Bwaai Aika Ti Noori Imatara

Tariu ao mwaaneu, I rangi ni kakaitau ni menau irarikimi. Ti tangiri ngkami, ti kakaitau ibukimi, ao ti namakina te kakabwaiaaki man ami tataro.

E taku Beretitenti Russell M. Nelson n ara kabane ni maungatabu ae nako: “Kam nooria ni matami bwa tera ae riki? I tataro bwa ti na aki kabua kakannaton te tai aei! E na kawaekoa Ana mwakuri te Uea.”

Kawaekoan Ana Mwakuri. “Kawaekoan” bon te taeka ae rangi ni kakawaki. E kaineti ma te kakamwakuri ni kawaekoa, kabirimwaaka, ao ni kabaitiiaki. N rikiraken te Ekareti ao ana babaire Kristo, ae e a waaki kabiitiian bwaai. Ao ti bane ni irekereke iai.

N Eberi 1834 i Kirtland, Ohio, e bootiia ni kabane ake iai irouia te nakoanibong Iotebwa Timiti inanon te auti n reirei ae uarereke tao 14 te buuti abwakina (4.3 te mita) tikuea. Ti kona ni kamenai tebwi ma uoua auti n reirei akanne inanon te Tienta ni Maungatabu, ao iai naba nikiran taian ruu. E taku Iotebwa Timiti, “Bon ti tabeman Nakoanibonga ae kam noriia n te tairiki aei, ma te Ekaretia aei e na kaona Meangin ao Maiakin Amerika—e na kaona te aonaaba.”

E kakoroaki bukin te taetae ni burabeti anne “n ae ti noria ni matara.” Ana Ekaretia Iesu Kristo ibukiia Aika Itiaki ni Boong aika Kaitira e rikirake kaaina ao utu, mition ao mitinare, autinibootaki, ao tembora, ao te kabaeara ao karinrin n ara tieminari, intitute, ao iuniwetiri ni kabane ni kabuta te aonaaba.

Ti kukurei ngkai ti maeka iaon te aba n tain rikiraken kaain te Ekaretia ao te anainano, ma ae kakawaki riki bon inanoia ao maiuia membwa. Ti kinaaki ae ngaira bon taan iriira Iesu Kristo. Ti tibwaua ara koaua Ibukina, Ana Ekaretia, Ana kawai, ao kawain Ana berita. Bon Ana aomata ngaira, ao bon Ngaia ara Tia Kamaiu.

I miimi n te bwai are e aranna Beretitenti Nelson ae “kakannaton— te tai aei” ao e kaota ana kakaitau ae nano nakon te Uea ibukin Ana mwakuri. I kaungaira bwa ti na teimatoa n ninikoria n aroia Ana reirei, taan kakoaua ni kakoroan bukin te taetae ni burabeti, n taai ake ngkoa ao n taai aikai.

Iai ake a tiribure ake a takarua ni kangai, “Taraia ikai ao … ‘taraia ikekei!’” n aron are a karaoia n ana tai te Burabeti ae Iotebwa Timiti. E ngae n anne, a na bon iai ao e na riki ma ti taeka aika a noraki inanon waakin te mwakuri ae kakannato aei. Uringa ana taeka te Burabeti Iotebwa Timiti: “Akea te bai ae kona ni katoka wakin te mwakuri; a na roko kakaitara, … ma koauan te Atua e na waakirake ni matoatoa, n rine, ao n inaomata, ni karokoa e niniia aaba ni kabane, ni kawari ni kabane taabo, n roko ni mwakoro nako, ao n tang inanon taninga ni kabane, ni karokoa ana mwakuri te Atua e na katiaaki, ao Iehova ae korakora e na kangai e a tia te mwakuri.”

Ni mwiokoau n te ririki aei, iai nakoau ibukin te Uea ni kawaekoan Ana mwakuri. E katei taian tembora te Ekaretia n te mwaiti ae aki nonoraki mai imwaina, ni karekei aia tai membwa n nebonebo inanon ana auti te Uea. Te kauoua, te mwakuri ni mitinare bon ikotaia aomata aika mwaiti nakon ana nanai ara Tia Kawakin Tiibu ae Raoiroi ae Iesu Kristo. Ao te kateniua, ana reirei te Ekaretia n aekakina nako a karaoaki n ae mwaiti n reireiniia naake a “ukoukora Iesu aio.”

N te bong aei iai 367 mwaitin ana tembora te Ekaretia aika baireaki, aika a kateaki, ke aika a bon mwakuri ngkai. Ao tera oin te kantaninga iai? Te kaeka e katanoataaki iaon tembora n tatabeua nako: “E Tabu bwa Ana Bai Iehova.” Te tembora e kauka te kawai nakon kakabwaia aika moan te rietaata mairoun Tamara are i Karawa ibukira n tatabemaniira nako. Tariu ao mwaaneu, ti kawaekoa arora n riki n tabu ngkai maiura a tau ibukin te tembora, ngkai ti nebonebo n ana auti te Uea, ao ngkai ti karaoi berita aika tabu ma te Atua ibon ibukira ao n tei ibukiia ara bakatibu ake ni iteran te rabuna are teiterana.

E taku Beretitenti Nelson: “Ana waaki n iowawa teuare e buakaka e waekoa n rikirake, n ae korakora ao n aekana nako. Kainanoan nakora nakon te tembora n taina ao taainako ae riai e bon aki tau. I bubuti ngkami bwa kam na tataromwaaka n iangoia bwa kam na kanga ni kabonganai raoi ami tai.” Inanon Ana auti, ti kona n namakina ae e raoniira te Uea ae moan te tabu ao te rau ae korakora.

N te ririki ae nako I anganaki tibwangau bwa N na tararua katabuan te Mendoza Argentina Tembora. N au rongorongo, I taekina ana taetae ni burabeti Unimwaane Melvin J. Ballard n 1926 bwa ana mwakuri te Uea e na karaurau n rikirake inanon te tai i Aberika Maiaki, “n aron te aroka ae te oke ngke e karaurau n riki man uaan te acorn. E aki ae e a bwebwerake naba n ti tebongina,” ma ngaa ma ngaa aika a na kaaina te Ekaretia, ao aban Aberika Maiaki e na riki bwa “te korakora inanon te Ekaretia.” I nooria bwa e kakoroaki bukin te taetae ni burabeti anne bwa e noria matau.

Mendoza, bon te acorn ngkoa ae rangi ni uarereke, ao e a riki ngkai bwa te oke ae moan te korakora. E okioki aron te rikirake anne ni kabutai aaba nako ao aban marawa.

Ti nooria bwa e kawaekoa Ana mwakuri te Uea inanon taian mition. N 2024, 80,000 mitinare a beku inanon 450, taian mition.a beku inanon 450 taian mition. Tenibwi ma onoua mai buakon mition akanne aika a boou. N te ririki ae nako ao te mwakuri ni mitinare e riairiia aomata ae riaon 308,000 membwa aika a boou nakon te Ekaretia. Ae riaon riki te mwaiti, tamnein te ikoikotaki bon uotakiia aomata nakon Iesu Kristo ao Ana euangkerio.

I tabe n iangoia Abotoro aika Brigham Young ao Heber C. Kimball, are n 1839 bon ngaiia ake a mwananga nako ni mitinare i aban Buritan. A rootaki n te mamaara; a kitaniia aia utu ake aoraki man rootaki n te maiu ni kainnano. Irarikin anne, uoman a tamwarakea te aenikaa, ao ngke a mena irarikiia aia utu aika a tangiriaki, e taku Heber, “Ti na waaki rake ao n anganiia te kukurei ao te ungannano.” A korakai n teirake i aon waeia ao a takarua, “Hurrah, hurrah ibukin Iteraera.”

I noora te ungannano ae aekan anne ibukin ana mwakuri te Uea i Lima, Peru, ngke I kaitibo ma mitinare n aia tienta ni kataneiai mitinare ao n taian mition i Lima. Ai kakukureira norakiia! I noora kawaekoan ana mwakuri i bon imatau raoi. Iai itiua mition ngkai ni kaawan Lima.

Imwiin kaitiboora, iai aia kakubanako mitinare ibukiu. A teirake ao a takarua, “Hurrah ibukin Iteraera.” N na bon aki kona ni mwaninga te tai anne; I iangoia bwa kam bon mena naba ikekei. “Te bwai ae I norii imatau” bon mitinare ake a kararoaia man “kaubwain te aonaba aio” ni beku ibukin te Atua ao n ibuobuoki ni kawaekoa te mwakuri ibukin Rokona.

Ti noora te Uea ngke e kawaekoa ni karekei taai n reirei ibukiia ara membwa ao naake tiaki naba kaain ara aro ni kabuta te aonaaba. Teuana te bwai ae ti tei n okoro iai n aron te ekaretia bon moanbwaian ao kakawakin te reirei. E tua te Uea ni boong ake ngkoa n tain Kaokan Bwaai bwa a na “ukoukora te rabakau, n te kamatebwai ao n te onimaki naba.” Anne ae e riki n te bong aei ao e materaoi takaruaan “hurrah.”

N te tai aei e riaon 800,000 mwaitiia ataein te reirei ni kabuta te aonaaba ake a kabaei araia n te tieminari ao n te intitute inanon rongorongon te Ekaretia. A ikotaki ara roronrikirake n aanga aika a kakaokoro man te moaningabong, inanon ngaina, ao n te tairiki ni kaei kiraati i aonrain ao n aia kamatebwai ni mweengaia. Bon taanga ni buaka aika a korakora man raoiroi, a karekei korakoraia ibon imarenaia ngkai a reiakina taekan Iesu Kristo, iriira, ao ni kakoaua Ibukina ngkai bon Natin te Atua.

N tain bwakan baanikai ae nako, I taetae n te bootaki n taromauri n te tabo ae onrake irouia ataein te tieminari ao te intitute ma aia karo n te Iuniwetiri i Utah. Rokoia e bon kaota nanoia ni kan ataa ao n iriira Iesu Kristo E rangi ni mataata au rongorongo nakoia ataein te reirei akanne: Kaboraoa te tai ae ko angan te Uea. I reireiniia bwa a na kabaeranta aia kamatebwai ma te reirei ae koaua ae rietaata, riki iaon kamatebwaian “Natin te Atua ae maiu.”

I titirakiniia naba aomata n taai aikai: Tera bwaai ae kam karinani ni kan karaoi kabooraoi taia, tiaki ti n reken am tai, nakon te Uea n am kamatebwai ae onoti ke n am utu ni koroboki aika tabu ao n Nakomai, Iriirai, tataro, ni weteam, mwakuri n ibuobuoki, kanakin te toa, nebonebo n te tembora, ao ni iangoan ana bwai te Atua. E taku ara Uea ao ara Tia Kamaiu “Reirei i Rou; … ao e na reke iroumi iai motikan rawan tamneimi.” Kakoaua Bwai bwa e Bon Taekin. Ao kaboraoa am tai ae ko Anganna.

E taku Beretitenti Nelson: “I bubuti ngkami bwa kam na kariaria te Atua bwa e na tautaekana maiumi. Anganna ami tai ae bati. Ngkana kam karaoa aei, kam na nora keeraken marurungin tamneimi.”

Ti noora rikiraken te tamnei anne n te tieminari, intitute, ao n ana iuniwetiri te Ekaretia. Inanon taabo aikai, e moanibwai te Uea ni bwaai nako. Ngaia are E riai ni memena inanon maiura n tatabemaniira nako.

Te tabo riki teuana are e kaota aron rikiraken te reirei n te Ekaretia bon te BYU–Pathway n te aonaaba ni kabutaa. Ni kabuta te aonaaba, e riaon te mwaiti ae 75,000 ake a kabaei araia ao e reitinako ao ni waekoa n rikirake. Angiina bon membwa, ao e riaon te katenimwakoro ake a mena i Aberika. Te pathway bon ibukin karekean ao reitan te reirei. Ngkana a bane am kooti nanona bon reken te mwakuri, ao reken te mwakuri nanona bon nakoraoin te maiu ibukiia utu ao tibwanga riki tabeua ni beku ibukin te Uea.

Ngke I kaitibo ma taan kairiiri n te titeiki i Uganda, I ataia bwa beretitentii n te titeiki ae bwanin a rin n te reirei n te BYU–Pathway. Ngkana ti tauraoi n te maiu n rabwata ao n te maiu n tamnei, ti na kona riki n tokanikai iaon ana mwakuri ni kamwamwane te riaboro. Uringa ana taeka Betero: “Ba e nakonako ami kairiribai are te riaboro n ai aron te raian ae bekorara n ukoukora ae e na ongnga.”

I ataia bwa ribuakon rongorongon te euangkerio ae raoiroi, iai koraki ake a korakai, ake a kataaki aia onimaki, a nanououa, ao aia titiraki ake a taraa n tuai ni kaekaaki. Tariu ao Mwaneu, Iesu Kristo bon te kaeka. Waaki ma Mangaia. Noora Baina ni mwakuri inanon maium. Ongo Irouna. “A na tai rawawata nanomi,” E taku n ana kabanea n aoa nakoia Ana reirei i Keketemwane, imwaain uouotan Ana kaibangaki rinanon kawain Ierutarem, imwaain rokona i Korokota, ike e karaoa ao ni katiaa ana anga karea ni kamaiu, are bon tii Ngaia, ana Rikitemanna te Atua, ae e kona ni karaoia.

Ataia bwa E ota. E katokaa Iaona ara bure, ara kairua, rawawatara, ao aki nakoraoin ara bong, bwa ti aonga ni manga maeka ma Tamara are i Karawa n akea tokina. E taku, “Tanimai nakoiu n ami iango n taai nako; tai nanououa, ao tai maaku.” Te onimaki iroun Iesu Kristo e kona n “tabekikorake” ao ni kamaoa uruakin nanom. Onimakinna ao ko na kawaekoa okim nakon “bain ana tangira n aki toki.”

I a manga katuruturua riki ana taeka ara burabeti ae tangiraki: “Kam noora te bwai ae riki ni bwaai aika ti nori imatara? I tataro bwa ti na aki kabua kakannaton te tai aei! E na kawaekoa Ana mwakuri te Uea.” Ti na riki bwa reirei ngaira inanon ara bong n takaruaea, “Hurrah ibukin Iteraera” ngkai ti katauraoi ibukin okin ara Uea ao ara Tia Kamaiu. N aran Iesu Kristo, amen.