Te Babaire n Nanoanga

N Eberi ae nako, imwin karekean te rongorongo ae kakukurei bwa e a tia te Ekaretia ni kaoka te Kirtland Tembora, e kaoira Beretitenti Russell M. Nelson bwa ti na kamatebwaia te tataro ni katabu ibukin te Kirtland Tembora, are koreaki n mwakoro 109 n Reirei ao Berita aika Tabu E taku Beretitenti Nelson, bwa te tataro ni katabu, “e reireiniira aron tembora ni kakorakoraira n tamnei ni kaitarai kangaangan te maiu ni boong aika a kaitira.”

I aki nanokokoraki bwa kamatebwaian te mwakoro 109 e na bon kakabwaiako. N te tairiki aei, N na tibwai tabeua bwaai ake I reiakin man au ongeaba nakon ana kakao ara burabeti. I karekea te rau ao ni kauringaki bwa e nanoanga te Uea ao ana babaire ni kamaiu Tamara are i Karawa bon te babaire n nanoanga.

N aron ae tao kam ataia, “a kaungaaki mitinare aika a boou ni karekea aia entaumente n te tembora n te tai ae waekoa ao n rin n te tembora ni kamwaita rorokoia n aron are a konaa.” Ngkana a tia n entaute, a “kona naba ni beku bwa taan mwakuri n te tembora … imwaain ae a moana te mwakuri ni mitinare.”

Te tai i nanon te tembora imwain te rin n te (MTC) e kona n riki bwa te kakabwaia ae tamaroa ibukiia mitinare ake a boou ngkai a reiakina iai taekan berita aika tabu n te tembora imwain tibwaan kakabwaia n te berita akanne nakon te aonaaba.

Kamatebwaian te mwakoro ae 109, I reiakinna bwa i nanon te tembora, e anga te Atua te kakorakora nakoia mitinare aika boou—ao nakoira ni kabane—n te kawai ae tabu. N te tataro ni katabu, are roko rinanon te kaotioti, e tataro Iotebwa bwa “ngkana am taan mwakuri a na nako man am auti … ni kaota koauan aram,” ao “nanoia” ana “aomata ni kabane” a na “kamarauaki”—naake “a kakannato n te aonaba” ao “kainnano ni kabane, ake akea aia bwai, ao ake [a] karawawataaki.” E tataro bwa “e aonga aia motikitaeka ae e aki riai ni mauna n atakin te koaua, ao a aonga am aomata ni karekea te akoaaki i mataia ni kabane; ”Bwa a aonga ni kabane tabotabon te aonaba n ataia bwa ngaira, am taan mwakuri, ti a tia n ongo bwanaam, ao bwa ko a tia ni kanakoira.”

Aio te berita ae rang tamaroa ibukiia mitinare ake a tibwa weteaki—bwa e aonga aia motikitaeka “ae e aki riai ni mauna n atakin te koaua,” ni “karekea te akoaaki i mataia ni kabane,” ao ni katerea nakon te aonaba bwa a kanakoaki mai iroun te Uea. Ngaira n tatabemaniira ti kainnanoa naba te kakabwaia anne. Bon te kakabwaia nakoira ngkai ti karekea kamarauan nanora ngkai ti aitara ma kain rarikira ao raora ni mwakuri. Akea ni mwanewen te tataro ni katabu bwa kabanean ara tai n te tembora e na bon kamaraua nanoia tabeman’, ma I kananona bwa kabanean ara tai inanon ana auti te Uea e na bon kamaraua nanora ngkana ti kabotoa maiura i aon Iesu Kristo ma Ana nanoanga.

Ngke I kamatebwaia te tataro ni katabu, I kunea bwa e bubuti man bubuti Iotebwa ibukin te akoi—ibukia membwa n te Ekaretia, ibukia ana kairiribai te Ekaretia, ibukia taan kairiiri n te aba, Ao, ae bon kaineti nakoina, e bubutia te Uea bwa e na ururingnga ao n nanoanga Emma ma natiia.

Tera ana namakin Iotebwa ngke, teuana te wiki imwiina, n bongin te Itita, Eberi 3, 1836, n te Kirtland Tembora, e kaoti te Tia Kamaiu nakoina ma Oliver Cowdery ao, n aron are koreaki n mwakoro 110 n Reirei ao Berita aika Tabu, e taku, “I a tia ni butimwaea te auti aei, ao arau e na mena ikai; ao N na kaotai nakoia au aomata n te nanoanga n te auti aei.” E bon rang kakawaki te berita n nanoanga aio nakon Iotebwa. Ao n aron are taekinna Beretitenti Nelson n Eberi ae nako, te berita aio “e kaineti nakon tembora ni kabane ake a tia ni katabuaki ni boong aikai.”

A mwaiti kawai ake ti kona ni kunea iai te nanoanga iroura n tatabemaniira i nanon ana auti te Uea. E koaua aio bwa e a tia te Uea n tua nakon Iteraera bwa e na katea te umwa ao ni kaki i nanoan te “ne ni kabara bure.” I nanon te tembora, ti karekei nanoanga i nanon berita ake ti karaoi. Berita aikanne, n raonaki ma te berita are ti karaoia n te bwabetito, a kabaeira ma te Tama ao te Nati ao n aron are reireia Beretitenti Nelson ti na kona “ni karekea te aeka n tangira ao n nanoanga ae onoti … are atongaki bwa hesed” n te taetae n Ebera.

Ti na kunea te nanoanga ngkana ti kabaeaki ma ara utu nakon te maiu are akea tokina. Inanon te tembora, ti na kona naba ni mataata raoi n te Karikibwai, te Bwaka, ana mwakuri ni kamaiu te Tia Kamaiu, ao n ara ataibwai n manga maeka riki ma Tamara are i Karawa—n kanoan nako te babaire ni kamaiu—e bon kaota ana nanoanga. E koaua bwa e taekinaki bwa te babaire ni kamaiu bon te babaire ni kakukurei ibukina bwa bon te “babaire n nanoanga.”

I kakaitau n taian berita aika tamaroa n mwakoro 110 are e taku te Uea bwa e na kaota rabwatana rinanon ana nanoanga n Ana tembora. I kakaitau n te bwai are taekinaki bwa e na kaota ana nanoanga te Uea nakoira, ai aron Iotebwa, ngke e tangira ana nanoanga.

Ana bubuti Iotebwa n mwakoro 109 bon tiaki ana moantai ni karekea Ana nanoanga ao ni karekea te kaotioti. N te Buakonikai ae Tabu, te ataeinimwane ae Iotebwa e tataro tiaki ti bukina bwa e kan ata te Aro ae koaua, ma e bon “tang nakon te Uea ibukin ana nanoanga, bwa bon akea riki te tabo ae kona [ni] karekea iai te nanoanga.” Bwa n atakina irouna bwa e kainnanoa te nanoanga e ataia bwa bon ti te Uea ae kona n reke irouna te nanoanga ao ni kauki wintoon karawa. Teniua te ririki imwiina, e kaoti te anera Moronaai, n rimwiian are e taekinna Iotebwa n ana “tataro ao bubuti nakon te Atua ae Moan te Mwaakaibukin kabwaraan au bure ma nanobabau ni kabane.”

Karekean te kaotioti are kairaki ma te bubuti ibukin ana nanoanga e bon rang taabangaki inanon koroboki aika tabu. E ongo bwanaan te Uea Enoti imwiin ana tataro ibukin kabwaran ana bure. E moana rairakina taman te Uea ae Ramonaai man ana tataro: “n anganako au bure ni kabane bwa I aonga n ataiko.” Tao ti aki kakabwaiaki ma taian taneiai aika kakaongora aikai, ma ibukia naake a rawawata ni kaekaan aia tataro, ukoran ana nanoanga te Uea bon teuana te kawai ae moan te mwakaroiroi ae tina kona iai n namakina te Tamnei ae Raoiroi.

Iai te reirei ae irekereke ma aio are taekinaki n Moronaai 10:3-5. Kauarerekean kiibu aikai e anganira te reirei bwa rinanon ara tataro, ti na kona reiakina koauan Ana Boki Moomon. Ma te kauarereke aei e na kona ni bua kakawakin te taeka ae nanoanga. Kakauongo raoi nakon ana taeka ni kaunganano Moronaai; “N na anai nanomi bwa ngkana kam na wareki bwaai aikai … bwa kam na uringnga bwa e a tia n nanoanga te Uea nakoia natiia aomata, man te tai are karikaki iai Atam nakon te tai are kam na karekei iai bwaai aikai, ao n iangoi i nanomi.”

E kaumakira Moranaai bwa ti na aki ti wareki bwaai aikai—koroboki ake e nang tauraoi ni kainna—ma ti na iangoi naba i nanora baike a kaotaki inanon Ana Boki Moomon “bwa e a tia n nanoanga te Uea nakoia natiia aomata,” Ara taratara nakon ana nanoanga te Uea e bon buokiira ni katauraoira bwa ti na kona n “butiia te Atua, te Tama ae akea Tokina, n aran Kristo, ngkana arona bwa a koaua bwaai aikai.”

Ngkana ti iangoa raoi Ana Boki Moomon, ti na bae n titiraki: E bon koaua. n aron are taekinna Aramwa, Ana babaire n nanoanga te Atua bwa e na taraia raoi bwa a na bane ni manga kautaki natina ake a maeka i aon te aba, ao a na bane bwaai “ni kaokaki … nakon aroia”? E bon koaua Amureki—e kona ana nanoanga te Tia Kamaiu ni karaua nanoia aomata ni kabane kainnanoan raoi te motiraoi are ti kantaningaaki bwa ti na kabooa ao ngkanne e na “[mwaneira] ni kamanoira ni baina”?

E koaua, ae kaotia n ana kakoaua Aramwa, bwa e aki ti korakai Kristo ibukin ara bure ma ibukin naba “marakira ao aki taura” bwa E aonga n “ata … aron kamaiuaia ana botanaomata ni kaineti ma mamaraia”? E bon nanoanga te Uea, n aron ana reirei te Uea Beniamina, bwa ngkai te bwaintituaraoi ae akea boona, E mate “ibukin aia bure ake … a tia ni mate n aki ataa nanon te Atua ibukiia, ke aomata ake aki ata te bure”?

E koaua, n aron ae taku Riaai bwa, that “E bwaka Atam bwa aonga n riki aomata; ao a riki aomata bwa aonga ni karekea te kimwareirei”? Ao e bon koaua, n aron ae kaotia Abinataai, ngke e taekina Itaia, bwa Iesu e “waraki ibukin ara bure, e kamanatuaaki ibukin ara buakaka; e mena i aona te boaaki are e reke iai ara raoi; ao ti kamiuaki n oreana”?

Ni kabwaninan taekana, ana babaire te Tama n aron ae reiakinaki n ana Boki Moomon e bon kaota raoi te nanoanga aei? Eng I kakoauaa ao n ataia bwa reirei aika a uota te rau ake a taekinaki n Ana Boki Moomon a bon koaua.

I tiku, n iangoia bwa tabeua a bon rang rawawata, man am kakaonimaki ni wareware ao n tataro, ko na ataia bwa e na bon “kaota te koaua nakoimi, ni mwaakan te Tamnei ae Raoiroi.” I ata te rawawata anne ibukina bwa I a tia ni boo ma ngaia, ririki aika nako, ngke i wareka ana Boki Moomon ao i bon aki karekea te kaeka nakon au tataro n te tai ae tawe.

Ngkana ko korakai, I kaoko bwa ko na iriira ana reirei Moronaai n iangoia raoi n anga aika mwaiti Ana Boki Moomon n reireia “aron ana nanoanga te Uea [nakoia] natiia aomata”? N aron ae riki i rou, au kantaninga bwa ngkana ko karaoia, e na kona n roko i nanon ana rau te Tamnei ae raoiroi ao ko kona n ataia, kakoaua, ao n namakinna bwa Ana Boki Moomon ao te babaire n nanoanga a bon koaua.

I karabwarabwa ibukin ana babaire n nanoanga te Tama ao ibukin nanon ara Tia Kamaiu ni kakoroa bukina. I ataia bwa E na kaota rabwatana inanon te nanoanga n Ana tembora ae tabu ao inanon maiura ngkana ti Ukoukoria. N aran Iesu Kristo, amen.