O Le Alofa o le Atua

I se tasi taumafanafana a o matou malaga i se vaega tuufua, sa faaalu e lo matou aiga se po e momoe ai i fafo i lalo o se lagi maninoa. Sa manino lo matou vaaia i o matou luga a’e o le Aniva, sa faatumulia i fetu e lē mafaitaulia ma fetulele i nisi o taimi. A o matou maofa i le maoae o foafoaga a le Atua, sa matou lagonaina se sootaga migao ma Ia. O le ma fanau laiti, sa ola a’e i Hong Kong, e le’i oo i se mea faapea muamua. Sa latou fesili ma le lotomama, pe na matou nonofo i lalo o le lagi lava lea i lo matou aiga [i Hong Kong]. Sa ou taumafai e faamatala i ai, o le lagi lava lea e tasi, ae o le faaleagaina o le ea ma le malamalama i le mea sa matou nonofo ai, na le mafai ai ona matou vaaia nei fetu e ui lava ina sa i ai iina.

Ua aoao mai i tatou e tusitusiga paia e faapea “o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia.” E ui ina puaoa la tatou vaaiga faaleagaga i faalavefau fenumia’i ma faatosinaga a le lalolagi, a tatou faaaoga le faatuatua i le Atua ma Lona Alo o Iesu Keriso, tatou te maua le faamautinoaga manino o lo La’ua moni ma lo La’ua popolega mo i tatou.

I le Tusi a Mamona, na vaai le perofeta o Liae i “se laau, o ona fua sa manaomia lava e faafiafia ai le tagata” ma “sa sili ona suamalie, nai lo mea uma.” Ina ua ia tofoina le fua, sa faatumuina lona agaga i le olioli, ma sa ia manao i lona aiga e tofo foi i ai. Ua tatou aoao o lenei laau e faatusa i le “alofa o le Atua,” ma e faapei o Liae, e mafai foi ona tatou maua se molimau fiafia i le Atua pe a tatou valaaulia o Ia i o tatou olaga.

O Iesu Keriso o le faailoaga lea o le alofa o le Tama Faalelagi mo i tatou. E ala i Lana taulaga togiola, na Ia tauave ai i Ona Lava luga a tatou agasala ma sa totolia o Ia mo a tatou amioletonu. Na ia tauaveina patino o tatou mafatiaga, tauave o tatou faanoanoaga, ma tauave i Ona Lava luga o tatou tiga ma ma’i. Ua Ia auina mai le Agaga Paia e faamafanafana i tatou, ma o fua o le Agaga e aofia ai le olioli, filemu, ma le faatuatua lea e faatumuina ai i tatou i le faamoemoe ma le alofa.

E ui e mafai ona maua e tagata uma le alofa o le Atua, e toatele i latou e sailia ma le naunautai, a o isi e mananao ia lagonaina le alofa o le Atua ae e le talitonu ua tatau ai mo i latou. O nisi o loo matuai taumafai e pipiimau pea i ai. Ua aoao mai i tatou e tusitusiga paia ma le perofeta a le Alii e faapea, e mafai ona tatou iloa pea lava pea le alofa o le Atua pe a, tatou salamo pea lava pea, faamagalo atu e le aunoa, tauivi e tausi Ana poloaiga, ma auauna atu ma le le manatu faapito i isi, e ala i le alofa tunoa o Iesu Keriso. Tatou te lagonaina le alofa o le Atua pe a tatou faia mea tatou te latalata atili ai ia te Ia, e pei o le talanoa ma Ia i aso taitasi e ala i le tatalo ma le suesue i tusitusiga paia, ma tuu le faia o mea e faataumamao ai i tatou mai ia te Ia, e pei o le faasausili, fefinaua’i, ma le fouvale.

Ua valaaulia i tatou e Peresitene Russell M. Nelson ia “aveesea, faatasi ai ma le fesoasoani a le Faaola, otaota tuai mai o tatou olaga” ma “lafoai le oona matuitui.” Ua ia fautuaina i tatou e “faamalolosia ma le mataalia atili o tatou faavae faaleagaga” e ala i le “faatutotonuina o o tatou olaga i [le Faaola] ma i sauniga ma feagaiga o Lona malumalu.” Na Ia folafola mai “a tatou tausia a tatou feagaiga o le malumalu, tatou te maua se avanoa tele atu e faaaoga ai le mana faamalosiau o le Alii. … Tatou te lagona ai le alofa lē pona o Iesu Keriso ma lo tatou Tama Faalelagi i se fuataga tele!”

E i ai sa’u uo sa faamanuiaina i se aiga matagofie ma se galuega faamanuiaina. Na suia lenei mea ina ua ma’i o ia ua le mafai ona faigaluega, ma sosoo ai ma le tatalaina o le faaipoipoga. Na faigata tausaga talu mai lena mea, ae na lagolagoina o ia i lona alofa i lana fanau ma feagaiga sa ia osia ma le Atua. I se tasi aso, sa ia faalogo ai ua toe faaipoipo lona toalua muamua ma ua talosaga e faaleaogaina la latou faamauga i le malumalu. Sa faaletonu o ia ma ua fememea’i. Sa sailia le filemu ma le malamalama i le maota o le Alii. O le aso ina ua mavae lona alu i le malumalu, sa ou maua ai le fe’au lenei mai ia te ia:

“Sa ou maua se aafiaga matagofie i le malumalu anapo. Ou te manatu sa iloagofie sa ou taofimau pea le tele o le ita. … Sa ou iloa ua tatau ona ou sui, ma sa ou tatalo i le vaiaso atoa ina ia faia. … O anapo i le malumalu sa ou lagonaina moni le Agaga o aveesea le ita mai lo’u loto. … Sa o se faamāmāavega le faasaolotoina mai ai. … Sa aveesea se avega taufaamata’u mai ia te au.”

E ui ina o loo i ai ona luitau, ae e pele i la’u uo lena aafiaga i le maota o le Alii, lea na fesoasoani ai le mana faasa’oloto o le alofa o le Atua ia lagona le latalata atili i le Atua, ua tele atu lona faamoemoe e uiga i le olaga, ma ua itiiti lona atuatuvale i lona lumanai.

Pe a tatou iloa le alofa o le Atua, e mafai ona tatou tauaveina ma le faigofie a tatou avega, ma ua’i atu ma le onosai ma le fiafia i Lona finagalo. Ua tatou mautinoa o le a manatua e le Atua Ana feagaiga ma i tatou, asiasi mai ia i tatou i o tatou puapuaga, ma lavea’i i tatou mai le nofopologa. O le a tatou mananao foi e faasoa atu le olioli tatou te lagonaina ma o tatou aiga ma ē pele ia i tatou. E pei o le aiga o Liae, e tofu le tagata ma lana faitalia e filifili ai pe ‘ai i le fua pe leai, ae o lo tatou avanoa e alofa atu ai, faasoa, ma valaaulia i se ala e mafai ai e i latou tatou te alolofa i ai ona lagona le alofa o le Atua.

Ina ia fesoasoani i isi ia lagonaina le alofa o le Atua, e moomia ona tatou atia’e i totonu o i tatou lava uiga paia faaKeriso e pei o le lotomaualalo, alofa mama, mutimutialofa, ma le onosai ma fesoasoani e faaliliu atu isi agai i le Faaola e ala i poloaiga sili e lua o le alofa i le Atua ma le alofa i o tatou uso a tagata.

Sa tauivi se tasi o o ma atalii ma le taumafai ia avea ma sē tasi o se vaega, ma le faatauaina o ia lava i tausaga o lona talavou. Sa ma tatalo ma lo’u toalua ia iloa pe faapefea ona fesoasoani ia te ia, ma sa ma naunau e fai soo se mea e finagalo le Alii ma te faia. I se tasi aso sa uunaia au e fesili i lo’u peresitene o le korama a toeaina pe na te iloaina se tasi o manaomia se fesoasoani e mafai ona ma asiasi faatasi i ai ma lo’u atalii. I le mavae ai o ni nai mafaufauga, sa ia talosagaina i ma’ua e asiasi i se tamaitai o loo feagai ma ni luitau maoae faalesoifua maloloina, ma i le i ai o le faatagana mai le peresitene o le paranesi, e ave le faamanatuga ia te ia i vaiaso taitasi. Sa matuai faageetia au ae sa popole foi pe o le a faape’ī se tali a lo’u atlii i lenei tautinoga faalevaiaso.

I le ma asiasiga muamua, sa mafatia o ma’ua loto mo lenei tamaitai pele, ona sa feagai pea o ia ma tiga e le aunoa. Sa matuai faafetai o ia mo le faamanatuga, ma sa ma fiafia e asiasi ia te ia ma lona toalua. I le mavae ai o ni nai asiasiga, o se tasi Aso Sa sa ou malaga ai ma sa le mafai ona ma o ma lo’u atalii, ae sa ou faamanatu ia te ia lo ma tofiga. Ina ua ou foi mai i le fale, sa tau le mafai ona ou faatali pe na faapefea lana asiasiga. Sa tali mai lo’u atalii, e le’i manatu o ia o faia e tamaiti o lana vasega ni mea mananaia faapea. Ma sa ia faaopoopo i le faapea mai, na alu ma ave lona uso e fesoasoani ma sa sologa lelei le faamanatuga, ae na faanoanoa lenei tuatafine pele i le aluga o le vaiaso ona sa ia valaaulia ni uo i lona fale e matamata tifaga ai, ae e le’i lelei lana masini vitio. Fai mai lo’u atalii, na ia sailia i luga o le initoneti, ma maua ai le faafitauli, ma sa ia faaleleia loa lava i lea taimi. Sa ia lagona lona aoga, fiafia, ma le faatuatuaina e fai se mea na faasusulu ai le aso o le tuafafine lea. Sa ia lagonaina le alofa o le Atua mo ia.

Afai e ufitia le olaga i puao tusa lava pe o a au taumafaiga silisili, afai e te manatu e le o faafofogaina au tatalo, pe afai foi e le o mafai ona e lagonaina le alofa o le Atua, faamolemole e taua au taumafaiga uma, e pei ona mautonu fetu i o tatou luga a’e, e silafia, e faafofogaina, ma alolofa le Tama Faalelagi ma Iesu Keriso ia te oe.

I se tasi taimi, ina o i ai Ona soo i se vaa “o felafoa’iina [e] galu,” sa savali atu ai le Faaola agai ia i latou i luga o le sami ma faamautinoa atu i ai, ma faapea atu, “Ia outou loto tetele; o A’u lava; aua tou te matatau.” Ina ua manao Peteru e savali atu i le Faaola i luga o le sami, sa talo atu Iesu ia te ia, ma faapea atu, “Sau.” Ae ina ua aveesea le taula’i atu o Peteru na amata ai ona magoto, ma sa aapa atu loa le aao o le Faaola e pu’e o ia ma ta’ita’i atu o ia i le saogalemu a o fetalai atu, “O oe na lē faatuatua itiiti, se a le mea ua e masalosalo vale ai?”

A oo ina faasagatau mai matagi i o tatou olaga, pe tatou te naunau ea e matafiafia ma lototetele? E mafai faapefea ona tatou manatua e le tuulafoaiina i tatou e le Faaola, ma o loo lata mai o Ia atonu i ni ala tatou te le o iloaina? Pe tatou te loto ea e o atu ia te Ia i le faatuatua, aemaise ai lava pe a foliga e faigata le ala o i o tatou luma? A o a foi ni auala Na Te sii a’e ai i tatou i le saogalemu pe a tatou tautevateva? E mafai faapefea ona tatou vaavaai faamaoni atu ia te Ia i mafaufauga uma e aunoa ma le masalosalo po o le fefe?

Afai e te manao e lagonaina atili le alofa o le Atua i lou olaga, sei ou valaaulia oe e te mafaufau i mea nei:

• Muamua, taofi soo ina ia e manatua o oe o se atalii/afafine o le Atua ma mafaufau i mea e te faafetai ai.

• Lua, tatalo i aso taitasi, ma ole atu i le Tama Faalelagi e fesoasoani ia e iloa pe o ai o siomiaina oe e moomia ona lagonaina Lona alofa.

• Tolu, ole atu ma le lotofaamaoni po o le a se mea e mafai ona e faia e fesoasoani ai i lena tagata ia lagonaina le alofa o le Atua.

• Ma le lona fa, gaoioi loa lava i le musumusuga e te maua.

Afai tatou te tatalo pea lava pea ma ole atu e fai ma sui o isi, o le a faaali mai e le Atua ia i tatou ia tagata e mafai ona tatou fesoasoani i ai. Ma afai foi tatou te gaoioi loa lava, e mafai ona avea i tatou ma auala Na Te tali ai a latou tatalo. O le faia o lena mea, e oo mai le taimi, o le a tatou maua ai tali i a tatou tatalo ma o le a tatou lagonaina le alofa o le Atua i o tatou lava olaga.

I ni nai masani talu ai, a o ma malaga i Viatename, sa ma i ai ma lo’u toalua i se vaalele na amata lele ese i se afā malosi. Sa matautia le fesoua’iga, ma mafai ona iloa atu mai lo ma faamalama ia ao pogisa, o timuga mamafa, ma uila. I le mavae ai o se alu a’e lēmailoa i luga, sa i’u ina ēa i luga a’e o ao o matagi ma agai atu ai i lea vaaiga matagofie. Sa o ma toe manatuaina ai ma lagonaina lo tatou Tama Faalelagi ma Iesu Keriso ma lo La’ua alolofa tele mo i tatou.

Uo pele, i le avea ai o se tasi ua iloaina le alofa o le Atua, ou te molimau fiafia atu ai o le Faaola o Iesu Keriso o le alofa lea o le Atua. O Lona alofa mo i tatou e atoatoa, e patino, ma e le uma. A tatou mulimuli faamaoni ia te Ia, ia faatumuina i tatou i Lona alofa, ma ia avea i tatou o se molῑ o le ava e taialaina isi i Lona alofa. I le suafa o Iesu Keriso, amene.