Taraiko man te Kauoua ni Kariiri
Tai karabako mairouia ake a tangiriko man boutokaiko, ma, birii nakoia.
Tabeua te ririki n nako, ngke e koro 12 au ririki, I kaoaki bwa N na ira au moan kaembing n te kooram n te Nakoanibonga ae te Aaron. Aio bon te kakao ae e a kaman kariaaki ngke te tia kairiiri n te kooram tamau ao e aki toki n nanako n kaembing ma ataeinimwanen ara uoote ao ngai I tiku n mweengara.
Ngke e a roko te bong anne, I bon rang n ingainga. Ao N na bon kaotia bwa I a kaman tangiria n kan booibuako ibuakoia ataeinimwaane. I tangiria n kaotai bwa I a tau. Inanon anne e aki rang n maan ngke I a kataaki bwa N na noraki bwa I tau ke I aki.
Katabeakiu are e I anganaki bon anaakin kingin ana kaa tamau bwa ti na mwanibuakaia ara taan kairiiri. I aki raoi uringa te bwai ae I taekinna nakon tamau, ma ngke I a biri nakon aia kurubu ataeinimwaane ma te kiing i baiu, e bon rotai te kakatonga n reken te kiing irou.
Ngkanne e a manga roko te kauoua n tabe. N na kauka mataroan te kaa ao n katoka te kai imarenan ana kaintekateka te turaiwa ao buun te kaa. Ao N na rokana mataroan te kaa bwa e aonga n tang te buu ni uaa e bong ao e na akea te anga n kauka te kaa ao n kanakoa te kai arei.
Aio mwakoron te karaki ae I rangi ni maama iai. Ngke I tia n katokaa te kai n nnena, I rokana te mataroa ao n waekoa n birinako n karabaai ibuakon te aroka. Ngke I toro i aontana, ao I a namakinna te maraki ae korakora. N te rootongitong ibuakon kataweu, I a tekatekana te aroka ae kateketeke.
E taonakinako tangiu ni maraki n tangin buun te kaa, ao ai akea au anga bwa nang turatura n okira te kaa, n kaota au “bure” ao n karekea buokau ae tawe ribuakon maemaeu.
Nikiran te tairiki anne, I wene n baraaki n te umwau-nrianna ao tamau, e kabongana te kainikatena, ni kanakoi kateketeken te aroka arei mai … eng, N na ti tuangi ngkami bwa I aki kona n tekateka raoi inanon boong ake imwiina.
I a tia n iaiangoa au taneiai aio inanon taai aika bati. I a kona ngkai n ngareakina aron kairakeu e ngae ngke a mataata nakoiu reirei ake a reke mai iai.
E mwaiti bannan anuaia aomata aika a na taara n titebo n te aroaro n aomata—tangiran te kan booibuako, tangiran kan kaotakim bwa ko tau, maekan ae kona katibanakoi bwaai, ao te birinako man rekenikain ara kairua. Bon aio te kabane n anua ae N na kabanea au tai iaona n te bong aio—karabaakira imwiin karaoan te bwai ae ti riai n aki karaoia.
Ngkai, I aki katitebooa au manibuaka ngke I ataei ma te bure ae kakaiaki, ma ti kona n karekei tabeua reireiara mai iai are a na kona n boongana ngkana ti a kataaki inanon nakonakora n te maiu aio.
N te Nne n Aroka are Eten, a maeka iai Atam ma Ewa ibuakon te kukurei—rawatan te amwarake, te nnen aroka ae akea kabotauan tamaroana—tiaki ti te nnen aroka ae tamaroa, ma te nnen aroka ae akea iai te uteute ke aroka aika kateketeke.
Ma, ti ataia naba bwa te maiu n te nnen aroka e kakeaa nnen te rikirake are a kainanoia. Te nnen aroka bon tiaki te kabanea n tia ma te kakatai, teuana mai ibuakon aika bati, are e na kaotiia, katauraoiia, ao n karekea te rikirake nakoia nakon kabanean tiaia n okira matan te Tama ma Natina.
Ko na uringa bwa bon iai te kakaitara i nanon te nnen aroka. E kona Rutibeero n kariiria Atam ao Ewa. E kataia moa n kariiria Atam bwa e na kana uaan te aroka n ataakin te raoiroi ao te buakaka. N ururingan te tua bwa a naaki kanna, E rawa iai Atam. Ao ngkanne e a roko Ewa are te kakabwaiaaki, are e a rineia bwa e na kana te uaa, n kairoroa Atam bwa e na kanna naba.
Imwiina, a taekinna Atam ao Ewa bwa aia rinerine aio e riai ibukin kakoroan ana kainibaire Tamaia are i Karawa. Ma man kanakin te uaa, a bure ni kaineti ma te tua—te tua ae anganaki mairoun te Tama. Reken ma tinebun ataakin te raoiroi ma te buakaka e uota nakoia te rawawata ngke a ongo bwanaan te Tama n katanoata Okina nakon te nnen aroka. A ataia bwa ai akea karabaaia, bwa are n koauana, akea karabaaia, bwa a maeka n te aro n aki ataibwai. Ma tao ae kamaraki riki nakon akean karabaaia n te tai anne, bwa e a oti aia bure. Akea aia anga n kamanoia ao n rootaki. Akea karabaaia n aro ni kabane.
N arona n aonikai, Rutibeero, e ataa rootakia ma memereia, e a manga kariiria riki—n te tai aio bwa a na karabaia mairoun te Atua.
Te kariiri aio—N na aranna bwa te “kauoua ni kariiri”—bon te kariiri are e na kona n uota te rekenikai ae korakora ngkana ti ongo iai. E koaua, kaitaaran taian moan kariiri n aki urua ana tua te Atua e bon raoiroi, ma ti ataia bwa ti na bon bane n bwaka n aekan nako moan kariiri i aon te aonaaba aio. Ngkana ti kekeiaki inanon rikirakera ma ara atatai, ti kaantaningaia bwa korakorara n kaitarai moan kariiri e na reitinako n rikirake ngkana ti kekeiaki n riki n ai aron ara Tia Kamaiu, Iesu Kristo.
Tabeman ana tangiria n karabaia mairoun te Atua bukina bwa a aki tangiria n kuneaki ke n kaotaki, ao a namakina te maemae ke te rawawata. Ma, e mwaiti koroboki aika tabu aika a reireiniira bwa karabakira mai iroun te Atua e bon aki kona n riki. N na tibwai tabeua.
E reireina Ieremia te Uea rinanon taian titiraki aikai: “Iai temanna ae kona ni karaba n tabo aika raba ae N na aki noria iai? bon ana taeka Iehova. Tiaki e bon oni karawa ma aonaba i Rou?”
Ao e reireia Iobi:
“Ba memena naba matana i aon aroaron te aomata, Ao E nori nakonakona ni kabane.
“Akea te ro, ao akea naba nun te mate, Ae a na karabaia iai akana karaoa ae buakaka.”
Te Tia Areru ae Tawita e taku:
“Iehova, ko tirotiroai, ao Ko ataai.
“Ko ata tekatekau ma teirakeu, Ko ata nanou mai kiraroa. …
“Ba noria, akea te taeka teuana i neweu, ae aki bane n ataki i Roum, Iehova. …
“N na nakea mairoun Tamneim? Ao N na biri nakea mai matam?
“Ngkana tao I rierake nako karawa, ao bon are iai naba Ngkoe: Ngkana I bairea neu ni wene i Tiore, ao noria, bon arei iai naba Ngkoe.”
Membwa aika Boou
Ibukiia ake a tibwa kaina Ana Ekaretia Iesu Kristo ibukiia Aika Itiaki ni Boong aika Kaitira, e na taraa ni kangaanga te kauoua ni kariiri . Rinanon ami bwabetito kam berita bwa kam na katoka i aomi aran Iesu Kristo, are irouia aika mwaiti e kainanona bitakin tein maiuia. E aki bebete bitakin maiun temanna. Angiin te tai e kainanoa ae ko na bitii anuam ma kateim ao n raonaki naba ma am bobotaki ibukin te rikirake nakon Tamam are i Karawa ae tatangira.
Te kakaitara e ataia bwa ko na ngore ni kaitarai ana kariiri. E na karaoa maium ngkoa, are e aki kakukureiko n anga aika bati, ae taraa n tamaroa ngkai. Te tia bukibuki, n aron ae aranaki n te Kaotiotii, e na kariiriko ma iango aika tang n aron aio: “Ko aki korakora n bita maium; ko aki kona aio; ko aki bootau ibuakoia aomata aikai; a na bon aki butimwaiko; ko ngore.”
Ngkana a tang ni koaua iango aikai iroum ake a boou nakon kawain te berita ae tabu, ti bubutiko bwa kona aki kakauongo nakon bwanaan te tia bukibuki. Ti tangirii ngkami; ko konaa; ti butimwaiko; ao ma te Tia Kamaiu Ngaia, e na iai iroum te korakora ni karaoi ni kabane. N te tai are ko kainnanoa ara tangira ao ara boutoka, tai mwamwanaaki n iangoia bwa ti na aki butimwaaiko ngkana ko keerikaki nakon tein maium ngkoa. Rinanon mwaakan Ana Mwakuri ni Kamaiu Iesu Kristo ae akea kabotauana, ko kona n manga bwanin. Ma ngkana ko karabako mai Irouna ao n kararoako man kaain am koaua ae tibwa reke, ko kararoako man oin te ibuobuoki are e na kona man anganiko te korakora n tokanikai.
Raoraou temanna, ae tibwa kaina te ekaretia, e tibwaa aron kangaangan kateimatoaan te onimaki ibuakon te maroaa. Bon iai te korakora ae raka n rikira ma teimatoara n riki bwa taan boutoka—ni bwabwaka ma ni kekeiaki inanon kakabwaiaakira n ana tangira te Tia Kamaiu Iesu Kristo.
E reireiniira Beretitenti Russell M. Nelson bwa “te tokanikai man kangaangan te aonaaba tiaki te bwai ae riki n te bongina ke uabong. E ririki inanon maiura ngkana ti teimatoa ni irii ana reirei Kristo. Ti ribanaa ara onimaki iroun Iesu Kristo man rairan nanora ni katoa bong ao ni kawakin ara berita ake anganiira te mwaaka. Ti teimatoa n nakonako i nanon kawain ara berita ao ni kakabwaiaaki ma korakoran tamneira, ma kaotioti aika onoti, ao kakorakorakin ara onimaki, ma aia mwakuri n ibuobuoki anera.”
Ngkana ko ikoaki, e keerikaki marurungim ao ni kona ni mate ngkana ko aki karekea bwainaorakiiana. Anne e koaua naba ibukin ikoakin tamneira. Ti, ikoakin tamneira aika aki bwainaorakiiaki aika kona n karekea te kangaanga nakon kamaiuakira are akea tokina. Tai karabako mairouia ake a tangiriko man boutokaiko, ma, birii nakoia. Bitiobi, beretitenti n te mwaanga, ao taan kairiiri aika tamaroa a kona n buokiko n karekea mwaakan te kamaiuaki n Ana Mwakuri ni Kamaiu Iesu Kristo.
Nakoia akea a kakarabaia, ti butii ngkami bwa kam na okirikaai. Kam kainnanoa te euangkerio ao Ana Mwakuri ni Kamaiu Iesu Kristo are e anganiira, ao ti kainanoia ake kam kona n anga. E atai ami bure te Atua; ko aki kona ni karabako ma Irouna. Kaiokiko Nakoina.
Ngkai Aika Itiaki ngaira Irouna, ngaira n tatabemaniira ti riai n karekea te katei n riki bwa kain te Ekaretia ae tatangira, butimwaai, ao ni kakaunganano nakoia ake iai nanoia n kekeiaki i nanon Ana kawai.
Taraiko man te kauoua ni kariiri! Iriira aia reirei burabeti ake ngkoa ao ngkai ao n ataia bwa ko bon aki kona n karabako mairoun te Tama ae tatangira.
N aki tabe ma anne, kabongana mwaakan te kamaiu n ana Mwakuri ni Kamaiu Iesu Kristo. Bwa aio raoi bukin karikara—ni karekea te rabwata ae mamara man kona ni mate bwa “kabaeaki ni mamaran te rabwata ma te kaantaninga” ao ti na konaaki, te kananokawaki, n taian moan kariiri aika mwaiti; n rikirake e ngae ngkana ti bwaka nakon kariiri aika; ao n ukora te ibuobuoki mai karawa imwiin karaoan aio, bwa ti na kona n riki bwa ai aron ara Tia Kamaiu ao Tamara are i Karawa. Bon Ana kawai. Bon ti anne te kawai. I kakoauai koaua aikai n aran Iesu Kristo, amen.