Lub Npe uas Siv Los Hu Nej

Thawj Tswj Hwm Russell M. Nelson qhia tias yog Vajtswv tab tom hais lus ncaj qha rau peb, qhov xub thawj Nws yuav xav kom peb to taub yog qhov uas peb yog leej twg tiag tiag: peb yog Vajtswv cov me nyuam, cov me nyuam ntawm txoj kev khi lus, thiab Yexus Khetos cov thwj tim. Lwm txoj kev xav txog peb tus kheej los ntshe yuav ua rau peb poob siab nthav.

Kuv kawm li no rau kuv tus kheej thaum kuv tus tub hlob tau txais nws lub xov tooj ntawm tes thawj zaug. Nws zoo siab heev, nws pib sau nws tsev neeg thiab cov phooj ywg lub npe rau hauv nws lub xov tooj ntawm tes. Muaj ib hnub kuv pom tias nws niam hu tuaj. Nyob hauv nws lub xov tooj ntawm tes yog lub npe “Niam.” Lub npe ntawd yog ib lub npe uas txawj ntse thiab zoo—thiab, kuv xav tias, yog ib lub cim uas nws hwm tus zoo tshaj plaws hauv peb lub tsev. Ces, kuv pib xav. Nws muab lub npe twg rau kuv?

Kuv pib saib tag nrho cov npe uas nws sau rau haud, xav tias yog nws sau Wendi lub npe ua “Niam,” kuv lub yuav tsum yog “Leej Txiv.” Tsis pom lub npe ntawd. Kuv nrhiav lub npe “Txiv.” Tsis pom dab tsi thiab. Kuv txoj kev xav paub hloov mus rau kev txhawj me ntsis. “Nws puas muab kuv hu ua ‘Corey’?” Tsis yog. Rov qab nrhiav ib zaug ntxiv, kuv xav tias, “Peb yog cov neeg ncaws pob—tej zaum nws yuav hu kuv ua ‘Pelé.’” Kheev lam muaj li ntawd. Thaum kawg, kuv hu nws lub xov tooj kuv tus kheej, thiab [peb] lo lus tshwm sim hauv nws lub xov tooj: “Tsis yog Niam”!

Cov kwv tij thiab cov muam, tib neeg siv lub npe twg los hu nej?

Yexus muab cov uas coj raws li Nws hu ntau lub npe: Cov thwj tim. Cov tub thiab ntxhais. Cov yaj saub tej me nyuam. Cov yaj Cov phooj ywg. Txoj kev kaj ntawm lub ntiaj teb. Haiv neeg ntseeg. Txhua lub npe no muaj txoj kev tseem ceeb nyob mus ib txhis thiab qhia txog kev sib raug zoo nrog tus Cawm Seej.

Tiam sis tag nrho cov npe no, muaj ib lub npe uas zoo dua lwm cov—thiab lub npe ntawd yog Khetos. Nyob hauv Phau Ntawv Maumoos, Vaj Ntxwv Npeyamis qhia tias:

“Tsis muaj lwm lub npe uas yuav coj tau kev cawm seej los; yog li ntawd, kuv xav kom nej ris Khetos lub npe. …

“Thiab yuav muaj tias txhua tus uas ua li no yuav tau nyob rau ntawm Vajtswv sab tes xis, vim nws yuav paub lub npe uas siv los hu nws; vim yuav hu nws los ntawm Khetos lub npe.”

Cov neeg uas ris Khetos lub npe rau lawv tus kheej yuav los ua Nws cov thwj tim thiab tej pov thawj. Nyob hauv phau Tes Hauj Lwm, peb nyeem hais tias tom qab Yexus Khetos txoj kev sawv rov los, tau txib cov neeg ua pov thawj uas Vajtswv tau xaiv kom mus qhia thiab ua tim khawv tias tus uas ntseeg Yexus, ua kev cai raus dej, txais tus Vaj Ntsuj Plig Dawb Huv ces tus ntawd yuav txais kev zam txim rau tej kev txhaum. Cov uas tau txais tej kab ke dawb ceev no tau sib sau ua ke nrog cov Ntseeg, los ua cov thwj tim thiab tau los hu ua Neeg Ntseeg Khetos. Phau Ntawv Maumoos qhia tias cov uas ntseeg Khetos hu ua cov Neeg Ntseeg Khetos thiab cov neeg khi lus yog “Khetos cov me nyuam, nws cov tub, thiab nws cov ntxhais.”

Qhov uas hu yus los ntawm lub npe Khetos txhais li cas? Txhais tias nrog Nws khi lus thiab ua raws li tej kev khi lus, nco ntsoov txog Nws, coj Nws tej lus txib, thiab “txaus siab … ua tim khawv txog Vajtswv txhua lub sij hawm, thiab txog txhua yam.” Txhais tias koom siab txhawb nqa cov yaj saub thiab cov thwj tim thaum lawv qhia Khetos tej lus—nrog tej lus qhuab qhia, kev khi lus, thiab tej kab ke—thoob plaws lub ntiaj teb. Kuj txhais tias peb pab lwm tus kom pab neeg kom txhob raug kev nyuaj siab thiab ua ib lub teeb ci thiab muab kev cia siab los ntawm Khetos rau tib neeg sawv daws. Muaj tseeb tiag, nov yog ib yam peb ua tas peb lub neej. Tus Yaj Saub Joseph Smith tau qhia tias “nov yog ib qho chaw uas tsis muaj ib tug txiv neej twg cia li tau txais tam sim ntawd.”

Vim yuav tsum siv sij hawm thiab rau siab kom hloov los ua ib tug thwj tim “ib nqe lus ntxiv rau ib nqe lus, ib ntsiab cai ntxiv rau ib ntsiab cai,” yooj yim rau peb xav tias tej lub npe uas lub ntiaj hu peb tseem ceeb heev. Tej no tsuas pab ib me pliag xwb thiab yuav tsis thoob tsis txaus. Txoj kev txhiv dim thiab tej yam mus ib txhis tsuas “los ntawm tus Mexiyas uas Dawb Huv.” Vim li ntawd, qhov uas peb mloog cov yaj saub tej lus kom peb tsom ntsoov rau kev hloov los ua cov thwj tim yeej yog ib qhov tseem ceeb tam sim no thiab yog ib qhov txawj ntse, nyob hauv lub caij nyoog no uas muaj tib neeg lub suab uas nrov thiab ntxias peb. No yog lub ntsiab ntawm Vaj Ntxwv Npeyamis tej lus qhia thaum nws hais, “Kuv xav kom nej nco ntsoov sau lub npe no [uas yog Khetos] cia rau hauv nej lub siab tas mus li, … kom nej yuav hnov thiab paub lub suab uas yuav hu nej, thiab, lub npe uas nws yuav siv los hu nej.”

Kuv twb pom tej no hauv kuv tsev neeg. Kuv yawg koob Martin Gassner tau hloov tas mus ib txhis vim ib ceg ntseeg tus thawj tswj hwm tau teb tus Cawm Seej txoj kev hu. Nyob hauv teb chaws Yelemes nyob rau xyoo 1909, yog ib lub sij hawm uas nyuaj, thiab tsis tshua muaj nyiaj. Martin ua hauj lwm ua ib tug kws ham hlau hauv ib qhov chaw ua khoom. Nws lees hais tias, ntau lub sij hawm uas lawv them nws ua hauj lwm, nws mus haus cawv, haus luam yeeb, thiab yuav cawv rau nws cov phooj ywg haus nyob hauv ib lub tsev haus cawv. Thaum kawg nws tus poj niam ceeb toom rau nws tias yog nws tsis hloov nws lub neej, nws tus poj niam yuav nrauj nws.

Muaj ib hnub, tus uas nrog Martin ua hauj lwm ntsib nws ntawm txoj kev mus rau lub tsev haus cawv nrog ib daim ntawv quav hauv nws txhais tes. Nws tau nrhiav daim ntawv uas lub npe yog Was wissen Sie von den Mormonen?, uas txhais hais tias Koj paub dab tsi txog cov neeg Maumoos? hauv kev thiab qhia Martin tias tom qab nws nyeem ces nws hnov dab tsi txawv hauv nws lub siab. Kuv paub tias tej zaum lub npe ntawd hloov lawm.

Muaj ib qhov chaw nyob sau tom qab tsuas pom tau txaus paub tias lub koom txoos nyob qhov twg. Lub koom txoos nyob deb me ntsis tiam sis tej yam uas nkawd tau nyeem tshoov nkawd lub siab nkawd thiaj tau txiav txim siab tias nkawd yuav caij tsheb nqaj hlau Hnub Caiv ntawd mus xyuas. Thaum nkawd mus txog, nkawd pom tias qhov chaw nyob tsis yog lub koom txoos li nkawd xav tiam sis yog ib lub tsev pam tuag. Martin tsis xav mus—vim tias tiag tiag mas, ib lub koom txoos hauv ib lub tsev pam tuag ntshe zoo nkaus li yuav sib phim zoo dhau.

Tiam sis sab saud, nyob hauv ib lub chav lawv xauj, nkawd nrhiav tau ib pawg Neeg Ntseeg me me. Ib tug txiv neej caw nkawd koom kev sib ntsib ua tim khawv. Tus Ntsuj Plig tau tshoov Martin lub siab thiab tej lus tim khawv uas nws tau hnov kuj tshoov nws lub siab ua rau nws ua tim khawv thiab. Thiab nyob ntawd, hauv qhov chaw tsis zoo li yus xav, uas nws hais tias nws twb paub lawm tias yeej muaj tseeb.

Tom qab ntawd tus txiv neej hais tias nws yog ceg ntseeg tus thawj tswj hwm thiab nug seb nkawd puas rov qab los. Martin qhia tias nws nyob deb dhau thiab tsis muaj nyiaj txaus tuaj txhua lub lim tiam. Ceg ntseeg tus thawj tswj hwm no hais tias, “Lawv kuv qab.”

Lawv taug kev ob peb nplov rau ib lub chaw ua khoom uas ib tug phooj ywg ntawm ceg ntseeg tus thawj tswj hwm ua hauj lwm. Tom qab hais lus sib tham me ntsis, tus neeg ua hauj lwm no tau muab Martin thiab nws tus phooj ywg ib txoj hauj lwm. Ces ceg ntseeg tus thawj tswj hwm caw nkawd mus rau ib lub tsev kem thiab nrhiav ib qhov chaw nyob rau nkawd tsev neeg.

Tag nrho tej no los tshwm sim ua ntej tas ob teev xwb. Martin thiab nws tsev neeg tsiv tsev lub lim tiam tom qab. Rau hli tom qab ntawd lawv tau ua kev cai raus dej. Tus txiv neej uas ib zaug sawv daws tau paub nws yog ib tug neeg qaug cawv tau los ua ib tug uas rau siab tshaj tawm txog nws txoj kev ntseeg tshiab—ces cov neeg hauv zos pib hu nws ua “tus pov thawj,” tej zaum vim lawv tsis tshua hwm nws li.

Hais txog ceg ntseeg tus thawj tswj hwm, kuv qhia nej tsis tau nws lub npe—tsis nco qab nws hu li cas lawm. Tiam sis kuv muab nws hu ua ib tug thwj tim, tus tub txib, ib tug Neeg Ntseeg Khetos, tus Neeg Xamalis zoo, thiab ib tug phooj ywg. Peb tseem paub nws lub hwj huam 116 xyoo tom qab, thiab kuv sawv txais kev txhawb nqa los ntawm nws txoj kev ua thwj tim.

“Muaj neeg hais tias yus suav taus cov noob hauv ib lub txiv, tiam sis yus suav tsis taus cov txiv uas yuav los ntawm ib lub noob.” Lub noob uas ceg ntseeg tus thawj tswj hwm cog tau huaj vam kom muaj cov txiv ntau. Nws tsis paub tias 48 xyoo tom qab ntawd, ob peb tiam neeg ntawm Martin tsev neeg nyob ob sab ntawm daim ntaub thaiv yuav sib khi hauv lub Tuam Tsev Bern Switzerland.

Tej zaum tej zaj lus uas zoo tshaj plaws yog tej zaj uas peb tsis hnov tiam sis yog tej uas peb pom ntawm tej uas tib neeg ua ntsiag to, thiab tej yam uas cov neeg dog dig ua, cov neeg uas sim ua zoo li Yexus, thiab mus ub mus no ua tej yam zoo. Tej yam uas ceg ntseeg tus thawj tswj hwm no ua tsis yog ib feem ntawm daim ntawv khij cia. Nws ua nws lub neej zoo li nyob hauv phau ntawv Amas: “Lawv tsis tau ntiab ib tug twg uas … tshaib plab, los sis tus uas nqhis dej, los sis tus uas muaj mob, … lawv ua siab dawb rau txhua tus, tsis hais tus laus thiab tus hluas, … tsis hais tus txiv neej thiab tus poj niam.” Thiab, ib qhov tseem ceeb uas peb yuav tsum nco ntsoov, lawv tsis tau ntiab ib tug twg “tsis hais tus nyob sab nraum lub koom txoos los sis nyob hauv lub koom txoos.”

Cov neeg uas ris Khetos lub npe paub ib yam li Joseph Smith tau hais tias, “Ib tug neeg uas muaj Vajtswv txoj kev hlub puv nkaus nws lub siab, yuav tsis zoo siab vim nws tsev neeg tau koob hmoov xwb, tiam sis nws xav tawm mus thoob plaws ntiaj teb no foom koob foom hmoov rau tib neeg sawv daws.”

Yexus ua Nws lub neej li no. Muaj tseeb tiag, Nws ua ntau yam es Nws cov thwj tim sau tsis tau tag nrho. Tus Thwj Tim Yauhas sau tia,: “Tseem muaj ntau yam uas Yexus tau ua tas los lawm. Yog yuav muab tej ntawd sau tseg huv tib si rau hauv ntawv, kuv xav hais tias lub ntiaj teb no yuav tsis muaj chaw txaus ntim tej ntawv ntawd.”

Cia peb siv zog ua raws li Khetos tus yam ntxwv, ua tej hauj lwm zoo thiab sim ua cov thwj tim tag nrho peb lub neej kom txhua zaus peb ntsib leej twg, lawv yuav hnov tau Vajtswv txoj kev hlub thiab hnov tau tus Vaj Ntsuj Plig Dawb Huv lub hwj chim. Ces peb thiaj li koom nrog kuv yawg koob thiab ntau plhom tus uas tau ua tim khawv, zoo li tus thwj tim Adales, “[Peb] twb ntsib tus Mexiyas lawm.”

Thaum kawg, lub ntiaj teb tsis qhia peb tias peb yog leej twg. Tiam sis peb txoj kev ua thwj tim nyob ntawm cov kab ke uas peb txais, tej kev khi lus uas peb ua raws li, thiab txo kev hlub uas peb qhia rau Vajtswv thiab cov neeg zej zog thaum peb ua tej yam zoo. Ib yam li Thawj Tswj Hwm Nelson qhia tias, peb yeej yog Vajtswv cov me nyuam, cov me nyuam ntawm txoj kev khi lus, Yexus Khetos cov thwj tim.

Kuv ua tim khawv tias Yexus Khetos muaj txoj sia nyob thiab tau muab peb txhiv dim. Nws yog Tus uas hais tias, “Kuv tau hu nej lub npe; nej yog kuv li.” Los ntawm Yexus Khetos lub npe, amees.