O Oe o le Keriso
(Mataio 16:16)
Tatou te mananao i a tatou fanau ia talitonu ia Iesu Keriso, avea ma ni ō o Iesu Keriso ma Lana Ekalesia e ala i feagaiga, ma finafinau ia avea faapei o Iesu Keriso.
Ina ua i le vasega fa lo ma atalii o Eli, sa faatuina e lana vasega se faigamalo faafoliga, lea na filifilia ai o ia e ana uo e avea ma faamasino o le vasega. I se tasi aso, sa asiasi atu ai se faamasino moni mai le Faamasinoga o le Itumalo Lona Lua a Iuta, ma tuu ana toniga faafaamasino i luga o Eli, ona faatautaia lea o se faatautoga o le tofi mo la latou vasega. O lea mea na faamumūina ai ia Eli laitiiti se faanaunauga e suesue i le tulafono, ma le Faitulafono Lava Ia, o Iesu Keriso.
I le mavae ai o tausaga o ni taumafaiga filiga, sa maua ai e Eli se valaaulia mo se faatalanoaga i se tasi o ana filifiliga pito i luga mo le aoga faaloia. Sa ia fai mai, “Mama, e 10 fesili na fai mai ia te au. O le fesili faaiu o le, ‘O fea e faapogai ai le tapasa o lou tamali’iaga?’ Sa ou ta’ua e faapea, i le talafaasolopito atoa sa faapogai ai e le tagata soifua faiga o le tamali’iaga e ala i le mamanuina o o latou olaga mai olaga o isi. O le faataitaiga o le tamali’iaga ua ou taumafai e mamanu mai ai lo’u olaga o Iesu Keriso. Sa ou fai atu afai e ola tagata uma i aoaoga a Iesu Keriso i le Lauga i luga o le Mauga, o le a sili ona lelei ma toafilemu le lalolagi.” Ona uma ai lea o le faatalanoaga, ma sa ia mafaufau ifo ia te ia lava, “Ia ua uma ai foi a’u miti faatamaitiiti. E leai se tasi o le poto salalau e manao e faalogo e uiga ia Iesu Keriso.
Lua vaiaso mulimuli ane, ae taliaina ai Eli ma sa maua se sikolasipi. A o le’i tuuto atu i ai, sa matou asiasi i le lotoa. Sa foliga mai le aoga faaloia o se maota tele ma sa tu i luga o se maupuepue e iloa atu ai se vaituloto matagofie. O se mea ofoofogia, a o matou savavali e ui atu i le faletusi maoae ma alasavali malualii, sa matou vaaia ai i luga o fu’a ma ma’a o loo vaneina ai uiga paia mai le Lauga i luga o le Mauga.
O le Lauga i luga o le Mauga o le lauga ua mautinoa lava e aupito sili ona maoa’e ua fofogaina, na faataimua i ana aoaoga. E leai se isi lauga e mafai ona fesoasoani tatou te malamalama lelei ai i le tamalii o Iesu Keriso, Ona uiga paia, ma lo tatou faamoemoega laualuga e avea faapei o Ia.
O le avea ai ma soo o Iesu Keriso i le olaga atoa e amata i o tatou aiga—ma i le Peraimeri i le vave o le 18 masina le matua. Tatou te mananao i a tatou fanau ia talitonu ia Iesu Keriso, avea ma ni ō o Iesu Keriso ma Lana Ekalesia e ala i feagaiga, ma finafinau ia avea faapei o Iesu Keriso.
Talitonu ia Iesu Keriso
Muamua, talitonu ia Iesu Keriso.
Ina ua mae’a le lauga i le areto o le ola, o “isi soo e toatele [o le Alii]” ua faigata ona taliaina Ana aoaoga ma le aoaoga faavae, ma sa latou “o ese … i tua, a e lei toe feoai i latou ma ia.” Ona faliu atu lea o Iesu i le Toasefululua ma fai atu se fesili faaootia-loto, “Pe tou te fia o ese foi?”
Sa tali atu Peteru:
“Le Alii e, a matou o ea ia te ai? O ia te oe upu o le ola e faavavau.
“… Ua matou talitonu, ma ua matou iloa o oe o le Keriso, o le Alo o le Atua soifua.”
E pei ona faaalia e Peteru, o le talitonuga o le “faatuatua lea i se tasi pe taliaina se mea faapea e moni.” Ma ina ia mafai ona taitai atu e lo tatou faatuatua i le faaolataga, e tatau ona totonugalemu i le Alii o Iesu Keriso. “Tatou te faaalia le faatuatua ia [Iesu] Keriso, pe a tatou maua le faamautinoaga o loo i ai o Ia, [o se malamalama] i Lona uiga ma le [natura moni], ma se iloa o loo tatou finafinau e ola e tusa ai ma Lona finagalo.”
Na tautino mai e lo tatou perofeta pele, o Peresitene Russell M. Nelson, “O le faatuatua ia Iesu Keriso o le faavae lea o talitonuga uma ma le alātafe o le mana faalelagi.”
E mafai faapefea ona tatou fesoasoani i fanau e faamalolosia lo latou talitonuga ia Iesu Keriso ma maua ai Lona mana paia? E le toe manaomia ona tatou toe sailia se isi mea nai lo tatou Faaola lava Ia.
“[Na fetalai mai le Alii] i tagata ma faapea mai:
“Faauta, o Au o Iesu Keriso, …
“Tutulai ma o mai. …
“… Ma sa oo ina o atu le motu o tagata i luma, ma tuu atu o latou lima i lona itu, ma latou tagotago i tulaga o fao i ona lima ma ona vae; ma sa latou faia lenei mea, i le o atu i luma taitoatasi …a vaai ma o latou mata ma tago atu ma o latou lima, ma iloa mautinoa ai ma molimau ai, o ia lava lea.”
Ou te valaaulia outou e mafaufau loloto pe faape’ī foliga o lenei mea i le olaga o fanau iti. Pe latou te faalogo i molimau ia Iesu Keriso ma Lana talalelei? Pe latou te vaai i ata migao, faaletapuaiga o Lana misiona ma Lona tulaga faaleatua? Pe latou te lagonaina ma iloa le Agaga Paia o molimau atu i Lona moni ma le paia? Pe latou te iloa e uiga i Lana savali ma le misiona?
Avea Ma Ni Ō o Iesu Keriso ma Lana Ekalesia
Lua, avea ma ni ō o Iesu Keriso ma Lana Ekalesia.
Na oo le nuu o le Tupu o Peniamina i se liuga tele o le loto sa latou tuuto atu e ala i feagaiga o latou ola e faia le finagalo o le Atua. Ona o le feagaiga sa o latou osia ma le Atua ma Iesu Keriso, o lea sa “taʼua ai [i latou] o le fanau a Keriso, o ona atalii, ma ona afafine.” I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua i ai so tatou tiutetauave faalefeagaiga e fau Lona malo ma saunia mo Lona toefoi mai.
E mafai faapefea ona tatou fesoasoani i fanau ia faia ma tausia feagaiga paia? I le tusi lesona o le Sau, Mulimuli Mai ia te A’u i le faaopoopoga A ma le E, tatou te maua ai talanoaga faaosofia ma lesona o le a faamamanaina ai aiga ma lagolago ai faiaoga ma taitai i o latou tulaga faatausimea paia, e tapena ai fanau mo se olaga atoa i luga o le ala o feagaiga.
Avea e faapei o Iesu Keriso
Tolu, avea e faapei o Iesu Keriso.
I le Tusi a Mamona, na apoapoai ai e le Faaola Ona soo faatoa valaauina ina ia faataitai atu ia te Ia i le mea e mafai ai: “O a ituaiga o tagata e tatau ona outou i ai? E moni ou te fai atu ia te outou, e pei lava o au nei.”
E mafai faapefea ona tatou fesoasoani i tamaiti ua papatisoina ma faamauina ia faataunuu o latou tiutetauave faalefeagaiga e faapotopoto i latou lava ma isi ia Iesu Keriso? O le avea ma soo i le olaga atoa e manaomia ai i tatou ina “ia avea ma ē anaana i le upu ae le na o le faalogo i ai.”
Pe a tuuina atu valaaulia i soo aupito iti o le Alii, faamolemole ia faaaoga avanoa uma e taitai ai i latou, taiala i latou, savavali i o latou autafa, ma fesoasoani ia latou maua le Ala. Faufautua i nei fanau iti faapelepele a o latou tapenapena e aoao atu, molimau atu, tatalo, pe auauna atu ina ia latou talitonu mautinoa ma iloa le olioli i le faataunuuina o o latou tiutetauave. Saili auala musuia e fesoasoani ai ia i latou ia latou iloa o la latou Ekalesia lenei, ma ua ia i latou se matafaioi taua e faatino i le saunia mo le toefoi mai o le Faaola.
A o avea Iesu Keriso ma taulaiga o o tatou olaga, e faavavau lava ona fesuisuia’i mea tatou te mananao ai, ma le ala tatou te mananao ai i ai. O le liua e suia ai mea uma! E suia ai lo tatou natura “ua le toe i ai so tatou manao e fai mea leaga, ae ia faia mea lelei e le aunoa.” E suia ai le ala tatou te faaaluina ai o tatou taimi, o a tatou punaoa; o mea tatou te faitauina, matamata ai, faalogologo i ai, ma faasoa. E suia ai foi le ala tatou te tali atu ai i se faatalanoaga maoa’e, faaakatemia, ma galuega faalematātā.
E manaomia ona tatou faasusulu atu le Malamalama o Iesu Keriso i tulimanu uma o o tatou olaga. Afai tatou te le molimau atu i le moni o Lona tulaga faaleatua i le muai olaga, o Lana misiona paia, ma Lona Toetu ua talaia ai falepuipui o le oti, i o tatou fale ma i sauniga taitasi o lenei Ekalesia, ona avea lea o a tatou savali o le alofa, auaunaga, faamaoni, lotomaualalo, lotofaafetai, ma le agaalofa ua na o se talanoaga uuna’i o le ola magafagafa ae lē o i ai se mana. A aunoa ma Iesu Keriso e leai se mana e suia ai, leai se faamoemoega e faananau i ai, ma leai se toefaaleleiga o lape o le olaga. Afai tatou te faatalale i lo tatou tulaga faalesoo o Iesu Keriso, e ono avea o se malapagā mo a tatou fanau.
A tatou fai atu ia tatou fanau tatou te alolofa ia i latou, pe o tatou ta’uina atu foi ia i latou e alolofa lo latou Tama o i le Lagi ma le Faaola o Iesu Keriso ia i latou? O lo tatou alofa e ono faamafanafana ma musuia ai, ae o lo La’ua alofa e mafai ona faapaiaina ai, faaeaina, ma faamaloloina ai.
O lenei Iesu e le tatau ona avea o se Iesu faatalafatu, po o se Iesu e leai ni faigata, po o se Iesu e leai se tino, po o se Iesu faasamasamanoa, po o se Iesu e lēmailoa, ae o se Alo e Toatasi o le Atua, e mamalu, e silafia mea uma, ua toetu, ua faaeaina, e tapuai i ai, e mamana, o lē silisiliese e lavea’iina. Ma e faapei ona ta’utino malosi mai e se tamaitiiti i le Atu Filipaina ia te au i se tasi aso, “Ua agavaa i tatou mo le laveaiina!” I le suafa paia ma le suafa mamalu o Ia “o lē ua tuuina mai e le Atua e fai ma faapalepale [silisili],” o Iesu Keriso, amene.