Ana Tangira te Atua

N te tiamwa teuana n mwanangara n te aono ae tionako, a matu au utu n te tairiki itinaniku iaan karawa ae aki uanangnang. Ae itiaki ao e kona n nooraki raoi ietara bon te Milky Way ae koro tamaroana, ae onrake ni itoi aika bati ao tabeua itoi ake kanga a bwaka rikaaki. Ngke ti tabe ni miakina kamiimin ana kairikibwai te Atua, ti namakina ara reitaki ae rau Mangaia. Natira aika a uarereke, ake a ikawai i Hong Konhg, a bon tuai n rinanon aei mai imwaaina. A titiraki n aki karabai nanoia ngkana ti maeka iaan te karawa ae airon aei ni mweengara. I kataia ni kabwarabwara nakoia ae bon titearona aekan karawa, ma ibukin barekan te eea ao te ota ike ti maeka iai a tuukira man noorakin itoi aikai e ngae ngke a bon mena ikekei.

A reireiniira koroboki aika tabu bwa “te onimaki bon te aki nanokokoraki nakoni baika kantaningaki, kakoauani baika aki noraki.” Ngkai a kona bwaai ni kabwakabwaka ma kariiri ni kamangaoa ara taratara n tamnei, ngkana ti kammwakura ara onimaki iroun te Atua ao Natina Iesu Kristo, ti na karekea te atatai ae itiaki bwa bon iai Ngaiia ao A tabeaianga ibukira.

N ana Boki Moomon, te burabeti ae Riaai e noora “te kai, ae kangkang uaana ae na kakukureia te aomata” ao “karewerewen uaana e riaon karewen bwaai nako.” Ngke e katoonga uaan te kai, e kaonaki tamneina ma te kimwareirei ae korakora, ao e tangiriia ana utu bwa a na katoongnga naba. Ti ataia bwa te kai aio e tei ibukin “ana tangira te Atua,” ao n aron Riaai, ti kona naba ni karekea kimwarerein ana kakoaua te Atua ngkana ti kaoa nakon maiura.

E tei Iesu Kristo bwa ana tangira te Atua ibukira. Rinanon Ana anga karea ni kamaiu, E katoka Iaona ara bure ao e ikoaki rabwatana ibukin ara buakaka. E rinanon te korakai ibukin rawawatara, e uoti nanokawakira ao e katoka iaora marakira ao aorakira. E karokoa te Tamnei ae Raoiroi bwa e na karaui nanora, ao uaan te Tamnei bon te kimnwareirei, te rau, ao te onimaki, ake a kaoniira ma te kaantaninga ao te tangira.

Ngkai a kona aomata ni kabane ni karekea ana tangira te Atua, bon angiina a ukoukoria ma nanoia ni koaua, ngke tabeman a tangiria bwa a na namakina ana tangira te Atua ma aki kakoaua ae a tau ni karekea. Tekorakina a korakai ni kakataia bwa a na teimatoa n namakina ana tangira. A reireiniira koroboki aika tabu ao ana burabeti te Uea bwa ti kona n teimatoa n namakina ana tangira te Atua ngkana, ti rairi nanora, rinanon ana akoi Iesu Kristo,, kabwarai buure, keiaki ni kawakin Ana tua, ao ni beku ibukiia tabeman. Ti namakina ana tangira te Atua ngkana ti karaoi bwaai are a na kaanira Nakoina n aron te reitaki ma Ngaia ni katoa tai rinanon te tataro ao kamatebwaian koroboki aika tabu, ao katokan bwaai ake a na kararoaira Mangaia, n aron te kainikatonga, kakauntaeka, ao te kakaitara.

E kaoira Beretitenti Russell M. Nelson bwa ti na “kamwaing, baika a bareka ni maiura, man ana ibuobuoki te Tia Kamaiu.” ao ni “katinanikui itabaraara.” E a tia ni kaungaira bwa ti na “kakorakorai aan maiura n tamnei” rinanon “kabotoan maiura iaon te Tia Kamaiu ao iaon otenanti ao berita aika tabu n Ana tembora.” E berita bwa “ngkana ti karekea mwaakan te Uea, ti karekea mwaakan te Uea ni kakorakora. … Ti na namakina ana tangira ae korakora ao ni kororaoi Iesu Kristo ao Tamara are i Karawa!”

Iai raoraou ae kakabwaiaki ma ana utu ae tikiraoi ao aia mwakuri ae karikirakea aroia. E riki te bitaki aei ngke e aki kona ni mwakuri n te aoraki are e rootaki iai, ao ni manga raure imwiina. E taraa ni kangaanga kanoan ririki ma ririki, ma e kateimatoaaki ibukin tangiraia natina ao berita aika tabu ake e karaoi ma te Atua. N te bong teuana e ataia bwa buuna are mai imwaaina e a manga iein ao e bubuti bwa e na kamaunaaki kabaeakiia n te tembora. E rootaki nanona ao ni mwengo ana iango. E ukora te rau ao te atatai n ana auti te Uea. N te bong are imwiin nakona arei, I karekea te rongorongo mairouna:

“I karekea te taneiai ae moan te kamiimi inanon te tembora n te tairiki ae nako. I taku n au iango bwa e mataata bwa I a tia n teimatoa inanon te unuun ao te kakauntaeka . … I ataia bwa I riai ni bitaki, ao I a tia n tatataro inanon te wiiki ibukin karaoana. … N te tairiki ae nako inanon te tembora I namakina te Tamnei bwa e kanakoa te unuun mai inanou.… Iai te kabebeteaki ngkai I kainaomataaki mai iai.… E a kounako te rawawata are I taonaki iai.”

Ngkai e bon teimatoa n rinanon taian kakaewenako, e kawakina te taneiai inanon ana auti te Uea raoraou anne ike mwaakan ana tangira te Atua e buokia n namakina kaanna nakon te Atua, karekea te kaantaninga ae kakukurei ibukin te maiu, n aki raraoma ibukin taai aika a na roko.

Ngkana ti namakina ana tangira te Atua, a kona ni kabebeteaki rawawatara ao n anga ngaira ma te tataona n nano ao te kukurei nakon Ana kaantaninga. Iai ara onimaki bwa te Atua E uring Ana berita ma ngaira, e kawariira inanon rawawatara, ao ni kainaomataira man te tautoronaki. Ti tangiria naba ni kan tibwaua te kimwareirei are ti namakinna ma ara utu ao aika a tangiraki iroura. N aroia ana utu Riaai, iai inaomatan temanna ma temanna n rinerine n rineia ni katoonga uaan te kai ke e aki, ma tibwangara ti na tangira, tibwatibwa, ao ni kakao n te anga are naake ti tangiriia a na kona iai n namakina ana tangira te Atua.

Ni buokiia tabeman n namakina ana tangira te Atua, ti riai ni ribanai inanora anuan Kristo n aron te nanorinano, tangira ae kororaoi, nanoanga, ao te taotaonaki n nano, ao ni buokiia aomata ni kaokiia nakon te Tia Kamaiu rinanon iriiran tuua aika uoua n tangiran te Atua ao raora.

Temanna natira e koraki n taku bwa e aki tau n arona nako ngke tebwi tabun ana ririki. I tataro ngai ma kainnabau ni kan ataia bwa ti na kanga ni buokia, ao ti tauraoi ni karaoi bwaai ake e tangiria te Uea bwa ti na karaoi. N te bong teuana I namakina kairau iroun te tamnei bwa N na titirakina au beretitenti n te kooram ngkana e ataia bwa antai ae N na kona ni kawaria ma natiu te mwaane. Imwiin iangoakina, e tuangiira bwa ti na kawara te aine ae iai ana kangaanga ma marurungin rabwatana, ao man ana kariaia te beretitenti n te mwaanga, ti na uota te toa nakoina ni katoa wiiki. I kukurei ma I tabeaianga iroun natiu te mwaane bwa e na tera arona n te motinnano ae na karaoaki aei ni katoa wiiki.

Ni moan rokora, a rootaki nanora ibukin te aine ae tangiraki aei,ngkai e teimatoa inanon te maraki. E rangi ni kakaitau ibukin te toa, ao ti kukurei ni kakawaria ma buuna. Imwiin tabeua ara kakawari, n te Tabati teuana I mena n te tabo ae raroa ao n aki kona n raona natiu te mwaane ma I kauringnga ibukin mwiokoara. Ngke I a okira mweengau, I waekoa ni kan ongora bwa e uara aron ana kakawari. E kaeka natiu te mwaane bwa akea raona n reirei ae kona ni karaoa te bwai ae rangi n tikiraoi n aron aio. Ao e kabwarabwara riki man taku bwa e kaira tarina bwa e na buokia, ao e nakoraoi te toa, ma e a tia n nanokawaki te aine aei n te wiiki anne ibukina bwa e a kaoiia raoraona nakon mwengana bwa a na tamnei, ma e uruaki ana bwai ni kaoti tamnei. E taku natiu bwa e kakaea buokana i aonraain, e kunea te kangaanga, ao e karaoia ibukin neiei n te tai naba anne. E namakinna ae e rangi ni bongana, e kukurei, ao n onimakinna bwa e kona ni karaoa te bwai teuana are e kakukureia te aine arei n te bong arei. E namakina ana tangira te Atua ibukina.

Ngkana e rootaki am konabwai ma maium, ngkana ko namakinna bwa a tuai kaekaaki am tataro, ke ko aki kona n namakina ana tangira te Atua, taiaoka ataia bwa e kakawaki am konabwai, n ai aroia itoi ake ietara, bwa a ataia Tamara are i Karawa ao Iesu Kristo, a ongo, ao a tangiriko.

N te tai teuana ngke a mena Ana reirei i aon te booti ngke “e reimaurua [n te] nao,” ao e nakoia te Tia Kamaiu iaon te nama ao e karaua nakoia ni kangai, “Kabebetei nanomi; boni Ngai; tai maku.” Ngke e tangiria n nakonako Betero nakon te Tia Kamaiu i aon te ran, E anoanoia Iesu, ni kangai, “Mai.” Ao ngke e bua ana iango Betero ao e a moanna n iinako, e arora baina Te Tia Kamaiu n taua ao e kamaiua ngke e taku, “Ko aera ngkai ko nanokokoraki, ngkoe ae karako am onimaki?”

Ngkana ti kaitaraaki n taian angibuaka inanon maiura, ti na kukurei ao n ninikoria? Ti na kanga n uringnga bwa e aki mwanuokiniira te Tia Kamaiu ao E bon mena irarikira, tao n aanga ake ti aki kona n ataia.? Ti na Nakoina inanon te onimaki ai moarara riki ngkana e taraa ni kangaanga te kawai ae mena imwaaira? Ao ni kawai raa ae E tabekirarake iai bwa ti aonga ni mano ao n tokanikai iaon kangaanga ake ti kaitara mangaai? Ti na kanga ni kakaonimaki n taraia n ara iango nako, n aki nanououa ke ni maaku?

Ngkana ko tangiria n namakina ana tangira te Atua n ae rangi ni korakora inanon maium, I kaoko bwa kona iangoi bwaai aikai:

• Te moan, toki teutana n taainako n uringnga bwa ngkoe natin te Atua ao iangoi bwaai aika ko kakaitau iai.

• Te kauoua, tataro ni katoa bong, butiia Tamara are i Karawa bwa e na buokiko n ataia kaain raikim ae riai n namakina Ana tangira.

• Te kateniua, bubuti ma nanom ni koaua tera ae ko kona ni karaoia ni buoka te aomata anne n namakina ana tangira te Atua.

• Ao te kaaua, karaoia n te tai naba anne n te kairi are ko karekea.

Ngkana ti teimatoa n tataro ao ni bubuti n tei ibukiia tabeman, e na kaotiia aomata nakoira te Atua ake ti na kona ni buokiia. Ao ngkana ti karaoia n te tai naba anne, ti kona n riki bwa aanga n ibuobuoki rinanon are E kaekai iai aia tataro. Man karaoan aio, n taina, ti na karekei kaekaan ara tataro ao ti na namakina ana tangira te Atua inanon oin maiura.

Tabeua te namwakaina n nako ngke ti mwananga i Vietnam, I kiba ma kainnabau rinanon te angaibuaka ae korakora. E a riao man kakamaaku te angibuaka, ao nangroo, e bwaka ni korakora te karau, ao e kona n nooraki te iti man te wintoo. Imwiin te tai maanin, e a kibarake ara wanikiba i aon nangin te angibuaka ao n otirake nakon te tabo ae kamiimi taraana aei. Ti a manga kauringaki riki iibukin Tamara are i Karawa ao Iesu Kristo ao n namakina Aia tangira ae korakora ibukira.

Raoraou aika a tangiraki, are a tia n namakina ana tangira te Atua, I kimarimari ni kakoaua bwa te Tia Kamaiu Iesu Kristo bon ana tangira te Atua. E kororaoi, e onoti, ao e teimatoa Ana tangira ibukira. Ngkai ti kakaonimaki n iriiria, ti na bon kaonaki n Ana tangira ao ti na riki bwa te taura ae ota are e kairiiria aomata nakon Ana tangira. N aran Iesu Kristo, amen.