Elder Brik V. Eyre

Na ta’ua e Elder Brik V. Eyre lona aafiaga i le auauna atu mo le tolu tausaga o se peresitene o le Misiona a Arizona Phoenix “e le talitonuina.”

E uiga i le auauna atu faatasi ma lona faletua o Susana, sa ia saunoa ai, “E te lua amo gatasi ma lau soa, … ma o lea na ma galulue soosoo tau’au ai.” Ma e uiga i le auauna atu faatasi ma le faitau selau o faifeautalai faamisiona, sa ia faaopoopo mai ai, “Ou te le iloa pe mafai ona ou faamatalaina le faamanuiaga maoae o le faaaluina o aso uma ma sui faatagaina o Iesu Keriso mo le tolu tausaga.”

Sa soifua mai Brik Vern Eyre i le aso 17 o Ianuari, 1964, i Logan, Iuta, ia Vern Bingham Eyre ma Emma Rae Anderson Eyre. E toalima ona tuafafine matutua ma nisi o tuaa i uluai tagata o le Ekalesia.

Sa auauna atu Elder Eyre i le Misiona a Kuatemalala Aai o Kuatemala. Sa faaipoipo atu o ia ia Susan Zari Rahimzadeh i le Malumalu o Logan Iuta i le aso 27 o Iuni, 1987. O le tamā o Sister Eyre e tupuga mai Musalemi, ae o lona tina e tupuga mai le Au Paia o Aso e Gata Ai. O le aiga o Eyre, o e sa nonofo i Park City, Iuta, i le taimi o lona valaauga, e toalima le fanau matutua.

O Elder Eyre e i ai sona faailoga o le tagata malaga i le suetusi mai le Iunivesite o Polika Iaga ma se faailoga o le matuaofaiva i pulega o mea tau pisinisi mai le Iunivesite o Tulsa. Sa galue o ia i le alamanuia o oloa faafomai, e aofia ai mo Baxter International o le sui peresitene sinia ma le peresitene o le itulagi o Amerika a le kamupani, ma talu ai nei o se sui o le komiti faafoe a le HemaSource.

I le taimi o lona valaauga, sa avea Elder Eyre o se Fitugafulu Eria. Sa avea foi o ia ma se peresitene o le siteki, fesoasoani i le au peresitene o le siteki, fautua maualuga, epikopo, peresitene o Alii Talavou a le uarota, ma se faiaoga seminare i le vaveao.