Raug Sim Siab thiab Tau Dag Zog Los ntawm Khetos

Kuv cov kwv tij thiab cov muam, kuv hnov tus Tswv txoj kev hlub thaum peb tuaj sib koom ua ke. Kuv txo hwj chim los hais lus rau nej. Kuv thov kom tus Ntsuj Plig yuav coj kuv tej lus los rau hauv nej lub siab xwv kom nej yuav hnov yam uas tus Tswv xav qhia nej, kom yuav zoo tshaj kuv cov lus xwb.

Ntau xyoo tas los lawm kuv tau kawm physics thiab kev ua leb thaum kuv kawm ntawv qib siab. Zoo nkaus li kuv yuav kawm tsis yeej li. Kuv pib xav tias kuv tab tom kawm ib yam uas kuv tsis muaj peev xwm kawm tau. Thaum kuv kov tsis yeej, ces kuv haj yam tsis muaj siab xav kawm ntxiv. Kuv txoj kev poob siab no ua rau kuv xav tias kuv yeej yuav kawm tsis tau ib yam dab tsi li. Kuv pib xav tias kuv mam li tsum, es yuav kawm ib yam uas yooj yim dua.

Kuv qaug zog heev. Thaum kuv thov Vajtswv, kuv tau hnov tus Tswv txoj kev nplij siab. Kuv hnov Nws hais lus rau kuv lub paj hlwb hais tias, “Kuv tab tom sim koj siab, tiam sis kuv yeej nrog nraim koj nyob.”

Thaum ntawd kuv tsis to taub txhij txhua txog cov lus ntawd. Tiam sis kuv paub tias kuv yuav tsum ua li cas—kuv tau pib rau siab ntso ua.

Thaum ntsuam xav txog thiab ua hauj lwm rau ntau xyoo tom qab ntawd, kuv pib to taub zaj xov uas txhawb tib neeg lub siab hauv cov vaj lug kub uas hais tias: “Vim Yexus Khetos txhawb kuv lub zog, kuv thiaj ua taus txhua tsav yam huv tib si.”

Kuv kawm hais tias txoj kev kawm physics uas nyuaj kawg no yeej yog ib qho txiaj ntsim uas los ntawm Vajtswv los. Nws tab tom qhia kuv tias yog muaj Nws txoj kev pab, kuv thiaj txawj ua tej yam uas zoo nkaus li ua tsis tau yog tias kuv tso siab ntseeg hais tias Nws yuav nyob ntawd pab kuv. Dhau ntawm qhov txiaj ntsim no, tus Tswv tab tom sim kuv siab thiab ntxiv zog rau kuv.

Lo lus sim siab muaj ntau ntsiab lus. Txoj kev sim siab tsis yog sim ib yam xwb. Yog kom ntxiv dag zog. Yog xav sim ib daim hlau yus tso kom raug ib yam nyuaj thiab hnyav. Qhov kub, qhov hnyav, thiab nias, xwv kom seb nws ruaj khov npaum li cas. Daim hlau tsis qaug zog vim muab nws sim li ntawd. Tiag tiag mas, nws thiaj yog ib yam uas yus tso siab rau, tej thaum pom hais tias nws muaj zog txaus ris tau lwm yam hnyav.

Tus Tswv yeej sim peb siab ib yam kom peb thiaj muaj dag zog ntxiv. Txoj kev sim siab ntawd tsis yog thaum peb xis nyob los sis nyob zoo xwb. Yeej los thaum twg zoo nkaus li peb ua tsis taus thiab xav tias peb yuav kov tsis yeej li. Tus Tswv qhia peb tias peb yuav tsum loj hlob tuaj mus tsis tu tsis tseg thiab rau siab ntso no, kom peb tsis txhob nyoo, thiab pheej sim ua tas zog.

Thaum peb rau siab ntseeg Yexus Khetos—tab txawm lub sij hawm ntawd peb xav tias peb tsis muaj cuab kav ua li—peb sab ntsuj plig yuav haj yam muaj zog. Cov vaj lug kub yeej qhia txog qhov tseeb no.

Piv xam hais tias tus yaj saub Maulaunais, raug kev sim siab thiab tau dag zog ib yam li no. Nws nyob nws ib leeg xwb rau ntau xyoo. Nws sau hais tias nws tsis muaj phooj ywg, hais tias lawv tau tua nws txiv, thiab tag nrho nws cov neeg raug puas tsuaj tas. Tib neeg tseem sim muab nws tua pov tseg thiab.

Tab sis mas Maulaunais tsis tau poob siab. Tiam sis, nws tau sau nws zaj lus tim khawv txog Yexus Khetos hauv cov phiaj rau cov neeg uas nws yeej yuav tsis pom, kuj muaj cov neeg uas xav muab nws tua pov tseg cov xeeb leej xeeb ntxwv. Nws sau ntawv rau peb. Nws paub hais tias peb ib txhia yuav luag thuam nws cov lus. Nws paub tias ib txhia yuav muab tej no xyeej pov tseg. Tab sis mas nws pheej sau ntawv.

Hauv nws txoj kev sim siab, Maulaunais txoj kev ntseeg haj yam muaj zog thiab nyob ruaj khov. Nws haj yam dawb huv. Nws cov lus muaj hwj chim heev vim nws twb rau siab ntseeg mus txog thaum kawg. Peb hnov tau lub hwj chim ntawd thaum peb nyeem nws zaj lus tim khawv hais tias:

“Nim no kuv, Maulaunais, sau me ntsis uas kuv xav hais tias zoo; thiab kuv sau rau kuv cov kwv tij, cov Neeg Lamas; thiab kuv xav kom lawv paub tias twb ntev tshaj li plaub puas nees nkaum xyoo tau dhau mus txij thaum tau muab lub cim txog Khetos txoj kev los.

“Thiab kuv muab tej ceev xwm txheej no khi tseg cia, tom qab kuv hais ob peb lo lus los ntuas nej.

“Saib seb, kuv yuav ntuas nej tias thaum nej nyeem tej no, yog hais tias yog Vajtswv lub tswv yim kom nej nyeem, kom nej yuav nco qab tias tus Tswv tau hlub tshua noob neej npaum li cas, txij thaum tsim Adas los txog rau lub sij hawm uas nej yuav tau txais tej no, thiab xav txog qhov no nyob hauv nej lub siab.

“Thiab thaum nej yuav tau txais tej no, kuv xav ntuas nej kom nej thov Vajtswv, Leej Txiv tus uas Nyob Mus Ib Txhis, los ntawm Khetos lub npe, saib tej no puas muaj tseeb; thiab yog nej thov nrog lub siab dawb paug, nrog kev mob siab tiag, thiab muaj kev ntseeg Khetos, nws yuav qhia rau nej tias tej no muaj tseeb, los ntawm tus Vaj Ntsuj Plig Dawb Huv lub hwj chim.

“Thiab los ntawm lub hwj chim ntawm tus Vaj Ntsuj Plig Dawb Huv nej yuav paub qhov tseeb ntawm tag nrho txhua yam.”

Maulaunais zaj lus tim khawv haj yam muaj zog vim nws kho siab, tiam sis nws tseem yog ib qho kaj uas ci rau txhua tiam neeg uas xav nrhiav peb Leej Txiv Saum Ntuj Ceeb Tsheej thiab tus Cawm Seej Yexus Khetos.

Lwm tus yaj suab hauv Phau Ntawv Maumoos, Yakhauj, rau kev sim siab thiab tau dag zog thaum nws ua me nyuam yaus uas raug kev txom nyem thiab kev nyuaj siab ntau. Tiam sis nws leej txiv, Lihais, qhia nws tias Vajtswv yuav foom koob hmoov rau nws thaum twg nws raug kev sim siab.

“Thiab saib seb, thaum koj tseem yau koj tau raug tej kev txom nyem thiab ntau yam kev tu siab, vim txoj kev ua lwj ua liam ntawm koj cov tij laug.

“Tiam sis, Yakhauj, kuv thawj tug me tub uas yug nyob hauv hav zoov, koj paub Vajtswv txoj kev koob meej; thiab nws yuav fij koj tej kev txom nyem los ua tej yam uas pab tau koj.

“Yog li ntawd, koj tus ntsuj plig yuav tau txais koob hmoov, thiab koj yuav ua neej nyob nyab xeeb nrog koj tus tij laug Nifais; thiab koj yuav siv tas koj lub neej ua hauj lwm pub rau koj tus Vajtswv. Yog li ntawd, kuv paub tias koj twb txais kev txhiv dim, vim koj tus Txhiv Dim txoj kev ncaj ncees; vim koj tau pom lawm tias thaum txog lub caij nyoog uas muaj txhij txhua nws yuav coj txoj kev cawm seej los rau tib neeg.”

Tus Yaj Saub Joseph Smith raug kev sim siab thiab tau dag zog li no thaum nws nyob hauv lub Qhov Taub Liberty. Thaum nws nyuaj siab kawg, tus Yaj Saub Joseph qw hais tias:

“Au Vajtswv, koj nyob qhov twg? …

“Koj txhais tes yuav nkaum ntev npaum li cas?”

Tus Tswv pom hais tias Joseph txoj kev nyuaj siab ntawd ua li cas rau nws vim nws ua siab ntev nyiaj tej ntawd ces tus Tswv tau hais tias:

“Kuv tus tub, koj cia li nyob kaj siab lug; koj tej kev nyuaj siab thiab koj tej kev txom nyem yuav muaj nyob ib nyuag ntus xwb;

“Thiab tom qab ntawd, yog koj ua tib zoo nyiaj mus, Vajtswv yuav tsa koj mus nto ntuj; koj yuav yeej tag nrho koj cov yeeb ncuab.”

Tus yam ntxwv zoo tshaj plaws txog kev sim siab thiab kev txais dag zog yog tus Cawm Seej txoj Kev Theej Txhoj. Nws tau ris tag nrho lub ntiaj teb tej kev txhaum. Nws tau ris peb tej kev mob thiab peb tej kev nyuaj siab. Nws tau haus lub khob dej iab. Nws qhia tias nws yuav rau siab ntseeg txhua txhua lub sij hawm.

Vim muaj Nws txoj Kev Theej Txhoj zoo kawg, Yexus Khetos ntxiv tau dag tau zog rau peb thaum twg peb muaj kev cov nyom. Nws paub nplij peb lub siab vim Nws tau raug txhua yam teeb meem uas peb yeej yuav raug hauv lub ntiaj teb no. “Nws yuav ris nws cov neeg tej kev mob thiab tej kev nkeeg … xwv kom nws yuav paub pab nws cov neeg ntawm sab cev nqaij daim tawv raws li lawv tej kev qaug dag qaug zog.”

Peb kawm tias thaum nyob hauv lub Vaj Khexemanes, tus Cawm Seej tau thov Leej Txiv kom Nws yuav tsis txhob raug kev sim siab ntawd—tiam sis Nws kuj hais tias yog yuav ua raws li Leej Txiv lub siab nyiam ces tus Cawm Seej yeej kam ua. Ua lwm yam lus hais, tus Cawm Seej yeej tau muaj kev poob siab thiab tsis paub seb yuav zoo li cas, tiam sis Nws tso siab ntseeg Nws Leej Txiv Saum Ntuj Ceeb Tsheej.

Cov kwv tij thiab cov muam, tej zaum nej txoj kev sim siab thiab kev tau dag zog yuav tsis zoo li Maulaunais los sis Yakhauj los sis tus Yaj Saub Joseph. Tiam sis yeej yuav los. Tej zaum yuav los ntsiag tos, muaj kev cov nyom hauv nej tsev neeg. Tej zaum yuav los thaum muaj mob muaj nkees los yog kev poob siab los yog kev nyuaj siab los yog kev kho siab.

Kuv hais lus tim khawv tias tej lub sij hawm no tsis yog puav pheej qhia tias tus Tswv tau tso nej tseg. Tab sis mas, tej no yog puav pheej hais tias Nws hlub nej txaus muab nej kho thiab ntxiv dag zog rau nej. Nws tab tom ua rau nej muaj zog txaus ris lub nra hnyav hauv txoj sia nyob mus ib txhis.

Yog tias peb rau siab ntso ua peb tej hauj lwm, tus Tswv yuav kho peb lub siab. Nws yuav ntxiv dag ntxiv zog rau peb. Ces yuav muaj ib hnub twg uas peb yuav saib yav nram qab thiab pom hais tias tej kev cov nyom ntawd yeej yog puav pheej txog Nws txoj kev hlub. Peb yuav pom hais tias Nws tsuas tab tom kho peb xwv kom peb yuav muaj cuab kav nrog Nws sawv ua ke muaj yeeb koob. Xws li tus Thwj Tim Pov Lauj hais thaum nws yuav tas sim neej hais tias, “Kuv twb siv zog khiav kawg kuv lub zog lawm, kuv twb khiav mus txog qhov kawg lawm, kuv muab siab npuab Vajtswv.”

Kuv hais lus tim khawv tias Vajtswv yeej paub nej. Nws paub tias nej muaj kev cov nyom zoo li cas. Nws nrog nraim nej nyob. Nws yuav tsis tso nej tseg. Kuv hais lus tim khawv tias Yexus Khetos yog Vajtswv Tib Leeg Tub. Nws yog peb lub dag zog, peb tus Txhiv Dim, peb qhov chaw cia siab. Yog tias peb tso siab rau Nws, ces Nws yuav ua rau peb sab ntsuj plig muaj hwj chim txaus kov yeej txhua yam kev cov nyom uas peb raug. Kuv ua tim khawv li no los ntawm Yexus Khetos lub npe dawb ceev, amees.