Tus Txheej Txheem rau Txoj Moo Zoo

Yog tias nej tau tuaj xyuas peb lub lav Louisiana, ces tej zaum nej paub txog peb tej zaub mov qab heev—gumbo, jambalaya, étouffée, thiab muaj ntau yam ntxiv.

Tej thaum, kuv muaj siab loj ua raws li tej txheej txheem ua ib pluag mov qab heev. Yam kawg nkaus tom qab muab txhua yam xyaw ua ke thiab tom qab ua raws li tej txheej txheem lawm yog kom saj seb nws puas qab thiab seb puas tshuav ib yam dab tsi uas yuav tsum tso rau haud. Thaum txog lub sij hawm ntawd, kuv yeej hnov cov neeg Creole uas txawj ua zaub mov no ntxhi lus hauv kuv pob ntseg hais tias, “Cia li tso ib co Tony ntxiv rau hauv.” Tony yog ib yam txuj lom creole uas lawv ua hauv kuv lub qub zos Opelousas, Louisiana. Feem ntau nws yog ib yam “txuj lom tseem ceeb” uas pab tau kom qab thaum tib neeg tsis ua raws nraim li tus txheej txheem ua yam zaub mov ntawd.

Kuv tus poj niam Michelle, wb tau ua thawj coj hauv qhov chaw tshaj tawm txoj moo zoo hauv lub xeev Louisiana. Wb yeej qhia cov tub txib ua raws li Michelle tus txheej txheem ua zaub mov jambalaya hmo kawg uas lawv ua tub txib ua ntej lawv yuav rov mus tsev. Ntxiv rau lawv zaj lus tim khawv txog Yexus Khetos txoj moo zoo uas muab txum tim rov qab los lawm, peb cov tub txib paub txog tej txheej txheem ua zaub mov noj.

Ob peb hlis tas los no, kuv tab tom saib lub Koom Txoos cov Ntawv thiab pom ib co vidi-aus hu ua Thawj Tswj Hwm Russell M. Nelson tej Lus Qhia txog Kev Txum Tim Rov Qab Los.” Lub npe rau ib zag vidi-aus ntawd ua rau kuv luag nyav. Nws hu ua “Cov Vaj Lug Kub yog Vajtswv tus Txheej Txheem rau txoj Kev Zoo Siab hauv lub Neej No.” Ces kuv txawm qhib zaj vidi-aus uas kav ob nyuag na this ntawd thiab tau saib Thawj Tswj Hwm Nelson qhia lub Koom Haum Me Nyuam Yaus ib zaj lus me me uas muaj hwj chim uas qhia seb yuav ua li cas thiaj muaj kev zoo siab. Nws qhia tias: “Yog tias koj tab tom ua khoom qab zib noj, ces koj yeej ua raws li tus txheej txheem ua yam qab zib ntawd puas yog? Ces txhua zaus koj yeej yuav tau ib yam qab zib, puas yog?”

Lub sij hawm ntawd nws twb yuav muaj 95 xyoos, ces nws hais ntxiv tias: “Tib neeg nug hais tias, ‘Koj noj mov li cas? Koj ua li cas thiaj ua neej nyob ntev mus?’” Nws teb hais tias, “Qhov tseem ceeb mas yog cov vaj lug kub. Tej zaum nej yuav sim nyeem cov no.”

Ces yeej yog li ntawd. Qhov tseem ceeb mas kom yus muaj kev zoo siab hauv lub neej no yog ua raws li Vajtswv tus txheej txheem uas nyob hauv cov vaj lug kub. Kuv hu qhov no ua “Tus Txheej Txheem rau Txoj Moo Zoo.”

Es nej yuav ua li cas yog tias ua ib yam tsis yog thaum ua raws li tus txheej txheem? Es, nyob rau hauv tus Txheej Txheem rau Txoj Moo Zoo yeej muaj ib yam “txuj lom tseem ceeb” uas yuav pab nej ua qhov yog txhua zaus thaum kawg. Txhua zaus lo lus teb yeej yog Yexus Khetos.

Kuv xav tias peb txhua leej txhia tus muaj tej lub sij hawm thaum peb xav tias tej yam uas peb muab xyaw rau haud yeej tsis zoo txaus, los sis nyuaj rau peb ua raws li tus txheej txheem, los yog peb tsis ua raws kev raws cai, los yog muaj ib yam dab tsi uas peb tswj tsis tau, thiab ntau yam ntxiv.

Ces yuav muab kho li cas? Qhov yooj yim mas yog kom ntxiv tej yam uas caw Yexus Khetos los rau hauv peb lub neej.

Yog li ntawd, yuav ua li cas thiaj ntxiv tau Yexus Khetos rau hauv yus lub neej?

Thaum kuv ua tus thawj tswj hwm rau cov tub txib, txhua rau lub lim tiam kuv tau ntsib txhua tus tub txib hluas. Thaum xam phaj txhua leej li no, cov tub txib feem coob xav paub seb lawv yuav ua li cas haj yam nrog lawv tus khub sib raug zoo.

Muaj ib zaug, ib tug tub txib los zaum rau kuv tau xam phaj nws. Kuv txawm pom hais tias muaj ib yam dab tsi uas txob nws siab heev. Kuv nug hais tias, “Me txwj laug es, hnub no koj xav tham txog dab tsi?” Nws txawm piav hais tias nws thiab nws tus khub muaj teeb meem dab tsi ces lawv thiaj khiav tsis tau cov tub txib tej hauj lwm zoo. Nws txawm los kua muag, ntsia kuv thiab nug hais tias, “Thawj Tswj Hwm es, kuv yuav tsum ua dab tsi?”

Lub sij hawm ntawd, kuv yeej tsis paub seb kuv yuav teb li cas. Tom qab ib pliag, kuv txawm nug nws seb puas tsim nyog wb txhos caug ua ke thov Vajtswv seb tus Ntsuj Plig yuav coj wb kev li cas. Nws kam ua li ntawd, ces wb txawm txhos caug thiab thov Vajtswv txoj kev tshoov siab.

Tom qab thov Vajtswv tas, wb txhos caug ntawd ib pliag ces txawm zaum ntawm wb ob lub rooj zaum sib ntsia. Kuv nug seb wb nyeem puas tau ib nqe vaj lug kub ua ke. Thaum wb qhib wb phau vaj lug kub, kuv nres ib pliag thiab qhia nws tias, “Me txwj laug, thaum wb nyeem nqe vaj lug kub no, thov kom koj yuav nug koj tus kheej lo lus nug no: Yog kuv ua raws li tej cwj pwm no, qhov ntawd puas yuav pab kuv txoj kev ua ib khub thiab wb txoj kev ua cov tub txib tej hauj lwm?”

Ces wb txawm nyeem Maulaunais 7:45 thiab nyeem nrov hais tias: “Thiab kev siab hlub tiv taus ntev, thiab siab zoo, thiab tsis xav tau luag tug, thiab tsis khav txiv, tsis xav rau nws tus kheej xwb, tsis chim sai, tsis xav phem, thiab tsis nyiam kev ua phem tiam sis nyiam qhov tseeb, tiv txhua yam, ntseeg txhua yam, cia siab rau txhua yam, nyiaj txhua yam.”

Ces tus txwj laug no ntsia kuv kua muag poob dawb vog hais tias, “Aws, Thawj Tswj Hwm, tiam sis ua li ntawd nyuaj kawg.” Kuv paub tias nyuaj thiab qhia nws tias nws yog Vajtswv ib tug tub es yog tias nrog tus Tswv sib koom siab nws yuav ua tau.

Ces wb txawm sib tham txog Txwj Laug Clark G. Gilbert ntawm Pawg Xya Caum zaj paj lug txog txoj kev ntxhab, uas qhia peb tias peb yuav tsum pib ntawm qhov chaw uas peb nyob, thiab nrog tus Tswv, nyiaj mus tom ntej thiab nce mus rau qhov chaw zoo. Kuv paub tias nws tseem xav tsis thoob seb nws yuav tsum pib ua li cas, ces kuv thiaj thov nws piav seb nws to taub dab tsi txog nqe vaj lug kub uas hais tias “los ntawm tej yam me me thiab yooj yim thiaj muaj tej yam tseem ceeb los.” Nws txawm piav hais tias thaum ua tej yam me me thiab yooj yim, yus thiaj ua tau tej yam tseem ceeb. Kuv thiaj thov kom nws xav txog ob yam me me thiab yooj yim uas nws ua tau kom thiaj ua siab zoo rau nws tus khub.

Tom qab ib me pliag, nws qhia seb nws xav li cas. Ces kuv thiaj thov kom nws xav txog ob yam me me thiab yooj yim uas nws muaj peev xwm ua kom thiaj ua siab ntev rau nws tus khub. Nws txawm teb tas sim ntawd txog ob yam nws ua tau. Zoo nkaus li nws twb xav txog qhov no ua ntej wb tau sib sab laj li no. Kuv thiaj caw nws thov Vajtswv txog ob peb yam ntawd thiab nug seb puas tsim nyog ua li ntawd, thiab kom nws tau kev cob qhia thiab kev tshoov siab seb nws yuav ua li cas thiaj ua tau raws li lub tswv yim no. Nws pom zoo ua li ntawd. Thaum wb xaus lus, kuv thov kom nws yuav sau ntawv txhua lub lim tiam rau kuv seb nws ua li cas lawm.

Hauv ob peb lim tiam tom qab ntawd, kuv pom hauv nws tej tsab ntawv tias nws tab tom ua zoo dua. Tiam sis tsis yog kuv pom tej yam zoo hauv nws tej tsab ntawv txhua lim tiam xwb, tiam sis kuv kuj pom li ntawd hauv nws tus khub tej ntawv thiab. Lwm zaus uas kuv xam phaj nws, kuv pom hais tias nws lub ntsej muag thiab lub siab tau hloov hlo. Kuv thiaj nug hais tias, “Ces, Txwj Laug, puas muaj tseeb hais tias kev siab hlub yeej tsis plam ib zaug hlo li?’” Nws txawm luag nyav hais tias: “Yog los mas, thiab los ntawm tej yam me me thiab yooj yim thiaj muaj tej yam tseem ceeb los.”

Thaum uas koj ua raws li tus Txheej Txheem rau Txoj Moo Zoo rau txoj kev ua neej nyob muaj kev zoo siab, nco qab ntsoov Thawj Tswj Hwm Nelson zaj lus qhia hais tias: “Txawm nej muaj lus nug los sis muaj teeb meem li cas los, lus teb yeej nyob ntawm Yexus Khetos lub neej thiab tej lus qhia. Cia li kawm txog Nws txoj Kev Theej Txhoj, Nws txoj kev hlub, Nws lub siab hlub tshua, Nws cov lus qhuab qhia, thiab Nws txoj moo zoo uas kho peb zoo thiab pab peb vam meej. Muab siab npuab Nws! Cia li coj raws li Nws!”

Thaum twg nej xav “hnov Nws” thiab kawm paub seb yuav ua li cas thiaj caw Yexus Khetos los rau hauv nej lub neej, cia li ua raws li tej theem uas Thawj Tswj Hwm Nelson qhia peb txog txoj kev txais kev tshwm sim rau yus tus kheej:

“Nrhiav ib qho chaw uas ntsiag to uas koj yuav ib sij mus xyuas. Txo hwj chim rau ntawm Vajtswv. Qhia nej Leej Txiv Saum Ntuj Ceeb Tsheej seb nej lub siab xav li cas tiag. Mus rau Nws kom tau lus teb thiab tau kev nplij siab.

“Thov Vajtswv hauv Yexus Khetos lub npe txog nej tej kev txhawj xeeb, nej tej kev ntshai, nej tej kev qaug zog—tiag mas, tej kev ntshaw hauv nej nruab siab. Ces nej mam li ua tib zoo mloog lus! Sau tej kev xav uas los rau hauv nej lub paj hlwb. Sau ntawv seb nej xav li cas thiab ua raws li li tej kev tshoov siab uas nej raug ntawd. Thaum nej ua li no ib hnub dhau ib hnub, ib hlis dhau ib hlis, ib xyoos dhau ib xyoos, nej thiaj yuav ‘loj hlob es txawj ua raws li tej kev tshwm sim.’”

Kuv ua tim khawv hais tias Yexus Khetos yog peb tus Cawm Seej thiab tus Txhiv Dim. Nws tau “ua txhua yam uas peb xav tau kom thiaj yuav rov mus rau [peb] Leej Txiv Saum Ntuj Ceeb Tsheej.” Los ntawm Yexus Khetos lub npe, amees.