Tus Tswv Saib Neeg lub Siab
Tib yam uas Vajtswv xav tau kom ua raws li Nws tej lub hom phiaj thiab pab peb hloov los ua neeg zoo li Nws yog kom peb tig peb lub siab mus rau Nws xwb.
Thaum tus Tswv txib kom xaiv Ixayees tus vaj ntxwv tshiab los ntawm Yexais cov tub, tus yaj saub Xamuyees, saib Yexais tus tub hlob, Eli-as, ces nws hais tias, “Tus uas tuaj sawv tab meeg tus Tswv no, yog tus uas nws xaiv ntag.” Tiam sis Eli-as tsis yog tus tub qhe uas tus Tswv tau xaiv. Tus Cawm Seej ceeb toom Xamuyees hais tias: “Koj tsis txhob saib qhov uas nws siab thiab zoo nraug xwb. Kuv tsis yuav tus ko, rau qhov kuv tsis saib neeg li noob neej saib. Neeg saib lub cev ntaj ntsug, tiam sis kuv saib neeg lub siab.”
Txawm yog Daviv tsis yog tus uas muaj dag zog tshaj plaws los tsis yog tus uas muaj txuj ci zoo dua li nws cov tij laug, Vajtswv pom tias nws lub siab muaj zog. Nws hlub Vajtswv kawg nws lub siab lub ntsws thiab muaj ib lub siab xav mloog Vajtswv lus. Nws ntseeg Vajtswv txoj kev hlub, lub hwj chim, thiab tej lus cog tseg, raws li nws qhia thaum nws nrog tus Tswv txoj kev pab ua siab loj tawm tsam thiab kov yeej Nkauli-am.
Zaj dab neeg no qhia peb tias tib yam uas Vajtswv xav tau kom ua raws li Nws tej lub hom phiaj thiab pab peb hloov los ua neeg zoo li Nws yog kom peb tig peb lub siab mus rau Nws xwb. Rau ib tug xib hwb qhia kev cai, Nws txib hais tias, “Nej yuav tsum hlub tus Tswv uas yog nej tus Vajtswv kawg siab kawg ntsws.” Rau tus Yaj Saub Joseph Smith, Nws hais tias, “Tus Tswv yeej yuav tsum muaj neeg lub siab thiab kev txaus siab ua.” Thiab rau cov Neeg Nifais, tus Cawm Seej uas tau sawv rov los caw li no hais tias: “Nej yuav muab lub siab puas tas thiab lub siab xav ua zoo ua kev txi rau kuv.”
Yog vim li cas? Tus Cawm Seej qhia tias yog peb tig peb lub siab mus rau Nws, ces vim Nws tau theej peb lub txhoj, peb thiaj li yuav tau koob hmoov muaj dag zog thiab txais tej lub txiaj ntsim ntawm sab ntsuj plig kom kov yeej peb tej teeb meem hauv lub ntiaj teb, tiv taus kev ntxias, txais tau tej lus qhia thiab to taub, thiab muaj kev xyiv fab thiab kev kaj siab lug hauv peb lub neej. “Los ntawm tej yam me yuav muaj tej yam uas loj tawm los.” Nws hais tias Nws muaj hwj chim “ua kom tej uas qaug zog los ua tej uas muaj zog rau [peb]” thiab foom koob hmoov rau peb kom muaj txhua yam thiaj li vam meej hauv lub ntiaj teb no thiab txais txoj sia nyob mus ib txhis. Nws hais tias “Cov uas muaj lub siab ncaj ncees, cov ntawd tau koob hmoov; lawv yuav pom Vajtswv.”
Kuv ntseeg hais tias nov yog vim li cas Yexus Khetos tau hais lus cem cov xib hwb qhia Vajtswv txoj kev cai thiab cov Falixais thaum Nws ua hauj lwm qhuab qhia hauv lub ntiaj teb no. Txawm yog lawv rau siab ua raws nraim li Nws txoj kev cai, lawv muaj hom phiaj tsis yog. Nws tau cem lawv hais tias, “Cov neeg no lub qhov ncauj hwm kuv, tiam sis lawv lub siab tsis npuab kuv.”
Qhov no ua rau tag nrho Nws cov thwj tim nco ntsoov tias qhov tseem ceeb tsis yog tej yam uas peb ua thiab hais xwb, tiam sis yog vim li cas peb muaj siab xav ua tej yam uas Yexus Khetos hais kom peb ua. Nws hais tias, “Vim kuv, tus uas yog tus Tswv, yuav txiav txim rau neeg sawv daws raws li tej yam lawv ua, raws li tej kev xav tau ntawm lawv lub siab.” Peb Leej Txiv Saum Ntuj Ceeb Tsheej xav kom Nws cov me nyuam tsis txhob lam mloog lus thiab lam pab lwm tus xwb. Nws xav kom peb ua tej ntawd vim peb muaj siab xav ua vim peb hlub Nws kawg peb lub siab lub ntsws. Nws xav kom peb yuav xav hloov los ua neeg zoo li Nws.
Yog li ntawd, yog tus Cawm Seej txhawj txog peb sab ntsuj plig txoj kev nyob zoo—qhov uas Nws xav tau ntawm ib tug thwj tim tseeb—ces peb yuav tsum ua li cas kom tshuaj ntsuam peb lub siab seb puas ua qhov yog rau Vajtswv pom?
Tsis ntev tas los, thaum kuv tus poj niam thiab kuv ua tub txib tag thiab wb rov qab los ntawm Portugal, wb tau ua tej kev kuaj xyuas lub cev nqaij daim tawv seb wb puas noj qab haus huv. Tej kev kuaj xyuas ntawd twb kuaj seb wb lub plawv zoo li cas—xws li kuaj ntshav, kev hnov lub plawv txoj kev dhia, thiab kev kuaj lub plawv thaum khiav. Kuv ntseeg tias tus Cawm Seej twb muab tej kev kuaj xyuas peb sab ntsuj plig uas peb siv tau kom seb peb muaj lub siab zoo li cas. Cia kuv hais ob peb yam kev kuaj xyuas rau nej.
Kev Ntsuam Xyuas Nej lub Siab Seb Zoo Li Cas
Yam thib Ib, Peb Tsom Ntsoov rau Dab Tsi, Muaj lub Hom Phiaj thiab lub Siab Xav Ua Dab Tsi
Yexus tau qhia tias, “Vim tej uas muaj nqis rau nej nyob qhov twg, nej lub siab yuav nyob qhov ntawd.” Tej yam uas muaj nqis rau peb yog tej yam uas peb tsom ntsoov rau thiab siv dag zog kom tau. Peb xaiv siv sij hawm ua dab tsi thiab tsom ntsoov rau dab tsi, thiab tej lub hom phiaj uas peb muaj yeej qhia ntau txog peb lub siab. Tus Cawm Seej ceeb toom hais tias txawm Nws hu neeg coob, Nws xaiv tsawg tus “vim lawv tso siab plhuav rau tej yam ntawm lub ntiaj teb no, thiab [lawv] xav muaj koob nto npe.” Kuv puas tsom ntsoov rau tus Cawm Seej hauv kuv lub neej? Kuv qhov muag puas ntsia ntsoov rau Nws lub yeeb koob?
Yam thib Ob, Peb txoj Kev Txaus Siab Ua Raws Li Vajtswv cov Lus Txib
Nyob hauv cov vaj lug kub, tus Tswv thiab Nws cov yaj saub qhia tias kev muab hlob thiab kev tsis mloog lus yeej koom ua ke nrog ib lub siab tawv. Nifais tau ntuas nws cov tij laug hais tias: “Yog vim li cas nej thiaj tsis ua raws li tus Tswv tej lus txib? Yog vim li cas nej thiaj yuav piam sij, los ntawm nej txoj kev siab tawv?” Rau Haiv Neeg Ntseeg nyob hauv Missouri, tus Tswv ceeb toom hais tias, “Tiam sis tus uas tsis ua ib yam dab tsi li kom txog thaum tus Tswv txib nws tso, thiab txais ib lo lus txib nrog lub siab uas ua xyem xyav, thiab tub nkeeg ua raws li lo lus txib ntawd, tus ntawd yuav raug txim.” Txawm tus Cawm Seej tsis xav tias peb yuav ua neeg zoo tag nrho thaum peb ua raws li Nws cov lus txib los, Nws hais kom peb muaj ib lub siab xav ua raws li cov lus txib ntawd.
Yam thib Peb, Peb txoj Kev Rau Siab Kawm cov Vaj Lug Kub thiab Xav Txais Kev Tshwm Sim
Tus Tswv tau ntuas Oliver Cowdery kom “khaws tej lus no cia rau hauv koj lub siab.” Tus Tswv caw peb rau siab kawm cov vaj lug kub, thiab dhau los ntawm tus Vaj Ntsuj Plig Dawb Huv lub hwj chim, rau siab kawm kom to taub thiab txais kev tshwm sim txog qhov uas txoj moo zoo muaj tseeb.
Tus yaj saub Anpinadais tau cem cov pov thawj ntawm tus Vaj Ntxwv Nau-as uas phem vim lawv tsis ua li ntawd hais tias, “Nej twb tsis ua kom nej lub siab yuav to taub; yog li ntawd, nej thiaj tsis muaj tswv yim.” Kuv puas rau siab kawm cov vaj lug kub txhua hnub thiab xav to taub cov vaj lug kub thaum kuv thov Vajtswv?
Yam thib Plaub, Peb tej Kev Xav thiab tej Lus
Tus Cawm Seej qhia tias “yam uas tawm hauv neeg lub siab los ua rau neeg ua phem” thiab “rau qhov nws lub siab xav li cas, nws lub ncauj hais li ntawd.” Peb tej lus thiab peb tej kev xav zoo li cas los yeej qhia tias peb lub siab huv npaum li cas. Kuv puas tsom ntsoov rau tej kev xav tsis zoo txog lwm tus lub hom phiaj, los sis txog kuv tus kheej? Kuv puas txiav txim rau lwm tus sai sai? Kuv puas nrhiav tej kev zam kuv tus kheej thaum kuv ua yuam kev? Thiab kuv tej lus nev? Kuv tej lus puas txhawb nqa thiab pab lwm tus nyob ib puag ncig kuv? Los yog puas tsim kev sib ntxub thiab kev sib cav sib ceg?
Tom qab tus kws kho mob kuaj kuv lub cev, nws qhia kuv tias, kuv lub plawv zoo thiab—tiam sis muaj ob peb yam kev txhawj uas yuav tsum kho tam sim no, ua ntej tej ntawd yuav los ua tej teeb meem loj. Ces nws hais kom kuv hloov tej yam hauv kuv lub neej. Ib yam li ntawd, thaum nej tshuaj ntsuam nej lub siab thiab pom tias muaj tej yam tsis zoo, thov kom tsis txhob ntshai dhau! Tus Cawm Seej muaj ib co tshuaj thiab tej kev pab nej sab ntsuj plig. Nws twb cog lus tias yuav muab ib lub siab tshiab rau nej! Nov yog tej yam nej ua tau kom nej sab ntsuj plig yuav muaj zog ntxiv.
Kev Ua Kom Nej Sab Ntsuj Plig Muaj Zog Ntxiv
Yam thib Ib, Txhawb Nqa Nej txoj Kev Muab Siab Npuab Yexus Khetos
Thaum peb siv sij hawm txhua hnub kom muab siab npuab Yexus Khetos, peb lub siab yuav hloov. Kev kawm vaj lug kub txhua hnub, nrog rau kev thov Vajtswv thiab kev yoo mov, yuav ua rau nej hlub tus Cawm Seej ntxiv thiab txhawb nej txoj kev ntseeg thiab tej kev xav hloov siab lees txim thiab txo hwj chim rau Vajtswv. Cia li xav txog qhov uas Nifais hais no hais tias: “Yog li ntawd, kuv tau thov tus Tswv; thiab saib seb nws tau los xyuas kuv, thiab tau ua rau kuv lub siab mos muag kom kuv thiaj ntseeg txhua lo lus uas kuv txiv tau hais.”
Thaum peb saib xyuas lub noob ntawm txoj kev ntseeg vim peb muaj tej kev xav ua zoo thiab ua tej yam zoo, peb lub siab yuav hloov los ua dawb huv ib yam li cov Neeg Nifais: “Lawv yoo mov thiab thov Vajtswv tsis tu tsis tseg, thiab lawv txoj kev txo hwj chim loj hlob muaj zog zuj zus tuaj, thiab lawv txoj kev ntseeg Khetos ruaj khov zuj zus tuaj, txog rau thaum lawv muaj kev xyiv fab thiab kev nplij siab puv nkaus, muaj tseeb tiag, twb txog rau thaum ua rau lawv lub siab hloov ua ntshiab thiab dawb huv, kev hloov ua dawb huv uas tau muaj vim yog lawv ywj lawv lub siab rau Vajtswv.”
Yam thib Ob, Muab Nej lub Siab Ywj rau Nws
Tus Cawm Seej qhia hais tias, “Yog nej hlub kuv, nej yeej yuav ua raws li kuv tej lus [txib].” Nws caw peb qhia tias peb hlub Nws thaum peb khi lus thiab ua raws li Nws tej kev khi lus. Thaum peb rau siab ua raws li Nws cov lus txib txhua hnub, hloov siab lees txim rau peb tej kev txhaum, thiab nyiaj mus kom ris Nws lub npe thiab muaj lub siab xav ua raws li Nws lub siab nyiam, peb yuav tau koob hmoov muaj tus Vaj Ntsuj Plig Dawb Huv nrog nraim peb nyob.
Nifais ua tim khawv tias, “Kuv paub tias yog nej yuav coj raws li Leej Tub, kawg siab kawg ntsws, tsis txhob lam ua txuj ua los sis lam dag rau Vajtswv, tiam sis mob siab tiag, hloov siab lees txim rau nej tej kev txhaum, ua pov thawj rau Leej Txiv tias nej yeej txaus siab ris Khetos lub npe, los ntawm kev cai raus dej … , [ces] nej yuav tau txais tus Vaj Ntsuj Plig Dawb Huv.” Tus Vaj Ntsuj Plig Dawb Huv yuav coj nej thiab pab nej paub tus Tswv lub siab nyiam thiab xaiv ua tej yam zoo.
Yam Kawg, Ua Hauj Lwm rau Vajtswv thiab Pab Lwm Tus Kawg Nej lub Siab lub Ntsws
Tus Cawm Seej caw peb kom “ua hauj lwm rau nws kawg nej lub siab lub ntsws.” Thaum peb xaiv ua tej yam ua tus Tswv hais kom peb ua—xws li kev ua raws li cov lus txib, txais lub cim nco txog, hwm Vajtswv hauv lub tuam tsev, thiab pab lwm tus—nrog ib lub siab dawb paug thiab nrog kev mob siab tiag, txhua yam peb ua kom pab lwm tus thiab kom hwm Vajtswv yuav los ua ib yam uas txhawb nqa peb sab ntsuj plig thiab peb txoj kev ntseeg thiab zaj lus tim khawv thiab ua rau peb muaj kev xyiv fab thiab kev hlub Vajtswv thiab peb cov neeg zej zog puv npo peb lub siab.
Tus yaj saub Amas tej lus nug yeej tseem ceeb niaj hnub no: “Nej sab ntsuj plig puas tau yug los ntawm Vajtswv? Nej puas tau txais nws tus yam ntxwv rau nej lub ntsej muag? Puas tau ua rau nej lub siab hloov loj heev zoo li no?”
Cov kwv tij thiab cov muam, kuv caw nej muab nej lub siab tag nrho tso rau tus Cawm Seej hnub no. Cia li muaj ib lub siab uas xav pe hawm Nws thiab pab lwm tus. Cia li tso tej yam uas tab kaum nej hauv lub ntiaj teb no tseg thiab siv zog kom siv sij hawm nrog tus Tswv txhua hnub hauv nej lub neej. Cia li hloov siab lees txim thiab rov qab mus cuag Nws kawg nej lub siab lub ntsws, thiab Nws yuav zam txim rau nej thiab puag khawm nej mus ib txhis li hauv Nws txoj kev hlub. Tsis txhob ntshaw tej yam ntawm lub ntiaj teb no, tiam sis xaiv kom tso siab ntsoov rau Nws lub yeeb koob thiab nrhiav tej yam ntawm ib qho chaw uas zoo dua. Nws paub nej txoj kev xav thiab nej lub siab xav li cas, thiab thaum nej mus cuag Nws, Nws yuav foom koob hmoov rau nej kom muaj zog, ntseeg nej tus kheej, muaj kev kaj siab lug, thiab kev xyiv fab hauv lub neej no thiab muaj chaw nyob hauv Nws lub nceeg vaj xilethi-aus mus ib txhis li.
Kuv paub Yexus Khetos muaj txoj sia nyob. Nws yog peb tus Txhiv Dim. Thiab Nws hlub nej thiab hlub kuv kawg Nws lub siab lub ntsws. Los ntawm Yexus Khetos lub npe, amees.