Bon te Kristo Ngkoe
(Mataio 16:16)
Ti tangiriia natira bwa ana kakoaua iroun Iesu Kristo, n nim nakon Iesu ao ana Ekaretia rinanon te berita ae tabu, ao n riki n ai aron Iesu Kristo.
Ngke e koraki aua n te moanrinan natira te mwaane ae Eli, kaain ana kiraati a katea aia tautaeka n kakekewe are e a rineaki iai irouia raona n reirei bwa te tia moti. Te bong teuana, e roko te tia moti man te 2nd District, e karinii oneana n tia moti i aon Eli, ao imwiina e karaoa te katuea ibukin aia kiraati. Aio are e a katika nanon Eli n ataei, n tangira kamatebwaian te tua, ao te Tia Anga Tua are, bon Iesu Kristo.
Imwiin ririki n mwakuri korakora, e a karekea te kakao Eli bwa e na intawiu ma teuana mai ibuakon taian reirei ibukin te tua are e tangiria n reirei iai. E taku, “Tinau, I titirakinaki 10 titiraki. E kangai te kabanea n titiraki, ‘Ko karekea iaa am atatai ibukin ataakin te eti ma te kairua?’ I taekinna bwa man tarakin rongorongon maiuia te botanaomata ao a tia n karekei tein nako rabakauiia n ataa te eti ma te kairua man kabotoan maiuiia iaon bannan te aonaaba ae okioki. Te banna n ataakin te eti ma te kairua are I uaiakina maiuakinana bon maiun Iesu Kristo. I taekinna bwa ngke arona bwa te botanaomata a maiuaikin Ana kabwarabwara Iesu Kristo iaon te Maunga, e na bon riki te aonaaba bwa te tabo ae tamaroa, man korakora te rau iai.” Ngke e bwara ana intawiu, ao e taku i bon irouna, “E aki kona n koro nanon mwiiu are ma ngke I uarereke. Akea man taabo n reirei aika a kan ongo taekan Iesu Kristo.”
Uoua te wiiki imwina, e a reke rinin Eli ao e buoka. Imwain rinna, ti kawara te kaawa n reirei. Te tabo n reirei ibukin te tua e tei kanga te baereti ao n toka i aon te tabuki ae kaitaraa te nei ae tamaroa tarakina. Te kamimi, bwa ngke ti a rinanon te tabo n tango boki man rinanon taabo n nakonako, tia norii baana ao atiibu aika mwakoro i aoia taeka man te Kabwarabwara i aon te Maunga.
Te Kabwarabwara i aon te Maunga bon te kabwarabwara ae te kabanea n kakawaki ae a tia n taekinaki, n matoa man ana reirei. Akea riki te kabwarabwara ae kona ni buokiira n katamaroa ara atatai riki i aon bannan Iesu Kristo, Anuana mai karawa, ao oin raoi bukin rikira n ai Arona.
E moanaki man mwengara aron te maiu n riki bwa Ana reirei ae akea tokina—ao n te Moanrinan ae moa man 18 te namwakaina. Ti tangiriia natira bwa ana kakoaua iroun Iesu Kristo, nim nakon Iesu ao ana Ekaretia rinanon te berita ae tabu, ao n uaiakina te riki n ai aron Iesu Kristo.
Kakoaua iroun Iesu Kristo
Te moan, kakoaua iroun Iesu Kristo.
Imwiin te kabwarabwa i aon te Bwerena ni Kamaiu, “e mwaiti ibuakoia ana reirei [te Uea]” a kunea kanganga butimwaean Ana reirei ao ana tua, ao a “kerikaki, ao a aikoa manga airiri ma Ngaia. Imwiina e rairaki Iesu nakoia uaake Tengaun ma Uoman ao n titirakiniia te titiraki ae kangaanga n te namakin: “Ao ngkami kam kan nako naba?”
E kaeka Betero:
“Te Uea, ti na nako n antai? e mena i roum taekan te maiu are e aki toki.
“… Ao ti kakoauako ao ti ataiko ba ngkoe te Kristo, are Natin te Atua ae maiu.”
N aron are e taekinna Betero, te kakoaua bon “karekean te onimaki iroun temanna ke butimwaean te bwai bwa e koaua.” Ao ibukin ara onimaki bwa e na kairiira nakon te kamaiuaki, e riai n kabotoaki iroun te Uea ae Iesu Kristo. “Ti … kammwakura te onimaki iroun [Iesu] Kristo ngkana iai te kakoaua bwa E maiu, [te atatai] iaon [koauan] bannana [ma Arona], ao te atatai bwa ti uaiakina te maiu ni kaineti ma Nanona.”
E taekinna ara burabeti ae tangiraki, Beretitenti Russell M. Nelson, “Te onimaki iroun Iesu Kristo bon aan ni kabane koaua ao karekean te mwaaka ae rietata.”
Ti na kanga n buokiia natira bwa ana kamatoa aia onimaki iroun Iesu Kristo ao n karekea Mwaakana? Ti riai n aki taratara nako ma ti a ti nakon ara Tia Kamaiu.
“[Te Uea] e taetae nakoia aomata, ao n taku:
“Nooria, bon Iesu Kristo Ngai. …
“Teirake ao nakomai nakoiu. …
“… A mwananga aomata ake a uanao, ma ni karin baia i rarikina, ao a namakina mwiin te neera i baina ao i waena; ao a bon karaoa aio, ni mwananga temanna i mwin temanna … ao n bon nooria n oin mataia ao n bon namakinna ni baia, ao n bon ataia raoi ao n kaota koauana, bwa bon ngaia.”
I kaoi ngkami bwa kam na iangoia bwa e na tera tarakin aio i nanon maiuia natimi aika kairake. A bon ongongo kakoaua iaon Iesu Kristo ma Ana Euangkerio? A bon nonori tamnei aika a karineaki, a neboa Ana mwakuri ao arona n Atua? A bon namakina man kinaa ana kakoaua te Tamnei ae Raoiroi ni kaota koauana ma rikina mai karawa? A ataa taekan Ana rongorongo ma ana mwakuri?
Katiteuanaaki ma Iesu Kristo ao Ana Ekaretia
Kauoua, katiteuanaaki ma Iesu Kristo ao Ana Ekaretia.
Ana botanaomata te uea ae Beniamina a rinanon te bitaki n te nano ae korakora ao man te berita ae tabu n kabanea maiuia nakon karaoan nanon te Atua. Ao ngkai ibukin te berita ae tabu are a karaoia ma te Atua ao Iesu Kristo, a “aranaki bwa natin Kristo, natina mwaane, ao natina aine.” Ngkai ngaira membwa n Ana Ekaretia Iesu Kristo ibukiia Aika Itiaki ni Boong aika Kaitira, iai katabeakira rinanon te berita ae tabu ni katea Abanueana ao n katauraoi imwain Okina.
Ti na kanga n buokiia natira n karaoi ao ni kawakin berita aika tabu? I nanon Nakomai, Iriirai n abentekiti A ao B, ti kunei moanakin marooro ma reirei aika a na kakorakorai utu ao n boutokaia taan reirei ao taan kairiiri n nakoaia aika tabu n katauraoaia aia ataei ibukin te maiu iaon kawain ana berita ae tabu te Atua.
Te Riki n aron Iesu Kristo
Kateniua, te riki n aron Iesu Kristo.
N Ana Boki Moomon, e kauringiia Ana reirei te Tia Kamaiu ake a boou bwa ana katotonga raoi nakon are a kona: “Aekan aomata raa ngkami? E koaua ae I tuangkami, kam na riki n ai Arou.”
Ti na kanga n buokiia natira ake a tia n bwabetitoaki man kamatoaaki n kakoroi nanon katabeakiia inanon te berita ae tabu n bobotiia ma raoia nakon Iesu Kristo? Te maiu n riki bwa ana reirei e kainanoira bwa ti na riki bwa … taan toua mwiin ana taeka, ao tiaki tii taan ongora.”
Ngkana ko kanakoi taian kakao nakoia ana reirei te Uea aika a rang uarereke, taiaoka ma karekei taai ni kairiia, nakonako ma ngaiia, ao ni buokiia ni kunea te Kawai. Marooro ma aika a uarereke man kakaawaki aikai n aia katauraoi n angareirei, kakoaua, tataro, ke n beku bwa aonga n nanomatoa ao n namakina te kukurei ni kakoroan nanon tabeia. Ukorii kawai mai karawa ibukin buokaia bwa a na karekea te atatai bwa aio aia Ekaretia ao iai tibwangaia ae kakawaki ibukin te katauraoi imwain okin te Tia Kamaiu.
Ngkana e riki Iesu Kristo bwa boton maiura, a na bitaki n aki toki bwaai ake ti tangirii, ao aron tangirana. Te rairaki e bitii bwaai ni kabane! E bitii arora “n te aro are akea iai te nano ni kan karaoa ae buakaka, ma te nano ni kan teimatoa n ti karaoa ae raoiroi.” E bita arora n kabongana ara tai, kaubwaira; bwaai ake ti wareki, ti nori, kakauongo, ao ake ti tibwauai. E bita naba arora n kaekaeka nakon intawiu ibukin te mwakuri n taabo n rabakau aika a kinaaki man rietata.
Ti riai ni kaota Otan Iesu Kristo n rinanon nako maiura. Ngkana ti aki kakakoaua koauan Rikina mai Karawa n te Maiu imwain aio, katabeana mai karawa, ao Mangautina are e uru-karabuuti inanon mwengara ao n boowi nako n te Ekaretia aio, a na akea ngkanne uaan ara rongorongo n tangira, n beku, n kokoaua, n nanorinano, n kakaitau, ao n nanoanga ao n riki bwa kanga ti taeka n kaunganano ibukin te maiu n iango. N akean Iesu Kristo ao bon akea te mwaaka n bitaki, akea te kaantaninga ibukin iangoan are iaona, ao akea te raunnano i nanon kanganga n te maiu aei. Ngkana ti kabwarabae n rikira bwa ana reirei Iesu Kristo, e na kona n riki bwa te kanganga ae bubura ibukiia natira.
Ngkana ti tuangiia natira bwa ti tangiriia, ti tuangiia naba bwa a tangiraki irounTamaia are i Karawa ao ara Tia Kamaiu ae Iesu Kristo? Ara tangira e kona ni karaui man kaungaia, ma Aia tangira e kona n kaitiaki, karietata, ao n kamarurung.
Iesu aio ae bon tiaki Iesu ni kakekewe, ke te Iesu ae bebete, ke te Iesu ae akea rabwatana, ke te Iesu ni mamanikangare, ke te Iesu ae aki kinaaki, ma e mimitong, moan te mwaaka, e mangauti, karietataki, neboaki, mwaaka Ana Rikitemanna te Atua, are e korakora ni kamaiu. Ao n aron ae kakoaua nakoiu te teei mai Biribin n te bong teuana, “Ti tau nakon te kamaiuaki!” N Arana ae rine man tabu “are e katereterea te Atua ba te karea” [ae korakora] ni kabwara bure,” Iesu Kristo, amen.