O Le Faiga o La Tatou Taitaiga Faalelagi
A o taulai atu o tatou olaga ia Iesu Keriso, o le a tatou maua lo tatou ala i le aiga, tumau e oo i le iuga ma olioli e oo i le iuga.
Na suia e Iesu Keriso lo’u olaga ina ua ou papatiso i le 26 o o’u tausaga i lo’u nuu pele o Frutillar, Chile. I lena taimi, o la’u galuega sa feavea’i atu ai a’u e sopoia vasa, vaitafe, ma vaituloto i le matagofie o Patagonia Chile. Ina ua uma lo’u papatisoga, sa ou vaaia la’u galuega ma lo’u olaga i se auala fou ma ese, ma iloa moni ai “o mea uma lava e faailoa mai ai o loo i ai se Atua.”
I le natura, e fanau mai le samani i le matāvai o vaitafe. E i ai se taimi i o latou olaga, e manaomia ai ona latou fe’ausi atu i lalo o le vaitafe ina ia oo atu i le sami, lea latou te maua ai meaai ma tulaga e manaomia mo lo latou tuputupu ae.
Ae o le sami o se nofoaga matautia foi lea e lalafi ai ’ia fe’ai ma taumafai ai tagata faifaiva e pu’e le samani i matau feilafi e faafoliga o ni meaai ae lē maoona ai. Afai e mafai ona faasaoina mai le samani i nei taufaamatau, o le a saunia i latou e faaaoga la latou faiga mamana o le taitaiga e toefoi atu ai i luga i le vaitafe i le nofoaga lava lea na latou fananau mai ai, ma feagai ai ma luitau fou ma nisi o luitau ua masani ai. Ua tele tausaga o suesueina e saienitisi a latou amioga e femalagaai ai, ma ua latou iloa ai e latou te faaaogāina se ituaiga o faafanua faamaneta, e pei o le GPS, e taiala ai i latou i lo latou taunuuga mulimuli ma le mautinoa e lē matalitonuina.
E mafai ona tatou toefoi uma i se aso i le aiga faalelagi lea na tatou o mai ai. Ma e pei o le samani, e i ai a tatou lava faafanua faamaneta, po o le Malamalama o Keriso, e taiala atu ai i tatou iina. Na aoao atu Iesu i Ona soo, “O a’u nei le ala, ma le upumoni, ma le ola, e le alu atu lava se tasi i le Tama, pe a le ui mai ia te a’u.”
A o taulai atu o tatou olaga ia Iesu Keriso, o le a tatou maua lo tatou ala i le aiga, tumau e oo i le iuga ma olioli e oo i le iuga. Na aoao mai Peresitene Russell M. Nelson e faapea, “o le olioli tatou te lagonaina e itiiti lava se mea e faatatau i tulaga o o tatou olaga ao mea uma o loo faatatau i le taulaiga o o tatou olaga.”
O Lo Tatou Natura Paia ma le Taunuuga
Mai le folafolaga i le aiga tatou te faitau ai faapea “o i [latou] taitoatasi o se atalii po o se afafine agaga faapelepele a ni matua faalelagi, ma, o lea ua tofu ai i latou taitoatasi ma se natura ma se taunuuga paia. … I le muai olaga, sa iloa ma tapuai atalii ma afafine agaga i le Atua o lo latou Tama e Faavavau ma sa [latou] talia Lana fuafuaga e mafai ai e Lana fanau ona maua se tino faaletino ma maua le tomai faalelalolagi latou te maua ai le atoatoaga ma iloa tino ai lo latou taunuuga paia o ni suli o le ola e faavavau.”
A o lei fanau mai o Ia i le olaga faaletino, sa faaali atu Iesu Keriso ia Mose ma fetalai atu ia te ia e fai ma sui o le Tama. Na Ia ta’u atu ia Mose, e i ai Sana galuega tele mo ia e faia. I le taimi o lena fonotaga, sa tele ni taimi na faaigoa ai e le Alii o ia “o lo’u atalii”.
Ina ua mavae lena aafiaga, sa sau Satani ma faaosooso o ia, ma faapea atu, “Mose e, le atalii o le tagata, ia e tapuai mai ia te au.”
Na tali atu Mose i le faaosoosoga e ala i le manatuaina o lona natura paia, ma faapea atu, “O ai oe? Aua faauta, o a’u o se atalii o le Atua.” O le upumoni na faasaolotoina ai Mose mai se osofaiga a le fili.
Uso e ma tuafafine, o matau o le olaga faaletino e moni. E tele ina faatosina, ae e na o le tasi lava le sini latou te sailia: ia toso ese i tatou mai le ala o le vai ola lea e tau atu i le Tama ma le ola e faavavau.
Ou te iloa le moni o matau o le olaga faaletino. I se tasi Aso Sa, i le avea ai ma se tagata fou liliu mai, sa ou faiaoga ai i se vasega perisitua ina ua tulai mai se talanoaga le mautonu. Sa ou tauivi e faamae’a la’u lesona. Sa ou ita ma lagona ai o a’u o le tagata na aafia ai fua. E aunoa ma le fai atu o se upu, sa ou agai atu i le faitotoa e aluese ai ma le manatu o le a ou le toe foi i le lotu mo sina taimi.
O le taimi lava lena, na tu mai ai i o’u luma se tagata popole o loo umia le perisitua. Sa ia valaaulia ma le alofa a’u e taulai atu ia Keriso ae le o le tulaga na matou oo i ai i le vasega. A o ou toe tepa i tua i le aafiaga ma ia, sa ia faasoa mai ia te a’u sa ia faalogoina se leo o fai atu ia te ia, “Alu e mulimuli ia te ia; e taua o ia ia te a’u.”
A’u uo pele, e taua uma i tatou ia te Ia. Na aoao mai Peresitene Nelson, “ona o la tatou feagaiga ma le Atua, o le a lē pa’u ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou.” O lo tatou natura paia ma le sootaga o le feagaiga ma le Atua ua tatou maua ai le aia tatau e maua ai le fesoasoani faalelagi.
O Le Manaomia o le Fafagaina
E pei lava ona manaomia ona fafagaina le samani i le sami ina ia tuputupu ae ai, e manaomia foi ona tatou fafagaina i tatou lava faaleagaga ina ia aloese ai mai le oti i le le lava o meaai paleni faaleagaga. O le tatalo, o tusitusiga paia, o le malumalu, ma lo tatou auai e le aunoa i sauniga i Aso Sa e taua i la tatou lisi o meaai faaleagaga.
Ia Novema 1956, na alu ifo ai Ricardo Garcia i le vai o le papatisoga i Chile, ma avea ai ma uluai tagata o le Ekalesia i lo’u atunuu. I le na o le tasi le aso a o lei maliu o ia, sa ia tautino atu ai i luma o lona aiga ma uo, “I le tele o tausaga ua mavae, sa valaaulia ai a’u e faifeautalai ina ia ou fiafia faatasi ma lo’u aiga. O a’u o se tagata fiafia. Ta’u atu i tagata uma i Chile o le talalelei o le fiafia.”
Ina ua uma ona faafailele o ia i le talalelei a Iesu Keriso, sa tuuto atu e Ricardo lona olaga atoa e auauna atu ai ma le alofa i le Atua ma ona tuaoi. O Lana faataitaiga o le avea ma soo ua faamanuiaina ai augatupulaga, e aofia ai ma a’u. Na aoao mai le Perofeta o Iosefa Samita, “o se tagata e faatumulia i le alofa o le Atua, e le faamalieina i le faamanuiaina na o lona lava aiga, a e ia faasalalau atu i le lalolagi atoa, e naunautai e faamanuia tagata uma lava.”
Toefoi i Lo Tatou Aiga Faalelagi
I le ta’ele o o tatou loto taitoatasi o loo i ai se manao e toefoi atu i lo tatou aiga faalelagi, ma o Iesu Keriso o la tatou faiga taiala faalelagi lea. O Ia o le ala. O Lana taulaga togiola ua mafai ai ona tatou osia feagaiga paia ma le Atua. O le taimi lava tatou te osia ai feagaiga, o le a i ai taimi tatou te fe’ausi ai e faasaga i le āu. O le tulaga lamatia, lē fiafia, faaosoosoga, ma puapuaga o le a tofotofoina ai lo tatou faatuatua ma le malosi faaleagaga. Fesili atu mo se fesoasoani. E malamalama Iesu Keriso ma e naunau lava e tauave a tatou avega.
Manatua ua lauiloa o Ia o “se tagata faanoanoa, ma ua masani i le faanoanoa.” Na aoao mai le Faaola, “E maua foi outou e le puapuaga i le lalolagi: a ia outou loto tetele; ua ou manumalo i le lalolagi.” O Lana taulaga togiola e mafai ai ona faamagaloina a tatou agasala ma oo ai ina lē toe manatuaina e Ia.
Atonu e lē galo atoatoa ia i tatou a tatou agasala o se vaega o lo tatou aoaoina i le olaga nei, o lea o le a tatou manatua ai e aua nei toe faia. Nai lo lena, o le a tatou manatuaina o Ia a o tatou aai ma feinu i le faamanatuga i le lotu i Aso Sa uma. O lenei sauniga o se vaega e tatau ai o le tapuaiga ma le atiina ae faaleagaga. E oo mai le olioli pe a tatou malamalama ua le na o se isi foi aso lenei. “O le Sapati na faia mo le tagata” ma le faamoemoe e tuuina mai ia i tatou le malologa mai le lalolagi ma faafouina ai o tatou tino ma agaga.
Tatou te manatua foi o Ia pe a tatou o i le malumalu—o le maota o le Alii. O malumalu e aumaia ia i tatou se malamalama loloto atu ia Iesu Keriso o le totonugalemu o le feagaiga lea e taitai atu ai i tatou i le ola e faavavau, “o le aupito silisili o meaalofa a le Atua.”
O le auai i le malumalu na ou maua ai le faamafanafanaga ma le faamoemoe sili e uiga i lo tatou taunuuga e faavavau. Ua ou oo i fesootaiga faalelagi ma tagata i itu uma e lua o le veli. Ua ou vaaia vavega faamalologa i olaga o la’u fanau laiti, o le toalua o i latou o loo ola ma ni ma’i e le vaaia lea e manaomia ai le tausiga i aso taitasi mo lenei olaga atoa.
E olioli lo matou aiga a o matou fefaasoaai e uiga i le fuafuaga o le fiafia. E susulu foliga o la’u fanau pe a latou faalogo i lena mea, faafetai ai ia Iesu Keriso, o o latou “puapuaga e na o sina taimi itiiti lava.” Ma te alolofa tele i le ma fanau, ma ua ma iloa e i ai se aso, e pei ona aoao mai Peresitene Jeffrey R. Holland, o le a latou “tutu i o ma’ua luma ma le mamalu ma le maoae, ma le atoatoa o le tino ma le mafaufau.” O a tatou feagaiga e aumaia ai i tatou ia latalata atili atu i le Atua i le tulaga e mafai ai mea e le mafai, ma faatumuina ai avanoa uma o le pogisa ma le masalosalo i le malamalama ma le filemu.
Faafetai ia Iesu Keriso, o loo i ai le faamoemoe ma mafuaaga faavae lelei e faaauau ai pea ona alolofa, tatalo, ma lagolagoina i latou tatou te manatu alofa i ai.
Ou te iloa o loo soifua o Ia. Na te silafia i tatou ma e alofa o Ia ia i tatou. O Ia o le ala, o le upumoni, ma le ola o le lalolagi.
Ou te valaaulia i tatou uma i le asō e taulai atu o tatou olaga ia Iesu Keriso ma Ana aoaoga. O le faia o lena mea o le a fesoasoani ia i tatou e aloese ai mai le ūina o matau o faaosoosoga, faatausuai, ma le manatu ifo ia te oe lava. O le a tatou tutu o ni malumalu—paia, mausali ma tumau. O le a tatou tetee atu i afā, ma o le a tatou taunuu i le fale, tumau e oo i le iuga ma olioli e oo i le iuga. I le suafa o Iesu Keriso, amene.