Ib Leeg Txhawb Nqa Ib Leeg

Tsis ntev tas los kuv nyeem txog ib lub sij hawm uas tshoov kuv lub siab heev. Tau muaj nyob hauv USA Masters Track thiab Field National Championship—uas yog kev sib tw khiav rau cov neeg laus.

Ib tug uas khiav hauv kev sib tw khiav 1,500 mev yog Orville Rogers uas muaj 100 xyoo. Tus sau ntawv sau tias:

“Thaum lawv tua rab phom, cov neeg sib tw khiav pib khiav nrog Orville nyuab puag tom qab, uas nws nyob nws ib leeg tag nrho kev sib tw khiav ntawd, uas nws maj mam khiav. [Thaum] tus uas nyob kiag ua ntej Orville khiav tas, Orville tseem tshuav ob lwm thiab ib nrab uas nws yuav tsum khiav. Ntau li 3,000 cov neeg ntsiag to zaum saib nws maj mam khiav ib lwm ntawm qhov chaw khiav—nws ua nyob ntsiag to, thiab khiav nws ib leeg xwb.

“[Tiam sis] thaum nws pib khiav lwm kawg, pawg neeg sawv, qw thiab npuaj tes txhawb nqa thiab pom zoo rau nws. Thaum nws yuav luag tas, pawg neeg qw nrov nrov. Pawg neeg coob li ob peb txhiab qw txhawb nqa nws, thiab Orville siv tag nrho nws lub zog kawg. Pawg neeg qw nrov nrov nrog kev zoo siab thaum nws khiav tas thiab cov neeg sib tw twb los khawm nws. Orville txo hwj chim thiab zoo siab ua tsaug co tes rau pawg neeg thiab taug kev tawm qhov chaw khiav nrog nws cov phooj ywg tshiab.”

Nov yog Orville txoj kev khiav sib tw zaum tsib, thiab txhua zaus nws ua kev sib tw nws kuj tau nyob tom kawg. Tej zaum ib txhia yuav xav txiav txim rau Orville, xav tias ntshe nws yuav tsum tsis txhob sib tw vim nws laus—xav tias tsis tsim nyog nws sib tw khiav vim tias nws tau ua rau nws cov kev sib tw khiav ntawd mus ntev.

Tiam sis txawm nws yog tus kawg los, muaj tsib yam uas Orville tau ua tshaj txhua tus neeg hauv lub ntiaj teb no zaj keeb kwm. Cov uas ntsia nws sib tw khiav yuav tsis tseeg tias yuav ua taus tiam sis cov neeg ntsia thiab cov nrog nws sib tw tsis yog cov txiav txim. Orville tsis tau txhaum kev cai dab tsi, thiab cov nom tswv tsis tau hloov txoj kev cai. Nws tau khiav tib txoj kev sib tw thiab tau ua raws li txhua kev cai ib yam li txhua tus uas sib tw khiav. Tiam sis twb suav tej yam uas ua nyuaj rau nws—xws li nws hnub nyoog thiab tej yam uas nws lub cev ua tsis taus— tau muab nws tso rau hauv pawg muaj hnub nyoog 100 xyoo rov saud. Thiab nyob hauv pawg ntawd, nws tau khiav ceev tshaj txhua tus neeg hauv lub ntiaj teb no zaj keeb kwm tsib zaug.

Ib yam li thaum Orville siv kev siab loj mus rau ntawm txoj kev sib tw ntawd, peb ib cov viv ncaus thiab cov nus yeej muaj kev siab loj thaum lawv mus rau lawv txoj kev uas yog lawv lub neej txhua hnub, paub hais tias neeg yuav txiav txim tsis zoo rau lawv txawm tias lawv ua zoo npaum li lawv ua tau thaum nyiaj kom dhau txhua yam kom raws tus Cawm Seej thiab ua raws li lawv tej kev khi lus nrog Nws.

Txawm peb nyob qhov twg hauv lub ntiaj teb, peb laus los hluas li cas, txoj kev koom siab koom ntsws yeej yog ib yam uas peb txhuas tus xav tau, hais tias tib neeg xav tau peb thiab xav kom peb pab thiab peb lub neej muaj hom phiaj thiab lub ntsiab, txawm peb lub neej zoo li cas los sis tej yam peb ua tsis tau los xij.

Thaum nws khiav lwm kawg, pawg neeg tag nrho qw zoo siab rau Orville, pab nws muaj zog mus txog thaum kawg. Tsis tseem ceeb tias nws ua tas tom kawg. Rau cov uas khiav thiab pawg neeg uas saib, qhov no tsis yog ua kom saib leej twg yeej xwb. Ntau zaus, no yog ib qhov piv txwv zoo ntawm peb tus Cawm Seej txoj kev hlub. Thaum Orville ua tias, lawv sawv daws zoo siab ua ke.

Zoo ib yam li Masters Championship, peb tej pawg ntseeg, ceg ntseeg, thiab tsev neeg ua tau tej qhov chaw uas cia peb qw txhawb nqa lwm tus—pab neeg uas sib khi lus thiab muaj Khetos txoj kev hlub rau txhua tus—sib pab kov yeej dab tsi los xij, txhawb nqa lwm tus thiab ib leeg tsis txhob txiav txim rau ib leeg. Peb ib leeg xav tau ib leeg. Peb txais Vajtswv lub dag zog los ntawm txoj kev koom siab koom ntsws, vim li no Dab Ntxwg Nyoog xav kom peb sib faib.

Tu siab tias, muaj ntau yam nyuaj rau peb ib txhia mus rau lub tsev koom txoos. Tej zaum yog ib tug uas muaj lus nug txog nws txoj kev ntseeg los sis ib tug uas muaj kev nyuaj siab txhawj xeeb los sis kev nyuaj siab. Tej zaum yog ib tug uas tuaj txawv teb chaws tuaj, yog lwm haiv neeg, los sis ib tug uas lub neej txawv los sis pom lub ntiaj teb txawv lwm tus es ua rau lawv xav tias lawv tsis sib nrog lwm tus sib haum. Tej zaum yog ib tug niam tsev los txiv tsev uas pw tsis tsaug zog los sis nyuaj siab vim muaj me nyuam mos liab los me nyuam yaus los sis ib tug uas tsis muaj poj niam los tus txiv nyob hauv ib pawg ntseeg uas muaj ntau khub niam txiv thiab tsev neeg. Tej zaum yog ib tug uas sim ua siab loj rov qab los tom qab nws tsis tau nyob rau ntau xyoo los sis ib tug uas pheej xav tias nws zoo tsis txaus thiab yeej yuav tsis sib haum nrog lwm tus.

Thawj Tswj Hwm Russell M. Nelson hais tias: “Yog ib khub niam txiv hauv nej pawg ntseeg sib nrauj, los sis ib tug tub txib rov qab los tsev ntxov, los sis ib tug ntxhais hluas ua xyem xyav txog nws zaj lus tim khawv, lawv tsis xav tau nej txoj kev txiav txim. Lawv yuav tsum hnov Yexus Khetos txoj kev hlub nyob hauv nej tej lus thiab tej yam nej ua.”

Peb ua tej yam hauv lub koom txoos kom peb nrog tus Tswv sib raug zoo thiab ib leeg nrog ib leeg sib raug zoo kom peb sab ntsuj plig yuav nyob zoo. Thaum peb khi lus nrog Vajtswv, pib thaum peb ua kev cai raus dej, peb ris txoj hauj lwm sib hlub thiab saib xyuas lwm tus vim peb yog Vajtswv tsev neeg, ib feem ntawm Khetos lub cev, qhov no tsis yog ib yam hauv ib daim ntawv rau peb muab khij kom qhia tias peb yuav tsum ua tiav lawm xwb.

Txoj kev hlub thiab kev tu lwm tus zoo li Yexus Khetos yeej siab dua thiab dawb huv dua. Txoj kev hlub dawb paug ntawm Khetos yog kev siab hlub. Li Thawj Tswj Hwm Nelson tau qhia, “Kev siab hlub ua rau peb xav ‘ib leeg txaus siab ris ib leeg tej nra’ [Mauxiyas 18:8] thiab tsis xav muab tej nra rau lwm tus ris.”

Tus Cawm Seej hais tias, “Yog nej ib leeg hlub ib leeg, sawv daws thiaj yuav paub hais tias nej yog kuv cov thwj tim.” Thiab Thawj Tswj Hwm Nelson tau hais tias: “Kev siab hlub yog tus cwj pwm tseem ceeb ntawm ib tug uas coj raws li Yexus Khetos tiag tiag.” “Tus Cawm Seej zaj lus yeej meej heev: Nws cov thwj tim tseeb yuav txhawb nqa, yaum, hais lus zoo, thiab tshoov neeg lub siab. … Qhov uas peb hais li cas txog lwm tus … muaj nqis heev.”

Tus Cawm Seej txoj kev qhia no yooj yim. Tej no hais nyob hauv Txoj Kev Cai Zoo: Nej xav kom lwm tus ua li cas rau nej, nej yuav tsum ua ib yam li ntawd rau lwm tus. Cia li xav tias nej yog tus neeg ntawd thiab ua rau nws ib yam li nej xav kom nws ua rau nej yog nej yog lawv.

Kev ua rau lwm tus zoo li Yexus Khetos yuav ua rau lawv los yeej hais txog neeg coob tshaj cov nyob hauv peb tsev neeg thiab tej pawg ntseeg xwb. Yuav tsum suav peb cov viv ncaus thiab cov nus uas ntseeg lwm txoj kev teev ntuj los sis tsis ntseeg hlo li. Yuav tsum suav peb cov nus thiab cov viv ncaus los ntawm lwm lub teb chaws thiab tej kab lig kev cai, thiab cov uas xav txawv ntawm tej kev kav teb kav chaw. Peb sawv daws yog Vajtswv tsev neeg, thiab Nws hlub tag nrho Nws cov me nyuam. Nws xav kom Nws cov me nyuam hlub Nws thiab ib leeg kuj hlub ib leeg.

Tus Cawm Seej tau ua ib tug yam ntxwv txog txoj kev hlub lwm tus, muab lawv sau los ua ke, thiab txawb nqa cov uas zej zog tau txiav txim tias yog cov neeg raug ntiab tawm thiab tsis huv. Nws tau txib kom peb ua raws li Nws tus yam ntxwv. Peb tau los nyob no kom coj li Khetos tej cwj pwm thiab thaum kawg los ua zoo li peb tus Cawm Seej. Nws txoj moo zoo tsis yog zoo li ib daim ntawv khij cia; twb yog ib txoj moo zoo uas hloov zuj zus—hloov zuj zuj los ua zoo li Nws thiab hlub zoo li Nws hlub. Nws xav kom peb rais los ua ib haiv neeg Xi-oos.

Thaum kuv muaj 20 tawm xyoo, muaj ib lub sij hawm uas kuv nyuaj siab heev, thiab thaum lub sij hawm ntawd, zoo nkaus li Vajtswv tsis nyob ntawd lawm. Kuv tsis txawj piav tag nrho txoj kev xav ntawd tsuas yog hais tias zoo nkaus li kuv kho siab heev. Txij thaum kuv yog ib tug me nyuam yaus, kuv yeej ib txwm paub tias kuv Leej Txiv Saum Ntuj Ceeb Tsheej nyob ntawd thiab kuv nrog Nws tham tau. Tiam sis thaum lub sij hawm ntawd, kuv tsis paub tseeb tias puas muaj ib tug Vajtswv. Tsis tau muaj tej zoo li ntawd tshwm sim rau kuv lub neej thiab zoo nkaus li kuv lub hauv paus tab tom ploj mus.

Vim li ntawd, nyuaj rau kuv mus lub tsev koom txoos. Kuv mus, tiam sis vim kuv ntshai tias lawv yuav hais tias kuv “tsis tshua muaj siab ntseeg” los sis kuv “tsis tshua ntseeg,” thiab kuv ntshai tsam lawv yuav hais kom ib tug los saib xyuas kuv. Tej yam uas kuv xav tau thaum lub sij hawm ntawd yog kev hlub, kev to taub, thiab kev txhawb nqa, tsis yog kev txiav txim.

Tej yam kuv ntshai tias tib neeg yuav xav txog kuv, kuv tus kheej twb tau xav txog lwm tus thaum lawv tsis tuaj koom lub koom txoos txhua lub lim tiam. Lub sij hawm ntawd uas nyuaj rau kuv tau qhia kuv tej zaj lus uas muaj nqi txog vim li cas tau txib peb kom tsis txhob txiav txim tsis ncaj ncees.

Puas muaj cov uas nyob ib puag ncig peb uas raug kev nyuaj siab ntsiag to, ntshai tsam lwm tus paub lawv tej kev nyuaj vim tias lawv tsis paub tias tib neeg yuav xav li cas?

Tus Tswv ib leeg xwb paub peb txhua tus txoj kev sib tw khiav nyuaj li cas thaum peb ua lub neej no—tej lub nra, tej kev nyuaj, thiab tej teeb meem peb raug uas tej zaum tsis muaj leej twg pom. Nws tib leeg xwb nkag siab peb tej kev mob uas hloov peb lub neej thiab peb kev poob plig thaum yav tas los uas tseem ua nyuaj rau peb niaj hnub nim no.

Ntau zaus, peb saib tsis taus peb tus kheej, peb xav hais tias peb yuav tsum nyob deb tshaj rau ntawm txoj kev sib tw khiav. Tus Tswv tib leeg xwb paub txog tej yam peb ua tsis taus thiab tej yam peb txawj ua, thiab vim li no, Nws ib leeg xwb uas muaj cai tag nrho txiav txim rau peb lub neej.

Cov viv ncaus thiab cov nus, cia peb ua zoo li pawg neeg hauv zaj dab neeg kom ib leeg qw txhawb nqa ib leeg thaum peb sim ua cov thwj tim txawm peb lub neej zoo li cas los! Peb tsis tau txhaum kev cai los sis hloov tej kev cai kom ua tau li no. Tiag tiag yog txoj lus txib tseem ceeb thib ob—kom hlub peb tus neeg zej zog ib yam li peb hlub peb tus kheej. Thiab zoo li peb tus Cawm Seej tau hais tias, “Thaum uas nej tau pab ib tug … , txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab kuv ntag,” rau qhov zoo los qhov phem. Nws kuj qhia peb tias, “Yog nej tsis ua ib lub siab ces nej tsis yog kuv li.”

Yuav muaj tej lub sij hawm hauv peb lub neej thaum peb yuav ua cov neeg uas yuav tsum muaj kev pab thiab txhawb nqa. Tam sim no cia peb cog lus tias peb ib leeg yuav pab ib leeg txhua lub sij hawm. Thaum peb ua li no, peb yuav haj yam koom siab thiab muaj ib qhov chaw uas tus Cawm Seej ua tau Nws txoj hauj lwm dawb huv kom kho thiab hloov peb txhua tus.

Rau nej txhua tus uas xav hais tias nyob deb tom qab hauv txoj kev sib tw khiav ntawm lub neej no, thov nej tseem mus tom ntej. Tsuas yog tus Cawm Seej xwb thiaj paub nej yuav tsum nyob qhov twg tam sim no thiab Nws muaj lub siab hlub thiab ncaj ncees. Nws yog tus Txiav Txim Zoo ntawm lub neej no, thiab Nws ib leeg xwb nkag siab tag nrho tias nyuaj npaum li cas rau peb thaum peb khiav los taug kev los maj mam mus. Thaum Nws txiav txim Nws yuav xav txog tej yam nej ua tsis taus, tej yam nej txawj ua, tej yam nej raug hauv nej lub neej no, thiab tej yam nej ris uas tsis muaj leej twg pom, Nws kuj yuav xav txog tej yam uas nyob hauv nej lub siab. Tej zaum nej yuav ua tshaj txhua tus neeg hauv lub ntiaj teb no zaj keeb kwm. Thov nej txhob poob siab. Thov kom nej mus tom ntej! Thov nej nyob nrog nraim peb! Nej yeej muaj chaw nrog peb! Tus Tswv xav tau nej, thiab peb xav tau nej!

Txawm nej nyob qhov twg hauv lub ntiaj teb no los, txawm lub zos me li cas los, thov nej nco qab tias nej Leej Txiv Saum Ntuj Ceeb Tsheej thiab nej tus Cawm Seej paub txhua yam txog nej thiab hlub nej tag nrho. Nkawd yeej nco ntsoov nej. Nkawd xav coj nej rov qab los tsev.

Ntsia ntsoov tus Cawm Seej. Nws yog nej tus nqaj hlau. Tuav Nws khov kho. Kuv ua tim khawv tias Nws muaj txoj sia nyob thiab tsim nyog uas nej tso siab rau Nws. Kuv kuj ua tim khawv tias nws txhawb nqa nej.

Cia peb coj raws li tus Cawm Seej thiab ib leeg qw kom txhawb nqa ib leeg kuv thov li no los ntawm Yexus Khetos lub npe, amees.