Lawv Yog cov uas Txiav Txim rau Lawv tus Kheej
Yog tias peb twb muab siab rau ntseeg Yexus Khetos, tau khi lus thiab ua raws li peb tej kev khi lus nrog Vajtswv, thiab hloov siab lees txim rau peb tej kev txhaum, ces lub rooj txiav txim yuav zoo.
Qhov kawg ntawm Phau Ntawv Maumoos yog Maulaunais txoj kev caw peb kom “los cuag Khetos,” “los ua neeg zoo tag nrho vim yog los ntawm nws,” “xyeej txhua yam uas tsis los ntawm Vajtswv tawm ntawm [peb] tus kheej mus,” thiab “hlub Vajtswv kawg [peb] lub siab thiab lub dag lub zog.” Qhov tseem ceeb, kab lus kawg ntawm nws tej lus qhia hais txog Kev Sawv Rov Los thiab txoj Kev Txiav Txim Zaum Kawg
Nws hais tias, “Tsis ntev no kuv yuav mus so nyob hauv Vajtswv qhov chaw uas nyob kaj siab lug, mus txog thaum kuv tus ntsuj plig thiab lub cev yuav rov los sib koom ua ke; thiab kuv raug coj los li tus uas kov yeej dhau tej cua, los ntsib nej nyob ntawm Yehauvas tus zoo kawg nkaus lub rooj txiav txim [uas zoo], tus Txiav Txim uas Nyob Mus Ib Txhis ntawm cov neeg uas muaj sia thiab cov neeg tuag.”
Kuv xav paub yog vim li cas Maulaunais sau lo lus “uas zoo” kom piav txog Kev Txiav Txim Zaum Kawg. Lwm tus yaj saub hauv Phau Ntawv Maumoos tau piav txog Hnub Txiav Txim hais tias yog “hnub zoo kawg” thiab peb yuav tsum “ntsia lawm yav tom ntej nrog lub qhov muag ntawm txoj kev ntseeg” rau hnub ntawd. Tiam sis feem ntau thaum peb xav txog Hnub Txiav Txim, peb nco txog lwm tus yaj saub tej lus, xws li “kev txaj muag thiab kev muaj txim phem heev,” “txhawj thiab ntshai heev,” thiab “kev nyuaj siab uas tsis muaj qhov kawg.”
Kuv xav tias qhov txawv heev ntawm tej lus no qhia tias Khetos cov lus qhuab qhia ua rau Maulaunais thiab lwm tus yaj saub muaj kev cia siab thaum lawv tos ntsoov mus txog hnub ntawd es tsis muaj kev ntshai raws li lawv ceeb toom hais tias cov uas tsis tau npaj lawv sab ntsuj plig yuav muaj. Maulaunais to taub dab tsi uas nej thiab kuv yuav tsum kawm?
Kuv thov kom tus Vaj Ntsuj Plig Dawb Huv yuav pab kuv thaum peb xav txog Leej Txiv Saum Ntuj Ceeb Tsheej txoj hau kev zoo siab thiab kev hlub tshua, tus Cawm Seej txoj kev theej txhoj nyob hauv Vajtswv txoj hau kev, thiab qhov uas peb yuav “lav ris [peb] tus kheej tej kev txhaum nyob rau hnub txiav txim.”
Leej Txiv txoj Hau Kev Zoo Siab
Lub hom phiaj ntawm Leej Txiv txoj hau kev yog kom Nws cov me nyuam ntsuj plig muaj cib fim txais ib lub cev nqaij daim tawv, kom kawm “qhov zoo thiab qhov phem” hauv lawv lub neej hauv lub ntiaj teb no, kom lawv sab ntsuj plig yuav loj hlob tuaj, thiab hloov los ua neeg zoo zuj zus mus ib txhis li.
Qhov uas phau Lus Qhuab Qhia thiab Kev Khi Lus hais tias yog txoj kev ywj siab coj ncaj ncees yog ib qho tseem ceeb nyob hauv Vajtswv txoj hau kev ua kom Nws cov tub thiab cov ntxhais tsis txawj tuag thiab kom tau txoj sia nyob mus ib txhis. Lub ntsiab cai tseem ceeb no los kuj nyob hauv cov vaj lug kub thaum hais txog kev ywj siab xaiv thiab kev nyob ywj siab kom xaiv tau thiab ua tau tej yam.
Lo lus “kev ywj siab coj ncaj ncees” yeej qhia tau peb. Tej lus uas muaj lub ntsiab tib yam li lo lus “ncaj ncees” yog “zoo,” “siab ncaj,” “tsim txiaj,” thiab “ntxim qhuas.” Tej lus uas muaj lub ntsiab tib yam li lo lus “kev ywj siab” mas muaj xws li “kev ua,” “yam ntxim ua,” thiab “ua hauj lwm.” Yog li ntawd kev ywj siab coj ncaj ncees los peb to taub tias yog kev muaj cai thiab muaj txiaj ntsim kom xaiv thiab ua tej yam ntawm peb tus kheej uas zoo, ncaj, tsim txiaj, thiab tseeb.
Tej uas Vajtswv tau tsim los muaj “tej uas ua tau tej yam thiab tej uas raug tej yam.” Thiab kev ywj siab coj ncaj ncees yog Vajtswv txoj kev tsim “kev muaj peev xwm ua tej yam los ntawm yus tus kheej” uas ua rau peb cov uas yog Vajtswv cov me nyuam muaj hwj chim ua neeg uas ua taus tej yam thiab tsis txhob ua neeg uas raug tej yam xwb.
Twb tsim lub ntiaj teb no kom ua ib qho chaw sim Leej Txiv Saum Ntuj Ceeb Tsheej cov me nyuam lub siab seb lawv puas “ua txhua tsav txhia yam uas tus Tswv lawv tus Vajtswv yuav txib kom lawv ua.” Lub hom phiaj ntawm txoj kev Tsim Ntuj Tsim Teb thiab peb lub neej hauv lub ntiaj teb no yog kev muaj cib fim ua tej yam kom hloov los ua neeg zoo li tus Tswv caw peb ua.
Tus Tswv qhia Enauj hais tias:
“Ntsia koj cov kwv tij cov muam; lawv yog kuv txhais tes kiag tsim, thiab kuv muab lawv tej kev txawj ntse rau lawv, thaum kuv tsim lawv; thiab nyob hauv lub Vaj Edees, kuv twb muab neeg txoj kev ywj siab xaiv rau lawv;
“Thiab rau koj cov kwv tij cov muam kuv tau hais, thiab kuj tau muab lus txib, hais tias kom lawv ib leeg hlub ib leeg, thiab kom lawv xaiv kuv, uas yog lawv Txiv.”
Peb muaj kev ywj siab xaiv kom peb ib leeg yuav hlub ib leeg thiab kom peb xaiv Vajtswv txoj kev. Thiab ob lub hom phiaj no yeej muaj lub ntsiab ib yam li txoj lus txib tseem ceeb thib ib thiab thib ob kom hlub Vajtswv kawg siab kawg ntsws, thiab hlub peb tus neeg zej zog ib yam li peb tus kheej.
Cia li xav seb Vajtswv txib peb—Nws tsis ntuas los sis qhia tswv yim xwb tiam sis Nws txib—kom peb siv peb txoj kev ywj siab xaiv kom pab lwm tus, kom ib leeg hlub ib leeg, thiab kom peb xaiv Nws. Tej zaum nyob hauv phau vaj lug kub, lo lus “ncaj ncees” tsis yog ib lo lus piav xwb tiam sis yog ib txoj kev uas Vajtswv siv kom txib peb siv peb txoj kev ywj siab li cas.
Ib zaj nkauj qhuas Vajtswv hu ua “Xaiv Qhov Yog” los yeej muaj ib lub npe zoo kawg. Peb tsis tau koob hmoov kom muaj kev ywj siab coj ncaj ncees peb thiaj li ua raws li peb lub siab nyiam xwb thaum twg los tau. Tiam sis, raws li Leej Txiv txoj hau kev, peb tau txais kev ywj siab coj ncaj ncees kom peb nrhiav thiab ua raws li qhov tseeb uas nyob mus ib txhis li. Vim peb “xaiv tau rau [peb] tus kheej,” peb yuav tsum mob siab ua tej yam zoo, “ua ntau yam los ntawm [peb] tus kheej txoj kev ywj siab xaiv, thiab coj kom muaj kev ncaj ncees ntau los.”
Tej lus qhia tias peb yeej yuav tsum muaj kev ywj siab coj ncaj ncees los muaj nyob hauv zaj lus hauv phau vaj lug kub txog kev sib sab laj ua ntej lub neej hauv lub ntiaj teb no. Luxifaws ntxeev siab tawm tsam Leej Txiv txoj hau kev rau Leej Txiv cov me nyuam thiab nws xav ua kom tib neeg txoj kev muaj peev xwm ua tej yam ntawm lawv tus kheej raug puas tsuaj mus. Qhov tseem ceeb, tus dab phem ua tib zoo tawm tsam lub ntsiab cai ntawm kev ywj siab coj ncaj ncees.
Vajtswv piav hais tias, “Yog li ntawd, vim tias Dab Ntxwg Nyoog ntxeev siab tawm tsam kuv, thiab nrhiav kev ua kom tib neeg txoj kev ywj siab xaiv puas tsuaj, … kuv thiaj muab nws ntiab tawm.”
Tus yeeb ncuab lub tom txwv yog kom rhuav Vajtswv cov tub thiab cov ntxhais lub txiaj ntsim kom “xaiv taus rau lawv tus kheej” uas muaj kev ywj siab ua ncaj ncees. Nws xav kom muab Leej Txiv Saum Ntuj Ceeb Tsheej cov me nyuam los ua neeg uas raug taus tej yam xwb.
Kev Ua tej Yam thiab Kev Hloov Zuj Zus
Thawj Tswj Hwm Dallin H. Oaks tau qhia hais tias Yexus Khetos txoj moo zoo caw peb kom paub tej yam thiab hloov los ua neeg dhau los ntawm kev siv peb txoj kev ywj siab coj ncaj ncees. He said:
“Phau Npaivnpaum thiab cov vaj lug kub uas muaj niaj hnub no hais txog kev txiav txim zaum kawg uas txhua tus neeg yuav txais nqi zog raws li tej yam lawv ua los sis tej yam lawv xav hauv lawv lub siab. Tiam sis lwm nqe vaj lug kub hais ntxiv txog qhov no hais tias peb yuav raug txiav txim nyob ntawm seb peb tau hloov ua neeg zoo li cas.
“Tus yaj saub Nifais piav txog lub ntsiab ntawm Kev Txiav Txim Zaum Kawg hais tias peb yuav raug txiav txim seb peb tau hloov los ua neeg zoo li cas: ‘Thiab yog hais tias lawv tau ua tej yam vuab tsuab ces lawv yeej vuab tsuab; thiab yog hais tias lawv [yeej] vuab tsuab ces yeej muaj tseeb tias lawv yuav nyob tsis tau hauv Vajtswv lub nceeg vaj’ [1 Nifais 15:33; ntxiv qhov uas ntawv qaij]. Maulaunais tshaj tawm tias, ‘Tus [uas yog neeg] vuab tsuab tseem yuav vuab tsuab li qub … thiab tus uas ncaj ncees tseem yuav ncaj ncees li qub’ [Maumoos 9:14; ntxiv qhov uas ntawv qaij].”
Thawj Tswj Hwm Oaks hais ntxiv tias: “Los ntawm tej kev qhia no peb pom tau tias Kev Txiav Txim Thaum Kawg tsis yog ntsuam xyuas saib ib tug neeg twg ua zoo los sis ua phem nkaus xwb—tej yam peb tau ua. Yog suav seb tau muaj li cas los ntawm tej yam peb tau ua thiab peb tej kev xav—tau ua rau peb hloov los ua neeg zoo li cas lawm.”
Tus Cawm Seej txoj Kev Theej Txhoj
Peb tej hauj lwm thiab tej kev xav xwb yeej cawm tsis tau peb. “Tom qab peb ua txhua yam uas peb ua tau,” peb sib raug zoo nrog Vajtswv tsuas yog dhau los ntawm kev hlub tshua thiab kev tshav ntuj uas muaj dhau los ntawm tus Cawm Seej txoj kev theej txhoj uas nyob mus ib txhis.
Amas hais tias, “Pib ntseeg Vajtswv Leej Tub, ntseeg tias nws yuav los txhiv nws cov neeg dim, thiab ntseeg tias nws yuav los raug kev txom nyem thiab tuag theej rau lawv tej kev txhaum; thiab ntseeg tias nws yuav sawv hauv qhov tuag rov qab los, qhov uas yuav ua kom muaj tau txoj kev sawv rov los, kom tib neeg txhua tus yuav tau los sawv ntawm nws xub ntiag, kom raug txiav txim thaum txog hnub kawg thiab hnub txiav txim, raws li tej yam lawv ua.”
“Peb ntseeg tias los ntawm Khetos txoj Kev Theej Txhoj, tag nrho tib neeg txhua tus txais tau kev cawm dim, los ntawm kev ua raws li tej kev cai thiab kab ke ntawm txoj Moo Zoo.” Peb yuav tau ris Vajtswv txiaj vim peb tej kev txhaum thiab tej yam phem peb ua yuav tsis ua tim khawv tawm tsam peb yog tias peb “yug dua tshiab,” muab siab rau ntseeg tus Txhiv Dim, “ua siab tseeb tiag” thiab “mob siab” hloov siab lees txim thiab “nyiaj kom mus txog thaum kawg.”
Kev Hwm Vajtswv
Tej zaum peb feem coob xav tias thaum peb nyob ntawm lub rooj ntawm tus Txiav Txim Mus Ib Txhis Li yuav zoo li thaum peb mus hais plaub ntug hauv lub ntiaj teb no. Ib tug txiav txim yuav tswj hwm. Yuav muab puav pheej rau nws saib. Yuav txiav txim rau peb. Thiab peb yuav txhawj thiab ntshai mus txog thaum peb kawm tias tau txiav txim li cas. Tiam sis kuv ntseeg hais tias yuav tsis zoo li no.
Qhov txawv ntawm tej kev ntshai uas peb muaj hauv lub ntiaj teb no yog qhov uas cov vaj lug kub piav hais tias yog kev “paub ntshai Vajtswv” los sis “kev hwm tus Tswv.” Tsis zoo li kev ntshai uas ua rau yus nyuaj siab txhawj xeeb, kev hwm Vajtswv yog lub hauv paus ntawm kev nyob kaj siab lug, kev nplij siab thiab kev muab siab rau ntseeg.
Kev paub ntshai uas ncaj ncees yog kev hwm tus Tswv Yexus Khetos, kev mloog Nws tej lus txib, kev cia siab rau Kev Txiav Txim Zaum Kawg thiab kev txais kev txim lij los ntawm Nws. Kev hwm Vajtswv yeej yog los ntawm ib txoj kev to taub tus Txhiv Dim tej cwj pwm thiab ntiag tug hauj lwm, ib txoj kev txaus siab ywj peb lub siab rau Nws, thiab ib txoj kev paub tias txhua tus txiv neej thiab poj niam yuav lav ris nws tej kev ntshaw, tej kev xav, tej lus, thiab tej yam nws ua hauv lub ntiaj teb no thaum txog Hnub Txiav Txim.
Kev hwm Vajtswv tsis yog kev ntshai los cuag Nws thaum peb yuav raug txiav txim. Tiam sis, yog kev lees paub txog tej yam ntawm peb tus kheej uas yog “tej uas yeej muaj tiag” thiab “tej yuav yeej yuav muaj tiag.”
Txhua tus neeg uas ua neej dhau los los sis yuav nyob hauv lub ntiaj teb no “yuav raug coj mus sawv ntawm Vajtswv lub rooj txiav txim, rau nws txiav txim raws li tej yam uas lawv tau ua, seb lawv ua zoo los sis lawv ua phem.”
Yog tias peb twb xav ua ncaj ncees thiab peb ua tej yam zoo—uas txhais hais tias peb tau muab siab rau ntseeg Yexus Khetos, tau khi lus thiab ua raws li peb tej kev khi lus nrog Vajtswv, thiab hloov siab lees txim rau peb tej kev txhaum—ces lub rooj txiav txim yuav zoo. Ib yam li Enos tshaj hais tias, peb yuav “sawv ntawm [tus Txhiv Dim] xub ntiag; ces [peb] yuav pom nws lub ntsej muag nrog kev zoo siab.” Thiab thaum hnub kawg peb “yuav tau txais qhov ncaj ncees ua nqi zog.”
Tiam sis, yog peb tau xav ua tsis zoo thiab peb tau ua tej hauj lwm phem, ces peb yuav ntshai nyob ntawm lub rooj txiav txim. Peb yuav “paub zoo tag nrho,” “nco qab zoo,” thiab “paub tseeb txog [peb] lub txim.” “Peb yuav tsis kam ntsia mus rau peb tus Vajtswv; thiab peb yuav zoo siab yog tias peb ua tau kom tej pob zeb thiab tej roob vau los tsuam peb es muab peb zais ncaim ntawm nws xub ntiag.” Thiab thaum hnub kawg peb “yuav tau txais [peb] nqi zog ntawm qhov phem.”
Yog li ntawd, thaum kawg, peb yuav txiav txim rau peb tus kheej. Tsis tas muaj leej twg qhia peb tias peb yuav mus qhov twg. Nyob hauv tus Tswv lub xub ntiag, peb yuav lees hais tias peb tau xaiv los ua neeg zoo li cas nyob hauv lub ntiaj teb thiab paub ntawm peb tus kheej hais tias peb yuav nyob qhov twg mus ib txhis li.
Kev Cog Lus thiab Zaj Lus Tim Khawv
Qhov uas yus to taub hais tias Kev Txiav Txim Zaum Kawg ua tau rau yus zoo siab tsis yog ib txoj koob hmoov uas Maulaunais muaj xwb.
Amas twb piav txog cov koob hmoov uas Vajtswv cog lus rau txhua tus uas rau siab ua tus Cawm Seej cov thwj tim. He said:
“Lub ntsiab ntawm lo lus txum tim rov qab los yog hais tias rov qab coj kev phem los rau kev phem, los sis kev nyiam sab cev nqaij daim tawv los rau kev nyiam sab cev nqaij daim tawv, los sis kev ua li dab phem rau kev ua li dab phem—qhov zoo rau qhov uas zoo; qhov ncaj ncees rau qhov uas ncaj ncees; qhov ncaj rau qhov uas ncaj; qhov muaj kev hlub tshua rau qhov uas muaj kev hlub tshua.
“… Coj ncaj ncees, txiav txim ncaj ncees, thiab ua qhov zoo tsis tu ncua; thiab yog koj ua txhua yam no ces koj yuav tau txais koj nqi zog; muaj tseeb tiag, koj yuav muaj kev hlub tshua txum tim rov qab los rau koj dua; koj yuav muaj kev txim lij txum tim rov qab los rau koj dua; koj yuav muaj kev txiav txim ncaj ncees txum tim rov qab los rau koj dua; thiab koj yuav muaj nqi zog zoo rov los rau koj dua.”
Kuv zoo siab ua tim khawv tias Yexus Khetos yog peb tus Cawm Seej uas muaj txoj sia nyob. Amas cov lus cog tseg muaj tseeb thiab muaj nqis rau peb—hnub no, tag kis, thiab mus ib txhis li. Kuv ua tim khawv li no los ntawm Yexus Khetos lub npe dawb ceev, amees.