Cov uas Ua rau Neeg Nyob Sib Haum Xeeb Tau Koob Hmoov

Cia li xav seb yuav zoo li cas yog nej yog ib tug tub hluas los ntxhais hluas nyob hauv Kapena-us, nyob ze Hiav Txwv Kalilais, thaum Yexus Khetos ua hauj lwm qhuab qhia hauv lub ntiaj teb. Muaj ib tug xib hwb uas nto moo—ib tug uas neeg coob tuaj mloog. Cov neeg zej zog npaj mus rau ib lub roob nyob ze hiav txwv kom mloog Nws hais.

Koj nrog lwm tus koom ua ke taug kev hauv Kalilais tej kev uas muaj hmoov av ntau. Thaum tuaj txog, cov neeg coob uas tuaj koom mloog Yexus ua rau koj xav tsis thoob. Ib txhia ntxhi lus tias “Tus Mexiyas.”

Koj mloog nws lus. Nws tej lus tshoov koj lub siab. Thaum koj taug kev mus tsev, koj nyob twj ywm thiab tsis nrog lwm tus sib tham.

Koj xav txog tej yam zoo kawg—tej yam uas zoo dua li Mauxes txoj kev cai. Nws hais txog txoj kev tig sab plhu rau ib tug ntaus thiab kev hlub yus cov yeeb ncuab. Nws cog lus tias, “Cov uas ua rau neeg nyob sib haum xeeb, cov ntawd tau koob hmoov; [vim] … yuav hu lawv [ua] Vajtswv cov me nyuam.”

Tiam sis nyob hauv koj lub neej, thaum muaj tej hnub nyuaj heev—tsis paub tseeb thiab muaj kev ntshai—ntshe yuav tsis muaj kev sib haum xeeb.

Koj khiav nrawm; ces thaum txog tsev koj txog txog siav. Koj tsev neeg koom ua ke, koj txiv nug hais tias, “Qhia peb tias koj hnov thiab xav dab tsi.”

Koj qhia tias Nws tau caw koj kom cia koj lub teeb ci rau lwm tus pom, kom ua ncaj ncees tsis hais luag tsim tsom koj los yog. Ua rau koj quaj me ntsis thaum koj hais tej lus no: “Cov uas ua rau neeg nyob sib haum xeeb, cov ntawd tau koob hmoov; [vim] … yuav hu lawv [ua] Vajtswv cov me nyuam.”

Koj nug hais tias, “Kuv yuav ua li cas pab neeg nyob sib haum xeeb thaum lub ntiaj teb raug kev kub ntxhov, thaum kuv muaj lub siab ntshai, thiab thaum tsis muaj kev thaj yeeb hlo li?”

Koj txiv saib koj niam thiab teb hais tias, “Yog los mas. Peb yuav tsum pib ua li no nyob hauv peb lub siab. Ces nyob hauv peb tsev neeg. Thaum peb ua li ntawd, ces peb pab tau kom tib neeg sib haum xeeb tom tej kev thiab tej zos.”

Cia li mus tom ntej 2,000 xyoos. Nej tsis tas xav txog qhov no—yog peb lub neej tam sim no. Txawm yog tej teeb meem ntawm tiam neeg uas tab tom loj hlob tuaj yeej txawv ntawm cov tub hluas ntxhais hluas nyob hauv Kalilais—kev tawg ua ob tog, kev tso kev ntseeg tseg, kev ua pauj, kev chim thaum tsav tsheb, kev npau taws, thiab kev koom ua ke cem neeg hauv social media—tiam sis ob tiam neeg no muaj kev sib cav sib ceg thiab kev kub ntxhov.

Zoo siab uas peb cov tub hluas ntxhais hluas kuj muaj sij hawm uas lawv mus mloog Zaj Lus Pem Roob: xws li seminary, tej lub rooj sab laj Ntxiv Dag Zog rau cov Tub Hluas Ntxhais Hluas, thiab Los, Nrog Kuv Mus. Nyob ntawd, tus Tswv caw lawv ua ib yam li thaum ub: kom cia lawv lub teeb ci rau lwm tus pom, ua ncaj ncees tsis hais thaum luag tsim txom yus los yog, thib hlub lawv cov yeeb ncuab.

Lawv kuj txais tej lus txhawb nqa los ntawm cov yaj saub ntawm Kev Muab Txoj Moo Zoo Txum Tim Rov Qab Los: “Xav Tau cov uas Ua rau Neeg Nyob Sib Haum Xeeb.” Tsis sib yeem tiam sis tsis txhob hais lus cem Muab kev sib cav thiab kev muab hlob pauv kom muaj kev zam txim thiab kev hlub. Sib koom tes thiab sib nkag siab, tsis txhob ntxub los sib cais. Thiab tib cov lus cog tseg hais tias, “Cov uas ua rau neeg nyob sib haum xeeb, cov ntawd tau koob hmoov; [vim] … yuav hu lawv [ua] Vajtswv cov me nyuam.”

Lub siab ntawm cov hluas uas tab tom loj hlob tuaj niaj hnub no yeej muaj ib zaj lus tim khawv txog Yexus Khetos thiab cia siab rau yav tom ntej. Tiam sis lawv kuj nug hais tias, “Kuv puas muaj peev xwm pab neeg nyob sib haum xeeb thaum lub ntiaj teb raug kev kub ntxhov, thaum kuv muaj lub siab ntshai, thiab thaum tsis muaj kev thaj yeeb hlo li?”

Lo lus teb los yeej yog nej muaj los mas! Peb ntseeg tus Cawm Seej tej lus hais tias: “Kuv muab kuv txoj kev kaj siab tso rau nej; … Nej tsis txhob txhawj, tsis txhob nyuaj siab thiab tsis txhob ntshai.”

Peb tseem yuav tsum pib ua rau neeg nyob sib haum xeeb nyob hauv peb lub siab. Ces tom qab ntawd ua hauv peb tsev thiab tsev neeg. Thaum peb xyaum ua li ntawd, ces yuav pab ua rau neeg zej zog nyob sib haum xeeb.

Cia peb xav txog peb qhov chaw no uas ib tug Neeg Ntseeg hauv Hnub Nyoog Kawg niaj hnub no yuav ua rau neeg nyob sib haum xeeb.

Thawj qhov chaw yog nyob hauv peb lub siab. Ib qho uas yooj yim pom tau hauv Yexus Khetos txoj hauj lwm qhuab qhia yog qhov uas cov me nyuam nyiam los rau Nws. Qhov no qhia ib yam tseem ceeb rau peb. Qhov uas peb xav tias ib tug me nyuam lub siab dawb huv thiab tsis muaj txim yuav xav li cas kom tsim kev sib haum xeeb yuav pab peb paub hloov peb lub siab li cas. Nov yog tej lus uas ob peb tug me nyuam yaus tau hais kom teb lo lus nug “Zoo li cas thaum yus pab neeg nyob sib haum xeeb?”

Kuv qhia txog lawv tej lus teb uas tawm hauv lawv lub siab los! Luke hais tias, “Pab lwm tus txhua lub sij hawm.” Grace hais tias ib leeg yuav tsum zam txim rau ib leeg, tsis hais thaum yus xav tias tsis ncaj. Anna hais tias, “Kuv pom ib tug uas tsis muaj leej twg nrog nws ua si, kuv thiaj li mus nrog nws ua si.” Lindy xav tias thaum yus ua rau neeg sib haum xeeb ces yog txoj kev pab lwm tus. “Ces yus pab lwm tus. Yeej meem yuav muaj neeg pab lwm tus mus tom ntej.” Liam hais tias, “Txhob ua nyaum rau tib neeg, txawm yog lawv ua nyaum rau yus los yog.” London hais tias, “Yog leej twg thuam yus los sis ua phem rau yus, yus hais tias, ‘Thov txhob ua li ntawd.’” Trevor hais tias, “Yog tshuav ib lub donut xwb thiab yus xav noj kom tag, yus cia li muab faib rau lwm tus.”

Cov me nyuam tej lus teb qhia kuv tias peb txhua tus xav ua siab dawb siab zoo thiab muaj kev khuv leej thaum peb yug los. Yexus Khetos txoj moo zoo txhawb nqa thiab muab tej cwj pwm no koom ua ke, tsis hais kev ua rau neeg nyob sib haum xeeb, nyob hauv peb lub siab, thiab ua rau peb tau koob hmoov nyob hauv lub neej no thiab lub neej tom ntej.

Qhov chaw thib ob, kev tua rau peb tsev neeg sib haum xeeb thaum peb siv tus Tswv txheej txheem kom peb sib raug zoo: kev yaum, kev ua siab ntev, muaj lub siab mos siab muag, ua siab zoo, thiab muaj kev hlub tsis tu tsis tseg.

Nov yog ib zaj dab neeg uas qhia tias ib tsev neeg tau ua li cas kom pab lawv sib haum xeeb, thaum lawv ua raws li tej lub ntsiab cai no.

Nyuaj rau cov me nyuam nyob hauv tsev neeg no kom sib raug zoo nrog ib tug neeg laus uas pheej siab luv, saib tsis taus, thiab hais lus nyaum. Cov me nyuam, uas nyuaj siab thiab ntxhov siab, pib xav tias tej zaum lawv yuav tsum ua nyaum zoo li tus laus ntawd.

Muaj ib hmo, tsev neeg ntawd tau sib tham ke txog kev nyuaj siab ntawd thiab tau ua li caw rau lawv. Ces lawv twb tawm tswv yim—tsis yog kev kho teeb meem tiam sis ib yam uas lawv sim ua tau.

Lawv yuav tsis nyob twj ywm los sis ua pauj, tiam sis cov me nyuam yuav ua ib yam uas yeej tsis xav tias lawv yuav ua: lawv yuav ua siab zoo rau nws. Tsis yog lawv tswj lawv tus kheej xwb, tiam sis lawv txhob txwm muaj siab hais lus zoo thiab ua tej yam zoo rau nws, tsis hais tus neeg laus ntawd ua li cas rau lawv los yog. Txhua tus pom zoo tias lawv yuav sim ua li ntawd rau ib ntus ces tom qab ntawd lawv yuav koom ua ke thiab sib tham seb.

Lawv ib txhia tsis tshua xav ua li ntawd thaum xub thawj, tiam sis lawv txhua tus cog lus tias lawv yuav ua siab tiag ua li ntawd.

Tom qab ntawd los muaj ib yam xav tsis thoob tshwm sim.

Tej kev tsis sib raug zoo pib ploj mus. Tej kev luag nyav pauv kev hnya. Tus neeg laus, uas ib txwm tsis qhib siab thiab nyaum, pib hloov. Cov me nyuam, vim lawv ua raws li lawv xaiv kom hlub nws, twb muaj kev xyiv fab thaum pom nws hloov. Txoj kev hloov no loj heev thiaj li tsis tas rov qab sib ntsib kom sib tham ntxiv. Kev ua siab zoo twb kho teeb meem lawm.

Thaum txog sij hawm mus, lawv ua phooj ywg zoo ua rau txhua tus txais kev txhawb nqa. Yog peb xav ua rau neeg nyob sib haum xeeb, peb zam txim pub rau lwm tus, thiab txhob txwm txhawb nqa lwm tus tsis txhob muab lawv cem.

Qhov chaw thib peb, kev ua rau peb zaj zog sib haum xeeb. Nyob rau tej xyoo uas muaj Kev Tsov Rog Thoob Ntiaj Teb thib Ob, Txwj Laug John A. Widtsoe qhia tias: “Tib txoj kev kom txhim tsa ib lub zej zog uas muaj kev thaj yeeb yog kom pab txiv neej thiab cov poj niam uas xav tau thiab xav txim kev thaj yeeb. Txhua tus neeg, los ntawm Khetos cov lus qhuab qhia … muaj feem pab kom muaj kev thaj yeeb nyob thoob plaws lub ntiaj teb.”

Zaj dab neeg no piav txog lub ntsiab cai no.

Ob peb xyoos tas los, ob tug txiv neej—ib tug xib hwb Muslim thiab ib tug xib hwb Ntseeg Khetos nyob hauv Nigeria—nyob ob tog ntawm kev sib tawm tsam ntawm nkawd ob txoj kev teev ntuj. Ob tog no twb raug tsim txom ntau heev. Tiam sis, dhau los ntawm lub hwj chim kho mob uas los ntawm kev zam txim, nkawd tau txiav txim siab koom ua ke.

Xib Hwb Muhammad Ashafa thiab Xib Hwb James Wuye ntaus phooj ywg thiab ua ib khub kom muaj kev thaj yeeb. Nyob ua ke nkawd tsim ib qho chaw rau kev kho teeb meem rau txhua kev teev ntuj. Tam sim no nkawd qhia lwm tus kom muab kev ntxub pauv kom muaj kev cia siab. Ob zaug twb xaiv nkawd kom seb puas txais nqi zog Nobel Peace Prize, es tsis ntev tas los twb xaiv nkawd npe seb puas txais nqi zog Commonwealth Peace Prize.

Ob tug uas dhau los yog ob tug yeeb ncuab, tam sim no nkawd koom ua ke mus rau ub rau no kho tej yam uas xiam tag lawm, ua tim khawv txog qhov tus Cawm Seej tej lus caw kom peb ua rau neeg nyob sib haum xeeb yog ib qho uas ua tau—yeej yog ib qho uas muaj hwj chim heev.

Thau peb los paub Vajtswv lub yeeb koob, ces peb “yuav tsis muaj ib lub siab xav ua kom lwm tus raug mob, tiam sis yuav xav nyob kaj siab lug.” Nyob hauv peb tej pawg ntseeg thiab peb zej zog, thov kom peb ib leeg yuav saib ib leeg zoo li Vajtswv cov me nyuam.

Hais ntsiab lus, kuv xav caw nej ua ib yam. Kom ua rau neeg nyob sib haum xeeb peb yuav tsum ua tej yam—peb txhua tus yuav tsum ua li cas, pib thaum tag kis? Nej puas kam xav seb puas xav ua ib txoj kev npaj uas muaj peb qhov kom ua rau neeg nyob sib haum xeeb rau ib lub lim tiam?

1. Ib lub tsev uas tsis muaj kev sib cav: Thaum pib sib cav, cia li nres thiab rov qab hais tej lus zoo thiab ua tej yam zoo.

2. Tuam choj digital saum huab cua: Ua ntej xa ib nqe lus, teb, los sis hais dab tsi online, cia li nug seb, “Qhov no puas ua rau neeg sib raug zoo?” Yog tsis ua, ces cia li tso tseg. Tsis txhob xa. Tiam sis, hais ib yam dab tsi zoo. Tshaj tawm txog kev kaj siab lug kom pauv kev ntxub ntxaug.

3. Kho thiab pab koom ua ke: Txhua tus hauv yus tsev neeg los tej zaum yuav nrog ib tug uas tsis sib raug zoo nrog yus kom thov txim, txhawb nqa, kho, thiab rov qab los koom ua ke.

Twb dhau ob peb lub hlis tom qab kuv txais kev tshoov siab uas ua rau kuv xav hais txog zaj no: “Cov uas Ua rau Neeg Nyob Sib Haum Xeeb Tau Koob Hmoov.” Thaum kuv kaw kuv zaj lus, thov cia kuv qhia nej txog tej yam uas tau tshoov kuv lub siab thaum lub sij hawm no.

Kev ua rau neeg nyob sib haum xeeb yog Khetos ib tug cwj pwm. Tej lub sij hawm lwm tus hais tias cov uas ua rau neeg nyob sib haum xeeb ruam los yog tsis muaj zog—cov hais li no los ntawm txhua sab. Tiam sis, qhov uas yus ua rau neeg nyob sib haum xeeb tsis yog kev qaug zog tiam sis yog kev muaj zog ua ib yam uas neeg ntiaj teb tsis tshua to taub. Yuav tsum ua siab loj thiab hais kom haum rau ob tog tiam sis yeej tsis tas tso yus tej ntsiab cai tseg. Kev ua rau neeg nyob sib haum xeeb yog kev qhib siab, tsis muab kaw. Yus ib leeg cev tes rau ib leeg, tsis muab lub nrig rau ib leeg saib. Kev ua rau neeg nyob sib haum xeeb los tsis yog ib yam tshiab, uas nyuam qhuav muaj los. Yexus Khetos yog tus uas qhia qhov no, rau cov neeg nyob hauv Phau Vaj Lug Kub Npaivnpaum thiab Phau Ntawv Maumoos. Kev ua rau neeg nyob sib haum xeeb los cov yaj saub txij thau muab txoj moo zoo txum tim rov qab los los txog hnub no twb tau qhia txog qhov no.

Peb ua raws li peb lub luag hauj lwm ua Leej Txiv Saum Ntuj Ceeb Tsheej cov me nyuam thaum peb sim ua rau neeg nyob sib haum xeeb. Kuv ua tim khawv txog Yexus Khetos, tus ua yog tus Tub Vaj Ntxwv ntawm Kev Thaj yeeb, tus Tub ntawm Vajtswv uas muaj txoj sia nyob, los ntawm Yexus Khetos lub npe, amees.