Faamanuiaga Tauia

O le galue ai i le Au Epikopo Pulefaamalumalu, ua ou maua ai le avanoa e feiloai ai ma le Au Paia o Aso e Gata Ai i le salafa o le lalolagi, i ni nofoaga ma aganuu eseese. O loo musuia pea a’u i lo outou faatuatua mausali ma le tuuto i le Alii o Iesu Keriso. Ae na o’otia foi au i tulaga eseese ma le tele o faigata e feagai ma le toatele o outou—o luitau e pei o ma’i, manaoga faapitoa, utiuti o punaoa, laitiiti o avanoa mo faaipoipoga po o a’oga, sauaina e isi, ma isi papupuni po o to’atuga. E i ai taimi, o nei tofotofoga e foliga e pona’ia ai lou alualu i luma ma lu’itauina ai au taumafaiga faamaoni atoatoa i le talalelei, ma atili ai ona faigata le auauna atu, tapuai, ma faataunuu tiute paia.

A’u uo pele, afai e i ai se taimi e te lagona ai le to’alia pe ua ta’uleaogāina ona o tulaga o lou olaga, ou te manao ia e iloa le mea lenei: E alofa patino le Alii ia te oe. Na te silafia ou tulaga, ma e tumau pea ona matala mai ia te oe le faitotoa i Ana faamanuiaga tusa lava pe o a luitau lua te fetaiai.

Ua ou aoaoina lenei mea moni e ala i aafiaga patino, e ui ina aligaliga le lē taua, ae ua tuua ai se aafiaga tumau mo a’u. I le 22 o o’u tausaga, a o ou tautua i le Fuavaa o le Ea i Farani i Pale, sa ou fiafia ina ua ou faalogo o le a lauga Elder Neal A. Maxwell, o se Aposetolo a le Alii, i se konafesi i le Champs-Élysées. Peitai, a o toeitiiti amata le sauniga, sa ou maua se faatonuga malosi e ave le taavale e alu ai se taitai sinia i le malaevaalele i le taimi tonu na faatulaga le konafesi e fai ai.

Sa o’u le fiafia. Ae o le naunautai e auai, sa ou momoliina le taitai ma faanatinati loa i le konafesi. Ina ua maua se mea e paka ai, sa ou tamoe loa i le Champs-Élysées i le nofoaga na potopoto ai, ma sa ou taunuu ua tau lē manava, ae toe lima minute mae’a le sauniga. I le taimi tonu na ou ulufale ai, sa ou faalogoina ai Elder Maxwell o fai mai, “O le a ou tuuina atu nei se faamanuiaga faaaposetolo.” I lena lava taimi, sa ou maua se aafiaga faaleagaga matagofie ma lēmafaagaloina. Sa lofituina a’u e le Agaga ma o upu o le faamanuiaga na foliga mai na tuia ai mui’a’a uma o lo’u agaga, e faapei sa na o a’u lava na faatatau i ai.

O le mea sa ou aafia ai i lena aso o se faaaliga itiiti ae mamana o se vaega faamafanafana o le fuafuaga a le Atua mo Lana fanau: A oo ina taofia i tatou mai le faataunuuina o manaoga amiotonu o o tatou loto e tulaga e le mafai ona tatou pulea, o le a tauia e le Alii i ni auala e mafai ai ona tatou maua Ana faamanuiaga folafolaina.

O lea upumoni faamautinoa e faavae i mataupu faavae autu e tolu o loo maua i le talalelei toefuataiina a Iesu Keriso:

1. E atoatoa le alofa o le Atua ia i tatou taitoatasi. “Ua Ia valaaulia i [tatou] uma ia o mai ia te ia ma taumamafa i lona agalelei.” O Lana fuafuaga o le togiola ua faamautinoa ai o tagata uma, e aunoa ma se tuusaunoaga, o le a tuu atu i ai se avanoa faamaoni e maua ai i se aso faamanuiaga o le faaolataga ma le faaeaga.

2. Ona o le Atua e faamaoni ma alofamutimutivale ma o Lana fuafuaga e atoatoa, o le a Ia lē tu’ua’ia i tatou i mea e le oo i ai la tatou pule. Na faamatala mai e Elder Neal A. Maxwell e faapea “O le Atua … e faitaulia ma le alofamutimutivale e le gata i o tatou faanaunauga ma a tatou faatinoga, ae faapea foi faigata e foliga eseese ia e faaee mai e o tatou tulaga ia i tatou.”

3. E ala mai iā Iesu Keriso ma Lana Togiola, e mafai ai ona tatou maua le malosiaga e onosa’ia ai ma i’u ai ina faatoilalo luitau uma o le olaga. E pei ona sa aoao mai Alema, na tauaveina e le Faaola i Ona lava luga e le gata i agasala a lē ua salamo ae faapea foi “tiga ma ma’i o ona tagata” ma “o latou vaivaiga.” O lea, i talaatu o le togiolaina o i tatou mai a tatou measesē, e lagolagoina i tatou i le alofamutimutivale ma le alofatunoa o le Alii i faamasinoga lē tonu, ni lē atoatoa, ma tapulaa o loo alia’e mai i o tatou aafiaga faaleolaga nei.

O le mauaina o nei faamanuiaga tauia e o mai faatasi ma tuutuuga patino. Ua poloaiina i tatou e le Alii e faia “mea uma e mafai ona faia” ma ia “ofo atu [o tatou] agaga atoa e fai ma taulaga ia te ia.” O lenei mea e moomia ai se manao loloto, se loto naunautai ma le faamaoni, ma lo tatou filiga a’ia’i i le tausiga o Ana poloaiga ma le faaogatusaina o o tatou loto ma Lona finagalo.

A oo ina le mafai e a tatou taumafaiga vilivilita’i ona faataunuu uma o tatou faanaunauga ona o tulaga e le mafai ona tatou pulea, e talia lava e le Alii manaoga o o tatou loto o se taulaga agavaa. Na aoao mai Peresitene Dallin H. Oaks, “O le a faamanuiaina i tatou mo manaoga amiotonu o o tatou loto, e ui lava ina i ai ni tulaga i tua atu na le mafai ai ona tatou faataunuuina le faatinoga o na manaoga.”

A o popole le Perofeta o Iosefa Samita e uiga i lona uso o Alavine, o lē na maliu e aunoa ma le mauaina o sauniga e tatau ai o le talalelei, sa ia maua le faaaliga faamafanafana lenei: “O i latou uma o e e maliliu mai le taimi nei ma le agai i luma e aunoa ma se malamalama e uiga i le talalelei, o e semanu latou te taliaina ma o latou loto atoa, o le a avea ma suli o le [malo selesitila o le Atua].” Ona faaopoopo mai lea o le Alii, “Aua o A’u o le Alii, o le a faamasinoina tagata uma e tusa ma a latou galuega, e tusa ma le manaoga o o latou loto.”

O le mea e taua i le Alii e le na o le, pe tatou te mafaia ae pe tatou te loto e fai mea uma tatou te mafaia e mulimuli ai ia te Ia o lo tatou Faaola.

Sa faamafanafana e se uo se faifeautalai talavou na faavauvau ona o le vave faamalolo o ia ona o mafuaaga tau i le soifua maloloina, e ui i ana tatalo faamaoni ma le faanaunauga vilivilita’i e galue. Sa faasoa atu e lenei uo se mau lea sa tautino mai ai e le Alii e faapea pe a oo ina “o atu [Lana fanau] ma lo latou malosi atoa” ma “lē tuua lo latou filiga” e faataunuu Ana poloaiga, “ma o mai o latou fili [ia e ono aofia ai tulaga feteenai i o tatou olaga] ma taofi i latou mai le faia o lena galuega, faauta, ona tatau ai lea ia te aʼu ona lē toe manaomia lena galuega mai i lima o na [tagata], ae ia talia a latou taulaga.”

Na tautino atu e la’u uo i lenei alii talavou e faapea, sa silafia e le Atua na ia tuuina atu le mea sili i le tali atu i le valaauga e auauna atu. Sa ia faamautinoa atu ia te ia na taliaina e le Alii lana taulaga ma o le a le taofia lava faamanuiaga na folafola mai i faifeautalai faamaoni uma.

O faamanuiaga tauia a le Alii e tele ina oo mai e ala i le agalelei ma le auaunaga a isi, o ē fesoasoani ia i tatou ia ausia mea e le mafai ona faia e i tatou lava. Ou te manatua se taimi, ona o le nonofo mamao mai se tasi o le ma fanau teine i Farani, sa ma lagonaina ai le lē mafai ona fesoasoani ia te ia ina ua mavae le fanauina ma le faigata tele o se pepe. O le vaiaso lava lena sa sailia ai e le matou uarota i Iuta se fesoasoani mo se tina faatoa fanauina se masaga. Sa ofofua atu e lo’u toalua o Valérie, e avatu se taumafataga mo ia, faatasi ai ma se tatalo i lona loto mo lenei tina fou ma lo ma afafine o loo manaomia le fesoasoani. E le’i leva, ae o ma iloaina na faatulaga e tuafafine i le uarota a lo ma afafine i Farani, e saunia ni taumafataga mo lona aiga. Ia i ma’ua, na tali mai e le Atua a ma’ua tatalo, ma auina atu Ana agelu e avatu le faamafanafanaga i le taimi sa ma le mafaia ai.

Pe a tatou feagai ma tapulaa ma luitau, tau ina tatou iloaina o tatou lava faamanuiaga—a tatou meaalofa, punaoa, ma taimi—ma faaaoga e auauna atu ai ia i latou e moomia le fesoasoani. O le faia o lena mea, o le a le gata ina tatou faamanuiaina ai isi ae valaaulia ai foi le faamalologa ma taui i o tatou lava olaga.

O se tasi o ala sili ona mamana e mafai ona tatou saofagā ai i faamanuiaga tauia a le Atua, e ala lea i galuega sui tatou te faia mo o tatou augatuaa i le maota o le Alii. A o tatou faatinoina sauniga mo i latou, ua tatou auai tino i le galuega tele o le faaolataga a le Alii, e faaaoga ai a tatou meaalofa ma tomai e tuuina atu ai faamanuiaga ia i latou o ē le’i mauaina le avanoa e maua ai i le taimi o o latou olaga faitino.

O le auaunaga alofa tatou te ofoina atu i malumalu paia, e faamanatu mai ai ia i tatou o le alofa tunoa o le Faaola e o’o i talaatu o lenei olaga. I le olaga a sau, tatou te ono maua ni avanoa fou e faataunuu ai mea sa le mafai ona tatou faia i lenei olaga faitino. I se saunoaga i tuafafine e le’i maua lava se soa faavavau, na saunoa atu ai ma le alofa ia Peresitene Lorenzo Snow: “E leai se tagata o le Au Paia o Aso e Gata Ai, o lē maliu i le mae’a ai ona soifua i se olaga faamaoni, o le a i ai se mea na te lē mauaina ona o le lē mafaia ona fai o nisi mea patino, ina ua lē mauaina avanoa mo ia. … O le a latou maua faamanuiaga uma, faaeaga ma le mamalu o le a maua e soo se alii po o se tamaitai na mauaina lenei avanoa.”

O lenei savali o le faamoemoe ma le faamafanafanaga e mo i tatou uma, o fanau a le Atua. E leai se tasi o i tatou e saoloto mai luitau ma papupuni o le olaga nei. O le mea moni, ua tatou fananau uma mai ma se lēmagafatia e faasaoina ai i tatou lava. Peitai ua i ai so tatou Faaola alofa, ma “ua matou iloa e faaolaina i tatou i [Lona] alofa tunoa, pe a uma mea uma e mafai ona tatou faia.”

Ou te molimau atu e ui atonu e tele tulaga o le olaga e le mafai ona tatou puleaina, ae leai se tasi o i tatou e lē oo i ai faamanuiaga e lē gata a le Alii. E ala i Lana taulaga togiola, o le a tauia ai e le Faaola mea uma tatou te lēgafatia ma faamasinoga lē tonu pe afai tatou te ofoina atu o tatou agaga atoa ia te Ia. I le suafa o Iesu Keriso, amene.