Am Katauraoi Ibon Iroum ni Kaitibo ma te Tia Kamaiu

Tariu ao mwaneu aika kam tangiraki, n okitobwa ae nako, E reirei Beretitenti Russell M. Nelson, “Aio bon te tai ibukimi ao ibukiu ni katauraoi nakon Kauaokin ara Uea ao ara Tia Kamaiu, Iesu Kristo. Ngkana e maroroakina taekan te Kauaoki Beretitenti Nelson, e aki toki n taekinna ma kantaningaakin ae tamaroa ma te kakimwareirei. E ngae n anne, n aki man n nako temanna ataeinainen te Moanrinan e kaongoai bwa e nanako nanona ngkana e taekinaki taekan te Kauoaki. E taku, “I maaku ibukina ngkai iai baika aki raraoi aika a na riki imwaain manga okin Iesu.”

Bon tiaki tii ataei aika a namakina naba te aekaki aei. Taekan reirei ae tamaroa ibukina, ibukim, ao ibukiu bon iriiran ana reirei te Tia Kamaiu. Ana kaetieti a bon mataata ke ni kai oota te aba iai. Ngkana ti iriiri, ti na bon aki kona ni maaku ke n raraoma.

Ngke e nang roko n tokin Ana mwakuri iaon te aba, e titirakinaki Iesu Kristo ngkana E kona ni manga oki riki. Ni kaekaana, E anga reirei iaon taetae ni kaikonaki aika teniua, are e koreaki ni Mataio 25, arom ni kaitibo Mangaia—tao n Ana tai ni Kauaoki ke ngkana ti kitana te aonaaba aei. Angareirei aikai a rangi ni kakawaki ibukina bwa am katauraoi ibon iroum ni kaitibo ma Atua bon te bwai ae moan te kakawaki ibukin maium.

Te Tia Kamaiu e moan karakina te taetae ni kaikonaki ibukiia kiibono ake tengaun. N te taetae ni kaikonaki, tengaun kibono a nako ni kakioa te baka n amwarake ibukin te mare. Niman kibono a uoti bwaan aia taura ao niman ake a nanobaba a aki. Ngke e katanoataaki ae e nang roko te tia iein te mwaane, a nako kibono ake niman ni kabooi bwaan aia taura. Ngke a roko, a bon oimwi, bwa e a kainaki te mataroa nakon te baka.

Iesu e kaoti teniua botoniango ibukin te taetae ni kaikonaki bwa ti na buokaki iai. E kabwarabwaraa:

“Ao n te bong anne, ngkana I roko ni mimitongiu, e na kakoroaki bukin te taetae ni kaikonaki are I taekinna ibukiia kiibono ake tengaun.

“Bwa naake a wanawana ao n tia ni karekea te koaua, ao n tia n anaa te Tamnei ae Tabu ibukin kairaia, ao n tuai ni mwamwanaaki—e koaua ae I tuangkami, a na bon maiu n te bong anne.”

N taekana teuana, a na riai n aki maaku ke n raraoma ibukina bwa a na bon maiu ao ni kakabwaiakii. A na bon tokanikai.

Ngkana ti wanawana, ti karekea te koaua man butimwaean ana euangkerio Iesu Kristo rinanon otenanti n te nakoanibonga ao berita aika tabu. Imwiina, ti kataia n teimatoa n tau ni karekea te Tamnei ae Raoiroi bwa e na memena irarikira n taainako. Te konabwai aei e riai n reke iroun temanna ma temanna ao n onoti, teutana imwiin teutana. N ae teimatoa, te kakaonimaki ni karaoan mwakuri aika a onoti n taromauri ao n wareware e kaoa te Tamnei ae Raoiroi ni kairiira.

Te kateniua ni bwai are e katerea Iesu bon kawakinam bwa ko na aki mwamwanaaki. E kauring te Tia Kamaiu:

“Kam na tarataraingkami ba a na aki burebureingkami aomata.

Ba ane a na nakomai n arau aomata aika bati, ni kangai—te Kristo Ngai—ao a na burebureia aomata aika bati.”

E ataia te Tia Kamaiu ae taan baka n raoiroi a na kataia ni burebureia ake a tia n rineaki ao a na mwaiti Ana reirei Iesu aika a na mwane. Ti riai n aki kakoauaia naake a kairua n taku bwa a kariaiakaki man mwaakan te Atua ke a kaota aia iango n ukoran te wanawana man bwaai n reirei aika aki onimakinaki ao ni bureburea te aba.

Ti reireinaki n ana Boki Moomon bwa ti na kanga ni kinaia taan bureburea te aba mairouia Ana reirei. A aki toki Ana reirei ni kaungaia aomata bwa a na kakoaua te Atua, a beku Ibukina, ao ni karaoa ae raoiroi. Ti na bon aki burebureaki ngkana ti ukoria ao ni butimwaai aia reirei aomata ake a onimakinaki ake boni ngaiia Ana reirei Iesu aika a kakaonimaki.

Ti kona naba ni kawakiniira n aki burebureaki ngkana ti nanako n nebonebo n te tembora n taainako. Aei e na buokiira ni kateimatoa ara taratara ae akea tokina ao ni kamanoira man bwaai n anainano ake a na katabeaiangai ara iango ke ni kararoaira man kawain te berita.

Te reirei ae kakawaki man te kaikonaki aei iaoia kibono ake tengaun bwa ti wanawana ngkana ti butimwaea te euangkerio, ukoria ni karekea te Tamnei ae Raoiroi bwa e na memena iroura, ao n aki burebureaki. Kibono ake niman ake a wanawana aki kona ni buokiia naake akea bwaan aia taura, akea temanna ae kona ni butimwaea te euangkerio, ni buitmwaea te Tamnei ae Raoiroi bwa e na kairia, ao n totokoa te mwamwanaaki ibukira. Ti na karaoa aei ibon ibukira.

Te Tia Kamaiu e moan karakina te taetae ni kaikonaki ibukin taian tarena. N te taetae ni kaikonaki, te mwaane e anga mwaitin te mwane ae kakaokoro, ae kaineti nakon taian tarena, nakoia tooro aika teniman. E angan temanna te toro nimaua tarena, e anga are uoua nakon are temanna, ao nakon are te kateniman e anganna teuana te tarena. N te tai teuana ma teuana, tooro ake uoman e kataboroa are a karekea. Ma te toro are te kateniman e tauna ana tarena are tii teuana. Nakoia tooro ake uoman ake a kataboroa aia tarena, e taku te mwaane, “E raoiroi, te toro ae ko raoiroi ae ko kakaonimaki: ko kakaonimaki nakon baika karako, N na karaoiko ba mataniwini baika bati: ko na rin i nanoni kimwareirein am uea.”

Ngkanne ao te mwaane aei e boaa te toro are e tauna ana tarena ibukina bwa e “buakaka man taningaroti.” E anaaki ana tarena te toro aei, ao e a kanakoaki. Ma, tao ngke e kataboroa ana tarena te toro aei, e na bon karekea naba te aekaki ni kamoamoaaki ao te kaniwanga n aroia tooro ake tabeman.

Teuana te rongorongo man te taetae ni kaikonaki aei e kaantaningaira te Atua bwa ti na kakorakorai ara konabwai ake ti a tia n anganaki, ma E aki tangiria bwa ti na kabotaui ara konabwai ma tabeman. Iangoa te atatai aei are e katauraoaki man te ka 18 n -tienture Hasidic te tia rabakau ae Zusya mai Anipol. Zusya bon te tia reirei ae rangi ni kinaaki are rikirake makuna ngke e a kaan matena. A titirakinna ana reirei, “Te mataniwi, bukin tera ngkai ko a ruru ni maaku? Ko a tia ni maiuna te maiu ae raoiroi; ni koauana ao te Atua e na bon anganiko kanuangam ae korakora .”

E taku Zusya: “Ngkana e taetae te Atua nakoiu, ‘Zusya, bukin tera ngkai ko aki riki bwa aekakin Mote?’ N na kona ni kangai, ‘Ibukina bwa ko aki anganai te tamnei ae korakora are ko angan Mote.’ Ao ngkana I tei imatan te Atua ao E kangai, ‘Zusya, bukin tera ngkai ko aki riki bwa aekakin Toromon?’ N na kona ni kangai, ‘Ibukina bwa ko aki anganai wanawanan Toromon.’ Ma, noria, tera ae na taekinna ngkana I tei imatan au Tia Karikibwai ao E kangai, ‘Zusya, bukin tera ngkai tiaki Zusya ngkoe? Bukin tera ngkai ko aki riki bwa te mwaane n te konabwai are I a tia n anganikoi?’ Oo, anne bukina ae I ruru ni maaku.”

Ni koauana, e na bon nanokawaki te Atua ngkana ti aki katan iaon raoiroina, ana nanoanga, ao ana akoi te Tia Kamaiu ni kakorakorai ara konabwai ake e anganiira te Atua ao ma ni karekei. N Ana ibuobuoki n tangira, E kaantaningaira bwa ti na riki bwa bon katootongan arora aika a raraoi. Bwa ti na kona ni waaki ma ara konabwai aika a kakaokoro e kakawaki aei Irouna. Ao ni bon nakoira naba.

N te kabane, te Tia Kamaiu e a manga karakina te taetae ni kaikonaki ibukin te tibu ao taian kooti. Ngkana E okira mimitongina, “ane a na bane ni botaki botanaomata i matana; ao E na karaureia te korakina ma te korakina, n ai aron te tia kawakin tibu ngkana e karaureia tibu ma koti, ao ane E na kakiia tibu i angataina ao koti i angamaingina.”

Naake a mena n angataina a riki bwa taan abaaba ni Ueana, ao naake a mena n angamaingina a na bon aki riki bwa taan abaaba. Te anua ni katei ae kaokoro iai kinaakin te aomata ngkana a tia ni kamwarakea ngke E baki, a anganna nimana ngke E bora n taka, a kamaekaa ngke E riki bwa te iruwa, a kunnikainna ngke akea karabaana, ao a kawaria ngke E aoraki ke ngke E mena n te matawariki.

A bon miimi man raraoma te koraki, naake a mena ni baina te angatai ao naake ni baina te angamaing. A titirakinna ngkana a tia, ke ngke a tuai, ni Kamwarakea, ni kamooia, ao ni kunnikainna ke ni Buokia ngke E taonaki n te aoraki. N ana kaeka, e taku te Tia Kamaiu, “E koaua ae I a tuangngkami, ba ngke kam karaoi baikai nakon temanna ae moan te mangori ibuakoia tariu aikai, ao kam karaoi naba nakoiu.”

E rangi ni mataata te rongorongo man te taetae ni kaikonaki aei: ngkana ti beku ibukiia tabeman, ti beku ibukin te Atua; ngkana ti aki, ti karawawata Nanona. E kaantaningaia bwa ti na kabonganai ara bwaintaningira, tarena, ao ara konabwai ni kakabwaiai maiuia natin Tamara are i Karawa. Te anainano mai ieta aei ni beku ibukiia tabeman e kamatataaki n te boem are e koreaki n te ka 19 n tienture iroun te tia otooto mai Finnish ae Johan Ludvig Runeberg. Ngai ma tariu ao mwaaneu ti a bon ongoongo naba te boem aei “Te tia Ununiki ae Paavo” inanon uarerekera. N te boem, Paavo bon te tia ununiki ae maiu ni kainnano are e maeka ma buuna ao natina ni mwakoron te nei i nuukan Findland. Inanon ririki ma ririki, a rootaki man mate angiin ana uanikai ake e ribanai man uniki, ngkana man ranin te tinoo, angibuaka n tain te tiamwa, ke te buane are e reke man te eea n tain te autumn. Ni katoaa rokon tain te kiniuanikai ae karako man aki nakoraoi, e bwaebwaeti buun te tia ununiki, “Paavo, Paavo, ngkoe te unimwaane ae akea arom, e a mwaninga taekara te Atua.” Paavo, ni boonmwiina, e taetae ma te rau, “Rengana kunin te aroka ma te buraawa ni karaoa te kariki bwa aonga n aki baki ataei. N na beku korakora ni kanakoa ranin ma bokabokan te marae n ununiki. E bon kataira te Atua, ma E na bon karekei kainanora.”

Ni katoa maten taian uanikai, e tua Paavo nakon buuna bwa e na kataboroa riki mwaitin kunin te aroka are e renganna ma te buraawa bwa e aonga n toki te baki. E mwakuri korakora naba, ni kenii taian nibwa ni kanakoa ranin aontano ao ni kauarerekea riki ana marae n ununiki ni kabotaua ma te ran are e reke man te aoi.

Imwiin ririki ni korakai, n tokin te tai ao Paavo e a taia uaan arokana ma te kakabwaiaaki. E kibakiba ma ni kimwareirei neiere buuna, “Paavo, Paavo, bon taai aikai ni kakukurei! E a boo ara tai ni karenakoa kunin taian aroka, ao ni kamwaa te kariki are e bon tii karaoaki n te buraawa.” Ma e katika bain buuna Paavo ao e taku, “Rengana iteran te buraawa ma kunin te aroka, bwa a rootaki naba aia marae n ununiki kaain rarikira.” E anga ana bwai ao ana bwai ana utu teuae Paavo ibukin buokaia kaain rarikina aika a rootaki man aki kaubwai.

Te reirei man ana taetae ni kaikonaki te Tia Kamaiu ibukin te tibu ao te kooti bwa ti riai ni kabonganai bwaintangira ake ti a tia n anganaki—te tai, tarena, ao kakabwaia—ni beku ao ni buokiia natin Tamara are i Karawa, riki naake a bon rootaki man kainnano.

Au kakao nakon ataein te Moanrinan are e raraoma are I taekinna mai imwaaina, ao nakoimi n tatabemani ngkami, kam na iriira Iesu Kristo ao n onimakina te Tamnei ae Raoiroi n aron raoraom ae kakawaki iroum. Onimakiniia naake a tangiriko ao ake a tangira te Tia Kamaiu. Ukoukora ana kairi te Atua ni karikirakea am konabwai aika a onoti, ao buokiia aomata, e ngae ngke e aki bebete. Ko na bon tauraoi ni kaitibo ma te Tia Kamaiu, ao ko kona n reitiko ma Beretitenti Nelson ni kaantaningakin baika a raraoi ake a riki ma ni kakimwareirei. Ni karaoan aei, ko buoka ni katauraoa te aonaaba ibukin Kauaokin Iesu Kristo, ao ko na kakabwaiaki man tau am kaataninga n rin inanon ana rau ao kimwareirein te Uea, ngkai ao nakon taai aika a na roko.

Ngkai ti anenea teuana te kuna man ara boki n anene ae boou:

N aran Iesu Kristo, amen.