E Pei o se Tamaitiiti

Na amatalia e Iesu le tausaga mulimuli o Lona soifuaga faaletino i le faalolotoina lea o le aoaoina o Ana Aposetolo. Afai e tatau i Lana savali ma Lana Ekalesia ona faaauauina ia te Ia, ua tatau la ona tele mea e faaofi atu i loto o ni alii faatauvaa tele e toa 12, e lei atoa lelei se 24 masina talu ona faatoa latou iloa o Ia.

I se tasi aso na molimauina ai e Iesu se finauga i ni si o i latou ma sa fesili ai mulimuli ane, “Pe se a na outou fefinauai ai i le ala?” O le mea moni na latou maasiasi, “sa latou faalologo,” o le tala lea a le faamaumauga. A e na silafia e lenei aoao silisili o aoao uma manatu o o latou loto ma lagona ai iina le uluai faailo o le faamaualuga patino. O lea na “valaau atu ai [o Ia] i le tamai itiiti, …

“Ua faapea atu, E moni, ou te fai atu ia te outou, a le liua outou, ma avea ia pei o tama iti, tou te le sao lava i le malo o le lagi.

“O lenei o sē faamaulalo o ia ia te ia e pei o le tama itiiti nei, e sili lea i le malo o le lagi.”

E tatau ona manatua a o lumanai ai le fanau mai o Keriso, o le lauga faamavae a le Tupu o Peniamina na aofia ai lenei faamatalaga iloga i le lotomaualalo o se tamaitiiti. Fai mai, “O le tagata natura o se fili i le Atua, … ma o le a faapea lava e faavavau faavavau lava, vagana ai ua … avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, … lotomaualalo, … ma tumu i le alofa, … e pei ona usitai atu o se tamaitiiti i lona tama.”

Ia, e manino lava le i ai o ni uiga faatamaiti faafuasei e lilifa i ai tatou te le fautuaina. Luasefulu-lima tausaga talu ai, na ū ai e le atalii e tolu tausaga o lo’u afafine le lima o lona tuafafine, le tama teine e lima tausaga a lo’u afafine. O lo’u atalii faaletulafono, sa vaaia tamaiti i lena po, na mateletele e aoao lona afafine i lesona uma na mafai ona ia mafaufau i ai e uiga i le faamagalo atu, ma faaiu faapea atonu sa le’i iloa a e le tuagane laitiiti pe faape’ῑ le lagona o se ū o le lima. O lena taumafaiga faaletamā e le’i fuafuaina lelei, na matagofie ma lelei pe a ma se minute, masalo e minute ma le afa, a e lagonaina loa le faataio na gatete ai le faamalama mai le potumoe o tamaiti, lea na valaau toafimalie mai ai le tama teine a lo’u afafine, “Lea ua ia iloa nei.”

O le a se mea e tatau ona tatou malamalama ai mai mea lelei o olaga o tamaiti? O le a le mea na mafua ai ona tagi Iesu lava ia i le vaaiga sili na faaootia loto i le tusi atoa o le Tusi a Mamona? O le a le mea na aoao atu e Iesu ina ua Ia auina ifo le afi faalelagi ma agelu puipui e siomiaina na fanau, ma poloaiina tagata matutua e “faauta i [o latou] tamaiti”?

Tatou te le iloa pe o le a le mea na uunaia ai na mea uma, ae ou te manatu e i ai se sootaga ma lo latou mamā a’ia’i ma le lotomamā, lo latou lotomaualalo e fananau mai ma i latou, ma le mea e mafai ona aumaia i o tatou olaga pe afai tatou te faatumauina.

Aisea ua faaigoa ai e se perofeta e toatasi ia aso tatou te faanoanoa ai o se “faatauvaa o mea faatauvaa”? E faapefea e “mafaufauga lē aoga ma le faamaualuluga o le fanauga a tagata” ua avea ma upu e faauiga i ai le fale tele ma le laolao, o le matuai oti faaleagaga lava i le miti a Liae? Ma le au sa Sorama, o le vaega lena o e na tatalo i ala faamaualuluga mo i latou lava? Lea na faapea mai ai Alema e faatatau ia i latou, “Le Atua e, ua latou tagi atu ia te oe i o latou gutu, a ua latou fefete aʼe … i mea le aoga o le lalolagi.”

I se faatusatusaga, pe i ai ea se mea ua sili atu ona matagofie, sili atu ona mamā, pe sili atu ona lotomaualalo nai lo se tatalo a se tamaitiiti? E faapei ua i ai le lagi i totonu o le potu. E matua’i mao’i lava le Atua ma Iesu Keriso, ae mo isi e mafai ona sili atu ona papa’u le aafiaga.

E pei ona ta’ua e Elder Richard L. Evans le 60 tausaga ua mavae: “O le toatele o i tatou ua fai mai e Kerisiano, ae tatou te … Lē manatu mamafa ia te Ia. … Tatou te faaaloalo ia te Ia, ae tatou te le mulimuli ia te Ia. … Tatou te sii mai Ana fetalaiga, ae tatou te lē ola ai.” “Tatou te faamemelo ia te Ia, ae tatou te lē tapuai ia te Ia.”

Maeu se eseesega e mafai ona i ai le lalolagi pe a maualuga le manatu o le lalolagi ia Iesu nai lo le ta’uvaleina o lona suafa i gagana masoā mai lea taimi i lea taimi.

Ae e alolofa moni lava tamaiti ia te Ia, ma e mafai ona tauave lena alofa i isi o a latou sootaga i malaetaalo o le olaga. I le avea ai ma se tulafono, e oo a i tausaga mu’amu’a o o latou olaga, e faigofie lava ona alolofa tamaiti, e vave ona loto faamagalo, ma matua’i taliē fiafia, e mafai ona faaliusuavai ai se loto sili ona malō, ma faigata.

Ia, e alu pea lava pea le lisi. Mama a’ia’i? Faatuatuaina? Lototele? Amio Sa’o ma Mamalu?

O mai tatou o e vaavaai i le lotomaualalo i luma o le Atua, na faaalia e se tasi o a’u uo talavou, e pele lava ia te au.

I le aso 5 o Ianuari, 2025—ua 91 aso talu ai—na tuuina atu ai le Perisitua Arona ia Easton Darrin Jolley ma sa faauuina o se tiakono i Le Ekalesia a Iesu Keriso o le Au Paia o Aso e Gata Ai.

Sa i ai ia Easton se aafiaga o se naunautaiga malosi ia ona tufaina atu le faamanatuga o le Talisuaga a le Alii. A e o lenei avanoa paia sa vaavaalua mai ma se popole faatigā manava e faapea o le a ia toilalo, o le a pa’ū o ia, o le a ulagia o ia pe faamāina o ia lava ma lona aiga.

Tou te iloa, o Easton e i ai se ma’i ogaoga lava, e sosolo i le toto o le faaletonu i maso o le tino. Ua faatupulaia ai ona faatumulia lona olaga a o laitiiti i luitau tuga a o nutililii ai ona faamoemoega ma miti mo le lumanai. E le o toe mamao ona tumau lea ona i ai i se nofoa faataavalevale. E le talanoa lona aiga i le mea o loo faatali mai mo ia pe a maea lena.

O le Aso Sa ina ua uma lona faauuga, o le a tufaina ai e Easton le faamanatuga mo le taimi muamua. Ma o lana uunaiga sa taofia ia te ia lava, ia mafai ona ia tuuina atu ia lava ma nei faatusa paia i lona tamā, o le epikopo o le uarota. I le naunau atu i lena galuega, sa ia augani ma aioi atu, tagi ma faatauanau, ia maua se faamautinoaga o le a leai se tasi, leai se tasi, o le a taumafai e fesoasoani ia te ia. Mo le tele o mafuaaga, e ma’oti ia te ia lava, na ia manaomia ai ona faia lenei mea na’o ia e aunoa ma se fesoasoani.

I le maea ai ona tofitofi le areto ma faamanuia e le ositaulaga—o se faatusa e sui ai le tino na tuimomomo o Keriso—na tulai atu ai Easton, o lona tino e lē atoatoa, ma setusetu atu i luga e aumai lana fata. Peita’i, sa i ai sitepu e feoloolo le maualuga mai le fola o le falelotu agai i le pulela’a maualuga. O lea, ina ua maua lana fata, sa ia aapa maualuga i le mafai na te mafaia ma tuu ai i luga a’e o le puipui e pipii ai. Ona, nofo lea i lalo i luga o le tasi o sitepu maualuga, faatasi ai ma ona lima e lua, ua toso atu lona vae taumatau i luga o le sitepu muamua. Ona ia toso atu lea o lona vae agavale i luga i le sitepu lava e tasi, ma faaauau ai faapena se’ia, i le malosi atoa, ua ia faatoilaloina se tasi o luitau faigata i lona i ai lea i le tumutumu o lana tolu-sitepu o Mauga Everesi.

Ona ia gaoioi atu lea i se pou tu o le fale lea e mafai ona ia a’e ane ai ina ia tu ai i luga. Na ia toe liliu atu i le mea o loo i ai le fata. I ni nai sitepu ona ia tu ai lea i luma o le epikopo, o lona tamā, o lē, faatasi ma fofoga ua faatumulia i loimata ua tafe ifo i ona foliga, na ia taofiofia ia lava mai le fusi atu i lona atalii lototele atoatoa ma le faatuatua. Ma o Easton, faatasi ma le faafetai ma se ataata tele ua lilofia ai ona foliga, atonu e ono faapea mai ai, “Ua ou tuu atu le viiga [i lo’u tamā ma] faaumaina le galuega na [ia tuuina mai] ia te a’u, ou te faia.”

Faatuatua, faamaoni, mama a’ia’i, faatuatuaina, mamalu, ma le, i le faaiuga, alofa mo lena tamā na ia naunau ina ia faamalieina. O nei uiga ma le tele o isi e mafai ona aumaia tatou ia faapea foi ona fai atu, “O sē faamaulalo o ia ia te ia e pei o le tama itiiti nei, e sili lea i le malo o le lagi.”

Uso e ma tuafafine ma uo, i le tumutumu o le lisi o ata aupito sili ona matagofie, ua ou iloa o pepe ma tamaiti ma talavou sili ona galulue malosi ma taua e pei o i latou ia na tatou faasino atu i ai i lenei aso. Ou te molimau atu o i latou na o ata vaaia o le malo o le Atua i le lalolagi i lona malosi atoa ma le matagofie.

I lena lava agaga o le molimau, ou te tuu atu ai la’u molimau e faapea i lona talavou, na vaai Iosefa Samita i le mea na ia fai mai na ia vaaia ma sa talanoa ma i latou o e na ia faapea mai na ia talanoa i ai. Ou te molimau atu o Russell M. Nelson lotomaualalo ma le mama a’ia’i, o le perofeta faauuina ma faamanuiaina ma le tagatavaai a le Atua. Mai le faitauina pea lava pea i lo’u olaga atoa, ou te molimau atu ai o le Tusi a Mamona o le tusi sili ona tauia ua ou faitauina ma o le maa’au’au o si o’u pa’usisi i se malo o le mau maota. Ou te molimau atu o le perisitua ma le tatalo ua toefuatai mai ai lo’u ola—le perisitua a Keriso ma a outou tatalo. Ou te iloa e moni nei mea uma ma ou te molimau atu ai i le suafa aupito sili ona faamaoni ma lotomaualalo o atalii uma o le Atua—Olefa ma le Omeka, O A’u o Le Sili, o le na faasatauroina, o le molimau faamaoni—o le Alii o Iesu Keriso lea, amene.