Tai Kamatoai Nanomi

E waaki kaokan ana euangkerio Iesu Kristo ngke a kaoti te Atua te Tama ao Natina ae Tangiraki nakon te kairake Iotebwa Timiti, ni kaeka ana tataro ae mangori. Ni mwakoron Kaokan bwai, e raira te rekooti n rongorongon ngkoa Iotebwa Timiti man ana bwaintangira ao mwaakan te Atua. Te rongorongo aei bon rongorongon ana mwakuri te Atua ma kaain Amerika ngkoa ao iai i nanona bwaninin te euangkerio ae akea tokina.”

Ngke te ataeinimwane ngai, I wareka ana Boki Moomon, I titiraki n tainako bwa bukin tera aki kakoaua te koaua ake a anganaki Reimwan ao Remuera, e ngae ngke e kaoti ana anera te Uea ao ni bon taetae nakoia. Bukin tera a aki kona n nanorinano ao n ongeaba Reimwan ao Remuera nakon aia reirei tamaia, Riaai, ao tariia ae uarereke riki Nibwaai?

I kunea teuana te kaeka nakon te titiraki aei n 1 Nibwaai, are e taekinna bwa Nibwaai e “tang ibukin rawawatan nanona irouia tarina ngkai a rangi ni matoatoa nanoia.” E tuangiia tarina ake a ikawai riki Nibwaai, “Bukin tera ngkai a rangi ni matoatoa nanomi, ao ni mataki ami kaantaninga?”

Tera ae e nanonaki n te nano ae matoatoa?

Rairan “hardness” n taetae ni Korea n ana Boki Moomon bon 완악 (Wan-Aak: 頑惡). Te kibuntaeka aei e kabonganai koroboki n Tiaina “Wan”(頑), nanona “imanono,” ao “Aak” (惡), nanona “buakaka.” Ngkana ti kamatoai nanora, ti riki bwa mataki, ao a aki kona n rin inanora ao n ara iango bwaai aika a raraoi. Ti rikirake n imanono ao ti moana karimoaan nanora n bwain te aonaaba, n rawa n ongeaba nakon te Atua. Ti rineia bwa ti na kabotoi ara kantaninga tii n oin ara iango n aki butimwaai aia iango ao aia kairiiri tabeman. Ti rineia n rawa ni kauki nanora n ongeaba iroun te Atua ma ti kaririaki ni bwain te aonaaba ao te kakaitara. Ngkana a matoa nanora, ti totokoi ana wirikiriki te Tamnei ae Raoiroi. Ti na “waeremwe n uringa te Uea,” ao imwiin te tai ti na “aki namakina” Ana taeka.

E reireiniia aomata Nibwaai i Ammonia bwa tabeman “a na bon totokoa Tamnein te Atua ibukin matoatoan nanoia .” E reirei naba bwa “a na kamatoa nanoia, a na bon anganaki mwakoron te taeka ae e uarereke riki ni karokoa ae akea te bwai ae a ataia ni kaineti ma ana mwakuri aika a kamimi.” N tokina, e na nako mairouia te Tamnei, ao te Uea “e na anaa [Ana] taeka” mairouia naake a kamatoai nanoia, n ai aroia Reimwan ao Remuera. Ibukina bwa a reitinako ni kamatoai nanoia Reimwan ao Remuera, n rawa n namakina te Tamnei ae Raoiroi, ao n rineia n aki butimwaai ana taeka ao ana reirei tamaia ao Nibwaai, n tokina a totokoi koaua aika akea tokiia mairoun te Atua.

Ni kaitara aroia Remuera ao Remuera, e reitinako n nanorinano Nibwaai, n ukoukora ana kairi Tamnein te Uea. Ibukin anne, e kabebetea nanon Nibwaai te Uea. E taekinna Nibwaai bwa e bon “ tang nakon te Uea; ao noria e a kaoti nakoiu, ao e a kamaraua nanou n te aro are I a kakoauai taeka ni kabane ake e a tia n taekin tamau.” E buoka Nibwaai te Uea ni butimwaea, matata, ao ni kakoauai ni kabane kamimin te Atua ao Ana taeka. E a kona Nibwaai ni kateimatoa raonakina iroun te Tamnei ae Raoiroi.

Tera ae ti kona ni karaoia n aki kamatoai nanora?

Te moan, ti kona ni kakaraoa te rairannano ni katoabong.

E reirei ara Tia Kamaiu, “Ane e rairananona ao ma ni kawarai n aron te teei ae uarereke, ao N na butimwaia.” E reireia, ara burabeti ae tangiraki, Beretitenti Russell M. Nelson:

“Te rairannano boni kingin te rikirake. Te onimaki ae itiaki bon ngaia ae buokiira ni kawain te berita.

“Taiaoka tai maaku ke n tataona am bong n rairannano. E kukurei Tatan ngkana kam rawawata. … Waaki ngkai ni karekea te kimwareirei are e reke man katokan anua n aomata. E tangirira te Tia Kamaiu n taainako riki ngkana ti rairi nanora.”

Ngkai ti namakina te kimwareirei inanora ao kawaran te Uea, ti a riki bwa “ai aron te ataei, n ongeaba, n nimamannei, n nanorinano, n taotaonakinnano, n onrake n te tangira, ao n tauraoi ni butimwaei bwaai ni kabane ake e tangiria te Uea bwa e na karaoi, n aron te ataei ae ongotaeka nakon tamana.”

Te kauoua, ti kona ni kakaraoa te nanorinano.

Te rairannano ni katoabong e na uotii nanorinano nako nanora. Ti tangiria bwa tina nanorinano imatan te Uea, n ai aroia ataei ake a ongotaeka nakoia aia karo. Ngkanne ti na karekea n tainako te Tamnei ae Raoiroi iroura, ao nanora ana kamarauaki.

Ngai ma kainnabau, Sue, ti a tia ni kinaia te taanga aika a tamaroa inanon aua te ririki n nako. Ngke ti moan kaitibo ma ngaiia, te buumwaane bon te membwa ae boou n te Ekaretia, ao kainnabana e kakaitibo ma mitinare ni kamatebwaia te euangkerio. A mwaiti mitinare ake a kaitibo ma ngaia ni buokia n nakon Kristo. Ti namakinna bwa iai ingaingana n ana koaua n te euangkerio ao e ataia bwa e koaua te Ekaretia. E namakina te Tamnei n tainako n rokora ao e kakaonimaki n irii bootaki ni kabane. E tatangiria n reitaki ma membwa aika a tamaroa n te uoote. E ngae n anne, e kunea bwa e kangaanga bwa e na motika nanona n rin n te ran ni bwabetito. N te bong teuana e wareka Moronaai 7:43–44, are kangai:

“Ao riki, nooria, I taku nakoim bwa e bon aki kona n reke te onimaki irouna ma te kantaninga, ma ti ngkana e nimamannei, ma n nanorinano inanona.

Ao ngkana ngaia ao, [am] onimaki ao am kantaninga e bon matebuaka, bwa akea ma i ibuakoia ae butimwaeaki iroun te Atua, ma ti ngkana e nimamannei ma n nanorinano nanona.”

Imwiin warekan kiibu aikai, e a ata te bwai ae e riai ni karaoia. E taku bwa e a tia n ota n nanon bwainakin te nimamannei ao te nanorinano. Ma, e bon aki tau otana ni karekea te onimaki ao te kantaninga n ongeaba nakon ana tua te Atua. E na kanakoa imanonona ao wanawanana are i bon irouna. E na waaki n nanorinano rinanon te rairannano ae nako mai inanona. E a moanna n ota n te nanorinano n te taratara ni matan te Atua. E a katan iroun Tamana are i Karawa ao e tataro bwa e na kamarauaki nanona. Rinanon taian tataro aikai, e namakina te Tamnei ni kakoaua bwa Tamana are i Karawa e tangiria bwa e na bwabetitoaki.

Ni kauoman te buumwane ao te buuaine a tibwaia bwa ngke a kananorinanoia riki, e mwaiti riki ae a kona n oota iai n ana taeka te Atua, ao a kamarauaki nanoia n irii ana reirei ara Uea Iesu Kristo.

Te kateniua, ti kona n onimakina ao ni katan iaon ara Tia Kamaiu.

NIbwaai bon te banna ni katoto ae korakora n iriirakin nanona bwa e na kamarauaki man onimakinan te Uea. E reirei, “I a tia n onimakiniko, ao N na onimakiniko n aki toki. N na aki katoka au onimaki iaon te iriko.” N aron naba anne, n te kaotioti are e anganaki te Burabeti Iotebwa Timiti, e taku te Uea, “Katuka am onimaki n te Tamnei are e kairiko nakon karaoan ae raoiroi—eng, ni karaoa te motiraoi, n nakonako ma te nanorinano.” Ngkana ti onimakina te Atua ao a na bon boutokaaki n rawawataia, ma aia kaangaanga, ma karawawatakiia.

Ngkana ti rairannano ma nanora, nanorinano i bon iroura, ao n onimakina ao ni katan iaon te Uea, a na kamauraki nanora. Ngkanne e na kabwaroa Tamneina ao ni kaota nakoira kamimiin karawa. Ti na kakoauai ni kabane taeka are E reirei iai, ao e na kananoaki riki otara.

Ara tia Kamaiu, Iesu Kristo bon te banna ni katoto ae rianako n te nimamannei. N 2 Nibwaai 31:7, ti warekia, “E ngae ngke a ataia ae tabu, ao e kaotia nakoia natia aomata, bwa n ana tai ni maiu n rabwata ao e karinanoa imatan te Tama, ao e kakoaua nakon te Tama bwa e na ongeaba nakoina ni kaawakin ana tua ni kabane.” E ngae ngke e mimitong man kororaoi, E bon nanorinano i matan te Tama ao e ongotaeka nakoina ngke e bwabetitoaki.

N tokin maiuna n te maiu ae mamate, E anga nanona Iesu Kristo nakon Tamana man anaan te mwangko ae mao. Aio e karekea nakoina bwa E na ruru ibukin te maraki, ao ni wawanako raraana man bwangabwangan kunna, ao n rawaawata n te rabwata ao te tamnei.” E bubuti te Tia Kamaiu ngkana E “ na aki nimma te mwangko ae e mao, ao ni keerikaaki.” Ma, E taku “Te mimitong nakon te Tama, ao.[E] nimma ao ni katia [Ana] katauraoi ibukia natiia aomata.”

Tariu ao mwaneu, ti a tia n angananki te inaomata n rinerine n te maiu n rabwata. Ti kona n rineia ni kamatoai nanora, ke n rineia ni kamaraui nanora. Inanon maiura ni katoabong, ti kona n rineia bwa ti na karaoi bwaai ake a kaoa Tamnein te Uea bwa e na maeka inanora. I ataia bwa inanon rinerine aikai, iai te rau ao te kimwarerei iai.

Tia iriira ana banna ni katoto ara tia Kamaiu, Iesu Kristo, are e iriira nanon te Tama. Ngkai ti karaoia, e berita nakoira te Uea, “Bwa, noria, N na ikoikotiia n aron te moa aine ngkana e ikoikotiia natina i an baina, ngkana a aki kamatoai nanoia.” N aran Iesu Kristo, amen.