”

E le ta’u maia e le maasiasi na tatou faia se mea sese; na te ta’u maia o i tatou lava o a tatou mea sese. Tou te ono faalogoina foi le, “Lalafi.” E faia e le fili mea uma i lona mana e taofiofi ai le mamafa i totonu, ma ta’u mai ua maualuga tele le tau, ma o le a faigofie atu pe afai e tuu ai pea lenei mea i le pogisa, ma aveese ai uma le faamoemoe.

O Satani o le gaoi o le faamoemoe.

Ma e moomia ona outou faalogo i le mea lenei, o lea o le a ou ta’u leoteleina atu upu nei: E lē o oe o le leo o i lou ulu po o mea sese na e faia. E ono manaomia foi ona e faileoteleina. Ta’u ia Satani, “Leai, e le o nei.” Tuu o ia i ou tua.

Ia lagonaina lena malosiaga, le salamo faaleatua e liliu atu ai oe agai i lou Faaola, ma mata’itu Lona alofa tunoa o ulu atu i lou olaga ma olaga o i latou e te alofa i ai. Ou te tautino atu, o le taimi lava tatou te aumaia ai ma le lototele se loto momomo agai atu ia te Ia, e i ai o Ia iina i le taimi lava lea.

Afai na vaai i se tasi o malemo, pe le aapa atu ea lou lima ma lavea’i mai i latou? Pe mafai ona outou mafaufau e teena e le Faaola lou lima o faaloaloa atu? Ou te vaai faalemafaufau o Ia e puna ifo i le vai, i lalo ifo o mea uma, e si’i a’e i tatou i luga ina ia mafai ona tatou manavaina se ea fou! E leai se tasi e mafai ona magoto i lalo ifo o le susulu o le malamalama o Keriso.

E susulu pea e faavavau Keriso nai lo le pogisa o le maasiasi. Na Te lē osofa’ia lava lou taua. Ia vaai toto’a la ia.

• Mafaufau faapea o le lima lea e faatusa i le taua.

• O le lima lea e faatusa i le usiusitai. Atonu na e ala a’e i lenei taeao, fai se tatalo ‘anoa, ma suesue i tusitusiga paia ia faalogo i le siufofoga o le Atua. Na e faia faaiuga lelei ma o loo e faia tagata o siomia oe i tulaga e faapei o Keriso. O loo e faalogologo i le konafesi aoao. Ua i ai lou usiusitai iinei!

• Pe atonu foi e le o lelei le āluga o mea. Na e tauivi talu ai nei e fai nai mea iti na, o mea faigofie e fesootai ai i le lagi. Na e faia ni nai faaiuga e te le o mitamita ai.

• O fea o i ai lou taua? Pe ua se’e ese ea le lima lea i se taimi?

O lou taua e le o nonoaina i le usiusitai. O lou taua e tumau; e le suia lava. Na tuuina atu ia te oe e le Atua, ma e leai se mea e mafai e oe po o se isi lava ona fai e suia ai. O le usiusitai e aumaia ai faamanuiaga; e moni lena mea. Peitai o le taua e lē o se tasi lea o na mea. O lou taua e “taua i le silafaga a le Atua,” i taimi uma po o fea lava e ave i ai oe e au faaiuga.

E ui ina ou faia ni mea sese, ou te manao e tumau pea i le sootaga o feagaiga ma Keriso, ma o le a ou ta’u atua ia te outou pe aisea.

Sa ou ola a’e ma fai a’u lesona maulu, ma aoaoina ai a fai e faamasino se togi o se maulu, latou te mataitū le faatinoga. Pe na faatu sa’o le maulu, ma faasasa’o tama’ivae ma sina pisipisi itiiti? Ona latou faia lea o se mea tulaga ese. Latou te faaopoopo i ai ma le maualuga o le faigata.

E tofu maulu tagata uma ma a latou lava tulaga maualuga o le faigata. Ma o lou Faaola ua na o le pau lea o le tagata e silafia moni le tulaga maualuga o le faigata o loo e maulu ai. Ou te manao i se sootaga ma le tagata e toatasi e malamalama ia te au, e iloa lo’u fatu, ma le faigata o loo ou taumafai ai!

Na Te silafia le puao o le pogisa o loo faaifoifo mai i luga o i tatou uma tagata malaga, e ui atu la tatou malaga i le vaitafe eleelea—e oo lava i lo tatou pipii i le aiu’amea, o le a tatou aafia lava i amioleaga o siomia ai i tatou.

O le o mai ia Keriso o le faapea lea, “Sei e fesoasoani mai lava ia te au?” faatasi ai ma le faamoemoe, ua i ai se faamautinoaga ua faaalia o loo faaloaloa mai pea e le aunoa Ona aao ia te oe. Ou te talitonu o lenei vaaiga fou o le salamo o lona uiga, e ui ina lei ooina atoatoa lo tatou usiusitai, ae tatou te taumafai e usitai ona o le alolofa i le taimi nei, filifili pea lava pea e tumau, ona tatou te alolofa ia te Ia.

Manatua le nuu o le Tupu o Peniamina, ua le toe i ai so latou manao e fai mea leaga ae ia faia mea lelei e le aunoa? Tou te manatu na teu o latou faleie, ma o i le fale, ma le’i toe faia lava se isi mea sese? E leai lava! O le eseesega latou te lei toe mananao e agasala. Sa ia i latou le usiusitai ona o le alolofa! Sa liua o latou loto ma liliu atu ai i le Atua a’o latou tauivi!

Sa i ai se taimi, i le matafaga, sa ou vaaia ai se manulele o lele agai i le matagi, ma ‘apatā malosi ona apa’au, toetoe a faali’i, ae na tumau a i le mea e tasi. Ona ou matauina lea o se isi manulele, e maualuga atu. Na ia maua se āu o matagi i luga ma sa faigofie ai ona faaopeopea, ma lē faapopoleina ai i le matagi. O le eseesega lena i le va o le taumafai e faia lenei mea na o i tatou lava ma le liliu atu i lo tatou Faaola, ma tuu atu ia te Ia e si’i a’e i tatou, ma le “faaamalologa i ona apaau.”

A o avea ma taitai misiona i Ausetalia, i le taimi o la ma’ua talatalanoaga mulimuli ma faifeautalai taitasi, sa matou talanoa ai e uiga i le 3 Nifae 17, lea na latalata ai tagata i le Faaola ma sa mafai ona lagona atu o Ia o tatalo mo i latou. Sa ma fesili, “Afai e mafai ona e lagona atu le Faaola o tatalo mo oe, o le a sou manatu i ni upu o le a Ia fai atu?”

O le faalogo atu i a latou tali, o se tasi lea o aafiaga na sili ona faatumulia i le Agaga i lo’u olaga. Na nonofo na faifeautalai taitoatasi, ma mata ua faatumulia i loimata a o ma faamanatu atu ia i latou, “E silafia e lou Faaola le maualuga o faigata o feagai ma oe. Na Ia lagonaina!”

O mea nei na faasoa filemu mai ma le agavaivai e na faifeautalai: Na fai mai se tasi o tamaitai faifeautalai, “O le a ta’u atu e Iesu i le Tama, ‘O loo ia faia le mea silisili. Ua ou iloa le malosi o loo ia taumafai ai.’” Fai mai se alii faifeautalai, “O mea uma o loo tutupu i lona olaga, ua ou mitamita ia te ia.”

Tatou taumafai e fai le mea lea. O le po nei, ae e te le’i tatalo, manatu faapea o loo lata ane Iesu Keriso. O Ia o lou Fautua i le Tamā. Fesili ifo ia te oe lava, “Mata o le a se tala a le Faaola i le Tamā e uiga ia te au?”

Ona fifilemu lea.

Faalogologo mo lena leo o fai mai mea lelei e uiga ia te oe—o le leo o le Faaola, lau uo aupito lelei, ma lou Tamā o i le Lagi, o lē o loo i ai moni iina. Manatua, o lo La’ua alolofa ma lou taua e silisili i taimi uma, tusa lava po o le a.

Ou te tu atu iinei e molimau atu o Iesu Keriso e tuuina atu le malamalama ia i latou o ē nonofo i le pogisa. O le mea lea, i na aso e te lagonaina ai lena leo o fai atu ia te oe e te lafi, ma e tatau ona e lafi i se potu pogisa ia na o oe lava, ou te valaaulia oe ia e lototoa ma talitonu ia Keriso! Savali e ki le Moli—lo tatou Susulu Atoatoa o le Faamoemoe.

Ia ufitia oe i Lona malamalama, o le a e vaai i tagata o siomia atoa ai oe, o ē na lagonaina foi le tuuatoatasi, ae o le taimi nei, i le mumu ai o le malamalama, o le a tomanatu ai oe ma i latou, “Aisea lava sa tatou fefefe ai i le pogisa? Aisea foi na umi ai ona tatou nonofo iina?”

“Ia fusi e le Alii o Malamalama oe i Ona aao, ma faamafanafana ma alofa pea lava pea ia te oe.” Ia faaauau pea ona tatou alolofa ia te Ia ma filifili ma saga filifili pea o Ia. I le suafa o Iesu Keriso, amene.