Karineakin Bwaai aika Tabu

N Te Otinako, ti ira Mote rinanon mwaruaruan Te Maunga are Oreba ngke e katikui tabeaiangana—te bwai ae ti ria ni bane ni karaoia—n noora te buakoako ae ura ma e aki bue. Ngke e keerake, “E weteia te Atua mai buakon te kai, ao E kangai, Mote, Mote. E taku, “Aei Ngai. E tuangaki iroun te [Atua], … buti am kau mai waem, bwa aontano ae tabu te tabo ane ko tei iai anne.” Ma te karinerine ae korakora, te nanorinano, ao ma te miimi, e buti ana kau Mote ao ni katauraoia n ongora ana taeka te Atua ao n mena Imatana ae Tabu.

Te taneiai ae tabu iaon te maunga ae onrake n te rau ae kamimi, e reita Mote nakon kinakina mai karawa, ao ni koauana, bon oin onikana man te tia kawakin man ae mangori nakon te burabeti ae korakora, ni kairia bwa e na nakonako i aon te kawai ae boou inanon maiuna. N aron naba anne, ngaira n tatabemaniira ti kona n rairi maiura n riki bwa Ana reirei nakon te banna ae rietata n te tamnei man karikan te karinerine ae tamaroa bwa mwakoron arora n tamnei ae tabu.

Te taeka ae karinerine e kona ni kairaki nakon te weabe n Ratine revereri,, are nanona “n tei ni mimi.” N te taratara n te eunagkerio, rairana aio e irekereke ma te namakin ke te anua ae korakora iai te karinerine, tangira, ao te kakaitau. Te aekaki n kabwarabwara aio ibukin bwaai aika tabu irouia ake iai irouia te nano ae raraoma man bane nakon te Atua ao Iesu Kristo e karikirakea te kimwareirei n tamneia.

Karineakin bwaai aika tabu bon te aro ae korakora ni kaotan kakawakin tamaroan te tamnei; bon uaan reitakira nakon baika tabu ao kaotan ara tangira ao kaniara ma Tamara are i Karawa ao ara Tia Kamaiu, Iesu Kristo. Bon teuana mai buakon taneiai aika kakukureia tamneira. Te anua n tamaroa aio e kairii ara iango, nanora, ao maiura nakon te Atua. Ni koauana, te karinerine bon tiaki ti mwakoron te maiu n tamnei; bon oina—aana are e kateaki iai te maiu n tamnei, ni kareka te reitaki ae onoti ma karawa, n aron are a reiakinna natira ngkana a anenea: “Ngkana I karinerine, I ataia I nanou / Tamau are i Karawa ao Iesu a kaan.”

Ngkai ana reirei Iesu ngaira, ti kaoaki bwa ti na karikirakea te bwaintituaraoi ae te karinerine inanon maiura bwa ti aonga n kauki nanora nakon te reitaki ae nano ma te Atua ao Natina, Iesu Kristo, ao ai arona naba ma kakorakoraan anuara n tamnei. Ngke iai inanora aekaki n namakin aikai, e na bon iai te kimwareirei ao te kukurei ae korakora inanon maiura, ao e na uarereke nnen te rawawata ma te nanokawaki. Ti riai n uringnga bwa kaotan karineakin bwaai aika tabu e oti n bwaai ake ti karaoi ni katoa bong ao n kakorakora namakinan te kakaitau—te miimi ae kaungaa nanom, karinerine, ao te tangira ibukin bwaai aika rietata man tabu.

Te kangaanga bwa, ti maeka n te aonaaba ae kaotan karineakin bwaaai aika tabu e a moanna n aki kakaraoaki. Ni koauana, te aonaaba e a tabe ni kukukurei n bwaai aika akea nanoia, n aron ae oti n te rongorongo n te maekatiin, burokuraem n te terewition, ke iaon te intanete. Akean karineakin bwaai aika tabu e karikirakea te anua n mamanikangare ao aroaro n aki ako, ake a kabaitiia bwakan te roro teuana nakon te ntaninganinga ao kabwakaan te roro are imwina nakon te karawawataaki.

Te aki karinerine e kona n kairiira nako man kabaeakira n ara berita aika tabu ma te Atua are e a kauarerekea te nano ni bukinaki imatan te Atua. Te bwai ae na riki, ti na rinanon te kangaanga ni bon ti tabeakin oin mwengaraoira; kakoroan oin nanora; ao n tokin te tai ti na roko n taabo aika aki tabu n ribai bwaai aika tabu; ao te Atua, ao te kangaanga ni kinaakira mai karawa bwa natin Tamara are i Karawa. Kakeaan karinean bwaai aika tabu e karikirakea kakoroan nanon te tia kakaitara n urua reitakira ni karekei kaotioti, aika kakawaki ibukin maiu tamneira inanon maiura.

Nanon ao kakawakin te karinerine ibukin bwaai aika tabu e kamataataaki raoi inanon koroboki aika tabu. Teuana te tai n Reirei ao Berita aika Tabu e taraa ni katerea bwa te karineakin Tamara are i Karawa ma Natina, Iesu Kristo, bon te anua ae kakawaki irouia ake ana karekea te abanuea ae te tiretio.

N te ekaretia ti kekeiaki ni kaota ara kabanea ni karinerine n te aro tabu nakon te Tama ma Natina n ara waaki nako, n raonaki ma arora ni kaota Aroia. Ana kairiiri te Tamnei ae Raoitroi bon te mwakoro ae kakawaki n aron ataakina bwa ana kangaa Aaro aikai n kaota aroia ae tabu, teia, ao anuaia n atua te Tama ma Natina. Ti tarataraia raoi bwa tina aki katamnei bwaai aika ana katikinakoira man oin boton ara iango iaon Tamara are i Karawa ao Natina, Iesu Kristo, ao Aia reirei, n raonaki ma arora n kaboonganai bwaai n ibuobuoki, n aron te rabakau n te intanete (AI) ni kaoti kanoana ma tamnei.

Te tua naba aio e kabonganaaki nakon rongorongo aika tauraooi rinanon ana bwai n reitaki te Ekaretia. Ni kabane reirei, boki, boki ni kaetieti, ao rongorongo a karauaki raoi n karaoaki man kariaiakaki rinanon ana kairiiri te Tamnei ni kaineti ma kateimatoaan tamaroana ae tabu, bonganana, ao ana kainibaire ana euangkerio Iesu Kristo. N ana marooro Unimwaane David A. Bednar nakoia kairake n ikawai n te Ekaretia e reireia aio: “Arora n reita te maiu n tamnei ma bwaai n rabakau aika boou, A riai Aika Itiaki ni Boong aika Kaitira ni bwaina te taotaonan nano ao te tataro n (1) n atai tuan te euangkerio ake a na kairia n aia tai ni kabonganai bwaai n rabakau aika boou ao (2) ni kekeiaki n ukora ana iraorao te Tamnei ae Raoiroi ao ana bwaintituraoi are te kaotioti.”

Tariu ma mwaneu aika tangiraki, n aron rikiraken tamaroan bwaai n reitaki, e bon aki kona ni kauekea te kaantaninga, miimi, ao te kubanako are kona n kuneaki man te karinerine are e reke man ana kairiiri te Tamnei ae Raoiroi. Ngkai ngaira ana reirei Iesu Kristo, ti riai n karaurau n taraia raoi bwa ti na aki kamemerea reitakira ma te Atua ao Natina man kabonganaan te AI n kaoti bwaai ma tamnei aika aki riai. Ti riai n ururingnga bwa onimakinan bwaai n reitaki n taai aikai “anganibain te iriko” a bon aki tau man aki riai n riki bwa onean mwiin te kairi mai karawa, te reirei, ao te kakoaua are ti kona ni karekeaki rinanon mwaakan te Tamnei ae Raoiroi. E taku Niibwai, “O te Uea, I a tia n onimakiniko, ao N na onimakiniko n aki toki. N na aki katoka au onimaki iaon te iriko.”

N te kaotioti teuana, te Burabeti Iotebwa Timiti e tuangkai bwa tembora ana kateaki nakon te Uea ao n riki bwa taabo n karinerine Nakoina Inanon ana mwakuri, ara burabeti ae tangiraki, Beretitenti Russell M. Nelson, e a tia n rangi ni katuruturua bwa a na rangi ni karinerine ara taromauri n te tembora ae tabu. Inanon ana auti te Uea, ti reiakinaki arora n rin nakon te tabo ae tabo imatan te Tama ma Natina. I aki toki ni kunea bwa ti tuangaki ao ni kaungaaki bwa te moan bwai are ti na karaoia n rinira n te tembora ma katauraoakira ni karaoi otenati aika tabu bon butan ara kau ao oneakira nakon onea aika mainaina. N aron Mote, ngkana ti iangoia raoi, ti kona n noria bwa man katikuan kaun te aonaaba bon te moan mwaneka n toua te tabo ae tabu ao n bitaki nakon kawai aika rietata man tabu.

Tariu ma mwaneu, ti aki riai n tamwarake nako taubukin te maunga, n aron are karoaia Mote, ni karekea te karinerine ibukin bwaai aika tabu ao n onikii arora bwa Ana reirei nakon kamatoaan maiura n tamnei ao ma te rairaki ae nano. Ti kona n karekea, n aron te katooto, ngkana ti uaiakina kamanoan mweengara man ana kairoro te aonaaba. E kona n kakoroaki nanon aio man te tataro mwaaka ae nako mai nanora nakon Tamara are i Karawa n aran Iesu Kristo ao ukoran ataakin ara Tia Kamaiu n ae tamaroa riki rinanon kamatebwaian ana taeka te Atua ake a kona n reke n koroboki aika tabu ao n aia reirei ara burabeti. N raonaki ma anne, bitakin tamneira e kona n reke ngkana ti keiaki ni karinea ara berita aika tabu ake ti karaoi ma te Uea man maiuakinan te ongeaba nakon Ana tua nako. Mwakuri aikane ana uota te rau ma te teimatoa i nanora. Kabotoan ara iango iaon mwakuri n aron aikai a na bon buoka bitakin mwengara bwa te tabo ae tabu ni katanan tamneira—taabo ni kamaomano aika onoti inanon te onimaki ae mena iai te Tamnei, n aron te maunga are e kawaria Mote.

Ti kona naba n karekea te aekaki n bitaki n te tamnei anne ngkana ti kakaonimaki n iriira te tataromauri n te Ekaretia, ao n raonaki ma rairan nanora nakon te Uea rinanon anenea anene n taromauri. Ni katannako—n aron Mote—man ana kairoro te aonaaba, moarara riki man ara tareboon ke bwaai ake aki kaineti ma tabun te tai aio, e anganiira te tai ni kabotoa ara iango nakon kanakin te toa, ma ara iango ao nanora aika bane iroun te Tia Kamaiu ao Ana mwakuri n kamaiu n raonaki ma ara berita aika tabu. Kabaneakin ara iango n te toa n aron aei e na karikirakea te karinerine n kaboouan reitakira ma te Tia Kamaiu ao n karika te Tabati bwa te bong ni kakukurei ao ni bitii maiura.

N tokin te tai, ti kona n karekea te bitaki n maiura n tamnei inanon rikira bwa ana reirei ngkana ti kateimatoaa te taromauri n maungan ana auti te Uea—ara tembora aika tabu—ni keiaki ni maiuakinan berita aika tabu ni koaua, riki ngkana ti aitara ma kangaangan te maiu ae mamate.

Ngai ma kainnabau ti a tia n karekei taneiai aika onoti ni maunga aika tabuinanon te karinerine ngkai ti keiaki ni kamwakurii tuua aika inanon maiura, are e a karekea te bitaki ae uaana ibukin rikira bwa ana reirei. I uringnga kanga ai aron ae riki ngkoananoa I rianna rinanon te tabo n ruanimate imwain taunan natira are te kauoman, are e aki korounana ao ni mate, ao buu e tiku n kamarurungnga n te onaoraki. I uringnga ae I tataro mwaaka nakon te Atua, n bubuti buokau bwa N na keiakina kataakiu. N te tai naba anne, I karekea te kaeka ae mataata man korakora n te tamnei inanou: a na nakoraoi bwaai ni kabane inanon maiura ngkana ngai ma kainnabau ti teimatoa, n taua te kimwareirei are e reke man maiuakinan ana euangkerio Iesu Kristo. Te bwai ae taraa ni kangaanga, karawawata n te tai anne e bitaki nakon te bwai ae tabu, te taneiai ae rine, boton buokan kateimatoaan ara onimaki are e a tia n anganiira te onimaki n ara berita aika tabu ake ti a tia ni karaoi ma te Uea ao n Ana berita ibukiu ma au utu.

Tariu ma mwaneu, karineakin bwaai aika tabu e karikirakea te kakaitau ni koaua, karababa te kukurei ni koaua, kairii ara iango nakon kaotioti, ao n uota te kimwareirei ae korakora nakon maiura. E katikui waera n tabo aika tabu ao n tabekirake nanora nakon te Atua.

I kakoauaa nakoimi bwa ngkana ti kekeiaki n anai aekaki n anua aika inanon maiura, ti na kona ni karikirkea te nanorinano, karababa ara atatai iaon nanon te Atua ibukira, ao ni kakorakora ara onimaki n bwaai ake a beritanaki n berita aika tabu ake ti karoai ma te Uea. I kakoaua bwa ngkana ti butimwaea te bwaintituaraoi ae karineakin bwaai aika tabu—tao n maungan ana auti te Uea, n te autinibootaki, ke n oin mweengara—ti na kona n kaonaki n te miimi ae akea kabotauana ao n kubanako n reitakira ma ana tangira ae kororaoi Tamara are i Karawa ma Iesu Kristo. I nanorinano n taekin koaua aikai n arana ae tabu ara Tia Kamaiu ao te Tia Kabooi Maiura, Iesu Kristo, amen.