Te Tangira ae Kororaoi—Kanikinaean Iriirana ni Koaua

Te reirei bon te tia ririmwii ke ana ataei temanna. Taian reirei bon “taan reireiaki” aika a kabanea maiuiia n riki n ai aron aia tia reirei. Ma, te riki bwa ana reirei Iesu Kristo e kainnanoa ae raka riki nakon ti kakoauaan Ana angareirei ma ana reirei. E kainnanoa ae raka riki iaon ti kakoauaan Rikina mai karawa ao Butimwaeana bwa ara Tia Kamaiu ao te Tia Kabooi Maiura, ae kakawaki n aron anne.

E kabwarabwara Beretienti Dallin H. Oaks: “Iriiran Kristo bon tiaki te kabwarabae ke te taina n tai. Bon te motinnano ae reitinako ao te katei ae e na kairiira n taainako ao n taabo nako.” Iriirana bon te mwananga ae e na karaoaki raoi ae ti na karaoia n bitira rinanon ana mwakuri ni kamaiu te Uea ao Mwakaana ae kamaiu. Tokin kawaira ni koaua n iriirana bon te riki n ai aron Iesu Kristo—riki ngkana ti a karekea “tein tarakina i [moara].”

Ngkana ti riki bwa ana reirei te Uea, ti riai n katotoongii raoi Ana iango ma ana mwakuri ni katoa bong—te katooto, Ongeabana, nanorinanona, ao taotaonakin nanona. Ngkai ti karaua ni karinii anua aikai nakon oin aron kinaakira, ti riki bwa taan “buokanibwai n [Arona] n atua.” Te mwakuri ni katootonga anuan te Tia Kamaiu aio bon boton Neboana. N aron ae reireiniira Beretitenti Neslson, “Te kabanea n tamaroa n ara karinerine nakon Iesu bon ara katoto ibukin Iesu.”

Man anuan Iesu Kristo aika ti na katootongi, teuana e tei n raka man rabwatanii ake nikirana. Te anua anne bon Ana tangira ae itiaki, ke te tangira ae kororaoi. A kauringiira te burabeti ae Moomon ma te Aboroto ae Bauro bwa n akean te tangira ae kororaoi,“bon akea [ngaira].” Ke, n aron ae kaotaki iroun te Burabeti Iotebwa Timiti, n akean “te tangira ae kororaoi, [ti] aki kona ni karaoa te bwai teuana.”

Te Tia Kamaiu e kanikinaea te tangira bwa te banna ke te kanikina are taan Iriiria a na kona ni kinaaki iai ngkana E taetae:

“I anganingkami te tua nabangkai, bwa kam na itangitangiri; n ai arou ngke I tangiringkami, bwa kam na itangitangiri naba.

Ane a na ataingkami aomata ni kabaneia ba au reirei ngkami n aei, ngkana kam i tangitangiri ”

Te tangira ae kororaoi bon te kaantaninga ae kangaanga aron kabwaranakoana ma e bebete rekena irouia ake a boo iai. Tataekina Au Euangkerio e reireiniira bwa “te tangira ae kororaoi, ai aron te onimaki, e kairiiri nakon te mwakuri.” E koaua, te tangira ae kororaoi e kona ni kabwarabwara bwa te “tangira ae kakamwakuri.” Te kabwarabwara aio e anganiira te oota ae bati iaon kakimototoan rongorongon maiun te Tia Kamaiu—“E nakonako ni kakaraoa ae raoiroi.”

Ngkai ngaira taan iriira Iesu Kristo, ti ukora katootongan te kawai are ara Mataniwi e kaota Ana tangira ae itiaki ibukiia tabeman. E ngae ngke e kaota te tangira ae kororaoi n angaa aika bati te Tia Kamaiu, I tangiria n katerei teniua bannan Ana tangira ae kororaoi ake a nonoraki irouia Ana reirei ni koaua.

Te moan, e kaota te tangira ae kororaoi te Tia kamaiu man maiuna n nananoanga. Inanon Ana mwakuri ibuakoia Nibwaite, n aron ae koreaki n Ana Boki Moomon, E tuangiia aomata te Uea bwa a na okiri bataia man iangoi taeka ake E a tia n taekin ao ni katauraoi raoi Imwaina nakon te ingabong. N te rongorongo ao e koreaki:

“A bon tang, ma ni kateimatoa aia taratara iaona n te aro are kaanga a na tuangnga bwa e na tiku riki teutana irarikiia.

Ao e taku nakoia: Nooria, e a onrake nanou n te nanoanga ibukimi.”

Te nanoanga bon mwakoron te tangira ae kororaoi are e ukora kabebetean te rawawata. Ngke e onrake n te nanoanga, E katokii aorakiia aoraki ma ake a rotaki. Imwiina, E kakabwaiaia natiia ao a ruo mai karawa anera ao n otabwaniniia. E karaoi mwakuri n akoi man tatangira aikai, ao a bati riki, bukina bwa E “nanoangaia.”

N au tai ni beku ngke te kairake ni mitinare i Amerika Maiaki, ngai naba I kakabwaiaaki man ana nanoanga temanna raoraou. Te tairiki teuana ngke I buti nakon mwengan ara beretitenti n te mition, e a bon buti naba n ana bwatika te ataeinimwaane i moan te kaa. E kakubanako kaotina n te aro ae bon akea au anga n totokoa te kurati. Te kananokawaki, bwa e mate te mwaane aio ngke e kuratinaki. I rootaki n buan maiuna. E rootai te maaku ma te kubanako n te bwai are e riki, I katikaki nakon te matawariki ao n kabureaki. Akea te tai ae I a tia n namakina te maaku ma te maroaa n aron te tai aio. I onrake n te bwarannano ma te maaku n iangoan ae N na kabureaki ni uaa tokin maiu.

Te mitinare temanna, ae Unimwaane Brian Kochever, e ongo taekan te kabuanibwai aio ao e nanoangai. E kawara te karabuuti ao n bubutiia bureitiman bwa a na kariaia bwa e na rin irarikiu n te matawariki bwa I aonga n aki maroaa. Te kakubanako bwa, a kariaia. Ni karokoa te bong aio, I namakina te kakaitau ae korakora ibukin ana mwakuri n tangira Kristo, are e uota te rau, e karaua nanou, ao n karauai inanon te tai ae korakora iai te rawawata inanon maiu. Ana nanoanga ae kororaoi e kaota kanikinaean maiuna bwa te reirei ni koaua ngaia iroun Kristo. N aron ae taku Beretitenti Russell M. Nelson, “Teuana te kawai ae moan te bebete ni kinaan te tia iriira ni koaua Iesu Kristo bon aron te aomata anne ni mwannanoia aomata ake tabeman.”

Te katooto riki teuana iaon aron te Tia Kamaiu n kaota Ana tangira bon rinanon Ana taratara ma mwakurian kainnanoia aomata aika a raba. Nakon te mwaane are 38 ana ririki ae wene n aoraki ao n akea ae buokia, e tabekakirake ao e kaungaaki iroun te Uea bwa e na maiuakin ae raoiroi. Nakon te aine are e kuneaki n wenenibure, E anganna te kaantaninga ao te karaunano ao tiaki te motikitaeka. Nakon teuare e nakibaina are e karuoaki mai taubukin te auti, e anganna te Uea kabwarakin ana bure, tiaki ti kamarurungan rabwatana.

Ngke I weteaki bwa N na beku bwa te bitiobi, a kakarekea te aki arau natiu ake onoman nakon kainnabau ae Cristin n tain te toa, are e na taraia n ti ngaia ao ngai N na tekateka i moa. N aron ae kam kona n iangoia, natira aki kona n rau. Norakin ana kangaanga kainnabau aei, uoman membwa n ara uoote, John ao Debbie Benich, a tetekateka irarikina ni katoa Tabati n buokia. Aia akoi aio e reitinako inanon ririki aika bati, ao a riki bwa bonomwi n tibu nakon ara utu. N ai aron te Uea, taan Iriiria aikai a nora te kainnano ae raba ao a mwakuriia ma te tangira—te kanikina ae korakora n maiuia n Iriiria.

Te kabanea, ana tangiria ae kororaoi te Tia Kamaiu e boboto iaon kakorakorakiia natin te Atua ni kabaneia ni kona ni kakoroi nanon kinakiia mai karawa bwa ti aonga ni “karekea ana kamaiu, ma mwaakan ana kabomwi.” Ngkai ti tabe n riki n ai aron ara Mataniwi, e na rikirake nanora n buokiia tarira ma mwanera iaon kawain te berita ae tabu.

N arona teuana, ti na kona n tabekiiarake ao n raoniia ake a namakina te bwainrang ke mwanuokinaki taekaia, buokiia ake a boou nakon te taromauri bwa a na namakina te butimwaeaki, ke ni kaoia raoraora bwa a na taromauri ma ngaira n te bootaki n toa—tao nakon te Itita ae uakaan aio. E mwaiti aanga aika ti kona n kaungaia man buokiia iai tabeman inanon aia waaki ni kekeiaki ngkana ti iangoia raoi ao tataro n ukora te buoka mai karawa ni kaureaki matara ao te nano n namakin n aiaron ae noria man namakinna Iesu Kristo ibukiia.

Buokaia tabeman iaon kawain te berita ae tabu e kona n roko n tein te mwakuri n ibuobuoki ae aki kantaningaaki. Te katooto, inanon au beku ngkai i Biribin, I ongo taekan te utu ae Agamata. A bwabetitoaki n 2023, ao a rinea bongin namwakaina are e na kabaeaki iai aia utu n te Urdaneta Tembora i Urdaneta. Ma, imwain aia tai te utu, e a oreaki aia tabo n te angibuaka. Te Tari Agamata, te tia uniki raiti, e aki kona n unikii arokana n tain te angibuaka. Ngke e a toki te angibuaka, e nang riai n kabaitiia n unikii ana raiti ngkai e aomwaimwai aontano—nakoraoi ibukin te unuuniki. Te kananokawaaki, bwa e nang taonaki mwanangaia nakon te tembora.

Uoman taan Iriiria, Unimwaane ao Titita Cauilan, n raonaki ma teniman mitinare, a ongo taekan aia kangaanga te utu ae Agamata ao a anga baia n ibuobuoki e ngae ngke akea rabakauia n unuuniki. N te mwakuri iaan kabuebuen taai, a kabwebwei koraan aroka, a buoka te utu ae Agamata n katiaa tabeia ao a kabaeaki n te tembora n aron are e a tia n baireaki taina. E nooria Unimwaane Caulan bwa “[te utu ae Agamata] e oota moaia ngke ti noriia n bwai mainaina n ana auti te Uea. Akea kabotauan te kimwareirei are ti namakinna n buokan temanna!”

A karekei kakabwaia aika bati te utu ae Agamata man kabaeakiia bwa te utu ae akea tokina bukina bwa tabeman taan iriira Kristo a onrake n te tangira ae kororaoi—kanikinaean maiuia n Iriiria—a tangiria n buokiia tariia ma mwaneia iaon mwanangaia iaon kawain te berita ae tabu.

Tariu ma mwaaneu, rikira bwa ana reirei Iesu Kristo bon ti kawain kareken te kukurei ae teimaan. Bon te kawai ae kaonaki ma mwakuri n tangira aika karaoaki man iangoaki raoi ibukiia tabeman. Ngkai e kangaanga man matoatoa kawain te riki bwa ana reirei Iesu, n taai tabetai ti na kona n rawawata man kabwaka, ti kona n karekea te rau n nano bwa te Atua e atai arora ao n tangiria n buokiira ni katoa tai. E kauringiira Itaia bwa te “Atua e na e na taua [baira] te atai, ni kangai nako imi … , Tai maku; I a buokiko Ngai.”

Ma te kakoaua aio mairoun Tamara are i Karawa n tiku n ara iango, I tataromwaaka bwa ti na ira nanon ana kakao Bertitenti Nelson n moanibwaia iriiran Kristo. Ti a “tataro nakon te Tama ma korakoran nanomi” bwa “e na kaonaki n te tangira aio, are e a tia ni katoka i aoia ni kabane ake taan irira Natina, Iesu Kristo; … bwa ngkana e kaoti ti na riki n arona,” bukina bwa ti uouota kakinikaean iriiran Kristo ni koaua, ae te “tangira ae kororaoi … ana tangira ae itiaki Kristo.”

I kakoaua bwa Iesu Kristo ara Tia Kamaiu, te Tia Kabooira, Banna ni Kakairi ao te Rao ae mimitong. N aran Iesu Kristo, amen.