I Luma Tonu o o Tatou Mata

Uso e ma tuafafine, ou te matuai faafetai lava i lo tatou faatasi ai. Matou te alolofa ia te outou; matou te faafetai mo outou, ma matou te lagona le faamanuiaina i a outou tatalo.

Na saunoa Peresitene Russell M. Nelson i le tatou konafesi na sei mavae atu: “Pe o tatou vaai ea i mea o loo tutupu tonu i o tatou luma? Ou te tatalo ina ia tatou lē misia le mamalu o lenei taimi! O loo faanatinati moni e le Alii Lana galuega.”

Faanatinati Lana galuega. O le “faanatinati” o se upu e afaina. E fautuaina ai le minoi vave, saoasaoa, ma faapea foi le topetope. I le tuputupu a’e o le Ekalesia ma le fuafuaga a Keriso, ua faapea ona tupu ai le faanatinati. Ma o i tatou uma o se vaega o lea mea.

Ia Aperila 1834, i Katelani, Ohaio, sa faapotopoto ai e le Perofeta o Iosefa Samita i latou uma na umia le perisitua i se tama’i faleaoga, pe a ma le 14 futu (4.3 m) faatafafa. E mafai ona ofi na faleaoga se tele i totonu o le nofoaga autu mo konafesi, ae i ai lava isi avanoa. Na saunoa ai Iosefa Samita, “Ua na o ni nai Perisitua o loo outou vaai atu i ai iinei i lenei po, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi.”

Ua faataunuuina lena valoaga “i luma tonu o o tatou mata.” Ua tuputupu a’e Le Ekalesia a Iesu Keriso o le Au Paia o Aso e Gata Ai i ona tagata auai ma aiga, misiona ma faifeautalai, falelotu, ma malumalu, ma i le lesitala i a tatou seminare, inisitituti, ma iunivesite i le salafa atoa o le lalolagi.

Tatou te faafetai i lo tatou i ai i le lalolagi i se taimi ua faateleina ai le Ekalesia i fuainumera ma faatosinaga, ae o le mea aupito taua, i loto ma olaga o ona tagata auai. Ua ta’ua i tatou o soo o Iesu Keriso. Tatou te faasoa atu a tatou molimau e uiga ia te Ia, Lana Ekalesia, Ona ala, ma Lana ala o le feagaiga. O i tatou o Lona nuu, ma o Ia o lo tatou Faaola.

Ou te maofa i le mea ua ta’ua e Peresitene Nelson o le “mamalu o lenei taimi” ma faailoa atu le agaga faafetai loloto i le Alii mo Lana galuega. Ou te faamalosiau atu ia i tatou ia tutu maualuga o ni Ona soo, molimau vaaitino i le faataunuuga o le valoaga i aso anamua ma aso nei.

E i ai le au faitio o e o loo alalaga mai, “Faauta o iinei!’ ma ‘Faauta o iina!’” e pei lava ona sa latou faia i taimi o le Perofeta o Iosefa Samita. E ui i lea, o i latou ma o le a avea na o ni vaefaamatalaga i lenei galuega mamalu. Manatua upu a Iosefa Samita: “E leai se lima palapala e mafai ona taofia le galuega mai le agai atu i luma; e mafai ona matamataita sauaga, … ae o le a agai pea i luma ma le le fefe le upumoni a le Atua, e viia, ma tutoatasi, seia oo atu i konetineta uma, ma asia itulagi uma, faatumulia ai atunuu uma, ma lagona e taliga uma, seia oo ina faataunuuina faamoemoega o le Atua, ma fetalai mai ai le Ieova Silisili ua mae’a le galuega.”

I o’u tofiga i lenei tausaga, ua ou molimauina ai le “faanatinatia [e le Alii] o Lana galuega. Ua fausia e le Ekalesia ia malumalu i se televave e le’i i ai muamua, ua tuu atu ai i le toatele o au paia se avanoa e tapuai ai i le maota o le Alii. Lona lua, ua aumaia e le galuega faafeautalai ni fuainumera matāti’a i le lafu a le Leoleo Mamoe Lelei, o Iesu Keriso lea. Ma lona tolu, o aoga a le Ekalesia i le tele o auala eseese o se tulaga maualuga fou i le aoaoina o latou o e “saili i lenei Iesu.”

O le asō, ua i ai i le Ekalesia malumalu e 367 i tulaga eseese o loo mamanuina, fausiaina, pe ua faagaoioia. Ma o le a le faamoemoega? O le tali o loo folafolaina mai i luga o malumalu taitasi: “E Paia i le Alii.” O malumalu ua matala ai le auala i faamanuiaga aupito maualuluga o loo i ai a le Tama oi le Lagi mo i tatou taitoatasi. Uso e ma tuafafine, ua tatou faanatinatia lo tatou paia a o tatou ola agavaa mo le malumalu, a o tatou tapuai i totonu o le maota o le Alii, ma a o tatou osi feagaiga ma le Atua mo i tatou lava ma e fai ma sui o o tatou augatuaa o i le isi itu o le veli.

Na saunoa Peresitene Nelson: “O sauaga a le fili ua matuā faateteleina na’ua le saoasaoa, le malolosi ma le eseese. O le manaomia ona tatou i ai i le malumalu e le aunoa ua matuā sili ona manaomia i le taimi nei. Ou te aioi atu ia te outou ia tagai ma le agaga tatalo pe o faapefea ona faaalu lou taimi.” I totonu o Lona maota, e mafai ona tatou lagona ai le mafutaga paia a le Alii ma le filemu faalelagi.

O le tausaga ua tuanai atu, sa faamanuiaina ai a’u e pulefaamalumalu i le faapaiaga o le Malumalu o Mendoza Atenitina. I la’u savali, sa ou ta’ua ai le valoaga a Elder Melvin J. Ballard i le 1926 e faapea, o le galuega a le Alii o le a tuputupu a’e malie mo se taimi i Amerika i Saute, “e pei lava o le tupu malie ae o se oak mai se akone. O le a e maena ae i se aso e tasi,” ae e faitau afe o le a auai i le Ekalesia ma o le a avea ai atunuu i Amerika i Saute ma “se malosiaga i le Ekalesia.” Ua ou vaaia le faataunuuina o lena valoaga i luma tonu o o’u mata.

O Mendoza, sa o se tamai akone, ua avea nei ma se oak malosi. O lena tuputupu a’e ua tupu faafia i le salafa o konetineta ma motu o le moana.

Ua tatou vaaia le faanatinatiina e le Alii o Lana galuega i misiona. I le 2024, e 80,000 faifeautalai sa auauna atu i misiona e 450. O le tolusefulu ono o na misiona o ni misiona fou. O le tausaga ua tuanai atu, na aumaia ai e le galuega faafaifeautalai le silia ma le 300,000 o tagata fou i totonu o le Ekalesia. E sili atu nai lo o fuainumera, o le agaga o le faapotopotoina ua aumaia ai agaga ia Iesu Keriso ma Lana talalelei.

Ou te mafaufau i Aposetolo o Polika Iaga ma Heber C. Kimball, o e i le 1839 na o atu ai o ni faifeautalai i Motu o Peretania. Sa gasegase i la’ua; sa la tuua o la aiga na mama’i ma pagatia. Ae ui i lea, na tulioso lenei toalua i totonu o se taavale solofanua, ma a o la iloa atu pea i latou na pele ia i la’ua, sa fai atu Heber, “Ta tutu i luga ma faalototele atu ia i latou.” Sa taumafai ma le faigata le toalua e tutu i luga ma alalaga atu, “Hurei, hurei mo Isaraelu.”

Sa ou vaaia lena naunautai e tasi mo le galuega a le Alii i Lima, Peru, ina ua ou feiloai i faifeautalai mai le nofoaga autu e aoao ai faifeautalai ma misiona i Lima. Oka sea vaaiga! Sa ou vaaia le faanatinatiina i luma tonu o o’u mata. Ua fitu nei misiona i le aai o Lima lava ia.

I le faaiuga o le matou feiloaiga, sa faia e faifeautalai se faate’i faapitoa mo a’u. Sa latou tutulai ma alalaga, “Hurei mo Isaraelu.” O le a le galo lava ia te a’u lena taimi; maimau pe ana outou i ai uma iina. I luma tonu o o’u mata sa i ai faifeautalai o e na faataatia ese “mea o lenei lalolagi” ina ia auauna atu i le Alii ma fesoasoani e faanatinati Lona afio mai.

Ua tatou vaaia le faanatinatiina e le Alii o avanoa faaleaoaoga mo o tatou tagata, faapea foi ma tagata e le auai i le tatou faatuatuaga, i le lalolagi atoa. O se tasi o mea e tumatila ai i tatou o se Ekalesia o la tatou faamamafa i aoaoga. Na poloai mai le Alii i aso popofou o le Toefuataiga ina ia “saili i le aoao e faapea foi i le suesue ma le faatuatua.” O loo tupu lena mea i aso nei, ma ua alagatatau ai se “hurei” leotele.

O le taimi nei ua silia i le 800,000 tagata aoga i le lalolagi atoa ua lesitalaina i le seminare ma le inisitituti, o le fuainumera aupito maualuga lea i le talafaasolopito o le Ekalesia. E faapotopoto a tatou talavou i ni auala eseese, mai vasega i le taeao po, i le aoauli, ma le afiafi i luga o le initoneti, ma i suesuega e fai i le fale. O i latou o se autau malolosi ma amiotonu, e maua mai le malosiaga mai le tasi ma le isi a o latou aoao e uiga ia Iesu Keriso, mulimuli, ma molimau atu e uiga ia te Ia o le Alo o le Atua.

O le tautoulu ua mavae atu, sa ou lauga ai i se faigalotu i se nofoaga sa tumu i tagata aoga seminare ma le inisitituti ma o latou matua i le Iunivesite o Iuta. Na tele se mea na ta’u mai e lo latou auai ai e uiga i lo latou mananao e iloa ma mulimuli ia Iesu Keriso. Sa manino lava la’u savali i na tagata aoga: Tuu atu se taimi tutusa i le Alii. Sa ou fautuaina i latou ia faapaleni a latou suesuega ma aoaoga moni, ma maualuga atu, o se suesuega lea e uiga i le “Alo soifua o le Atua.”

O lena lava foi la’u talosaga i tagata uma i le asō: O a lava mea o loo i lau lisi o mea e fai, ia tuu se taimi tutusa, ae le o se taimi avanoa, i le Alii i suesuega faaletagata lava ia o tusitusiga paia, suesuega faaleaiga o le Sau, Mulimuli Mai ia te A’u, tatalo, valaauga o le Ekalesia, aai ma feinu i le faamanatuga, tapuai i le malumalu, ma mafaufau loloto i mea a le Atua. Ua fetalai mai lo tatou Alii ma le Faaola, “Ia outou faaa’oa’o ia te au, … ona maua lea e outou o le malologa mo outou agaga.” Talitonu i Lana fetalaiga. Ma tuu atu se taimi tutusa ia te Ia.

Na saunoa Peresitene Nelson: “Ou te aioi atu ia te outou ia faamuamua le Atua i lou olaga. Avatu ia te Ia se vaega talafeagai o lou taimi. A e faia, ia matau le mea e tupu i lou malosiaga lelei faaleagaga.”

Ua tatou vaaia le tuputupu a’e o lena malosiaga i seminare, inisitituti, ma iunivesite a le Ekalesia. I totonu o nei siosiomaga, e faamuamua lava le Alii. E tatau foi la ona faamuamua o Ia i olaga o i tatou taitoatasi.

O le isi itu ua faaalia ai le tuputupu a’e faateleina o aoaoga a le Ekalesia o le BYU-Pathway Worldwide. I le salafa o le lalolagi, ua toeitiiti oo i le 75,000 le au lesitala ma o loo faaauau pea le televave o le tuputupu a’e. O le toatele lava o tagata o le ekalesia, ma e silia ma le tasi vae tolu o loo i Aferika. O le Pathway, e faatatau uma lava i le mauaina o aoaoga. O le faamae’aina o le kosi o lona uiga o le maua o se galuega, ma o le maua o se galuega o lona uiga o se olaga lelei atu mo aiga ma avanoa e tele atu e auauna ai i le Alii.

A o matou feiloai ma taitai o siteki i Uganda, sa ou iloa ai na lesitala le au peresitene uma o le siteki i le BYU-Pathway. O le tele o lo tatou saunia faaletino ma faaleagaga, o le tele foi lea o le mafai ona tatou taofia o osofaiga taulamalama a le fili. Manatua upu a Peteru, “O le tiapolo lea, o loo fealualuai o ia e pei o se leona tagi, ua saili se tasi e ‘aina e ia.”

Ua ou vaai i le ogatotonu o tala fiafia e uiga i le talalelei, o loo i ai i latou o e o tauivi, o e o loo luitauina faatuatua, masalosalo, ma fesili ia e foliga mai e leai ni tali. Uso e ma tuafafine, o Iesu Keriso o le tali lea. Amata ia te Ia. Vaavaai mo Lona aao i lou olaga. Faalogo ia te Ia. “Aua le atuatuvale o outou loto,” na Ia fetalai atu ai i Ona itula faaiu i Ona soo a o lumanai Ketesemane, a o lei amoina Lona satauro e ui atu i auala o Ierusalema, a o lumanai Kolokota, lea sa Ia faamae’aina ai Lana taulaga togiola—i le mea e na o Ia lava, le Alo e Toatasi na Fanaua o le Atua, na mafai ona faia.

Ia iloa e malamalama o Ia. Na Ia tauaveina i Ona lava luga a tatou agasala uma, measese, faanoanoaga, ma aso sili ona leaga, ina ia mafai ona tatou toe mafuta faatasi i le faavavau ma lo tatou Tama o i le Lagi. Sa Ia fetalai, “Vaai mai ia te a’u i mafaufauga uma; aua le masalosalo, aua le fefe.” O le faatuatua ia Iesu Keriso e mafai ona siitia a’e oe i luga ma faamalolo ai lou agaga ua faamanualia. Faatuatua ia te Ia ma o le a e faanatinatia lou toefoi atu “i aao o Lona alofa.”

Ou te toe faamamafa atu le saunoaga a le tatou perofeta soifua: “O tatou vaai ea i mea o loo tutupu i luma tonu o o outou mata? Ou te tatalo ina ia tatou lē misia le mamalu o lenei taimi! Ua faanatinati e le Alii Lana galuega.” Talosia i le avea ai o i tatou ma soo o o tatou aso ia alalaga atu, “Hurei mo Isaraelu,” a o tatou sauniuni mo le toefoi mai o lo tatou Alii ma le Faaola. I le suafa o Iesu Keriso, amene.