Unimwaane Ronald M. Barcellos

Ngke 12 ana ririki, Unimwaane Ronald M. Barcellos e wareka ana Boki Moomon n te moan tai. Ngke e tia ni wareware, e kawara te tia reirei n tieminari n ana uoote ao n titirakinna ngkana e kona n iriira te tieminari kiraati.

“I iriira te tieminari ngke 12 nakon 18 au ririki ni maiu ibukina bwa I tatangiria ni mena ikekei ao n ongora nakon karaki man te Baibara ao ana Boki Moomon,” e taku. “E a kaman reke tangiran te euangkerio irou, ao n namakinna bwa e koaua.”

Imwiin karaoan ana mwakuri ni mitinare ao e kamatoa ana onimaki, ao ni baireia bwa e na karimoa te euangkerio inanon maiuna.

“Katenako ma [Tamara are i Karawa], kawakin am berita aika tabu, ao ana kaoti nakoim Ana babaire ibukim,” e taku.

E bungiaki Ronald Maldonado Barcellos i São Paulo, Brazil, n Nobembwa 4, 1975, irouia karo aika Barcellos Silveira ao Marcia Maldonado Barcellos Silveira. E mareaki ma Karin Spat Albino Barcellos Silveira n te São Paulo Brazil Tembora n Ritembwa 4, 1999. Boni kaaro aika teniman natiia.

E kamatebwai Unimwaane Barcellos i aon tararuan te bitineti i São Marcos Iuniwetiri i São Paulo. E mwakuri ni kambwana aika a mwaiti ma nakoana ae te aobitia ibukin te mwaakete ao ni karaoi karikirake tabeua. E buoka katean bitineti aika a mwaiti, n aron GreenMile, LLC, ao n riki bwa te tia koroboki iai inanon ririki aika a bati.

E bane ana tai Unimwaane Barcellos man weteana bwa te beretitenti n te mition n te Portugal Lisbon Mition. E a tia naba ni beku bwa te kauntira n ana beretitentii te titeiki, te kauntira ae rietaata, te beretitenti irouia Kairake n Ataeinimwaane n te titeiki, te bitiobi, te kauntira n te bitiobiriki, te ibonga ae rietaata, te beretitenti n te kooram n unimwaane, ao te tia reirei n te tieminari.