Te Onimaki: Te Reitaki ae Tamaroa n te Onimakinaki ao te Kakaonimaki
E rikirake te onimaki ngkana ti onimakina Iesu Kristo ao n konabwai ngkana ti onimaki man kakaonimaki nakoina.
Ngke 17 au ririki, I karaoa te boraraoi ma raoraou ae José Luis bwa N na reireinna n uaua. Ngaia are n te ingabong teuana ti kabanea ara tai ni kataneiai. Ngke e a bwara ara reirei ao ni kitana te tabo n uaua, I ongo takaruan raoraou ibukin buokana. E a bwabwa ni inaako n iteran te tabo n uaua are e nano.
I kibara nanon te ran ao n uaua nakoina ao I tataro ibukin te buoka. Ngke I taua baina ni katikia nako eeta i aon taari, e tamwarakea aon nuukau raoraou arei ni inimaki ike e a bono iai ikeu. Ngkai tia kaai ni bwabwa ao ni iinako. Ngke I kataia n roko ieta, I tataro ma nanou ni kabane ibukin te kakai mairoun te Atua. Ngkanne, ni karaurau ma ni korakora, e kaotaki mwaakan te Atua ngke I namakina te bai ae kookai nakon tabon te tabo n uaua are e oora, n uotiira ni kamaiuiira.
Te bwai ae riki aio e kamatoaa kakaawakin te reirei are e reireia ngkoa Beretitenti Russell M. Nelson: “Ngkana ko ukora mwaakan te Uea ni maium n aiaron te tinebu are iroun te aomata ae bwabwa ngke e kakaea man kakaea te eea, e na riki te korakora mairoun Iesu Kristo bwa am bwai.”
Nakoia ataei ao kairake, I kan maroro ma ngkami ngkai ibukin kakaawakin te reirei i aon te onimaki iroun Iesu Kristo.
Te Onimaki iroun Kristo Nanona bon Onimakinana
Tera ae nanonaki n ae iai am onimaki iroun Iesu Kristo? Tera ae nanonaki ae ngaira ti onimakinna ke iai ara koaua bwa bon iai Ngaia? Tao anne moanakina, ma e raka riki nakon anne. Ko a tia ni iaiangoa te onimaki bwa te onimakinaki? Iangoa temanna ae ko rangi n onimakinna—tao kaain am utu ke raoraom. Bukin tera ko onimakinna? Tao bukina ko a tia n noora teimatoan aia tangira ao ibuobuoki.
Ngkana iai ara onimaki iroun Kristo, ti kinai Ana kakabwaia ao ni karikirakea ara onimaki ma Ngaia.
Ko na Kanga n Karikirakea Am Onimaki iroun Kristo?
N aia taromauri kairake ae nako, ko kaoaki bwa ko na “iangoa te tai ni maium ngke ko karekea te ota mai karawa. Kataa karaoan aei!
Moanna man iangoan raoi taekan Kristo ao te kukurei man Ana mwakuri ni kamaiu ao te euangkerio ake a roko nakon maium. Taua naba mwiin “urungakin kairiiri n tamnei” ngke e mena iroum te Atua, irouia ake ko tangiria, ao irouia aomata ake ni koroboki aika tabu. Ngkai, a na aki uoti korakora nakon maium kakoaua aikai ni karokoa e buokiia te Tamnei bwa a na “uringnga raoi” i nanoia. Ngaia are iangoia raoi ao kawakina mwiin are e bairei te Atua ni kabane ibukin kakai aikai bwa a na roko raoi n taia.
Imwiina, karaoa te waaki aei bwa te tai ni kaaniko nakon te Atua. Tataro nakon Tamam are i Karawa n aiaron ae ai tibwa te moantai. Kaota raoi am tangira ao am kakaaitau ibukin Ana kakabwaia. Titirakina ana namakin ibukim ao ibukin te kairiiri ibukin maium.
Ngkana ko nanonna ao n nanorinano, ko na ongo Ana kaea ao ni moana te reitaki ae koaua ma Tamam are i Karawa ao Iesu Kristo. Tiaki ti anne, ma e na ota raoi anuam ae raorioi! N aron aei, ko na kan tataro, kamatebwai, ao te taromauri n te tembora bwa te tai iroum ni kinaiia ao n kaitibo ma ngaiia.
E Kaai n Rikirake te Onimaki ma te Kakaonimaki
Ataia bwa e rikirake te onimaki ngkana ti onimakina Iesu Kristo ao n konabwai ngkana ti onimaki man kakaonimaki nakoina. Ngkana ko tangira te reitaki ni koaua ma Kristo, kaotia nakoina man karaoan berita aika a tabu ao karineakiia ma te kakaonimaki. E karikirakea te kaantaninga karaoan berita aika a tabu ma Iesu Kristo. E karikirakea te onimaki karineakiia.
N na kaota te katooto: Ngke te ataei ngai, N te bong teuana I kunea tinau n tang n ti ngaia. Ngke I titirakinna bwa bukin tera e tang, e taku ni karaurau, “I tangiria bwa ko na riki bwa te ateinimwaane ae tamaroa.” E ngae ngke I ataia bwa tiaki ngai bukin nanokawakina, I tangira man onimakina tinau n akea riki irarikina ao I tangiria ni kakeaa rawawatana. Ma rarin matau ao ana nanoanga te ataei ae ruaiua ana ririki, I berita nakoina n te bong anne bwa N na kekeiaki n taainako bwa te nati te mwaane ae tamaroa bwa e na kakatonga iai.
Ko kona ni iangoa korakoran te berita anne—ae e teimatoa—irou?
E kaira maiu au berita anne nakoina. Imwain karaoan babaire, I iangoia bwa e na kakukureia au mwakuri ake N na karaoi. Te reitaki n te berita ao te reitaki ma tinau bon boton au mwakuri i nanon maiu.
Ririki imwiina, I a kina raoi riki Iesu Kristo, I a tia n ata aron au onimaki irouna. I karaoa te berita ae tabu ma te Uea, ao ngke I a ukora karineakiia, E kabwarai au bure, kaira maiu, ao ”e kaonai ma Ana tangira” ni kaona nanou. E karinna i nanou Kristo te tangira ae nano, karinerine, ao te kakaonimaki i Bukina.
Ko ota bwa bukin tera te onimaki bon reirein te mwakuri, ao bwa n “akean te onimaki ko bon aki kona ni kakukureia te [Atua]”?
N am tai ni karaoi bwaai ae kukurei iai, ko na taekina are e taekinna Iotebwa i Aikubita ngke e kaririaki iroun buun Barao: “N na iranna iai ni karaoa te bure ae abwabwaki aei, ma ni bure nakon te Atua?” Ao ngkana ko kaitaraaki ma te kakaaitara, ko na taekina aron are e taekinna te Burabeti ae Iotebwa, “I ataia, ao I ataia, bwa te Atua e ataia, ao I aki kona ni kaakea … I ataia bwa man karaoana N na kamatauninga te Atua.”
Ngaia are te onimaki iroun Iesu Kristo bon te reitaki n te onimaki ae karaoaki ma te onimakinaki ao te tangira. Taekana teuana, kakaaitau n ana tangira n nanoanga te Atua (hesed), ti kaota te tangira (emunah) man kawakinan Ana tua nako.
E berita Kristo, “Ane iai i rouna au tua nako, ane e tau … e na tangiraki i roun Tamau, ao Ngai N na tangiria, ao N na kaotai nako ina.” Ngkana ko kan onimakinaki i Rouna, E na kaota Ana tangira ibukim.
Te Onimaki n Kaitaraan te Kaririaki
Ma ko na kanga n kaitarai aron kaririaki are e kainnanoa Ana kakai? Ngkai a riiriki kangaanga ao ni kakaamaku n tabetai, ti nakonako ma te aki maaku Nakoina, n aiaron ana kakao te botoniango n te maungatabu n te FSY 2025: “Tanimai nakoiu n ami iango n taai nako; tai nanououa, tai maaku.”
Ko Na Kanga n Nakonako n Aki Maaku Nakoina?
Iangoia bwa te tia mwamwananga ngke n te tabo ae aki ataaki arona. Ko kainnanoa te oota, n tokanikai i aon kangaanga ake i mwaaim. Am kakaonimaki nakon te Atua ao reitakim ae teimatoa ma Ngaia bon bwaan am taura. Ngkana ko kaitara ma te roo ao waaki aika a kangaanga, n aki nakonako ni mataki nako iai, ko na kaura am taura ae onrake n bwaana ae te onimaki iroun Kristo . Arom ngkoa ana karikirakea am kaantaninga are e na kateimatoako iai te Uea i aon kawaim.
A Na Mwaitira Am Kaantaninga ao Am Onimaki iroun Kristo?
Ko uringa au karaki n te tabo n uaua? N te tai ni kangaanga anne, e roko te kakai n te aro ae I kaantaningaia, ma e aki baireia te Atua bwa e na roroko n taainako n aron are ti tangiria. E na riai n boboto ara onimaki iroun Kristo ao ara kantaninga n Ana kakabwaia, ngkana E rineia ni karokoa nakoia. “Kaantaningai kakai,” ma “angan te Atua te tautaeka i aon maiura.”
E Berita te Atua nakoia Ana Botanaomata aika a Kakaonimaki
Raoraou kairake, ti tangiri ngkami ao n onimaki iroumi! Ko kaaina ana utu te Atua ao ngkami naati n te berita ae tabu. Kakoauaa ao onimakina Iesu Kristo. E na karikiko ni koaua bwa ko na riki bwa Ana reirei.
I kaoko man te bong aei bwa ko na ribanaa raoi am reitaki ma Iesu Kristo. Karaoa am motinnano bwa ko naaki mwanuokinna
Am kakaonimaki, tangira, ao am onimaki iroun Kristo e na bita anuam ao kinaakim n ai Arona. Ko na karekea nanomatoam ao korakoram n tokanikai i aon ana buaka Tatan. Ao ngkana ko karaoi kaairua, ko na kainnanoa Ana kabwarabure. Kabaneana, e na otamwaaka am kaantaninga ibukin taai aika a na roko. E na onimakiniko ma mwaakana ni kakoroa bukin bwaai ake E kaantaningaia mairoum, ae te mwaaka n okirikaaki Nakoina.
I kakoaua nakoim te kimwareirei are e roko man anenean “anenen te tangira ni kabomwi” ao ni “katobibiaki ni bain ana tangira n aki toki .” N aran Iesu Kristo ae tabu, amen.