Am Rairannano E Aki Karawawata Iesu Kristo, E Kakorakora Riki iai Kimwareireina

Tabeua te ririrki n nako n te mwananga nako Florida, I tekateka i tinaniku ni wareka te boki. E oti n atuuna bwa ti bane ni kona n nako karawa e boni ngae ngke ti aki kororaoi ngkai. E titiraki te aine ae e rirarikiu, N am iango e bon kona?”

I tararake, n aki ota, imwiina I a ataia bwa e taetae neierei ibukin te boki are I warekia. I taekina te bwai ae kamanga n aron, “Eng, I tuai rang warekia, ma I a kaongoko motina.”

O, ai tera ngke arona bwa I kona ni manga kaoka te tai! N na tuangnga iai, “Eng, e kona! Bukina bwa karawa tiaki ti ibukiia aomata aika a kororaoi, bon nneia aomata ake a kabwaraaki aia bure, ake a manga rinea Kristo imwiina ao imwiina riki.”

N te bong aei, I tangiria n taetae nakoia ake ibuakora are n tabetai a namakinna bwa, “Te rairannano ao kabwaraan bure e tara ni mwakuri nakoia aomata nako ma e aki nakoiu.” Naake a iangoia i bon irouia, “Ngkai I teimatoa ni kakaraoa te kairua ae okioki, tao ai bon teiu aei.” Naake, n ai arou, iai bong are a namakina iai te kawai n te berita bwa e katati rikaaki, kanga ai bon aron te nakonako ae raroa n kawain te berita!

Te mitinare ae tamaroa i Aotiteria ae Elder QaQa mai Fiji, e tibwa aekakin te namakin anne n buan ana koaua: “I ataia bwa e tangirai te Atua, ma n tabetai I kan ataia, ‘E ataia te Atua ae I tangiria?’ Bukina bwa I aki kororaoi, ao I teimatoa ni karaoi kairua.”

N te titiraki anne, e taekina aron te namakin n tabeaianga te Mitinare te mwaane ae QaQa. Tao ko na bon titiraki naba, n iangoia, “I rangi ni kataia, ma e ataia te Atua ae I kabanea au kona ni kataia? Ngkana I kabwaka, e ataia te Atua ae I teimatoa n tangiria?”

I nanokawaki ni kaota aio, ma I taneiai ni ukora reitakiu ma te Tia Kamaiu n aron maiuakinan te kororaoi. I iangoia bwa te maiu n ongotaeka nanona N na bon aki kainnanoa te rairannano. Ao ngkana I karaoa te kairua, are bon ni katoa bong, I kararoai mairoun te Atua, n iangoia, “E na bon bae n rang n un irou.”

Anne ae e aki koaua.

I a tia n reiakinna bwa ngkana ko tataninga ni karokoa ko a itiaki ke ko a bon tau n nakon te Tia Kamaiu, ko bon aki karekea oin te kantaninga!

Tera ngkana ti ingoa taekan te tua ao te ongeaba n teina ae okoro?

I kakoaua bwa ngkai e tabe ibukira te Atua ibukin ara kairua, E tabeaianga riki n te bwai ae riki imwiin karaoan te kairua. Ti na kona n rairaki nakoina ngkana ti bwaka ao tia manga karaoia riki? Ti na kona n teimatoa n tiku n te reitaki n te berita ae tabu aei?

Tao kam ongo ana taeka te Uea, “Ngkana [ko] tangirai, kawakin au tua” ao ko namakina te kabwaka ibukina ko tuai ni kawakin tua ni kabane. N na kauringi ngkami bwa aio bon te tua naba ibukin te rairannano! Ni koauana, e kona n riki bwa te tua ae okioki inanon koroboki aika a tabu.

Ana baebaeti Aramwa, “O bwa ngke ngai te anera, ao e kona n reke te bwai are e tangiria [nanou] … man takaruaea te rairannano,” e aki kataia ni kamamaeira ni kaoti ara kairua. E tangiria n takaruaea te rairannano bwa ko aonga ngkoe ao ngai n totokoa te nanokawaki i aon te aba. Teuana bukina ae Aramwa e riba te bure bwa bukina e kammarakiira.

N tabetai I uringnga, n aron te kauring iaon ramwau, bwa te tua bon te kawai ni kararoaki man te maraki. Ao te rairannano naba. E taku ara burabeti, “Te Tia Kamaiu e tangiriira n tainako ma riki ngkana ti rairi nanora.”

Ngaia are ngkana e kangai te Uea, “Rairi nanomi, rairi nanomi,” tera ngkana ko iangoia bwa e kangai, “I tangiriko. I tangiri ngkami.” Katamneia ae e butiiko bwa ko na kitana te anua are e karekea te nanokawaki nakoim, e kaoko bwa kona otinako man te roo ao n rairaki nakon Otana.

N ana uoote natiu te aine ae Carly, e katorobubua te ibonga ae boou bwa e na kakabwaia te toa, ao ngke e na riai ni kangai, “Bwa a na karaoia ni kauringa raraan Natim,” e taekinna ae kangai, “Bwa a na karaoia ni kauringa iai ana tangira te Nati.” A tiinako ranin matan Carly ngkai e torobaki nanona ni koauan taeka akanne.

E tatauraoi ni korakai n te maraki Ara Tia Kamaiu n Ana Mwakuri ni Kamaiu ibukina bwa E tangiri ngkami. Ni koauana, ngkoe bon “te kimwareirei are e tei imatana” ngkai E korakai.

Te kakao nakon te rairannano bon kaotan ana tangira te Atua.

Taekinan eng nakon te kakao anne bon kaotan ara tangira.

Katamneia tamnein Kristo ae ko tatangiria. Iangoia ngkai bwa E otanako moangarena ni katoa te tai are ko kabongana iai Ana bwaintangira, ibukina bwa Ngaia “otan te kantaninga ae kororaoi.”

Eng, rairan nanom e aki karawawata Iesu Kristo; e kakorakora riki iai kimwareireina.

Ti na reireia anne!

Ibukina bwa te rairannano bon ara rongorongo ae te kabanea n tamaroa!

Ti aki tiku i aon kawain te berita ngkana ti tuai man karaoa te kairua. Ti tiku i aon te kawai man te rairannano ni katoabong.

Ao ngkana ti rairi nanora, e kabwarai n aki kamamaeira iai te Atua, ni kabotauira nakoia tabeman, ke n takuira ibukina bwa aio bon te bwai naba are ti rairi nanora iai n te wiiki ae nako.

E kukurei n noriira ni katoa te tai are ti katorobubua iai. E kukurei ni kabwarai ara bure ibukina bwa irouna ti a kukurei!

Tiaki ko namakina anne bwa e koaua?

Ngkanne bukin tera bwa e kangaanga iroura bwa tina kakoaua?!

Tatan, te tia kabuakaka ae korakora ao te tia kewekewe, e kabongana te kamamaeaki ni kararoaiara mairoun te Atua. Te kamamaeaki bon te rotongitong ae rangi tinebu are ngkana ko kaotinakoa man rabwatam, e kona n rang tinebu ke n namakina temanna tinebuna.

Te mama bon te bwana are e tiriboiko, ni kangai, “Tera ae koa bon iangoia?” “Iai te bwai ae koa tia ni kaetia?”

E aki tuangiira te mama bwa ti karaoa te kairua, e tuangiira bwa bon ara kairua. Ko bae n ongo, “Karabako.” E karaoi bwaai ni kabane ni mwakana te kakaitara ni kawakin rawawata i nanora, n tuangiira bwa e rang boobuaka boona, n te aro are e na bebete riki ngkana ti tiku inanon te roo, ni kanakoi kantaninga ni kabane.

Tatan bon te tia iraea te kantaninga.

Ao kam riai n ongo aei, ngaia are N na taekini taeka aikai ni kabaibati.Tiaki ngkoe te bwana n am iango ke te kairua are koa tia ni karaoia. Ko bae ni kan taekina anne ni kabaibati naba. Tuanga Tatan, “Tiaki n te bong aei.” Nako aku Tatan.

Namakina te katikitiki anne, te nanokawaki n atua are e rairiko nakon am Tia Kamaiu, ao noora Ana nanoanga n rin ni maium ao ni maiuia naake ko tangiriia. I berita bwa te tai are ko uota iai te nano ae uruaki ma te ninikoria nakoina, E na bon waekoa ni mena ikekei.

Ngkana ko noora temanna bwa e bwabwa, tiaki ko na kanakoa baim ni kamauia? Ko kona n iangoa am Tia Kamaiu n rawa ni butimwaea baim? I iangoia bwa E tebo i nanon te ran, ni karinanoa i aan bwaai ni kabane bwa e na tabekiira rake bwa ti aonga n ikena te eea ae boou! Bon akea ae e kona n iinako riki nakon Otan Kristo ae oota.

E otamwaaka riki te Tia Kamaiu nakon rotongitongin te kamamaeaki. E bon aki kona n uruana kakaawakim. Ngaia are karaurau mataku.

• Iangoia bwa baim aei e tei ibukin kakawakim.

• Te bai aei e tei ibukin te ongeaba. Tao ko uti n te ingabong aei, ao ko tataro, ao ko taratarai booki aika a tabu n ongo bwanaan te Atua. Ko a tia ni karaoa te rinerine ae tamaroa ao ko akoi nakoia aomata ake irarikim n ai aron ana tangira Kristo. Ko ongora n te maungatabu ni kabuta! E mena ikai ongeabam!

• Ke tao e aki rangi n nakoraoi bwaai. Ko keiaki ni karaoi bwaai akana a uarereke akanne, bwaai aika a beebete n reitiko nako karawa. Ko a tia ni karaoi babaire aika ko aki rang kakatonga iai.

• E a ngaa ngkanne bonganam? E a tia ni kakamwakuri te bai aei?

E aki kabaeaki kakawakim nakon ongeabam. E teimatoa kakawakim, e aki bibitaki. Ko a tia n anganaki iroun te Atua, ao akea te bwai teuana ke temanna ae kona bitia. E uotii kakabwaia te ongeaba, ao anne te koaua. Ma kakawakin temanna bon tiaki teuana mai ibuakona. Kakaawakim n tainako “e korakora riki imatan te Atua,” e ngae ngke e a tia n uotiko nako am babaire.

Ngke I karaoi kairua, I tangiria n tiku inanon te reitaki n te berita ae tabu ma Kristo, ao N na tuangko bwa bukin tera.

I ikawairake n irira te reirei n te tebo ao I reiakinna bwa ngkana a anga te bwii taan taubwi, a tarataraa aron karaoakina. E etiruru raoi aron te rin, a tei i tabon waeia ao teutana teben te ran? Ngkanne a karaoa te bwai ae kamimi. A katinea iaon korakoraia ao aia konabwai.

Ni kabane a tebo aomata nako n oin korakoraia ao aia konabwai. Bon ti am Tia Kamaiu ae e atai kangaanga ake ko tebo rikaaki ma ngaia. I tangira te reitaki ma temanna are e kamaiuai, are e ata nanou ao au kangaanga are I waaki inanona!

E ata te rotongitong are e roko i aora ni kabane taan mwananga ao bwa mwanangara e rinanon te kanimaua ni karaanga—are e ngae ngke ti taua te kaibiti, ti na bon teberaki n te ran.

Ko kangai ngkana ko nakon Kristo, “Ko kona ni buokai?” ma te onimaki, kaotakin te kakoaua bwa e tangaina baina nakoim n tainako. I kakoaua noorakin aei n te rairannano are nanona bwa e ngae ngke ti aki kororaoi n te ongeaba n te tai aei ma, ti kataia n tangira te ongeaba ngkai, ni karaoia ao ni karaoia riki, ibukina bwa ti tangiria.

Uringa ana aomata te Uea are Beniamina, ake akea riki nanoia ni kan karaoa ae buakaka ma a reitinako ni karaoa ae raoiroi? N am iango a booti aia umwanrianna, ao a okira mweengaia, ao aki manga karaoa te kairua teuana? A bon aki! Te kaokoro iai bwa aki manga tangiria ni karaoa te bure. A karekea tangiran te ongeaba! A bitaki nanoia n taraa te Atua ao n nim ma te Atua ngkana a korakai!

N te taina, iaon te bike, I nora te manikiba ni kiba ni kaitara te ang, karokai baina ni kiba ni kaaintoa, ni kabanea korakorana, ma e bon tiku naba ni nnena. Imwiina I noora te mannikiba temanna, ae rietata riki. E a tia n reke ao n bon taabeibeti n akea ana kanganga, n aki bwerengaki n te ang. Anne te kaokoro i marenan kataakin karaoana i bon iroura ao n rairaki nakon ara Tia Kamaiu, n anganna bwa e na tabekiira rake, ma “ni kamaiu ni baina ni kiba.”

Ngke ti kairiiri n te mition i Australia, n ara kabanea ni kakawari ma mitinare, ti maroroakina taekan 3 Nibwaai 17, are a kaan aomata nakon te Tia Kamaiu ao a kona n ongo Ana tataro ibukiia. Ti titiraki, “Ngkana ko kona n ongo n ana tataro te Tia Kamaiu ibukim, tera n am iango ae E na taekinna?”

Ongorau n aia kaeka bon teuana te namakin n tamnei ae kakaawaki i nanon maiu. A na bae ni kainabwaabu teutana mitinare, ao ni waanako ranin mataia ngkai ti kauringiia, “Ami Tia Kamaiu e atai tein korakorami ao ami konabwai ake kam rinanona. E namakinna!”

Aio te bwai ae a tibwaia mitinare akekei ma te karaurau: e taku temanna te mitinare te aine, “Iesu e na tuanga te Tama, ‘E karaoa ana kabanea ni kona. I atai korakorana ni kataia.’” E taku te mitinare te mwaane, “Ni bwaai ni kabane aika a riki i nanon maiuna, I rang kakatonga irouna.”

Tina kataa aio. N tairiki, imwain ae ko na tataro, iangoia bwa e kaan irarikim Iesu Kristo. Ngaia te tia tei ibukimi nakon te Tama. Titirakiniko, “Tera ae e na taekinna au Tia Kamaiu nakon te Tama ibukiu?”

Ao imwiina kainabwaabu.

Kakauongo nakon te bwanaa anne are e taekini bwaai aika a raraoi ibukim—bwanaan te Tia Kamaiu, raoraom ae moan te tamaroa, ao Tamam are i Karawa, are e bon memena ikekei. Uringa, Aia tangira ao taumi a korakora n tainako n aki tabe ma te bwai teuana!

I tei ikai ni kakoaua bwa Iesu Kristo e anga te ota nakoia ake a tekateka n te rootongitong. Ngaia are, ni boong akana ko namakina iai te bwanaa bwa e tuangko bwa ko na karabako, bwa ko riai ni karabako n te ruu ae roo n tii ngkoe, I kaoko bwa ko na ninikoria n ao kakoaua Kristo! Kaaki te roo n rairaki nakon te Tia Kamaiu—Otan ara Kantaninga ae Kororaoi.

Kaonaki n te bitaki n ana kantaninga, kona nooria aomata ni kabane ni katobibiko ake a tia naba n namakina te maroa, ngkoe ao ngaiia kam na titiraki, “Bukin tera ti rang ni maaku n te roo? Ao bukin tera ti tiku ikekei n te tai ae maan?”

“E na bautiko Otan te Uea n ramwaneiko inanoan baina ao ni karaua nanom ao n tangiriko n tatainako.” Ti bia tangira Iesu ao n reitinako n rineia n tainako. N aran Iesu Kristo, amen.