Elder Michael Cziesla

E manatua lelei e Elder Michael Cziesla tauiviga o le 2017. I se Aso Lua o Ianuari, na faamuta ai lana galuega i se ofisa loia faavaomalo ina ua tautino mai e le kamupani ua gau. O le aso na sosoo ai na lolovaia ai lona fale ina ua pa se laina vai. Na osofaia e le au gaoi lona fale i le aso lona tolu ma taumafai e ave mea taua a le aiga. Ina ua mavae ni nai aso, na ogaoga suiga o lona olaga.

“Sa ou ataata i lena Aso Sa e pei ona masani ai a o ou saofai i luga o le tulaga o se peresitene o le siteki,” o lana tala lea. “E leai se tasi na iloa le mea o loo tupu. Ae i totonu sa ou matua faanoanoa lava. Sa ou i ai i se nofoaga pogisa tele.”

Ina ua mae’a le sauniga, sa fesili ane ai se alii filemu ma agamalu o le uarota ia te ia po o le a le mea ua tupu. “Sa na ona ia faalogo, ona ia fusi mai lea o au,” o le tala lea a Elder Cziesla. “Sa ou lagonaina le opoina o a’u e le Alii, sa Ia silafia lo’u tulaga faigata, ma o le a lelei mea uma.”

Na fanau Michael Cziesla ia Armin Ludwig ma Irmtraut Hanna i Neumünster, Siamani, i le aso 26 Iulai, 1972. Sa ola ae o ia i Schleswig-Holstein ma mulimuli ane auauna atu i le Misiona a Iuta Ogden. O lona faletua, o Margret Anne Rauh, sa auauna atu i le Misiona i le Lotoa o le Malumalu. Sa la faaipoipo i le Malumalu o Frankfurt Germany i le aso 4 Aperila, 1997. I le taimi o lona valaauga, sa latou nonofo ma le la fanau e toalima i Griesheim, Siamani, lea sa latou fiafia ai e feofeoa’i solo i le vaomatua ma tafafao i se motu i Tenimaka.

Sa maua e Elder Cziesla se faailoga faaloia mai le Iunivesite o Mainz i le 2000. Na ia fa’amae’aina lana galuega fa’aletulafono o se pa’aga sinia i McDermott Will & Emery.

A o lei valaauina o ia o se Fitugafulu o le Pulega Aoao, sa auauna atu Elder Cziesla o se Fitugafulu Eria i le Eria a Europa Tutotonu, peresitene le tumau o le misiona i le Misiona a Siamani Frankfurt, peresitene o le siteki, fautua maualuga, ma se fesoasoani i le au epikopo.