Talitonu Mautinoa i Luma o le Atua

O’u uso e ma tuafafine pele, ou te faafetai i lo’u talanoa atu ia te outou i le asō i lenei konafesi aoao taua. Ua oo ina leaga tele la’u vaai a o faasolo ina matua tele. Faafetai mo lo outou agaga malamalama a o tuuina atu la’u savali.

Ua tatou ola i se taimi o malosiaga sili i Le Ekalesia a Iesu Keriso o le Au Paia o Aso e Gata Ai. Ua tumu a’u i le olioli a o o’u vaai atu i le agaigai i luma i le tele naua o itu.

Ua faapitoa le musuia o a’u i o tatou talavou laiti. O loo latou tuuina atu le auaunaga i ni aofaiga tetele. O loo latou sailia o latou augatuaa ma faatino sauniga i le malumalu. O loo auina mai e o tatou alii talavou ma tamaitai talavou ia talosaga mo le galuega faafaifeautalai i ni fuainumera ua sili ona maualuluga. O lenei tupulaga faia’e ua tula’i mai o ni soo totoa o Iesu Keriso.

Lata mai nei sa ou feiloai ai i se tama teine fou a le tama a lo’u afafine. Pe a ou manatunatu i luitau o le a feagai ma ia i lona olaga, ou te lagonaina se faanaunauga tele e fesoasoani e fausia lona faatuatua ia Iesu Keriso. O le ola ai i Lana talalelei, o se mea e tatau ai mo lona fiafia i le lumanai.

E faapei foi o i tatou, o le a feagai o ia ma luitau. O le a oo uma i tatou inā mama’i, lē fiafia, tofotofoina, ma toilalo. E mafai e nei luitau ona faavaivaia lo tatou lava talitonu mautinoa. Peitai, e mafai e soo o Iesu Keriso ona maua le avanoa i se isi ituaiga o talitonuga mautinoa.

Pe a tatou osia ma tausia feagaiga ma le Atua, e mafai ona tatou maua le talitonu mautinoa e musuia mai e le Agaga. Na ta’u atu e le Alii i le Perofeta o Iosefa Samita e faapea o lo tatou talitonu mautinoa e mafai ona “solo malosi i luma o le Atua.” Manatu i le to’afimālie i le i ai o le talitonu mautinoa i luma o le Atua!

Pe a ou talanoa atu i le i ai o le talitonu mautinoa i luma o le Atua, o loo ou faatatau i le i ai o le talitonu mautinoa e faalatalata atu ai i le Atua i le taimi nei lava! O loo ou faatatau i le tatalo atu ma le talitonu mautinoa e faafofogaina i tatou e le Tama Faalelagi, e sili atu Lona malamalama i o tatou manaoga nai lo i tatou. O loo ou faatatau i le i ai o le talitonuga mautinoa e sili atu Lona alofa ia i tatou nai lo mea e mafai ona tatou malamalama i ai, Na te auina mai agelu e faatasi ma i tatou ma i latou foi tatou te alolofa i ai. O loo ou faatatau i le i ai o le talitonuga mautinoa e faapea, e naunau o Ia e fesoasoani ia i tatou taitoatasi ia taunuu i lo tatou gafatia aupito maualuga.

O lea la, e faapefea ona tatou maua lea ituaiga o talitonu mautinoa? Ua tali mai e le Alii lenei fesili i upu nei: “Ia tuu foi lou loto … ia tumu i le alofa mamā i tagata uma, … ma ia tuu le amiomamā e teuteuina ai ou mafaufauga e lē aunoa; ona solo malosi ai lea o lou lototele i luma o le Atua.”

O loo i ai le ki! I upu a le Alii lava ia, o le alofa mamā ma le amiomamā e tatala ai le ala e maua ai le talitonu mautinoa i luma o le Atua! Uso e ma tuafafine, e mafai ona tatou faia lenei mea! O lo tatou talitonu mautinoa e mafai moni ona solo malosi i luma o le Atua, i le taimi nei lava!

Ia tatou mafaufau i le alofa mamā ma le amiomamā.

Muamua, alofa mamā. E lua tausaga ua mavae, sa ou talosagaina ai i tatou uma, i le avea ai o ni soo o le feagaiga o Iesu Keriso, ina ia avea ma ni ē e faatupuina le filemu. Ou te toe fai atua le mea na ou fai atu ai i lena taimi: “O le ita e lē faatauanauina ai lava. O le faatupu vevesi e le mafai ona malosi ai se tasi. O finauga e le mafai lava ona musuia ai ni faaiuga.”

O le alofa mamā moni i tagata uma, o le faamaufaailoga lea o i latou e faatupuina le filemu! E taua le i ai o le alofa mamā i a tatou talanoaga, i tulaga lautele ma tulaga tuma’oti. Ou te faafetai atu ia te outou na talitonu ma mulimulita’ia la’u fautuaga muamua. Ae e mafai lava ona sili atu mea tatou te faia.

O le faatupu vevesi o i ai nei i talanoaga lautele ma i ala o faasalalauga faaagafesootai e taufaafefe. O upu faatiga o ni auupega e faaumatia ai. O fefinauaiga e taofia ai le Agaga Paia mai le avea ma a tatou soa tumau.

I le avea ai ma soo o Iesu Keriso, e tatau ona tatou taulamua i le ala o ni ē e faatupuina le filemu. A o avea le alofa mamā o se vaega o lo tatou natura, o le a mou ese mai ia i tatou le naunauga e tuumaualaloina isi. O le a tatou le toe faamasinoina isi. “O le a tatou maua le alofa mamā mo soo se ituaiga o tagata. O le alofa mamā i tagata uma, o se mea e tatau ai mo lo tatou alualu i luma. O le alofa mamā o le faavae o se uiga faaleatua.

Ia tatou aioi atu i lo tatou Tama Faalelagi e faatutumu o tatou loto i le alofa mamā sili atu—aemaise mo i latou e faigata ona alolofa i ai.—o le alofa mamā o se meaalofa mai lo tatou Tama Faalelagi mo soo moni o Iesu Keriso. O le Faaola o le Alii o le Filemu. E tatau ona avea i tatou ma Ana meafaigaluega mo le filemu.

Taimi nei, tatou talanoa i le amio mamā. Ua ta’u mai e le Alii ia i tatou ia teuteu o tatou mafaufauga e le aunoa i le amiomamā. Manatu i le faatelega o le a e maua, i soo se mafaufauga lelei pe a e faateleina i le amiomamā. O le amiomamā e faaleleia atili ai mea uma ma tele atu ai le fiafia! I se isi itu, manatu pe o le a le mea o le a tupu pe a e faaopoopoa le mamā i se mafaufauga lē mamā, se mafaufauga faatautala, po o se mafaufauga faanoanoa. O le amio mamā o le a tata’iesea na mafaufauga. O le amio mamā o le a faasalotoina ai mai mafaufauga atuatuvale, ma le popolevale.

Uso e ma tuafafine, a o faatupulaia le amioleaga o le lalolagi, e manaomia ona faateleina lo tatou ola mamā a’ia’i. O o tatou mafaufauga, upu, ma faatinoga e manaomia ona amiomamā e le aunoa ma faatumuina i le alofa mamā a’ia’i o Iesu Keriso i tagata uma. O le avanoa sili o i o tatou luma o le avea lea ma tagata e manaomia e le Atua ona avea ai i tatou.

O le tapuai e lē aunoa i le maota o le Alii e faateleina ai lo tatou gafatia mo le alofa mamā ma le amio mamā. O le mea lea, o le taimi i le malumalu e faateleina ai lo tatou talitonu mautinoa i luma o le Alii. O le faateleina o taimi i le malumalu o le a fesoasoani ia i tatou e saunia ai mo le Afio Mai Faalua o lo tatou Faaola, o Iesu Keriso. Tatou te lē iloa le aso po o le itula o Lona afio mai. Ae ou te iloa ua musuia a’u e le Alii e uunaia i tatou e sauniuni mo lena “aso tele ma le matautia.”

A o tatou saili ma le maelega ia maua le alofa mamā ma le amiomamā e faatutumu ai o tatou olaga, o le a faateleina lo tatou talitonu mautinoa e faalatalata atu i le Atua. Ou te valaaulia outou ia faia ni faatinoga ma le loto atoa ia faatupula’ia lo outou talitonu mautinoa i luma o le Alii. A oo ai la ina tatou o i le Tama Faalelagi ma le talitonu mautinoa ua faateleina, o le a faatutumuina i tatou i le olioli sili atu, ma o le a faateleina lo outou faatuatua ia Iesu Keriso. O le a amata ona tatou iloaina le mana faaleagaga ua silimamao i o tatou faamoemoega aupito silisili.

Tatou te faafetai i le Alii mo le faatele’a’iina o le fauina o malumalu i nei tausaga. I le asō i lalo o Lana taitaiga, matou te faasilasila atu ai fuafuaga e fau se malumalu i nofoaga taitasi nei e 15:

• Reynosa, Mekisiko

• Chorrillos, Peru

• Rivera, Iurukuei

• Campo Grande, Pasila

• Porto, Potukale

• Uyo, Nigeria

• San Jose del Monte, Filipaina

• Noumea, Niu Kaletonia

• Liverpool, Ausetalia

• Caldwell, Idaho

• Flagstaff, Arisona

• Rapid City, South Dakota

• Greenville, South Carolina

• Norfolk, Virginia

• Spanish Fork, Iuta

Ou te molimau atu o loo taitaia e Iesu Keriso, o le Togiola o Isaraelu, lenei, Lana Ekalesia. O loo sauniuni o Ia e toe afio mai. Ia faapena foi ona tatou sauniuni e talia o Ia. Ou te tatalo ai, i le suafa o Iesu Keriso, amene.