Fesoasoani Faalelagi mo le Olaga Nei

E ala mai i le Perofeta o Iosefa Samita, na faaali mai ai e le Alii ni nai mea e uiga i lo tatou muai olaga. O iina, na tatou ola ai o ni fanau agaga a le Atua . Ona sa naunau le Atua e fesoasoani i Ana fanau ua agai i luma, sa tonu ia te Ia e foafoa se lalolagi e mafai ona tatou maua ai se tino, aoao ai e ala i aafiaga, atia’e uiga paia, ma tofotofo ia iloa ai pe o le a tatou tausia poloaiga a le Atua. O i latou e agavaa o le a “faaopoopo i luga o o latou ulu le mamalu e faavavau ma faavavau lava” (Aperaamo 3:26).

Ina ia ausia tuutuuga o lenei fuafuaga paia, sa filifilia ai e le Atua Lona Alo Pele e Toatasi e avea ma o tatou Faaola. O Lusifelo, o lana filifiliga fautuaina, o le a faataumaoia ai le faitalia o le tagata, na avea ma Satani ma sa “lafoina i lalo.” O le faaāunu’ua ai i le lalolagi ma ua le maua ai le faamanuiaga o le ola faaletino, sa faataga ai Satani e taumafai “e faasese ma faatauaso tagata, ma taitai faatagataotaua i latou i lona loto, le toatele lava lea o i latou o e e lē faalogo mai i le leo [o le Atua]” (Mose 4:4).

E taua i le fuafuaga sili a le Atua mo le tuputupua’e faaletino o Ana fanau, o lo latou oo i le “faafeagai i mea uma” (2 Nifae 2:11). E faapei ona le mafai e o tatou musele faaletino ona atina’e pe tumau e aunoa ma le faatautee faasaga i le tulafono o le kalave, o lea la e manaomia ai e le tuputupu a’e faaletino i tatou ia galue faasagatau i le faaosoosoga a Satani ma isi mea faafeagai o le tino. O le mea e sili ona taua mo le tuputupu a’e faaleagaga o le tulaga manaomia e filifili ai i le va o le lelei ma le leaga. O i latou e filifili le lelei o le a agai i luma i lo latou faasinomaga e faavavau. O i latou e filifili le leaga—pei o le a faia e tagata uma i tofotofoga eseese o le olaga nei—o le a manaomia le fesoasoani laveai, lea na fuafuaina e se Atua alofa e tuuina mai.

O le mea mautinoa, o le fesoasoani faaletino aupito malosi a le Atua o Lona saunia lea o se Faaola, o Iesu Keriso, o lē o le a puapuagatia e totogi le tau ma saunia le faamagaloga mo agasala e salamoina. Ua faamatalaina e lena Togiola alofamutimutivale ma le mamalu, le mafuaaga ua avea ai le faatuatua i le Alii o Iesu Keriso ma uluai mataupu faavae o le talalelei. O Lana Togiola “ua aumaia le toetutu mai o e ua oti” (Alema 42:23), ma ua “togiola mo agasala a le lalolagi” (Alema 34:8), ma faamama uma ai a tatou agasala e salamoina ma tuuina atu ai i lo tatou Faaola le mana e fesoasoani ai ia i tatou i o tatou vaivaiga i le olaga nei.

E le gata i lena faamamaina mamalu o agasala na faia ma faamagaloina, ua saunia e le fuafuaga a se Tama o i le Lagi alofa le tele o isi meaalofa e puipuia ai i tatou, e aofia ai ma le puipuiga o i tatou mai le agasala mai lava i le amataga. O lo tatou olaga faitino, e amata lava i se tamā ma se tina. O le tulaga e tatau ona i ai, o le i ai uma o matua e toalua, e i ai meaalofa eseese e taiala ai lo tatou tuputupu a’e. A leai, o lo la’ua lē i ai, o se vaega lea o le faafeagai e ao ona tatou faatoilaloina.

O le fuafuaga a lo tatou Tama Faalelagi ua saunia ai isi fesoasoani e taiala ai i tatou ia tatou faigamalaga i le olaga nei. O le a ou tautala e uiga i le fa o nei mea. Faamolemole aua tatou te faapea mai ia ou talanoaina na o le fa, ona e fesopoa’i fesoasoani nei. E le gata i lea, e i ai isi puipuiga alofamutimutivale e faaopoopo i ai.

Muamua, ou te talanoa atu e uiga i le Malamalama po o le Agaga o Keriso. I lana aoaoga maoae i le Tusi a Moronae, o loo sii mai ai e Moronae aoaoga a lona tamā e faapea, “ua tuuina mai i tagata taitoatasi, ina ia mafai na iloa e ia le lelei mai le leaga” (Moronae 7:16). Ua tatou faitau i lenei aoaoga e tasi i faaaliga i ona po nei:

“Ma o le Agaga na te tuuina mai le malamalama i tagata taitoatasi e sau i le lalolagi; ma o le Agaga e faamalamalamaina tagata taitoatasi i le lalolagi atoa, o e e faalogo i le siufofoga o le Agaga” (Mataupu Faavae ma Feagaiga 84:46).

E toe fai atu: “Aua ua auina atu loʼu Agaga i le lalolagi e faamalamalama e ua lotomaualalo ma loto salamo, ma mo le taʼusalaina o e ua lē amioatua” (Mataupu Faavae ma Feagaiga 136:33).

Na faamalamalama mai e Peresitene Iosefa Filitia Samita nei mau: “E lei tuulafoa’ia tagata e le Alii (ina ua fananau mai i latou i lenei lalolagi), e tauāutago e sue le malamalama ma le upumoni, ae o tagata taitoatasi … ua fananau mai ma le aiatatau e maua ai le taitaiga, le faatonuga, le fautuaga a le Agaga o Keriso po o le Malamalama o le Upumoni.”

O le lona lua o lagolago maoae ua saunia e le Alii e fesoasoani ia i tatou e filifilia le mea e tonu o se fuifui o faatonuga faalelagi i tusitusiga paia o se vaega o le ata o le faaolataga (le fuafuaga o le fiafia). O nei faatonuga o poloaiga, sauniga, ma feagaiga.

O poloaiga ua faauigaina ai le ala ua faailogaina e lo tatou Tama Faalelagi mo i tatou ina ia agai atu ai i le ola e faavavau. O tagata o e mafaufau faapea o poloaiga o le auala lea e filifili ai e le Atua po o ai e faasala, ua latou le malamalama i lenei faamoemoega o le fuafuaga alofa o le fiafia a le Atua. I luga o lena ala, e mafai ai ona tatou ausia ma le faifaimalie le sootaga moomia ma lo tatou Faaola ma agavaa ai mo se faatelega o Lona mana e fesoasoani ai ia te i tatou a o agai atu i le taunuuga ua finagalo ai o Ia mo i tatou uma. E finagalo lo tatou Tama Faalelagi i Ana fanau uma ia toefoi atu i le malo selesitila, i le mea o afifio ai le Atua ma lo tatou Faaola, ma ia maua ai le ituaiga olaga o i latou o nonofo ai i lena mamalu selesitila.

O sauniga ma feagaiga o ni vaega o le tulafono o loo faavae ai tulaga manaomia o le ala i le ola e faavavau. O sauniga, ma feagaiga paia tatou te osia ma le Atua, o laasaga moomia ia ma puipui e tatau ai i luga o le ala. Ou te fia mafaufau e uiga i le matafaioi a feagaiga e pei ona faapupula mai e tusa ma le fuafuaga a le Atua, o Ana faamanuiaga aupito maualuluga ua tuuina mai ia te i latou o e muai folafola atu e tausia poloaiga patino, ma i latou e tausia na folafolaga.

O isi fesoasoaniga ua tuuina mai e le Atua mo le faia o filifiliga tonu, o faaaliga a le Agaga Paia. O le Agaga Paia o le sui lona tolu o le Aiga Atua. O Lana galuega, o loo faamatala mai i le mau, o le molimau mai i le Tama ma le Alo, e aoao i tatou, ia tatou manatua ai mea uma lava, ma taitai atu ai i tatou i upumoni uma. O loo aofia i tusitusiga paia le tele o faamatalaga i faaaliga mai o le Agaga Paia, e pei o se molimau faaleagaga e avea o se tali i se fesili e uiga i le moni o le Tusi a Mamona. Aua nei faaluafesasiina se faaaliga ma le meaalofa o le Agaga Paia, lea e faaee atu pe a mae’a le papatisoga.

O se tasi o fesoasoaniga maoae a le Atua mo Ana fanau faamaoni, o le meaalofa o le Agaga Paia. O le taua o lenei meaalofa e iloagofie i le mea moni, e faaee atu aloaia pe a uma ona salamo ma papatisoina i le vai, “ona [e pei ona faamalamalama mai e tusitusiga paia] oo mai ai lea o se faamagaloga o a outou agasala i le afi ma i le Agaga Paia” (2 Nifae 31:17). O tagata ua maua lea faamagaloga o agasala—ona faafouina lea e le aunoa lo latou faamamaaga e ala i le salamo i aso taitasi, ma le ola e tusa ai ma feagaiga na latou osia i le sauniga o le faamanatuga—e agavaa mo le folafolaga e faapea o le Agaga Paia, le Agaga o le Alii, “ia i ai pea … faatasi ma i latou” (Mataupu Faavae ma Feagaiga 20:77).

O lea la, sa aoao mai Peresitene Iosefa F. Samita o le Agaga Paia o le a “faamalamalamaina mafaufau o tagata e tusa ai ma mea a le Atua, e faatalitonu i latou i le taimi o lo latou liua ina ua latou faia le finagalo o le Tama, ma ia i ai ia i latou se molimau mausali e fai ma soa i le olaga atoa, e avea ma taiala mautu ma le saogalemu i mea moni uma, ma faatutumuina i latou i lea aso ma lea aso i le olioli ma le fiafia, ma se manao e agalelei i tagata uma, ia lafoai mea sese nai lo le faia o mea sese, ia agalelei ma alofamutimutivale, ia talitiga ma agaalofa. O i latou uma ua i ai lenei meaalofa lēmafuatiaina, lenei penina tau tele, e i ai se galala faifaipea i le amiotonu. A aunoa ma le fesoasoani a le Agaga Paia,” na faaiu mai ai e Peresitene Samita, “e leai se tagata soifua e mafai ona savali i le ala sa’o ma le vaapiapi.”

Faatasi ai ma le anoanoai o fesoasoaniga mamana e taiala ai i tatou i a tatou faigamalaga i le olaga nei, o se mea e le fiafia ai ona o le toatele naua o loo nofoa’i ma le lē saunia mo la latou feiloaiga faatulagaina ma lo tatou Faaola ma le Togiola, o Iesu Keriso. O Lana faataoto i taupou e toasefulu, ua talanoaina soo i lenei konafesi, ua fautuaina mai ai faapea o i latou na valaaulia e faafetaiai ia te Ia, e na o le ‘afa o le a saunia.

Ua tatou iloa uma lava faataitaiga o e le saunia: o faifeautalai ua mae’a mai misiona o ē faasalaveia lo latou tuputupu a’e faaleagaga i vaitau o le lē toaaga mai, o talavou ua faatuatuai lo latou tuputupu a’e faaleagaga i lo latou o ese mai aoaoga ma gaoioiga a le Ekalesia, o alii ua tolopo lo latou faauuga i le Perisitua Mekisateko, o alii ma tamaitai—o nisi taimi o fanau a paionia tamaalii po o matua agavaa—ua o ese mai le ala o feagaiga ua le osia ma tausia feagaiga i le malumalu paia.

O le tele o nei faaletonu e tutupu pe a le mulimulita’ia e tagata o le ekalesia le fuafuaga faavae faaleagaga o le tausisia o tatalo faaletagata lava ia, suesue e le aunoa o tusitusiga paia, ma le salamo soo. O se faatusatusaga, o nisi ua ‘alofia le faafouina i vaiaso taitasi o feagaiga e ala i le le taumamafa i le faamanatuga. Fai mai nisi e lē o faamalieina e le Ekalesia o latou manaoga; ua latou suia mea ua latou manatu o o latou manaoga ia o le lumanai oi luma, i mea ua tuuina mai e le Alii i Ana mau aoaoga ma avanoa mo la tatou auaunaga e tatau ai i isi.

O le lotomaualalo ma le faalagolago i le Alii o vaifofo ia mo na faaletonu. E pei ona aoao mai le Tusi a Mamona, e “faamanuia ma faatamaoaiga e le Alii i latou o e e tuu atu lo latou faalagolago ia te ia” (Helamana 12:1). O le faalagolago i le Alii o se manaoga faapitoa mo i latou uma o ē fuatia seseina poloaiga a le Atua ma aoaoga a Ana perofeta e faasaga i mea aupito lata mai e maua i suesuega ma le poto o le tagata.

Ua ou talanoa atu e uiga i le tele o fesoasoani faaletino ua tuuina mai e lo tatou Tama oi le Lagi alofa e fesoasoani ai i Ana fanau ia toe foi atu ia te Ia. O la tatou vaega i lenei fuafuaga faalelagi o le faalagolago i le Atua ma saili e faaaoga nei fesoasoani faalelagi, ae aupito sili ai lava le Togiola a Lona Alo Pele, o lo tatou Faaola ma le Togiola o Iesu Keriso. Ou te tatalo o le a tatou aoao atu ma ola ai i nei mataupu faavae, i le suafa o Iesu Keriso, amene.