Brian J. Holmes

E taekinna Unimwaane Brian J. Holmes bwa ngaia ao kainabana ae, Maggie, a tia ni kakoauaa ana berita te Uea are koreaki n Reirei ao Berita aika Tabu 84:88 are “E na rimoam.”

“Awaanne te bwai ae e a tia ni karaoia nakoira inanon bongin maiura,” e taku Unimwaane Holmes. “Ngkana ti raira maiura nakon te Uea, E mwaiti riki ae e kona n anganiira nakon are ti kona i bon iroura.”

N nakoana ae boou ae te Mataniwi ni Kabuta n te Itingaun, ana kaantaninga Unimwaane Holmes bwa e na reke ana tai ni kaota ana koaua iaon tibwangan Iesu n ana babaire Tamara are i karawa.

E taku, “Bon ngaia te Tia Kamaiu ao te Tia Kabooia natin ni kabane Tamara are i karawa,”.

E bungiaki Brian J. Holmes n Ritembwa 5, 1977, i Salt Lake City, Utah, temanna mai ibuakoia natiia Micheal H. Holmes ao Marian R. Holmes aika 12. Ngke te kairake ngaia, ao e beku n te mition i Munich, Tiaman. E mareaki ma Maggie Wilson n te Salt Lake Tembora ni Maati 29, 1999. Unimwaane ao Titita Holmes iai onoman natiia ao a maeka i Queen Creek, Arizona, n ana tai ni beku.

E karekea ana degree Unimwaane Holmes i aon te tautaeka ao te master degree ibukin te tua, man te Arizona State Uniwetiri. E a tia ni beku bwa te kauoman ni beretitenti n te Holmes Homes i Arizona, e kunea te Tua ibukin te Holmes, PlC, ao ni beku ngkai bwa te kauntira ni kabuta ibukin te Charter One, LLC.

Imwain ae e weteaki bwa te Itingaun ni Kabuta, ao e beku bwa te Itingaun n te Aono i Amerika Meang. E a tia naba ni beku bwa te beretitenti n te titeiki, kauntira ae rietaata, ao te bitiobi.