Lub Hwj Chim Thaum Txhawb Pab Ib tug Neeg
Thaum peb txhawb pab ib tug neeg, peb caw tus neeg ntawd los cuag Khetos thiab pe hawm hauv tus Tswv lub tsev.
Cov muam thiab cov kwv tij, ua nej tsaug vim nej rau siab ntseeg los cuag Yexus Khetos txawm muaj kev kub ntxhov siab lub caij no. Nej yeej zoo kawg nkaus; nej ntxim hlub kawg; nej txhua leej txhia tus yog Vajtswv ib tug me nyuam. Kuv thov Vajtswv kom peb yuav hnov tau tus Vaj Ntsuj Plig Dawb Huv tej kev tshoov siab thaum peb rais los mus ua thiab ib leeg pab ib leeg rais los mus ua Yexus Khetos cov thwj tim thiab hnov Nws txoj kev zoo siab thaum uas peb los pe hawm hauv tus Tswv lub tsev.
Thawj Tswj Hwm Russell M. Nelson qhia tias: “Tam sim no yog lub sij hawm rau nej, thiab rau kuv, npaj rau peb tus Tswv thiab tus Cawm Seej, Yexus uas yog tus Khetos, txoj Kev Los Zaum Ob. Tam sim no yog lub sij hawm rau peb tsom ntsoov rau peb txoj kev ua Nws cov thwj tim. Nyob hauv ib lub ntiaj teb uas muaj tej yam ntau uas meem txom peb, peb yuav ua li cas?”
Nws hais lus teb tias: “Kev teev tiam hauv lub tuam tsev yuav pab peb. Nyob hauv tus Tswv lub tsev, peb tsom ntsoov rau Yexus Khetos. … Peb los paub Nws zuj zus. … Tus uas muaj siab xav nrhiav Yexus Khetos tiag tiag tus ntawd yuav nrhiav Nws hauv lub tuam tsev.”
Ces peb yuav ua li cas rais los mus ua neeg zoo li ntawd thiab ib leeg pab ib leeg rais los mus ua Yexus Khetos cov thwj tim? Peb yuav tsum txhawb pab ib tug neeg. Txoj kev txhawb pab li tus Cawm Seej ua yog muaj kev khuv leej, ua siab zoo, ua siab ntev, thiab hlub tib neeg tsis txiav txim rau lawv. Thaum peb txhawb pab ib tug neeg, peb caw tus neeg ntawd los cuag Khetos thiab pe hawm hauv tus Tswv lub tsev kom txais tau Nws lub hwj chim uas txhiv neeg dim. Los yog hais tias, peb ib leeg pab ib leeg rais los mus ua cov thwj tim zoo thaum peb txhawb pab ib tug neeg ua tej yam uas coj lawv mus rau tus Tswv lub tsev.
Yexus Khetos qhia peb txog lub hwj chim ntawm kev txhawb pab ib tug neeg thaum muaj kev hlub thiab tsis txiav txim rau lawv. Nej yeej nco qab txog tus poj niam Xamalis nyob ntawm lub qhov dej. Tej zaum tus poj niam no xav tias nws tsis tseem ceeb, nws nyob nws ib leeg xwb, poob siab, thiab tsis muaj neeg paub txog nws. Tej zaum nws xav tias nws tsis tsim nyog koom lawv. Hauv nws lub neej nws twb muaj tsib tug txiv, thiab tus txiv neej uas nrog nws nyob lub sij hawm ntawd tsis yog nws tus txiv. Tej zaum lwm tus neeg twb txiav txim tsis ncaj rau nws vim lawv tsis paub hais tias nws lub neej zoo li cas. Tej zaum yog vim li ntawd nws tuaj nws ib leeg xwb rau lub qhov dej thaum nruab hnub uas kub tshaj plaws li. Txawm li ntawd los, nws yog thawj tus neeg uas Yexus Khetos qhia tias Nws yog tus Mexiyas. Rau Nws mas, tus poj niam no yog Vajtswv ib tug ntxhais.
Yexus Khetos qhia tus poj niam no tias dhau ntawm Nws tias yus txais tau txoj sia nyob mus ib txhis yog tias yus haus cov dej uas cawm neeg txoj sia. Nws qhia tias, “Tus uas haus cov dej uas kuv muab … yuav tsis nqhis ib zaug li lawm. cov dej uas kuv muab … yuav txhawv … thiab cawm nws txoj sia mus ib txhis.”
Tus poj niam Xamalis tau hnov tus Cawm Seej txoj kev hlub thiab tau lus tim khawv los ntawm tus Ntsuj Plig hais tias Nws yog tus Mexiyas. Tom qab qhov tim khawv no, nws rov mus nram nroog, ces tau caw lwm tus neeg tuaj saib, thiab muaj coob leej uas ntseeg hais tias Yexus yeej yog tus Khetos, “neeg ntiaj teb tus Cawm Seej tiag.” Khetos muaj kev hlub txhawb pab ib tug neeg; vim li ntawd, coob leej thiaj rais los ua Nws cov thwj tim uas rau siab ntseeg.
Peb kawm txog lub hwj chim ntawm kev txhawb pab ib tug neeg thaum muaj kev khuv leej los ntawm Khetos ob tug Thwj Tim Petus thiab Yauhas. Nej nco qab txog ib tug txiv neej, uas tuag taw txij thaum yug los, pw ntawm lub qhov rooj rau lub tuam tsev thov khawv. Tej zaum tus txiv neej no xav tias nws tsis tseem ceeb, nws nyob nws ib leeg xwb, poob siab, thiab tsis muaj neeg paub txog nws. Tej zaum nws xav tias nws tsis tsim nyog koom lawv.
“Tiam sis Petus hais rau nws hais tias, Kuv tsis muaj nyiaj tiam sis kuv yuav muab yam uas [kuv] muaj [rau] koj: Kuv tuav Yexus Khetos tus uas yog neeg Naxales lub npe hais rau koj hais tias koj cia li sawv thiab mus kev.”
Petus tuav nkaus tus txiv neej ntawd sab tes xis rub nws sawv, ces tus txiv neej lub cev txawm zoo tag nrho. Tom qab qhov txuj ci no, tus txiv neej no nrog Petus thiab Yauhas mus hauv lub tuam tsev, “dhia paj paws ua Vajtswv tsaug.” Petus thiab Yauhas txhawb pab ib tug neeg uas coj tus ntawd mus rau tus Tswv lub tsev, thiab tus txiv neej ntawd tau rais los mus ua ib tug thwj tim uas rau siab ntseeg Yexus.
Kuv cov me phooj ywg, muaj ntau lub sij hawm hauv kuv lub neej uas kuv xav tias kuv xav tais kuv tsis tshua tseem ceeb, kuv nyob kuv ib leeg xwb, poob siab, thiab tsis muaj neeg paub txog kuv. Kuv tau xav tias kuv tsis tsim nyog koom lawv. Kuv tau ua kev cai raus dej thiab ua kev cai pom zoo ua ib tug mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thaum kuv muaj 19 xyoo. Ib xyoos tom qab ntawd, kuv txais kev hu mus ua tub txib, tiam sis tseem tshuav ntau yam uas kuv tsis tau kawm txog lub Koom Txoos zaj keeb kwm.
Thaum kuv pib ua tub txib tej hauj lwm, kuv txawm kawm paub tias muaj ib lub caij uas cov Neeg Afikas Dub tsis tau txais tag nrho tej koob hmoov uas yus txais tau thaum pe hawm hauv tus Tswv lub tsev. Thaum kuv xub kawm txog qhov no kuv tau pib npau taws, ntxhov siab, poob siab, thiab ntshai. Tej kev xav no tau txob kuv lub siab ces kuv thiaj tsis to taub tus Vaj Ntsuj Plig Dawb Huv tej kev tshoov rau ib ntus.
Muaj hmoov, vim kuv muaj ib tug khub ua tub txib, Kevin Vick, uas tau muab kev hlub, kev ua siab ntev, thiab ua siab zoo los txhawb pab kuv. Txhua hmo thaum nws pom kuv tej kev ua xyem xyav thiab tsis paub xav, nws tsuas teb kuv hais tias, “Txwj Laug Johnson, kuv hlub koj.” Tom qab ob lim tiam, kuv tau cia kuv lub siab hnov Kevin txoj kev hlub . Kuv txawm muaj siab loj txaus yuav thov Leej Txiv Saum Ntuj Ceeb Tsheej los ntawm Yexus Khetos lub npe. Thaum kuv thov Vajtswv ntawd, kuv thiaj xav txog tshooj 6 hauv phau Lus Qhuab Qhia thiab Kev Khi Lus, nqe 21–23, uas hais tias:
“Saib seb, kuv yog Yexus Khetos, uas yog Vajtswv Leej Tub. … Kuv yog txoj kev kaj uas ci nyob hauv qhov tsaus. …
“… Muab koj lub cim xeeb xav mus rau hmo uas koj thov kuv nyob hauv koj lub siab, kom koj yuav paub txog qhov tseeb ntawm tej yam no.”
“Kuv tsis tau hais lus ua rau koj lub siab kaj txog qhov no los? Koj yuav tau kev ua tim khawv dab tsi uas tseem ceeb tshaj li qhov uas los ntawm Vajtswv?”
Thaum kuv nyeem, kuv nco qab lawm. Kuv thiaj nco txog hnub uas kuv tau yoo mov thiab thov Vajtswv seb Phau Ntawv Maumoos puas yog Vajtswv txoj lus thiab tias Joseph Smith puas yog tus Yaj Saub rau kev Muab Txoj Moo Zoo Txum Tim Rov Qab Los. Kuv tau nco txog tej kev sib khi lus hauv tus Tswv lub tsev uas muab kuv khi cia rau Yexus Khetos. Kuv tau hnov tus Cawm Seej txoj kev hlub, Nws txoj kev hlub tshua, thiab Nws txoj kev qhia tseeb tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog Nws lub nceeg vaj hauv ntiaj teb no thiab yuav tsum muaj kom thiaj npaj tau peb rau Nws txoj Kev Los Zaum Ob. Vim kuv nco qab lawm, kuv thiaj tau hnov tus Vaj Ntsuj Plig Dawb Huv dua thiab haj yam to taub tias Yexus yog tus Khetos thiab tias kuv yog Nws ib tug thwj tim.
Tej thaum peb yeej yuav muaj tej lus nug uas peb tsis paub teb thiab yuav xav tias peb tsis tshua tseem ceeb, peb nyob peb ib leeg xwb, poob siab, thiab tsis muaj neeg paub txog peb. Tiam sis, kuv cov phooj ywg es, peb yuav tsum peem mus lawm tom ntej muaj kev ntseeg Yexus Khetos thiab nco txog Nws tej lus uas hais tias:
“Cia li txais kev nplij siab.”
“Neeg ntiaj teb yuav tsim txom nej: tiam sis [cia li zoo siab], rau qhov kuv twb kov yeej lub ntiaj teb no lawm.”
Kuv ua tim khawv tias qhov no muaj tseeb thiab txog tus Cawm Seej txoj kev cog lus.
Ces yog li ntawd peb yuav ua li cas kom peb txoj kev txhawb pab ib tug neeg raws li tus Cawm Seej ua yuav haj yam zoo? Kev ua neej raws li Khetos tej lus qhuab qhia yuav pab peb. “Kev ua neej raws li Khetos tej lus qhuab qhia,” uas Thawj Tswj Hwm Nelson hais tias “yuav tsim ib tug txheej txheem uas muaj hwj chim ua rau peb sab ntsuj plig muaj zog zuj zus tuaj.
Thaum peb siv zog ua neej raws li Yexus Khetos tej kev cai siab dua … Tus Cawm Seej tsa peb kom dim tej uas lub ntiaj teb rub peb ua vim Nws foom koob hmoov rau peb kom haj yam muaj kev siab hlub, kev txo hwj chim, kev ua siab dawb siab zoo, kev tswj tus kheej, kev kaj siab lug, thiab kev so.”
“Lub dag zog [ntawm sab ntsuj plig no] uas los ntawm kev ua raws li Khetos cov lus qhuab qhia uas tseem muaj sia nyob,” raws li Txwj Laug Dale G. Renlund piav, “yeej ua rau peb muaj hwj chim hloov peb tus cwj pwm kom thiaj li tau hmoov zoo mus ib txhis li thiab kuj ua rau peb xav pab [txhawb pab] lwm tus raws li kev tsim nyog.” Txwj Laug Renlund rov qhia peb tias “tus Cawm Seej txoj hauj lwm yog kev kho mob [kom peb zoo tag nrho]. Peb txoj hauj lwm yog kev hlub—hlub thiab txhawb pab kom lwm tus xav mus cuag Yexus Khetos.”
Peb haj yam yuav ua neej raws li Khetos cov lus qhuab qhia thaum peb niaj hnub kawm Phau Ntawv Maumoos thiab txhua lub lim tiam noj lub cim nco txog. Thawj Tswj Hwm Nelson qhia tias Phau Ntawv Maumoos “qhia txog Khetos cov lus qhuab qhia … thiab muaj cov lus qhia uas muaj hwj chim thiab meej tshaj plaws hais txog Yexus Khetos txoj Kev Theej Txhoj, ntau dua lwm phau ntawv qhov twg los xij.” Kuv nyiam phau ntawv no heev. Txoj kev thov Vajtswv thaum txais lub cim nco txog txhua lub lim tiam yuav pab peb haj yam to taub Yexus Khetos txoj Kev Theej Txhoj thiab yuav ntxiv zog rau peb sab ntsuj plig, nplij peb siab, thiab ua rau peb muaj Vajtswv lub hwj chim hauv peb lub neej. Nco qab hais tias, “dhau los ntawm tej kab ke [ntawm lub pov thawj hwj], thiaj pom lub hwj chim ua li Vajtswv tshwm sim,” thiab tias lub hwj chim no, uas yog Yexus Khetos lub hwj chim, pab peb muaj lub siab xav thiab haj yam muaj cuab kav txhawb pab tau ib tug neeg.
Kuv txoj kev kawm Phau Ntawv Maumoos thiab kev noj lub cim nco txog ua rau kuv tsis tshua poob siab, pab kuv rau siab ntso ua ib tug thwj tim zoo, thiab pab kom kuv xav txhawb pab ib tug neeg ib yam li tus Cawm Seej tau ua.
Kuv cov phooj ywg, kuv cog lus tias thaum peb ua raws li Khetos cov lus qhuab qhia thiab txhawb pab ib tug neeg kom coj lawv mus rau tus Tswv lub tsev, peb yuav muaj peev xwm thawb mus tom ntej muaj kev ntseeg Yexus Khetos tab txawm peb muaj tej lus nug uas peb tsis tau lus teb thiab peb xav tias peb tsis tshua tseem ceeb, peb nyob peb ib leeg xwb, poob siab, thiab tsis muaj neeg paub txog peb. Peb yuav caw ib tug neeg kom los cuag Yexus Khetos thiab tuaj pe hawm hauv tus Tswv lub tsev kom txais tau Nws txoj kev txhiv dim thiab kev hlub. Nyob hauv tus Tswv lub tsev, peb yuav “hnov [tus Cawm Seej] txoj kev hlub tshua. [Peb] yuav nrhiav lus teb rau [peb] cov lus nug nyuaj tshaj plaws. [Thiab peb] yuav haj yam to taub txoj kev zoo siab uas los ntawm Nws txoj moo zoo los.” Los ntawm Yexus Khetos lub npe, amees.