N ai aron te Teei ae Uarereke

E moana kabanean Ana mwakuri i aon te aba Iesu man kakorakoraan reiakinaia Ana Abotoro. Ngkana e na ururingaki Ana rongorongo ao Ana Ekaretia, a na bati riki ake a na namakinaki nako nanoia mwaane ake 12 ake a kaman kinaa i nanon 24 te namakaina.

N te bong teuana e noora te kauntaeka Iesu imarenaia Tengaun ma Uomaao imwina e titiraki, “Tera ae kam kauntaeka iai?” N noran mamaaia, a “kainabwabu,” n aron are koreaki. Ma e noora nanoia te tia reirei ae raka riki arona n te reirei ao n namakina te aro ni kamoamoa. Ngai are E “wetea te ataei ae uarerreke nakoina, …

“Ao e taku, E koaua ae I a tuangkami, Ba ngkana kam aki rairaki, ao ngkana kam aki katotong aroia ataei aika uarereke, ao kam aki rin n uean te Atua.

“ Bwa ane e karinanoa n ai aron te tei aei, ao moan te kakanato n uean te Atua”.

E riai n ataaki bwa i mwain bungian Kristo, n ana reirei ni kaboo te Uea Beniamina e karina te taeka ae kakaawaki aei ae i aon ana nanorinano te tei. E taku: “Bon ana kairiribai te Atua te aro n aomata, … ao e na teimatoa n aki toki, ni karokoa ae e … riki bwa te aomaa ae itiaki rinanon ana mwakuri ni kamaiu Kristo ae te Uea, ao n riki n aiaron te ataei, n ongeaba, … n nanorinano, … n onrake n te tangira, … n aiaron te teei ae [ongo] iroun tamana.”

Ngkai, bon iai waaki n babakan ataei ae ti aki kaungai. Uabuwi ma nimaua te ririki n nako, tibu te mwane ae teniua ana ririki n te tai anne e tenaa bain mwanena ae nimaua a na ririki. Ai natiu te mwaane, are e tararuaia ataei n te tairiki anne, e reireina natina te aine , ni kabane reirein te rau ae kona ni iangoia, ni motikia bwa mwanena ae uarereke e bon aki ataia bwa aekara namakinan te tenaaki i aon te bai. E mwakuri ana reirei te karo anne tao inanon ti teuana, ke teuana ao teiterana te minti, ngke ti ongo te tang ae rangi ni takarua man aia ruu ni matuu ataei, ngke e takarua tibuu te aine, “E ataa ngkai kamarakina.”

Ngaia are tera ae ti nooria n aroaro aika a raraoi ni maiuia ataei? Tera ae karika tangin Kristo are e taekinaki i nanon Ana Boki Moomon? Tera ae reiakinna Iesu ngke E karuoa te ai mai karawa ao anera ake a katobibia ataei akekei, ao n taetae nakoia aomata “nooria [ami] ataei”?

Ti aki ataia bwa tera ae karika te aro aei, ma I taku bwa e irekereke ma aroia ni kororaoi ao n akea aia bure, te nanorinano i nanoia, ao tera are e kona n roko inanon maiura ngkana ti kateimatoaa.

E aera ngkai ara boong n aki rau ake e taekin temanna bwa “akea maneni bwai”? E kanga ae “iangoan bwaai ae akea maneia ao te kainikatonga irouia natiia aomata” bon taeka aika tei ibukin te kateitei are e bubura, are e mate n tamnei ni miin ni burabeti Riaai? Ao Tioramwaite, te botanaomata ake a tataroa bon aroia? E taetae ibukiia Aramwa, “O te Atua, a [tataro] nakoim ni matanriaia… n te aro are a taku bwa a korakora … ni bwain te aonaaba aika akea manenaia.”

Ni kaitaraana, iai riki te bwai ae tamaroa riki, ae itiaki, ke n nanorinano nakon te teei ae tataro? Titebo ae kanga e mena karawa inanon te ruu. Bon iai te Atua ao Kristo, ma irouia tabeman imwina, te taneiai anne e kona ni manga taraaki bwa akea nanona.

N aron are e taekinna Unimwaane Richard L. Evans 60 te ririki n nako; “A mwaiti mai buakora ae ti baka ni kiritian, ma ti … bon aki Kakoauaa raoi. … Ti karinea, ma ti aki iriria. … Ti taekina are E taku, ma ti aki maiuakinna.” “Ti Kamoamoaa, ma ti aki neboia.”

E na aekakira bitakin te maiu ngkana te aonaaba e kaburaa Iesu iaon riki ae taekinaki ni bakanrereiaki n te tai teuana ma teuana.

Ma ataei a rangi n Tangiria, ao te tangira anne e kaotaki n aron reitakiia tabeua n taabo n takakaro inanon maiuia. Ni bon arona, inanon aia tai ni kairake, ataei a rang kai tangira temanna. a tauraoi ni kakabwarabure, ao ni ngangarengare ni kukurei are, e kona n kamaraui naano aika a matoatoa.

Eng, e koro mwaitin aroia. Te Itiaki? Te Onimaki? Te Ninikoria? Nanomwakaia?

Nakomai ao irai n noora te nanorinano imaan te Atua ae kaotaki iroun temanna raoraou ae te kairake ae moan te tangiraki.

N Tianuare 5, 2025—91 te bong n nako—e katokaaki i aon Easton Darrin Jolley te nakoanibonga ae te Aaron ao ni katabuaki bwa te rikan n Ana Ekaretia Iesu Kristo ibukiia AikaItiaki ni Boong aika Kaitira.

E a kaman kan kakabuta ana toa te Uea n Ana Katairiki Easton n te tai ae rang maan. Ma e airi reken te tai ae tabu anne irouna ma te ruru n nano ni maaku bwa e na kabwaka, e na kona ni bwaka, bwa e na ngareakinaki, ke n rootaki nanona iai ao ana utu.

Ko nooria, iai aorakin Easton ae aki rang rereke irouia aomata, ae aorakin mwatiretin te rabwata. E a tia n roota rabwatana ma ngke e uarereke ma kangaanga ma uruakin ana kaantaninga ao arona nakon taai aika a na roko. N te tai ae waekoa ao e nang kabubutaki n te kaintekateka are e kokokaki ni kabanea maiuna. A bon aki taetaekinna ana utu bwa tera are i mwiin anne.

Te Tabati imwiin katabuana, E na kabuta te toa n te moantai Easton. Ao ungannanona irouna bwa e na kaotia ma kanikina aika a tabu aikai nakon tamana, are bon te bitiobi n te uoote. Ma ana kantaninga bwa te beku are e a kaman bubuti ao n tang ao ni bubuti, bwa a na bon akea, akeaae e na buokia. Ni bukina aika a mwaiti, ae onoti irouna, e riai ni karaoa aio n tingaia ao n akea ae buokia.

Imwiin uruakan te kariki ao kakabwaiakina iroun te ibonga—te kanikina are e tei ibukin rabwatan Kristo ae uruaki—Easton, ma rabwatana ae uruaki, e turatura ni waerake n anaa ana turee. Irarikin anne, iai teniua mwaneka ni waerake man timantin te autinibootaki nakon te tabo n taetae. Ngaia are, imwiin reken ana turee, e katika rangana ni waerake nakon are e konaa bwa e na tiku i aona i etan te tabo are e kona n tauaki n te nakonako. Imwiina, e tekateka i aon teuana te rangatana n te kawai ni waerake, ma baina ni kauoua are e tabeka iai rangana te atai nakon te rangatana ni waeraka. Imwiina e katika rangana te maing nakon te tabo naba anne, n tabekiarake ma te korakai ni karokoa e roko raoi iai ma te tokanikai.

Imwiina e mwaing ma te karaurau raoi i aon te boua are e kona iai n tamwarake nakon te tabo n tekateka mai moa. E okirakaaki naba ma ana turee. Tabeua riki te rangata ao e tei i matan te bitiobi, are tamana, ae waanako ranin matana i aon ubuna, are e kataia n aki kaota nanona n kan rabwata natina n ninikoriana ao kakaonimakina. Ao Easton, ma te okinnano ao te moangare ae oti i aon ubuna, e kona ni kangai ana taeka, “I a tia n neboiko [tamau ao] I kabanea te mwakuri are [e anganai] bwa N na karaoia.”

Te onimaki, kakaonimaki, itiaki, onimakinaki, karineaki, ao, n te kabanea, ana tangira nakon te tama ae tangiria ni kakukureia. Aikai ao tabeua riki anua ake a karekea nakoira taekinan aio,“Bwa ane e karinanoa n ai aron te tei aei, ao moan te kakanato n uean te Atua”.

Mwaneu ao tariu ao raoraou, te kabanea mai ieta n te tamnei ae I ataia ae rangi n tamaroa bon ataei aika a tibwa bungiaki ao ataei ao kairake ao anuaia aika a riai ao n akea booia n ai aroia ake ti taekiniia n te bong aei. I kakoaua bwa bon bannaia kaain abanuean te Atua ae butanako i aon te aba ni korakoraia ao n tamaroaia ni kabane.

Inanon naba tamnein au kakoaua anne, I kakoaua bwa inanon rikirakena, e noora are e nooria Iotebwa Timiti ao e taetae ma naake e taku bwa e taetae ma ngaiia. I kakoaua bwa Russell M. Nelson ae nanorinano ao ni itiaki bon ana burabeti ao ana tia mamata te Atua. Man te wawareware n tai nako inanon maiu, I kaota au kakoaua bwa Ana Boki Moomon bon te kabanea n eti ni boki ae I warekia ao bon kingin aan ana ekaretia Iesu Kristo ae e a tia ni kaokaki. I kakoauaa bwa te nakoanibonga ao te tataro a kaoka maiu—ana nakoanibonga Kristo ao ami tataro. I atai aikai ni kabane bwa a koaua ao I kaota au kakoaua iai nakoim n aran te nati ae te kabanea n ongotaeka ao n nanorinano ibuakoia natin te Atua—te Arebwa ao te Omeka, ae Korakora ae Ngai, are e tauraki, te tia kakoaua ae kakaonimaki—are te Uea ae Iesu Kristo, amen.