Faaeteete i le Faaosoosoga Lona Lua

I nai tausaga ua mavae, ina ua atoa lo’u 12, sa valaaulia ai a’u e auai i la’u tolauapiga muamua e alu ai ma le po, a la’u korama o le Perisitua Arona. O se valaaulia ua loa ona faatalitali i ai, aua o lo’u tamā o le taitai o le korama ma sa tele ina o e tolauapi ma tama o le uarota, ae tuu a’u i le fale.

Ina ua oo mai le aso, sa ou sagisagi fiafia. Ma e tatau ona ou ta’u sa’o atu, sa ou matuai naunau ia avea a’u o se tasi o tama matutua atu. Sa ou filimaoti e faamaonia a’u lava. I lena taumafaiga sa le’i leva ae tofotofoina a’u e vaai pe o le a ou auai i tausuaga ma avea ai o se tasi o le vaega.

O la’u matafaioi na atofa mai o le aumai o ki o le taavale a lo’u tamā ina ia mafai ai ona fai se togafiti faatausua i taitai. Ou te le o manatua lelei la’u tala na ioe mai ai lo’u tamā, ae sa le’i pine ae ou tamoe atu i le vaega o tama a’o uuina ki, ua ou mimita i le mea na ou ausia.

Ona oo mai ai lea o le isi tofiga. E tatau ona ou tatalaina le faitotoa o le taavale ma sulu se fasilaau i le va o le tua o le nofoa o le avetaavale ma le pu o le taavale. Ma ona ou lokaina lea o le taavale ina ia alu le po o e’ē le pu e aunoa ma se auala mo taitai e mafai ai ona alu se isi i le taavale e aveese le auupega faatauvaa.

Ia, o i lea na liliu ai le tala i se maasiasi tiga mo a’u. Na uma loa ona ou suluina le fasilaau, sa ou lokaina le faitotoa ma tamoe loa i le saoasaoa na ou mafaia e lafi i se pupuvao lata ane. A o ou faapupuu i lalo i le palapala, sa ou lagonaina se tiga matuai matautia. I le pogisa ma i lo’u faanatinati, sa ou saofai ai i luga o se laau toafa matuitui.

Sa lē lagona la’u faataitaiō i le tiga ona o le e’ē leotele o le pu, ma sa leai se isi mea ou te faia ae na o le savali faasa’esa’e i le taavale, e ta’uta’u a’u “agasala,” ma saili se fofō faigofie ma se vaaiga maasiasi faafomai.

O le taimi na totoe o lena po, sa ou faō i lo’u manava i totonu o se faleie a’o aveese e lo’u tamā ia tala o laau toafa matuitui e faaaoga ai palaea mai lo’u … e, tau ina ou fai atu, sa le’i lelei sa’u nofo mo le tele o aso mulimuli ane.

E tele taimi ou te toemafaufau ai i lena aafiaga. Ua mafai nei ona ou ‘ata i le faavalevalea o lo’u talavou, e oo foi ina ua manino mai ia te a’u ni nai mataupu faavae autu.

E tele mamanu i amioga a tagata e foliga ua masani ai le tagata natura—o le manao ia aofia ai, le manao e faamaonia ia lava, o le fefe i le le amanaiaina, ma le manaoga uuna’i e lafilafi ina ia aloese ai mai taunuuga. O le amioga faaiu lenei o le a ou taulai i ai i le asō—o le lafilafi pe a uma ona tatou faia se mea e le tatau ona tatou faia.

Ia, ou te le o faatusatusaina a’u tausuaga faatamaitiiti i le agasala matuiā, ae e mafai ona tatou aoao mai ni nai mataupu faavae e ono aoga a o tofotofoina i tatou i la tatou malaga i le olaga nei.

I le Faatoaga o Etena, sa i ai se tulaga toafimalie o Atamu ma Eva—se mau i meaai, o le matagofie lēmafaatusalia o le faatoaga—e le na o se faatoaga o le matagofie ae o se faatoaga e leai ni vao po o ni mea matuituia.

Peitai, ua tatou iloa foi o le olaga i le faatoaga na tapulaa ai lo la alualu i luma na moomia. O le faatoaga sa lē o se taunuuga faaiu ae o se suega, o le suega muamua o le mau suega, o le a faamaonia ai, saunia, ma faataga ai i la’ua e agaigai i luma i lo la’ua taunuuga faaiu o le toefoi atu i le afioaga o le Tamā ma le Alo.

O le a e manatuaina sa i ai le faafeagai i le faatoaga. Sa faataga Lusifelo e tofotofo Atamu ma Eva. Sa ia faaosoosoina muamua Atamu e ‘ai i le fua o le laau e iloa ai le lelei ma le leaga. O le manatuaina o le poloaiga e aua nei aai ai, o lea sa teena ai e Atamu. Ona oo mai ai lea o Eva ua faamanuiaina, o lē na filifili e ‘ai i le fua, ma faatalitonuina Atamu e ‘ai ai foi.

Mulimuli ane, na tautino ai e Atamu ma Eva e faapea, o lenei faaiuga sa tatau ona fai ina ia faataunuu ai le fuafuaga a le Tama Faalelagi. Ae o le ‘aai ai i le fua, na la solia ai le tulafono—o se tulafono na tuuina sa’o atu ia i la’ua mai le Tamā. O le taunuuga ma le lofituina o le malamalama i le lelei ma le leaga, atonu na tuua ai i la’ua i le faanoanoa tele ina ua la faalogoina le siufofoga o le Tamā o faasilasila ane Lona toefoi atu i le faatoaga. Sa la iloaina ai ua la’ua lē lavalavā, aua e moni lava ua leai ni o la’ua lavalava, ona sa soifua i la’ua i se tulaga o le lotomamā. Ae atonu na sili ona tiga le alia’e o la la’ua solitulafono nai lo le alia’e o lo la’ua lē lavalavā. Sa leai so la’ua puipuiga ma sa sātia gofie. Sa le’i ufiufia i la’ua uma faaletino.

I lea sailia pea o avanoa, sa iloa e Lusifelo lo la’ua tulaga ua alia’e ma ua faavaivaia, sa ia toe faaosoosoina foi i la’ua—o le taimi lenei, e lalafi mai le Atua.

O le faaosoosoga lenei—o le a ou faaigoaina o le “faaosoosoga lona lua,”—o le faaosoosoga lea e ono aumaia ai le taunuuga pito tele pe a tatou gauai i ai. O le mea moni, ina ia aloese mai faaosoosoga muamua uma e soli le tulafono a le Atua, e sili lea, ae ua tatou iloa o le a gauai tagata uma i se tele o faaosoosoga muamua i lenei lalolagi. A o tatou agaiga’i atu i lo tatou tulaga matutua ma ua malamalama, matou te faamoemoe o le a faaauau pea ona alualu i luma lo tatou malosi e aloese ai mai faaosoosoga muamua, a o tatou finafinau ia avea atili e faapei o le Faaola, o Iesu Keriso.

Atonu e taumafai isi e lalafi mai le Atua ona latou te le mananao e iloa pe alia’e, ma latou te lagonaina le maasiasi po o le ta’usalaina. Peitai, e anoanoai mau o loo aoao mai ai i tatou e faapea, e le mafai ona lalafi mai le Atua. O le a ou faasoa atu na o ni nai mau.

Ua aoao e le Alii ia Ieremia e ala i fesili nei: “Pe mafai ea e se tagata ona lafi i mea lilo ou te le iloa ai o ia? Na fetalai mai ai le Alii. E le o tutumu ea le lagi ma le lalolagi ia te au?”

Ma na aoaoina foi Iopu:

“Aua ua silasila o ia i ala o tagata taitoatasi, ua ia silafia foi ona savaliga uma.

“E leai se pouliuli, e leai foi se ata o le oti e lalafi ai o e fai amioleaga.”

Ua alaga le faisalamo o Tavita i lana gagana faatusisolo sili:

“Ieova e ua e suesue mai ia te a’u, ua e silafia lava a’u.

“O oe lava ua e silafia lo’u nofo i lalo ma lo’u tulai i luga, ua e silafia mamao mai o’u manatunatu. …

“Ae leai lava se upu i lo’u gutu, faauta, Ieova e, ua e silafia uma lava. …

“Ou te alu ea i fea ai lou agaga? Pe ou te sola i fea ai ou luma?

“Afai ou te alu a’e i le lagi, o i ai lava oe: afai ou te fofola so’u moega i seoli, faauta, e i ai lava oe.”