“Kaaniai”

Tariu ao mwaneu aika tangiraki, bon te kakukurei irou ngkai I raoni ngkami n te maungatabu ni kabuta aei n Ana Ekaretia Iesu Kristo ibukiia Aika Itiaki ni Boong aika Kaitira. Aio Ana Ekaretia. Ti bootaki inanon kateitei ao mweenga ni kabutaa te aonaaba n Arana.

Ti katoka Arana iaora ngke ti rin n Abanueana n ara berita ae tabu. Boni Ngaia are E mangauti ao Natin te Atua ae mimitong. Ngaira aomata, ae ti kona ni bure ao ni mate. Ma, man Ana tangira ibukira n tatabemaniira nako, E kaoira te Tia Kamaiu bwa ti na nakoina ni Kaniia.

Aio Ana kakao nakoira: “Kaaniai ao N na kaaningkami; botumwaaka n ukoukorai ao kam na kuneai; bubuti, ao kam na karekea; karebwerebwe, ao e na kaukaki nakoimi.”

Iai taai aika ti namakinna bwa ti kaan ma ara Tia Kamaiu Iesu Kristo. Irarikin anne, n tabetai inanon katakira n te maiu aei, ti namakina ae ti raroanako mai Irouna ao ti tangira kakoauakina bwa E atai baike a mena inanora ao n tangiriira n tatabemaniira nako.

E airi Ana kakao te Tia Kamaiu ma kawai n namakina te kakoaua anne. Roko ni Kaniia man Ururingngana n tainako. Nanomwaaka n Ukoukoria rinanon kamatebwaian koroboki aika tabu. Butiia Tamara are i Karawa ma nanom ni koaua bwa ko na namakina kaniam nakon Nati ae Tatangiraki.

Iai te kawai ae bebete iangoana. Bon te bwai ae ko na karaoia ngkana ko maenako ma raoraom aika tangiraki n te tai ae maan. Ko na kakaei kawai ni marooro ma ngaiia, ko na matenanoi marooro ake ko karekei mai irouia, ao ko na kabanea am kona ni karaoi bwaai ni buokiia.

Mwaitin kakaraoan anne, e na rikirake n teimatoa, e na korakora te reitaki n tangira, ao ko na namakina ae ko a rangi ni kaan riki ma ngaiia. Ngkana e rangi ni maan akean te marooro ae nanonaki ao te tai ni ibuobuoki imarenami, e na bon mamaara te reitaki.

E tangiriira Iesu Kristo n tatabemanira nako. E anganiira te tai ni kaniira riki Nakoina. N aron te rao ae tatangira, ko na karaoa naba ae aiaron anne, ni marooro rinanon te tataro, nakon Tamara are i Karawa n te tataro n aran Iesu Kristo, ongoraa nakon kairi mairoun te Tamnei ae Raoiroi, ao imwina ni beku ma te kukurei ibukiia tabeman ibukin te Tia Kamaiu. N tai ae aki maan ko na namakina te kakabwaia anne ni kaniaki riki Nakoina.

Ngke I kairake, I namakina te kukurei ni kaniiai nakon te Tia Kamaiu—ao Rokona ni kaan irarikiu—rinanon mwakuri n ongotaeka nakon ana tua aika bebete. Ngke I uarereke, e kakaraoaki te taromauri n toa ni katoa tairiki. I teimatoa n uringa teuana te tairaki, 75 te ririki n nako, ngke rang rootongitong ao ni kamwaitoro tinaniku. I uringa namakinan te ota ao te abue ngkai I ataia bwa I a tia ni kawakin tuua ni ikotaki ma Aika Itiaki n anaa te toa, ni berita ma Tamara are i Karawa ma n aki toki n ururingnga n tainako Natina ao ni kaawakin Ana tua nako.

N tokin te botaki n te tairiki anne, ti anenea te kuna n taromauri “Tiku Irou; ’Bwa E a Kani Bong,” ma taekana inanona “O te Tia Kamaiu, tiku irou bwa e a kani bong.”

I kaonaki n te Tamanei n taeka aikai, e ngae ngke te ataei Ngai. I namakina ana tangira te Tia Kamaiu ao kanna n te tairiki anne. Ao I namakina ana rau te Tamnei ae Raoiroi.

Ririki imwiina I tangiria ni kan kaoka namakinan ana tangira te Tia Kamaiu ao namakinan kanna Nakoiu n tain te taromauri n toa anne ngke i a kairake. Ngaia are I kawakina te tua riki teuana: I wawarekii koroboki aika tabu.

N ana boki Ruka, I warekia ae n te ka teniua ni bong imwiin Taurakina ao wenena n te ruanimate, a roko ana toro aika kakaonimaki, ibukin tangiran te Tia Kamaiu, bwa na kabira Rabwatana. Ngke a roko, Ao a kunea te atibu bwa e karabinoaki nako man te ruanimate ao n akea Rabwatana ikekei.

Uoman anera a tei irarikia ao a titiraki bwa bukin tera a maaku:

“Bukin tera kam ukoukora teuare e maiu ibuakoia mate?

“Akea ikai, e a tia n uti: uringa ngke e taetae nakomi ngke e mena i Kariraia,

“Ni kangai, Natin te aomata e na kamwaneaki ni baia mwaane aika taan bure, ao e na tauraki n te kaibangaki, ao e na manga uti n te katenibong.”

N te tairaki anne, uoman ana reirei a rianna mai Ierutarem iaon te kawai nako Emauti, ao te Uea are manga uti e kaoti nakoia ao ni mwananga ma ngaiia.

Ana boki Ruka e anganiira te kona bwa ti na rianna ma ngaiia n te tairiki anne:

“Ao e koro bukina, bwa, ngke a tabe n taetaenikawai ma n neneri, E kania Iesu ao E airi ma ngaiia.

“Ao a tauaki mataia ba a na aki kina.

“Ao E taku nako ia, Taeka ra akana kam taekin iroumi, ngkai kam nakonako? Ao a tei ni mata n nanokawaki?

“Ao temanna irouia uakekei, are arana Kireoba, e kaeka ni kangai, Ko maeka n iruwa i Ierutarem, n te aro are ti Ngkoe ae ko aki atai baika a riki iai ni bong aikai?”

A tuangnga te bwai are a nanokawaki iai bwa Iesu are e a tia ni mate ngke a onimakinna bwa ngaia ae e nang kamaiuia Iteraera.

Bon iai te tangira ni bwanaan te Uea are manga uti ngke E taetae nakoia ana reirei aika nanokawaki n nanoanga.

Ngke I reitinako ni wareware, ao iai te taeka ae rotaki iai nanou, kanga ai aron te namakin are I karekea ngke I uarereke:

“Ao a kania te kawa are a nako iai: ao Ngaia E bakaea te nako riki.

“Ao uakekei a kairoroa ni kangai, Ko na tiku iroura: ba e a kani bong, ao e a kan toki te ngaina. Ao e rin n tiku irouia.”

Te Tia Kamaiu e butimwaea te kakao n te tairiki anne n rin n aia auti Ana reirei. E rarikiriki n amwarake ma ngaia. E ana te berena, ao E tataro, ao E tabeutaia, ao E angania. Ao a kaureaki mataia, ao a kina. Ao E a mauna naba mai rouia.

E koreia Ruka ibukira aia namakin reirei ake a kakabwaiaaki akanne: “Ao a i taetae i rouia, Tiaki a bue nanora i nanora, ngke E taetae ma ngaira i nanora, ngke E taetae ma ngaira i nanon te kawai, ao ngke E kabara nanon te Baibara nako ira?”

A waekoa n okira Ierutarem reirei ake uoman ao tuangia Abotoro ake tengaun ma temanna te bwai ae riki. Ngke a tabe ni karakina te bwai ae a rinanona, e a manga kaoti riki te Tia Kamaiu nakoia.

E tei ibuakoia “ao n taku nakoia, E na mena te rau iroumi.” E kaoki taeka ni burabeti n Ana mition n tiringaki ibukin aia bure ni kabane natin Tamana ao n urua ana kababae te mate.

“Ao e taku nakoia, E koreaki n ai aron aei, ba E na maraki ni mate te Kristo, ao ba E na manga uti mai buakoia mate n te katenibong:

“Ao bwa e na tataekinaki rairan te nano ma kabarani bure n arana I buakoia botanaomata ni kabaneia nimoa n taekinaki I Ierutarem.

“Tani kaotioti ngkami ni baikai.”

Ai aroia Ana reirei aika tangiraki, natin Tamara are i Karawa ake a rineia bwa na rin ni mataroan te bwabetito a kabaeaki bwa na riki bwa taan kaotioti ibukin te Tia Kamaiu ao n tabeakiniia naake a kainanoa buokaia inanon maiuia. E kaman taekinaki aron matoan te nano aei n Ana Boki Moomon iroun te burabeti ae Aramwa n Nein Moomon:

“Ngkai ko ingainga ni kan okira ana nanai te Atua, ao n aranaki bwa ana aomata, ao n ingainga ni uota rawawatan temanna, bwa a aonga ni kabebeteaki;

“Eng, ao n tauraoi n tang ma ake a tang; eng, ao ni karau nanoia ake a kainnanoa karauan nanoia, ao n riki bwa taan kakoaua ibukin te Atua n taainako ao ni bwaai nako, n taabo nako ake kam nako iai … , ni karokoa matemi, bwa kam aonga ni kabooaki iroun te Atua ao … bwa e aonga n reke iroumi te maiu are akea tokina.”

Ngkana ko kakaonimaki nakon taian berita aikai, ko na kunea bwa e na memena iroum te Uea, ao ni kabebetea uotam. Kona rikirake ni kina te Tia Kamaiu, ao inanon te tai ko na riki n ai Arona ao “ni kororaoi iroun Kristo.” Man buokakiia aomata ibukin te Tia Kamaiu, ko na kunea bwa ko a kaaniaki ma Ngaia.

A mwaiti raomi ake a birinako man te kawai nakon te maiu ae akea tokina. Iangoia bwa tera ae kona karaoia bwa ko na kaokiia. Ko kona n onimaki iroun te Uea bwa e na kaaniia ngkai ko beku Ibukina ma te onimaki.

Kam uringa ana berita te Uea nakon Iotebwa Timiti ao Sidney Rigdon ngke a raroanako ma aia utu iaon Ana mwakuri:”Raou ae Sidney ao Iotebwa, ami utu a marurung; a mena inanon baiu, ao Nna kawakiniia raoi ngkai kam karaoa ae raoiroi ibukiu; bwa irou iai te mwaaka ni kabane.”

Ngkana ko buokia ake kainano, e na kamatoako mwaakan te Uea. E na ibuoka ni bai ma ngke ni kakabwaiaia natin Tamara are i Karawa.

Ana toro n te berita Iesu Kristo a na karekea ana Kariiri mai iroun te Tamnei ngkai a kakabwaia ao ni beku ibukia aomata Ibukina. Imwina ana namakina ana tangira te Tia Kamaiu ao ni kunea te kimwareirei ngkai a kaaniaki ma Ngaia.

Bon ngai te tia kakoaua ni Mangautin te Uea n ai aron ae I mena ikekei ma reirei ake uoman n te auti i aon kawain Emmauti. I ataia bwa E maiu.

Aio bon Ana Ekaretia ni koaua—ana Ekaretia Iesu Kristo. N te bong ni motiki taeka, ti na, tei imatan te Tia Kamaiu, n itaramata ma Ngaia. Bon te tai ae rang kakukurei nakoia naake, n te maiu aei, a tia ni kaaniaki Nakoira n Ana mwakuri ao ni kona ni ingainga ni kan ongo Ana taeka: “E tamaroa am beku, au toro ae kakaonimaki.”

I kakoaua ni mangautin ara Tia Kamaiu ao Te Tia Kabooi Maiura, n aran Iesu Kristo, amen.