Karekea Ana Bwaintituaraoi

Te anga te bwaintangira bon te katei ae bwainaki are e kanakoraoi ni kabane kateira, rikirakera, ao ara tai. N tainako, ao a tia aomata n anga bwaintangira bon imarenaia ni kakorakorai aia reitaki, kaota te tangira ao te kakaitau, ao ni bukamarui bootaki aika kakawaki n aron taian mare, koronririki, ao boong ni motirawa. Ao tiaki ti aomata ae a na karikibwai te Atua aika a na anga bwaintangira nakoia imarenaia! Ibuakon katooto aika a mwaiti n aroia ti kona n kainetia, benkuin aika a kona n anga atiibu aika raneanea nakoia raoraoia aika a tau, ao bonobos (ai tarin te mwangki) a anga uanikai bwa a na karababa aron aia iraorao.

Tera te bwaintangira ae ko a tia n anga? Iangoa te tai ngke ko kunea—ke ko karaoa—te bwaintangira ae moan te tamaroa ibukin temanna ae ko tangiria. Ko a tibwa ataia ae te bwaintangira bon te bwai ae moan te tangiria te aomata aei ao te bwai ae moan te kakawaki irouia. Tera te bwaintangira anne? Bon ibukin tinam? raoraom? natim? te tia reirei? tibum te unimwaane? E kanga aron am namakin ngke ko kunea te bwaintangira aei? Tera am namakin ngkana ko iangoa te aomata aei ae ko tangiria ni kauka te bwaintangira? N aron aei, n ningai ae e anganiko temanna te bwaintangira ae moan te tamaroa, ao e kanga aron butimwaeana iroum?

Ngke e nang koro itiua au ririki, ni maeka ma au karo i Arabia, ao aia birim ataei ae Chitty Chitty Bang Bang e a otinako. Te birim bon tamnein te kaa ae kamiimi bwa e kona ni kabutia bon irouna, beibeti iaon te ran, ao ni kiba naba! I ataa anne bwa ni mweengau i England a karaoa te kaa ae uarereke n aron Chitty Chitty Bang Bang, ao ngaia, anne ae I tangiria! Ko kona ni katika te bwee, ao bain te kaa te taore e na otinako! E nako tamau man ana tabo ni mwakuri nako England ao e tuangai ngkana iai te bwai ae n na uotia rikaaki ibukiu, ao I tuangnga ae I rang tangiria ni kan karekea teuana te aeka ni kaa ae te Chitty Chitty Bang Bang.

E oki man mwanangana, ao akea te kaa ae uotia. I rang n nanokawaki ao I taku n au iango bwa e mwaninga. Ma, 10 te bong imwiina bon au rekenibong, ao te bakete ae uarereke, ae kabaeaki n te kabae ae tikiraoi, e a kaman tataningaai. Ma te ingainga n nano ae korakora, n aki kona n tataninga, I kauka te bwaintangira ao I kunea au kaa inanona. E rootai te kukurei ngaia ae I a tang. I katika bwain kaukana, ao a otinaki baina, kanga titebo ma te kaa are n te birim! I kanga ni kaitaua au karo ibukin te bwaintangira ae moan te kakawaki aei. I takakaro ma te kaa anne inanon ririki aika mwaiti ao ni kawakinna ibukin ae mwaiti riki. I taku bwa e tangiria tamau n anganai te kaa anne ngkai e rang korakora tangirakina irou.

Ti kona n iangoa kanakoan te bwaintangira ni mwakorona aika teniua:

1. Aron kanakoan te bwaintangira, are e rineia, e karaoia, ke e katauraoa te tia anga te bwaintangira ao n angan are e mamate nanona irouna. E irekereke aei ma te nano ae tamaroa man ana itera te tia anga te bwai ae uaana.

2. Aron butimwaeana ao kaukakin te bwaintangira, ngkana te tia karekea e butimwaea te bwaintangira mairoun te tia anga—n tainako ma kaotan te mimii, te kakaitau—ao te kukurei imwain kaukakina, n tabetai kabwaran kabaeana ao ni kabwara te bakete ni ukora te bwaintangira are inanona.

3. Ao ngkanne iai mwakorona ae moan te kakawakiai, aron karekean te bwaintangira. Karekean te bwaintangira ae nako man te nano ae koaua bon te bwai ae raka riki nakon butimwaeana ao kaukakina. E raka riki, nakon, kinaakin bonganan te bwaintangira ao kaotan te kakaitau nakon te tia anga. Ni karekea te bwaintangira ma te koaua, ti kawakinna i bon ibukira kabongana n tainako inanon maiura, ao n uringnga ma te kakaitau nakon te tia anga.

Karekean te bwaintangira bon te mwakuri ae nako man te nano ao ni uaana, are e raka riki nakon ti kaukan te bakete. Ni karekeanabon te kakaitau ao te reitaki ma te bwaintangira ao nanon te tia anga n te kawai are e kakorakora te kabaeaki imarenan te tia anga ao te tia karekea. Iangoan te bwai n takakaro te kaa e kaoka rikaaki te uring ae rang kakukurei man kakaawaki, I a manga uring ana tangira ao ana akoi tamau ibukiu, are e tei ibukina te bwaintangira anne ao mwakuri n tangira aika a koro tirauaia.

Ana bwaintangira ae te ota ao te koaua Tamara are i Karawa aika mwaiti a kauraoaki bwa a na nurakinaki nakoira n tatabemaniira, Natina aika kakawaki. A nako mairoun Atuara ae akea tian ana akoi n aron te koburake inanon te tabo ae mau ae nako mai Nanona n akoi. “A bane angabwai aika raraoi ma bwaai n tituaraoi aika moan raraoi n ruo mai eta mairoun Taman taian oota.” Inanon kabaeakira n te berita ae tabu ma te Tama, Ngaia bon te tia Angaanga n tainako ao ngaira bon taan karekea n te nanorinano.

Ma akea te bwai ae ti kona ni karekea n akean ana kabanea n tamaroa ni bwaintangira te Tama, Ana Tiibu te Teei ae tangiraki, Natina Iesu Kristo. A bane n roko Ana bwaintangira Tamara ao a kamwakuraki man ana anga nano te Tia Kamaiu i Ketemwane ao iaon te kaibangaki ao ni Mangautina. Iesu Kristo, te Tia Kabooi Maiura ae akoi, bon te bwaintituaraoi mairoun Taman taian oota. “Ma e a tia te Atua ni katauraoa riki te kawai ae kororaoi riki [ibukira] iroun natina.”

I tangiria ni marooro iaon te bwaintangira ae bootii ni kabane koaua aika akea tokina ake a boutokai ara konabwai ni karekei ni kabane ake e tangiria Tamara ni katokai iaora—te bwai n tituaraoi n te ataibwai ae kakawaki, ae riai are ngkana, e butimwaeaki ao ni karekeaki ni matoa inanora ni iangoa te kimwareirei ao kangaanga n te maiu ao ara titiraki aika tuai kaekaaki: Bon aei bwa ngaira bon natin raoi te Atua E bon rang ni kamiimi te koaua anne! E kakubanako! Ao tiaki ae kanga te kabotau.

Iangoa ae ko a bon tibwa ongo aei n te moantai! Ngkami bon Natina aine ni koaua aika kam tangiraki. Ngkami bon natina mwaane aika kakawaki. Ao te kawai ae kam mena iaona bon Ana babaire ni kakukurei. N Ana tangira ae akea tiana, E ataiko imwain ae ko ruo nako aon te aba, baike ko a tia n rinanoi n te maiu aei, ao E a tia ni bairea arom ni boongi nako. Ao o, e ingainga Nanona bwa ko na oki nako Ina n te bong teuana, ni karekea tokin te kaantaninga n Ana bwaintituaraoi ni kabane aika tikiraoite maiu ae akea tokina ma Ngaia.

Te titiraki bwa tiaki n ae e koaua te bwaintituaraoi aei, ma tao ti na kona ni kunea ao ni karekea. Ti a kaman anganaki te bwaintituaraoi aei iroun te Tama. E a kaman tia ni kabwakaaki boon are bon oin te kantaninga n te bwaintituaraoi aei iroun te Tia Kamaiu. Ma ngkana ko a kaman tia n reireinaki, n taekina, anenea te koaua aei n ririki aika bwakanako, tao a na kaman tia ni bua kamimiin tamaroana ao ko aki kona n namakina mwaakana ao te rau mai iai.

Ngkana te bwaintituaraoi n te mataata—ao ni kabane te raoiroi, te rau, ao te kaantaninga ake a nako mai iai—a katukaki n aki butimwaeaki, n aki kaukaki, n aki karekeaki, ti kabuai tekeraoira! Bon te kananokawaki ibukiia Taan Angaanga! “Bwa tera kabwaian te aomata ngkana e anganaki te bwai n tituaraoi ao aki butimwaia/ Nooria, e aki kukurei n te bwai anne are e anganaki, ke ni kukurei iroun are e anganna te bwaintangira.”

I kaoi ngkami bwa kam na karekea tao n te moan n tai, ke nakon are kamwa tia ni karerekea mai imwaina, kinakim ae ngkoe bon natin te Atua ni koaua ae tangiraki. Ko riai ni kabwara te kabae, raeuaa kabaeana, kauka te bwaoki, ao karekea raoi ma te nanorinano ae korakora, ataakin raoi aan te koaua aei. E kona te Tamnei ae Tabu ni kakoaua nakon nanom bwa bon ngkoe natin Teuare Moan te Rietaata.

Ngkana ko butimwaea raoi te koaua ae rietaata aei nako nanom ao n namakina te rau ao te kukurei iai, e na bitaki arom ni kabane! Ko kona n namakina Ana tangira, ongo bwanaana, ao ni kinaa baina, n aki tabe ma te bwai ae riki,ke ae aki riki, i nanom maium. Ko kona ni manga bitia bwa ko kanga n taraiko ao n taraia tabeman. Reitakim n te berita ae tabu ma am Tia Kamaiu e na rangi ni matoatoa, ao rinanon tarakina man te bwai n tangira ae tamaroa aei, te maiu e na rangi ni boou, tamaroa, ao ma te kantaninga.

Taiaoka, ko kona n tataro bwa ko na ataia ngkana ko karekea te bitaki ni koaua n te atatai aei inanom? Taiaoka ko kona ni butimwaea te bwaintituaraoi? Ao ni karaoan aei e na kamwaitaki riki, n aki eenaki, ni karawataaki nakon are e reke iroum mai mwaaina—ao ni karaoan anne ko na kaonaki n bwaintituraoi ake tabeua ake a roko ma ngaia?

Ko na bae ni iango, “Tera ae I riai ni karaoia ni karekea te bwaintangira aei mai iroun te Atua?” Eng, kanga bon, akea. Bon te bwaintangira mairoun te Tia Anga. Anne bon te koaua raoi. Ti karinna iroum. Ngkoe bon Natina. Ko bon tangiraki Irouna. Tai karaoia bwa te bwai ae kangaanga. Tai totokoa karekean te bwaintituaraoi aei n iangoia bwa ko aki kororaoi iai. Te koaua iai bwa akea mai ibuakora ae “kanga ti tau ni karekei”—ni kabane Ana bwaintangira te Tama ake ti karekei ti manrinanon korakoran, ana nanoanga, ao ana akoi te Mesia ae Tabu, ma ai ingaingara nanona ibukiia Natina n tatabemaniia bwa ana karekei! Ngkanne, mataatam ae boou ke ni kaboouaki e matoa iroum, kukurei n anga te kakaitau nakon te Tia Anga te bwaintangira aei.

Imwin kunean au onimaki ngke 20 tabun au ririki, I a tia ni kunea raoi bwa bon ngai natin te Atua. Ni mwaitin te tai are I iango te bwaintangira aei inanou, e a tatao riki atakina bwa antai ngai ao e bwanin tangirakiu. Tabeua bwaai aika a tia ni buokai n rikirake ni mataata raoi bon taeka man koroboki aika tabu, au kakabwaia n tamanuea, te nebonebo n te tembora, buokaia aomata, kaotan te kakaitau, ao te tataro ae onoti ma Tamau. I mimi bwa e kanga nanokawakiu, marakiu, ao rawawatau ni maiu n tia ni kaman bitaki ao n rikirake ngke I a kaman ataa te koaua ae tikiraoi aei.

E kaungaira Moronaai bwa ti na “aki kaakeaa ana bwai n tituaraoi te Atua,” ma ti na “nakon Kristo, ma n taui bwaai n tituaraoi ni kabane aika raraoi.” Ko kona n nakon Kristo ma te koaua n Ana atataiaomata ao ni karekei ni kabane Ana bwaintituaraoi n te kimwareirei, te rau, te kaantaninga, te oota, te koaua, te kaotioti, te atatai, ao te wamawama—ma ni kaeta atuum, n taakin baim, ao arora baim n tauraoi ni karekea. Kam kona ni karekei bwaintituaraoi aikai ibukina bwa kam mano ao n aanaki ma te atatai ae ngkami bon natin te Atua aine aika kam tangiraki, ngkami natin te Atua mwaane aika ae kakawaki, ao n tia ni bwaintangiraiko ma Natina ae tabu ni kamaiuko, karaoiroiki, ao ni katabuko.

Bon ngkoe natin te Atua. Aio tiaki te anene ae tamaroa ae ti aneneia. Ko kona n taiaoka ni butimwaea, n ongo, ao ni karekea te bwaintangira n te wanawana ao te atatai mai Irouna? Ko kona ni kawakina ni baimatoaia bwa te kaubwai ae kakawaki iroum? Manga karekea te bwaintituaraoi aei, ke karekea n te moan tai, ao ni kariaia bwa e na bitii aron nako maium. Aio te kawai ae moan te tikiraoi ae e a tia ni katauraoia te Atua ibukim rinanon ana bwaintituaraoi Natina. Bwa kam aonga ni bon karekea te kimwareirei! N aran Iesu Kristo, amen.