O Meaalofa Sili a le Faavavau: Togiola a Iesu Keriso, Toetu, Toefuataiga

I tausaga ua mavae, o le matou vasega o le talalelei i le vaveao sa taulotoina fuaiupu mai le Tusi Paia. Sa ou fiafia lava au ia e tauloto fuaitau pupuu. Sa aofia ai le Ioane 11:35—o le fuaiupu sili ona puupuu i tusitusiga paia, na o le tolu upu—“Sa tagi Iesu.”

Mo au i le taimi nei, ua tagi Iesu i le faanoanoa ma o le olioli e molimauina ai le moni faavavega: na afio mai le Alo paia o le Atua i le olaga faaletino ma aoao ai e tusa ma la le tino le ala e i ai faatasi pea ma faamanuia ai i tatou.

Pe a tatou fetagisi i le faanoanoa po o le olioli, e malamalama lelei lava Iesu Keriso. E mafai e Ia ona i ai i taimi e sili ona tatou manaomia ai meaalofa maoae a le faavavau: le Togiola a Iesu Keriso, Toetu, toefuataiga.

Ua fetagisi Maria ma Mareta mo lo la tuagane o Lasalo, ua maliu. O le tuia i le mutimuti alofa, ua tagi ai Iesu. Ua Ia faatuina Lasalo i le ola.

Ua silasila atu Iesu ia Ierusalema i le po o le Paseka. Ua tagi o Ia, ua le mafai ona faapotopoto Lona nuu e faapei o se matuamoa ona ofaofata’i i lana toloai. O le asō o Lana Togiola ua aumaia ai le faamoemoe pe a tatou faanoanoa ona o mea semanu e i ai.

Ua tagi le Alii o le togaolive a’o Ia fesili atu i Lana auauna, lea e mafai ona aofia ai ma i tatou o ni uso ma tuafafine o auaunaga, “O le a se isi mea sa tatau ona ou faia mo loʼu togaolive?”

Ua tu Maria ma le faanoanoa tele i autafa o le tuugamau. Ua fesili lemu atu Iesu, “Se a le mea e te tagi ai?” E silafia e Ia “e afe ane le tagi i le po, ae oo mai le alaga fiafia i le taeao.” Ua aumaia e le Toetu le mālāma mo tagata uma.

I laueleele o le Tusi a Mamona, a o tula’i a’e le motu o tagata faatuatua ia te Ia, ua atoatoa le olioli o Iesu. Ua tagi o Ia.

“Ua ave foi e Ia o latou tamaiti taitoatasi ma faamanuia ia te i latou, ma ua tatalo i le Tama mo i latou.

“Ma ina ua uma ona ia faia o lenei mea sa toe tutulu o ia”

O le Eseta lenei ia Iesu Keriso: Ua tali e Ia faanaunauga o o tatou loto ma fesili a o tatou agaga. Ua Ia soloiesea o tatou loimata, vagana ai o tatou loimata o le olioli.

Pe tafe o tatou loimata, o nisi taimi tatou te faatoese ai, ua maasiasi. Ae o le iloaina e malamalama Iesu Keriso e mafai e tiga ma olioli o le olaga ona tuu mai ia i tatou le malosi i talaatu o lo tatou lava malosi a o tatou feagai ma mea oona ma suamalie o le olaga.

I Amerika i Saute, ua tagitu’i ai se tamā. Ua maliu si ona afafine talavou, o le puna o le fiafia i lona olaga. “O le a ou foai atu soo se mea ina ia ou toe vaai ai ia te ia,” na ia tagi ai i o’u lima. Na ou tagi foi.

I le faapaiaga o le Malumalu o Puebla Mekisiko, sa susū mata o se tuafafine pele i loimata o le fiafia. O ona foliga na susulu mai ai le faatuatua ma le ositaulaga. Fai mai a ia, “Todos mis hijos están aqui en el templo hoy”—“Ua i ai uma iinei la’u fanau i le malumalu i le asō.” O augatupulaga e faapotopoto i le maota o le Alii e aumaia ai loimata o le olioli ma le faafetai.

I taua faatautala i vai’a’ai, sa faia ai e aiga ma tuaoi ni mea e le leoa i le tasi ma le isi. E faifai mālie ona faaavanoa e loimata oona le ala i le faamoemoe. Sa gatete lona leo, fai mai se fafine i se tama’i nuu, “Tuaoi, ae ou te le’i alu ifo i lo’u tuugamau, ou te manao ia e iloa le mea e sue i ai tagata o lou aiga o loo misi.”

O se tamaitai faaipoipo lalelei ma se alii faaipoipo aulelei, ua faamauina i le maota o le Alii. E 70 ona tausaga, e faapena foi le alii. O se tamaitai faaipoipo lalelei, sa faatalitali ma le agavaa mo le aso lenei. Ua ia faafeliuliua’i ma le matamuli lona ofu faaipoipo i lea itu, ma le la itu. Sa maligi o matou loimata o le olioli. Ua faataunuuina folafolaga a le Atua. O Ana feagaiga e aumai ai faamanuiaga.

A o aoao atu i se asiasiga faaleaiga i se tuafafine ua oti lana tane, sa aoaoina e le talavou o Boyd K. Packer se lesona faamomoiloto. I le mae’a ai o se feeseeseaiga ma lana tane, sa fonō atu e le tuafafine se tala tiga faaiu. Sa maliu lana tane i se faalavelave e le’i faamoemoeina i lena aso. “Mo le limasefulu tausaga,” o tagitu’i le tina ua oti lana tane, “Na ou nofo i seoli ma le iloa o toe upu na ia faalogoina mai o’u laugutu, o se tala na ‘a’ati, ma matagā.”

O le Eseta ia Iesu Keriso e fesoasoani ia i tatou e fonofono, toefaaleleia, faasa’o a tatou sootaga, i itu uma e lua o le veli. E mafai e Iesu ona faamalolo le faanoanoa; e mafai ona Ia faamagalo. E mafai ona Ia faasaoloto i tatou ma isi mai mea na tatou tautatala ai pe faia e ono noatia faatagataotaua ai i tatou.

O le Eseta ia Iesu Keriso e mafai ai ona tatou lagona le faamaoniga a le Atua. E ta’u mai e le lalolagi lenei ia i tatou ua tatou uumi tele, pupuu tele, lautele tele, lauitiiti tele—e lē lava le atamamai, aulelei, po o le faaleagaga. E ala i le liua faaleagaga ia Iesu Keriso, e mafai ai ona tatou sao mai le manatu e le agavaa ma le vaai faatauvaa.

Faatasi ma le olioli i le Eseta, tatou te lagiina ai, “Ua faatoilaloina le oti; ua saoloto le tagata. Ua manumalo Keriso.” O le Toetu o Keriso ua faasaolotoina ai i tatou mai le oti, mai vaivaiga o taimi ma lē atoatoa faaletino. O le Togiola a Iesu Keriso ua toefuata’iina ai i tatou faaleagaga. Na tafetotoi o Ia mai pu afu uma, faapei o tagitu’i lona toto, ina ia tatou sosola ese ai mai le agasala ma le vavaeeseina. Ua Ia toetuufaatasia i tatou, ua atoatoa ma paia, ma le tasi ma le isi ma le Atua. I mea lelei uma, ua toefuatai tele e Iesu Keriso i tatou—e le gata i le mea sa tatou i ai ae o le gafatia atoa foi e mafai ona tatou oo i ai.

O le soifuaga ma le malamalama o Iesu e molimauina ai le alofa o le Atua mo Ana fanau uma. Ona e alofa le Atua lo tatou Tamā i Ana fanau uma i vaitausaga uma ma laueleele, tatou te maua Lana valaaulia alofa e o mai ia maua le filemu ma le olioli ia te Ia, i le tele o agaifanua ma aganuu. Soo se mea, i soo se taimi, pe o ai lava i tatou, ua tofu i tatou ma le faasinomaga paia o fanau a le Foafoa lava e tasi. I le agaga lava lea e tasi, ua faasoa ai foi e so’o o Isalama, FaaIutaia, ma le Au Kerisiano le talatuu faalelotu i le Tamā o Aperaamo ma sootaga o feagaiga e ala i mea na tutupu i Aikupito anamua.

Sa alu Tamā Aperaamo i Aikupito ma sa faamanuiaina.

O Iosefa, na faatauina atu o se pologa i Aikupito, na ia iloa o le miti a Farao o lona uiga e fitu tausaga o le mau ma sosoo ai ma le fitu tausaga o le oge. Sa faasaoina e Iosefa lona aiga ma lona nuu. Sa tagi Iosefa ina ua ia malamalama i le faamoemoega tele atu o le Atua, lea e galulue faatasi ai mea uma mo i latou o ē tausi i a latou feagaiga.

O Mose, o lē sa ola a’e i Aikupito i le aiga o Farao, na mauaina ma toefuatai mulimuli ane ki mo le faapotopotoina o fanau a le Atua.

O le faataunuuina o le valoaga, sa sailia ai e Iosefa, Maria, ma le tamaitiiti o Keriso se sulufaiga i Aikupito. I Cairo, fai mai ai ma le migao se Musalemi talitonu tuuto: “O loo aoao e le Korana e faapea, na maua e Iosefa, Maria, ma le pepe o Iesu le saogalemu ma le malutaga i lo’u atunuu. I lo’u atunuu, a o tamaitiiti Iesu sa ‘ai i a matou meaai, fai ai ana ulua’i la’a, ma tautala ai i Ana uluai upu. O iinei i lo’u atunuu, matou te talitonu sa faalo’ulo’u ifo o matou laau ina ia avatu ai fualaau ‘aina suamalie mo Ia ma Lona aiga. O Lona i ai i lo’u atunuu na faamanuiaina ai o matou tagata ma le laueleele.”

O le fuafuaga a le Tamā o le faitalia e iloa ai ona filifili tonu i le olaga nei, ua mafai ai ona tatou aoao e ala i o tatou lava aafiaga. O nisi o a tatou lesona silisili o le olaga e mai mea o le a tatou le filifilia lava. I le alofa, na afio maualalo ai Iesu Keriso i lalo, ma toe afio a’e i luga a’e o mea uma. E olioli o Ia i o tatou gafatia paia mo le fatufatu meafou ma le fiafia, agalelei e aunoa ma se manatu i se taui, faatuatua seia oo ina salamo ma le faamagaloga. Ma e tagi foi o Ia i le faanoanoa i le maoa’e o o tatou puapuaga faaletagata, o le agaleaga, faaitu’au—lea e tele ina aumaia i filifiliga a le tagata—faapei foi ona faia e lagi ma le Atua o le lagi ia i latou.

O tautotogo taitasi o le Eseta e molimauina ai o le soloa’iga ma le fetaula’iga faaleagaga, o vaega uma o le mamanu paia o le togiola, toetu, ma le toefuataiga e ala ia Iesu Keriso. O lenei fetaula’iga paia ma le faafaatusa, e le o se mea faafuasei pe faafuāveta. O le Aso Sa o le Laupama, Vaiaso Paia, ma le Eseta e faamanatuina ai le Togiola ma le Toetu o Keriso. E pei o le asō, o aso 6 o Aperila uma tatou te faamanatuina ai le faatuina ma le faatulagaina o Le Ekalesia a Iesu Keriso o le Au Paia o Aso e Gata Ai. O lenei Toefuataiga o se mafuaaga lea tatou te potopoto ai i Aso Sa muamua o Aperila taitasi i le konafesi aoao.

Na oo mai foi le Toefuataiga e faapei ona toefaafoi mai e Iesu Keriso toetu, Mose, Elaia, ma Elia ia ki ma le pule o le perisitua i le Malumalu faatoa faapaiaina o Katelani i le Aso Sa, 3 Aperila, 1836. I lena faatulagaga i lena aso na oo mai ai i le Ekalesia toefuatai a Iesu Keriso, le pule ma faamanuiaga a le Atua e faapotopoto Lana fanau, tapena Lana fanau e toefoi atu ia te Ia, ma tuufaatasia aiga mo le faavavau. O le Toefuataiga i lena aso na faataunuu ai le valoaga e ala i le tupu mai i le Eseta ma le Paseka.

E aofia ai ma le Malumalu o Katelani, sa ou asiasi atu talu ai nei i nofoaga paia i Ohaio, i le mea sa vaai ai le Perofeta o Iosefa ma isi i le faaaliga o le Atua lo tatou Tamā ma Lona Alo, o Iesu Keriso. Sa vaai le Perofeta o Iosefa i foliga o le lagi. I le lagi, e ala ia Iesu Keriso, o loo “lavea’i ai galuega uma a ona aao” i se malo o le mamalu. Na pau tuusaunoaga o i latou o ē “ua faafitia le Alo ina ua uma ona faaali mai o ia e le Tamā.”

A o amata lana misiona i le olaga nei, sa tautino mai ai e Iesu o Lana misiona ina ia faamanuiaina i tatou taitoatasi i mea uma tatou te naunau e maua—i taimi uma, i atunuu uma, i tulaga uma. Ina ua mavae ona anapogi i le 40 o aso, sa alu Iesu i le sunako ma faitau ai, “Ua i o’u luga le Agaga o le Alii, aua ua na faauu mai ia te a’u e folafola le tala lelei i e matitiva; ua auina mai a’u e ia e faamalolo i e loto momomo, e tala’i le saolotoga i le tafeaga, ma ia pupula mata o e tauaso, e tuu saoloto i e ua faasauaina.”

Matitiva, loto momomo, tafeaga, tauaso, faasauaina—o i tatou taitoatasi na.

O loo faaauau e le tusi a Isaia le folafolaga faaleMesia o le faamoemoe, laveai, faamautinoa: “Na afio mai ia i latou o ē faanoanoa i Siona, … e foaiina atu ia i latou le matagofie e sui a’i le efuefu, o le uu o le olioli e sui a’i le faanoanoa, o le ofu e fai a’i viiga e sui a’i le loto faavaivai.”

O lea, tatou te ‘alalaga atu ai, “Ou te matua fiafia ia Ieova, e olioli lo’u loto i lo’u Atua.” na fetalai ai Isaia, “aua ua na faaofuina au i ofu o le olataga, ua na faapulupuluina au i le ofu o le amiotonu.”

O vaitau taitasi o le Eseta tatou te faamanatuina ai, o se atoaga faafaatusa, meaalofa sili a le faavavau e ala ia Iesu Keriso: O Lana Togiola; o Lona (ma le folafolaga o lo tatou) Toetutu moni; Toefuataiga o Lana Ekalesia o aso e gata ai ma ki ma le pule o le perisitua e faamanuia ai fanau uma a le Atua. Tatou te olioli i ofusa o le faaolataga ma le ofutalaloa o le amiotonu. Tatou te alalaga, “Osana i le Atua ma le Tamai Mamoe!”

“Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”

Ia taitasi i tatou ma maua i le togiola a Iesu Keriso, le toetu, ma le toefuataiga—le filemu, avea ai, ma avea ma ni ō—le mea e tumau lona moni ma le olioli, fiafia ma faavavau, ou te tatalo ai i Lona suafa paia, o Iesu Keriso, amene.