Te Kariaiakaki mai Karawa, Ataeinimwaane aika Rianako Kakatekeia

Ko rabwa, Unimwaane Andersen, ibukin taekinan mwaakan te nakonibonga ao mwaakan Ana Mwakuri ni Kamaiu te Tia Kamaiu.

N te Tabati teuana n Tianuare, ngke I tekateka n tain bootakin te toa, e raka iaon tengau ma uoman kairake n ataeinimwaane a kamatoaki bwa a na kerake inanon te Nakoanibonga ae te Aaron. I namakina bwa ea bitaki te aonaaba inanon ara tai.

I a ataia bwa ni kabuta te aonaaba, ni katoa tain te tioun, ni bootakin te toa n aron ane teuana anne, tebwina te nga riikan, taan reirei, ao ibonga—n aron raoraon Beretitenti Holland n te ingabong aei, Easton— a kamatoaki nakon te beku n te nakoanibonga inanon maiuia are e na reitinako ao n tabangaki n tain ikotaia Iteraera.

Ni katoa Tianuare, a toka baai iaon atuia e kaniia 100,000 ataeinimwaane, n reitiia rinanon otenanti nakon aia rain n te kariaiakaki are e okirikaaki n tain moan Kaokan Bwaai nakon Iotebwa ao Oliver, nakon Ioane te Tia Bwabetito ao nakon Iesu Kristo.

Ngkai, ara ekaretia e aki bati n nonoraki baika a riki iai. N ara auti n taromauri, ti waaki n aki katanoatai.

Ma e ngae n anne, nooran wakin katabuaia kaain te nakoanibonga aika boou ni kabuta te aonaaba, I iango —bon inanon te “ekaretia ni kimwareirei” ae ngaia aei—ngkana e na aki takaruaeaki mai taubukin te auti. “N te bong aei,” I taku, “e na riai ni iai te turambete ao rebwen te timbara ao takiakian aia taura nenea I-Rom. E na riai ni iai te mwaati!”

Ataakin mwaakan te Atua ni bon teina ni koaua, ti riki bwa taan kakoaua n tokin ana waaki te aonaaba aei ngkai te kariaia mairoun te Atua e a butanako ni kaona te aonaaba.

Katabu aikai e uotiia ataeinimwaane aikai nakon te beku inanon maiua ngkai a na kunea bwa n taai ao taabo aika a kakaokoro e na rangi ni korakora kainanoaia ao aia tataro ao mwaakan te nakoanibonga are e a reke irouia.

Rinanin waaki aika baireaki aikai e moanaki man aia ibuibuoki anera ake a kanakoaki mairoun te Atua. E kaoti nakon Iotebwa ao Oliver Ioane te Tia Bwabetito are ngkoa, ni katoka baina iaon atuia, ao ni kangai, “Iaomi raou ni mwakuri, n aran te Mesia I anga te Nakoanibonga ae te Aaron, are e taui kiingin aia mwakuri n ibuobuoki anera, ao te euangkerio n rairannano, ao ni bwabetito ni kateboaki i an te ran ibukin kamaunaan bure” (Reirei ao Berita aika Tabu 13:1).

E arana te kariaiakaki aei Ioane bwa te “Nakoanibonga ae te Aaron,” ingoan tarin Mote ao raon te nakoanibonga. N taai ake rimoa, teuare e taua te nakoanibonga ae te Aaron a reirei ao ni ibuobuoki ma otenanti—otenanti aika a boboto iaon te riki bwa te reirei irou te Meetia ae e na roko, te Uea Iesu Kristo (taraa Te Tua Kaua 33:10).

N ana boki Warekaia Iteraera e anga kabwarabwaraan ana mwakuri te nakoanibonga ae te Aaron ni kabonganaan bwaai aika a tabu ni karaoan otenanti. “Ao ko na katea Aaron ma natina mwane … ao aia tei kakawakina … te taibora … ma bwain nako te uma are tabu ake a karaoi nakoaia iai” (Warekaia Iteraera 3:10, 31).

Otenanti n te O Tetemanti n te anga karea iaoia maan e kakoroaki bukina ao e oneaki rinanon maiun te Tia Kamaiu ao ana Mwakuri ni Kamaiu. Te otenati rimoa anne e oneaki mwiina n te otenanti are ti aranna ngkai bwa te toa n ana Katairiki te Uea.

Ngkai te Uea e anganiia naake iai rouia te nakoanibonga ae te Aaron bwa a na karaoa ae bon aekakin are a karaoaki n taai akekei: n reirei ao ni karaoi otenanti—ni kabane ni kauringiira n Ana Mwakuri ni Kamaiu.

Ngkana a ibuobuoki riikan, taan reirei, ao ibonga ma te toa, a karekei kakabwaia mai iai n ai aroia aomata nako: man kawakinan te berita are a karaoia ngkai aana te kariki ma te ran. Ma man karaoan tibwanga aika a tabu aikai, a bon reiakin naba nakoaia n aia nakoanibonga.

Te Nakoanibonga ae te Aaron e aranaki bwa te nakoanibonga ni katauraoi ibukina bwa otenanti ake iai e anganiia namakinan korakoran ao kimwareirein te beku n Ana mwakuri te Uea, ni katauraoia nakon mwakuri n te nakoanibonga rimwi, ngkana a tangiraki ni karaoi ibuobuoki ni kawai aika aki ataia—n raonaki ma taekinan kakabwaia mairoun te tamnei inanon taai are te kantaninga ao mii, n te maiu ao te mate, a namakinaki rokoia.

Kantaninga aikai a kainnanoa te katauraoi ae nanonaki raoi.

N Reirei ao Berita aika Tabu e kabwarabwara bwa te riikan ao taan reirei “ni kauringiia, kabwarabwara, kaungaia, ao n anga reirei, ao ni kaoia ni kabane bwa a na nako nakon Kristo.” (Reirei ao Berita aika Tabu 20:59 N raonaki ma tibwanga aikai, ibonga a na “tii tataekini … ao ni bwabetito” (Reirei ao Berita aika Tabu 20:50).

Eng, akanne ni kabane a tara n rang ni mwaiti, ma n te aonaaba ni koaua, bwaai aikai a riki n aron ae nonoraki ao ni kabuta te aonaaba.

Temanna te bitiobi e reireiniia kaain ana beretitentii ni kooram n rikan aika a boou tabeia aikai. Ngaia are te beretitentii e waaki n taetae iaon aron taraakina n aia kooram ao n aia uoote. A baireia bwa a riai ni moana kawaraia kain aia uoote aika a kara n norii bwaai are a kainnanoia ao imwiina a karaoi.

Ibuakoia naake a buokii bon Alan, ae akiako, n tabetai e aki ata te riai, ao n tabetai e iowawa. Buun Alan, Wanda, e riki bwa kain te Ekaretia, ma Alan, n aron are ti taku, bon te aomata ae kangaanga arona.

Ma, riikan a teimatoa ni mwakuri, ni katinanikua ana wii onako Alan, ngkai a tiabora te tino man te kawai ao ni kanakoi maange. Riikan a kona n rang kangaanga riribakia, ao n tokin Alan e a moanna n tatangiria. N te tai teuana a kaoia nakon te taromauri.

“I aki tatangira te taromauri,” e kaeka.

“Ma, ko tatangiriira,” a taku. “Ngaia are nakomai irai. Bon ti nakomai raoniira, ti n tain ara boowi ni kooram.”

Ao n ana kariaia te bitiobi, e roko—ao e a teimato n roroko.

Riikan a riki bwa tia reirei, ao ngkai a reitinako ni beku ibukina, e reireiniia ni mwakuri iaon karaoan kaa ao ni katei bwaai. N te tai are riikan aikai ake tia reirei a riki bwa ibonga, Alan e a araniia bwa “au roronga.”

A ingainga ni katauraoi ngkai ibukin aia mition ao a titirakina ngkana a kona ni kataneiai n angareirei ni mitinare ma ngaia. E berita bwa e na bon aki ongora ke n aki kakoaua, ma, eng, a kona ni kataneiai ni mweengana.

Ao ngkanne e a bwaka n aoraki Alan. Ao E a marau nanona.

Ao n tebongina, n te boowi ni kooram, n arona n akoi e bubuti nakoia bwa a na tataro ibukina bwa e na katoka te moko, ngaia are a tataro. Ma imwiina a iria nakon mweengana ni booti n anai baeke ni kabane.

Ngke e a rikirake ni mamaara Alan n rin te onaoraki ao tienta ni kamarurung, ”ana roronga” a buokia, ni karaurau n anga mwaakan te nakoanibonga ao te tangira ae aki mwamwana te aba. (taraa Reirei ao Berita aika Tabu 121:41).

A reitinako kakai ngke e tuatua Alan bwa e na bwabetitoaki—ma imwiina ao e motirawa imwain ae e riki anne. N ana bubuti, ana riikan ake a riki bwa ibonga a uotia ni bwaokina ao a taetae n ana taunimate, ike a—tekateka raoi n—kauring, kabwarabwara, kaungaia, ao n anga reirei, ao ni kaoia ni kabane bwa a na nako nakon Kristo.

Ao imwina, n te tembora, bon temanna mai ibuakoia ana “roronga Alan” are e bwabetitoa te beretitenti ngkoa n te kooram n riikan are e tei ibukin Alan.

Ni kabane bwai ake e taku Ioane te tia Bwabetito bwa a na karaoia, a karaoi. A karaoa ae a kakaraoia rikan, tia reirei, ao ibonga n te Ekaretia ni kabutaa te aonaaba.

Teuana te bwai are a tuangaki bwa a na karaoia naake a taua te nakoanibonga ae te Aaron bon karaoan te otenanti n toa.

N te ririki ae nako I kaitibo ma te bitiobi ae tamaroa ma kainnabana. N teuana te Kaonobong n aki maan nako, a buti n nako ni kaea ana bwabetito natiia te mwaane, a rinanon te korakai ni buan natiia te aine ae tangiraki uoua ana ririki, ae Tess.

Te ingabong are imwiina, kain aia uoote a ikotaki ni bootakin te toa n onrake n te nanoanga, are a korakai naba ni buan te ataeinnaine ae kororaoi aei. E aki kantaningaaki bwa ana utu te bitiobi a na roko n te taromauri n te ingabong anne, ma tabeua te miniti imwain waakin te bootaki, te bitiobi ma ana utu a karaurau n rin nakon aia tabo.

Te bitiobi e nakon te tabo n tei ao e nakonako ni katua ana tabo n tekateka imarenaia ana kauntira ao e tekateka n taiboran te toa.

Inanon te tairiki ni maten natina ao n aki mamatu n ukora te mataata ao te rau, e a tia ni karekea te wirikiriki n te bwai ae a rang kainnanoia ana utu—ao ae a rang kainnanoia ana uoote. Bon bwanaan aia bitiobi are a na ongo, aia beretitenti n te Nakoanibonga ae te Aaron n aia uoote ao te karo ae nanokawaki, n taekini berita n te toa.

Ngaia are, n taina, e katorobubua ma ibonga akanne ao e taetae nakon Tamana. N taetae inanon te rawawata ae korakora, e taekin taeka aika a rang mwakaroiroi are e kona aomata n taekinna ni kabaibati n te tai ni maiu.

Taeka aika iai mwiina ae akea tokina.

Taekan otenanti.

Taekan berita aika tabu.

Kaetieti ake a reitiira nakon oin te kantaninga n te maiu aei—ao nakon mwiina ae moan te tamaroa n ana baire Tamara are i Karawa ibukira.

Ko kona n iangoia bwa tera ae a ongo kain te taromauri n te umwantabu te bong anne—inanon taeka ake ti ongo ni katoa Tabati n ara umantabu?

O te Atua, te Tama ae Akea Tokina, ti butiko n aran natim, Iesu Kristo, bwa ko na kakabwaia ma ni katabua te kariki aei nako nanon tamneia ake a na bane n anaia, bwa a na kanna ni kauringa iai rabwatan natim, ma ni kakoaua nakoim, O te Atua, te Tama ae Akea Tokina, bwa a bon kukurei ni katoka i aoia aran natim, ma n aki toki n ururungnga ma ni kaawakin ana tua nako ake e a tia n anganiia; bwa e aonga ni memena Tamneina irouia n tai nako. Amen” (Reirei ao Berita aika Tabu 20:77).

Ao imwiina: “O te Atua, te Tama ae Akea Tokina, ti butiko n aran natim, Iesu Kristo, bwa ko na kakabwaia ma ni katabua te [ran] aio nako nanon tamneia ake a na nimma, bwa a na karaoia ni kauringa raraan Natim, are waanako ibukiia; bwa aonga ni kakoaua nakoim, O te Atua, te Tama ae Akea Tokina, bwa aki toki n ururingnga, bwa e aonga ni memena Tamneina irouia. Amen” (Reirei ao Berita aika Tabu 20:79).

Te karo aei ao te tina a kakoaua bwa te berita anne e a tia ni koro bukina. A karekea, ni koaua, karauan nanoia ae akea tokina, “Tamneina e raoniia.”

I aki toki ni kakaitau bwa naake a taua te nakoanibonga ae te Aaron, ma mwaakana, otenanti, ao nakoa, a kakabwaiaira ngaira ni kabane rinanon kingin aia ibuobuoki anera, ao te euangkerio n rairannano, ao te bwabetito man te kateboaki n te ran ibukin kabwaraan bure” (Reirei ao Berita aika Tabu 13:1). N aran Iesu Kristo, amen.