Kakabwaia ni Kabomwi

N au tai ni beku n te Bitiobiriki n Tararua, I a tia ni kaitibo ma aika Itiaki ni Boong aika Kaitira ni katobibia te aonaba n nori taabo ao katei aika kakaokoro. E rang anaki nanou n rikiraken ami onimaki ao nanomi nakon te Uea Iesu Kristo. Ao eng I bon rotaki naba n ami kangaanga ake kam kaitara ma ngaia—kakaewenako n aron te aoraki, te mwauku, aki taun te kaubwai, te kangaanga n te mare ao te reirei, te bwainikirinaki, ao bwaai ake kam tare iai. Inanon te tai, ao kataaki aikai a na kona n riki bwa te totoko nakon am kekeiaki ni maiuakina te euangkerio, e na rang kangaanga iroum bwa ko na beku, n taromauria, ao ni kakoroi nanon tabem aika tabu.

Raou aika kam tangiraki, ngkana ko namakina te totoko ke kangaanga inanon maium, I tangiriko bwa ko na ataia bwa: E tangiriko te Uea. E ata te bwai ae ko mena inanona, ao ni kauki mataroan kakabwaina nakoim n aki tarai kangaanga aika ko kaitara ma ngaia.

I reiakina koauan aei man au taneiai, ae uarereke, ma ni korakora nanona irou. Ngke 22 au ririki, n au tai ni mwkauri n ana tabo ni Wanikiba ni Buaka Buranti i Paris, I rangi ni kukurei n ongo bwa Unimwaane Neal A. Maxwell, ana Abotoro te Uea, e na taetae n teuana te maungatabu i Champs-Élysées. Ma, imwain te maungatabu anne, I tuangaki bwa N na kabuta baon te aobitia ae rietata nakoana nakon te marae ni wanikiba ni bon te tai are e na wakinaki iai te maungatabu.

I bon rangi ni un. Ibukin nanou ni kan iria, I kabwakaa te aobitia ao ni kawaekoai nakon te maungatabu. Ngke I kunea te tabo n tei,I waekoa ni katuka te kaa, ao ni kabirimwakai nakon te Champs-Élysées ao n roko ikekei ni kua ma ai ti nimaua te miniti ao e a bwara te maungatabu. Ngke I rinnako, I ongo ana taeka Unimwaane Maxwell ae kangai, “N na angani ngkami ngkai au kakabwaia n abotoro.” N te tai naba anne, E reke irou te bwai ae rang tamaroa, ae namakinan te tamnei ae I aki kona ni mwaninga. I kaonaki n te Tamnei, ao n rotaki nanou ni mwanewen ana kakabwaia, ae I rou e bon kaineti nakoiu.

Are I rinanona n te bong anne bon te bwai ae uarereke ma bon te rau ae mwakaroiroi n ana babaire te Atua ibukiia natina: Ngkana arora ae riaon ara konaa e totokoira man karaoan kakoroan nanora ake ti tangiria, e na kabomwi nakoira te Uea n te aro bwa ti na kona ni karekei kakabwaia ake E beritanna.

Te koaua aei e kamatoaki iaan kiingin reirei aika teniua ake a kuneaki n ana Eungkerio Iesu Kristo ae kaokaki:

1. E kororaoi ana tangira te Atua nakoira n tatabemaniira. “E kaoira [ngaira] ni kabane bwa ti na nakoina ma ni katoonga ana raoiroi.” Ana babaire ni kaboomwi e mwaneia ni kabane, n akea ae katukaki, bwa e na reke irouia n te taina te kakabwaia n te kamaiuaki ao te karietataaki.

2. Ibukina bwa e nanoanga ao n aki inanonano te Atua ao ni kororaoi Ana babaire, E bon kona ni kabaeira nakon bwaai ake a riaon ara kona. E kabwarabwara Unimwaane Neal A. Maxwell bwa te “Atua … e nanoanga tiaki ti nakon are nanora ao ara mwakuri, ma bon nakon naba ara kangaanga ake ti taonaki iai.”

3. Rinanon Iesu Kristo ao Ana Mwakuri ni Kamaiu, ti a kona ni kunea te korakora n teimatoa ao n tokanikai man kangangan te maiu. N aron are reireia Aramwa, bwa te Tia Kamaiu e aki ti katoka i aona ana bure ane raira nanona ma e bon katoka naba iaona “marakiia ao aorakiia ana aomata” ao “mamaaraia” Ngaia are, kaboakin maiura man ara kairua, ti mwaneaki n ana nanoanga ao ana akoi te Uea e kaitarai motibuaka, kakaitara, ake a reke man ara tai n te maiu aei.

Karekea taian kakabwaia ni Kabomwi aikai a roko ma ana kaetieti. E tua te Uea nakoira bwa ti na karaoa “ake ti kona ni karaoi” ao n “[anganna] tamneira bwa te karea nakoina.” E kainannoa aio te nanomatoa, te nano ae kakaonimaki, ao te botumwaaka ni kawakinan Ana tua ao ni katiteboa ara kantaninga ma Ngaia.

Ngkana ti kabwaka n ara kekeiaki ibukina bwa e a riaon ara kona, e teimatoa te Uea ni butimwaea nanora ae bon tau n angaanga. E reirei Beretitenti Dallin H. Oaks, “Ti na bon kakabwaiaki ibukin raoiroin nanora ao ni kammwakuria e ngae ngke ti kaitaraki ma kanganga ake a na kona ni uotira rikaaki.”

Ai aron ana raraoma Iotebwa Timiti ibukin tarina ae Alvin, are mate ao e aki karekei otenanti n te euangkerio, e karekea te kaotioti ae karaunano: “Ni kabane naba ake a na mate man te tai aei n akea te atatai n te [euangkerio] aei,” ake a na bon butimwaia ma nanoia ni kabane, bon taan bwaibwai [n abanuean te Atua ae te tiretio].” E reitia n taku te Uea, “Bwa Ngai te Uea, N na motiki taekaia aomata ni kabane ni kaineti ma aia mwakuri, ni kaineti ma are a tangiria i nanoia.”

Te bwai ae kakawaki iroun te Uea bon tiaki baike ti na karaoi ma bon nanora ni kan karaoa bwaai ake ti kona n riria bwa ara Tia Kamaiu.

E anga te karaunano temanna te rao nakon te kairake ni mitinare ngke e kamotirawaki man ana mwakuri ibukin aorakina, irarikin ana tataro ma nanona ni kan beku. E tibwa te kibu te rao aei are taekina ana katanoata te Uea nakoia Natina “nako ma korakoraia ni kabane ” ao “n aki toki n nanomatoa” ni kakoroi nanon Ana tua, “ao aia kairiribai [e kona n nanonaki bwa kanganga ni maiura] a roko i aoia ao n tuukiia man karaoan te mwakuri anne, nooria, bon au kantaninga n tangira te mwakuri anne n aki manga mena i baia natiia [aomata] akanne, ma ni butimwaea aia anga karea

E kaota ana koaua nakon te kairake raoraou aei bwa e nooria te Atua bwa e a tia ni kabanea ana kona ni karaoan ana beku. E tuangnga bwa e butimwaeaki ana karea iroun te Uea ao ni kona n reke irouna kakabwaia ake a tia ni beritanaki bwa e na reke irouia mitinare aika kakaonimaki.

A na kona n reke ana kakabwaia ni kabomwi te Uea rinanon te mwamwannano ao aia ibuobuoki rao tabemwaang ni kakoroi nanon baike tiaki kona ni karaoi i bon iroura. I uringa te tai ngke, ti raroa nako ma temanna natira te aine ae maeka i Buranti, ti a bon aki kona ni buokia ngkai e a tibwa tia ni bung. N te wiiki naba anne a ibuobuoki kain uoote i Utah nakon te tina are e a tibwa bungia natina aika a bwebwe. Kainabau, ae Valerie, e anga nanona bwa e na karaoa kanana—ma te tataro i nanona bwa e na raonaki te tina aio n ikotaki ma natira te aine. Imwiina riki teutana, ti karekea te rongorongo bwa aine n ara uoote i Buranti a bon baronga aia tai ni karaoi aia amwarake nakon natira ma ana utu. Ngaira iroura, e a tia te Atua ni kaeka ara tataro, ao ni kanakoia Ana anera bwa a na onea mwiira ni uota te karaunano.

Ngkana ti kaitara ma kanganga ao kakaewenako, tera ngke ti noori ara kakabwaia—ara tarena, kaubwaira, ao ara tai—ni kabonganai nakoia aomata ake a kainnanoia. Ni karaoan anne, ti bon aki ti uota te kabwaia nakoia tabeman ma ti bon karekea naba te kamaiuaki inanon maiura.

Teuana te kawai ae rang mwakaroiroi are ti kona n ibuobuoki iai nakon ana kakabwaia ni kabomwi te Atua bon man ara mwakuri are ti karaoia ibukia ara bakatibu n ana auti te Uea. Ngkana ti karaoi otenanti ibukia, ti rinnako n ana mwakuri ae korakora te Uea ibukin te kamaiuaki, kabongakin ara tarena ni katauraoi kakabwaia nakoia ake a aki reke aia tai ni karekei n aia tai ni maiu i aon te aba.

Ara mwakuri n ibuobuoki ake ti karaoi inanon tembora aika tabu e bon kauringira bwa e reitinako ana akoi ara Tia Kamaiu nakon te maiu ae na roko. N te maiu ae na roko, e na kona n reke ara tai ni katiai baike ti aki kona ni karaoi n te maiu aei. Nakoimi aine ake a tuai n reke toami, e taku Beretitenti Lorenzo Snow “Akea Aika Itiaki ni Boong Aika Kaitira aika a mate imwiin maiuakinan te maiu n onimaki ae e na kabua te bwai teuana ibukina bwa e a tia ni kabwaka ni karaoi bwaai tabeua ngkana e aki anganaki ana tai teuanne ke neienne. … A na karekei kakabwaia ni kabane, te karietataaki, ao te mimitong are e na reke iroun teuanne ke neienne n reken te tai irouia.”

Te rongorongo aio e bon kaineti nakoira ni kabane, natin te Atua. Ti bon aki kona ni birinako man taian kataaki ao kakaewenako n te maiu aei. Ma n tokin te tai, ti bane ni bungiaki ma te konabwai n tararuai maiura. Ma iai ara Tia Kamaiu ae tatangira, ao “ti ataia bwa bon rinanon [ana] akoi are ti kamaiuaki iai, i mwin bwaai ni kabane ake ti kona ni karaoi.”

I kakoaua nakoimi bwa e ngae ngkai ti kaitara ma kanganga aika a riaon ara kona, ti kona ni karekea ana kakabwaia te Uea. Rinanon Ana angakarea ni kamaiu, te Tia Kamaiu e karaoia ibukira ni kabane bwa ti na kamaiuaki man te bure ao te motibuaka ngkana ti anga ngaira Nakoina. N aran Iesu Kristo, amen.