Paub Nej Yog Leej Twg Tiag
Txawm peb nyob qhov twg hauv peb txoj kev ua ib tug thwj tim los, peb lub neej yuav hloov los ua qhov zoo yog peb to taub ntxiv tias peb yog leej twg tiag tiag.
Ob peb xyoos tas los wb tus ntxhais uas ua ntxhais txib tau muaj xwm txheej zoo kawg nkaus. Nws pom zoo kuv qhia rau nej ib feem ntawm nws tsab ntawv uas nws tau sau rau wb lub lim tiam ntawd:
“Nag hmo ib tug mej zeej uas rov qab los tau hais kom wb tuaj ntawm nws tsev sai li sai tau. Thaum wb mus txog, wb pom nws txhos caug hauv av, quaj quaj heev. Nws tseem quaj thiab qhia wb tias nws tau poob nws txoj hauj lwm, yuav txais kev ntiab tawm ntawm nws lub tsev kem, thiab yuav rov qab tsis muaj tsev nyob.”
Wb tus ntxhais qhia ntxiv: “Kuv pib nyeem hauv kuv phau vaj lug kub, seb nrhiav puas tau tej lus—tej yam lus uas yuav pab tau nws. Thaum kuv nrhiav ib nqe zoo tag nrho, kuv tau xav tias, ‘Kuv ua dab tsi? Khetos yuav tsis ua li no. Nov tsis yog ib qho tab meem uas kuv kho tau, tiam sis nov yog Vajtswv tus ntxhais tiag tiag uas xav tau kuv txoj kev pab.’ Yog li ntawd, kuv kaw kuv phau ntawv vaj lug kub, txhos caug ntawm nws ib sab, thiab khawm nws thaum wb quaj ua ke, mus txog thaum nws sawv thiab npaj siab kov yeej kev sim siab no.”
Tom qab tus poj niam no txais kev nplij siab, wb tus ntxhais tau nyeem cov vaj lug kub rau nws kom pab nws to taub nws muaj nqi npaum li cas rau Vajtswv thiab qhia nws ib yam tseeb uas tseeb tiag tiag —hais tias peb yog Vajtswv cov tub thiab cov ntxhais uas Nws hlub, Vajtswv uas khuv leej rau peb thaum peb raug kev txom nyem thiab Nws npaj siab pab peb thaum peb rov qab sawv.
Yog ib qhov zoo xav qhov thib ib ntawm cov lus qhuab qhia uas cov tub txib qhia yog qhov uas Vajtswv yog peb Leej Txiv uas hlub peb. Txhua yam tseeb tom qab ntawd yeej nyob saum lub hauv paus uas yog kev paub peb yog leej twg tiag tiag.
Susan H. Porter, tus Koom Haum Me Nyuam Yaus tus Tuam Thawj Tswj Hwm, qhia tias: “Thaum nej paub thiab to taub tias niam thiab txiv saum ntuj ceeb tsheej hlub nej puv nkaus, qhov ntawv hloov txhua yam. Qhov ntawd hloov nej txoj kev xav txog nej tus kheej thaum nej ua yuam kev Qhov ntawd hloov nej txoj kev xav thaum tej yam nyuaj tshwm sim. Qhov ntawd hloov nej tej kev xav txog Vajtswv cov lus txib. Qhov ntawd hloov nej tej kev xav txog lwm tus thiab nej txoj kev xav muaj peev xwm hloov los ua zoo.”
Peb kawm txog txoj kev hloov li no thaum peb nyeem txog thaum Mauxes sib tham nrog Vajtswv tim ntsej tim muag. Nyob hauv txoj kev sib tham ntawd, Vajtswv twb qhia ntau zaus rau Mauxes txog nws caj ceg los saum ntuj los, hais tias “Mauxes, … koj yog kuv tus tub.” Vajtswv qhia tias Mauxes muaj yam ntxwv zoo li Nws Tib Leeg Tub. Mauxes tau los to taub tseeb tias nws yog leej twg, thiab nws muaj ib txoj hauj lwm nws yuav tsum ua, thiab nws muaj ib Leej Txiv Saum Ntuj Ceeb Tsheej uas hlub nws.
Tom qab lub sij hawm no, tus yeeb ncuab tau los ntxias nws thiab hais rau nws hais tias, “Neeg leej tub Mauxes.” No yog ib qhov cuab yeej phem uas tus yeeb ncuab siv ntau zaus. Peb Leej Txiv Saum Ntuj Ceeb Tsheej yeej yuav muab siab hlub qhia peb tias peb yog Nws cov me nyuam, thiab tus yeeb ncuab yeej yuav hu peb los ntawm peb tej kev qaug zog. Tiam sis Mauxes twb kawm lawm tias nws yog ib tug tshaj ib tug “neeg leej tub.” Nws hais rau Dab Ntxwg Nyoog tias: “Koj yog leej twg? Vim saib seb, kuv yog Vajtswv ib tug tub.” Zoo ib yam li nws, thaum peb raug tej kev sim siab ntawm lub neej no los sis thaum peb xav tias tib neeg hu peb los ntawm peb tej kev qaug zog, peb yuav tsum sawv ruaj khov ntawm peb txoj kev paub tias peb yog leej twg tiag tiag. Peb yuav tsum muaj siab xav pom zoo los saum ntuj, tsis yog los ntawm neeg ntiaj teb. Thiab thaum peb ua li ntawd, peb kuj ua siab loj tshaj tawm tias, “Kuv yog Vajtswv tus me nyuam.”
Nyob hauv kev hawm Vajtswv uas tshaj tawm rau cov neeg hluas thoob ntiaj teb, Thawj Tswj Hwm Russell M. Nelson uas peb hlub tau qhia tias: “Yog li ntawd nej yog leej twg? Qhov tseem ceeb tshaj, koj yog Vajtswv tus me nyuam, ib tug me nyuam ntawm txoj kev khi lus, thiab Yexus Khetos ib tug thwj tim. Thaum nej muab siab npuab tej lus tseeb no, peb Leej Txiv Saum Ntuj Ceeb Tsheej yuav pab nej ua raws li lub hom phiaj kom nrog Nws nyob mus ib txhis li.”
Nyob hauv nqe vaj lug kub uas hais ntau tshaj, yeej tsis yog ib yam uas lam hais xwb, Vajtswv qhia peb hais tias peb thiab Nws txheeb ze li cas. Hais txog tag nrho cov npe uas hu tau Nws nyob hauv zaj lus thov foom koob hmoov rau lub cim nco txog, Nws hais kom muab Nws hu ua “Leej Txiv tus uas Nyob Mus Ib Txhis.”
Thaum peb los paub tseeb tias peb yog leej twg, peb yuav los ntseeg ntxiv tias peb Leej Txiv Saum Ntuj Ceeb Tsheej uas hlub peb tau npaj kev rau peb rov qab mus nrog Nws nyob. Txwj Laug Patrick Kearon qhia tias, “peb Leej Txiv txoj hau kev zoo nkauj, yeej yog Nws txoj hau kev ‘zoo kawg nkaus’ twb tau tsim kom coj nej mus tsev, tsis yog kom tav nej kev tsis pub nej nkag haud. … Vajtswv yeej yog tus uas raws nej tsis tu tsis tseg.” Xav txog qhov ntawd ib me pliag—peb Leej Txiv uas hlub peb thiab muaj hwj chim loj tshaj plaws yeej yog tus uas “raws nej tsis tu tsis tseg.”
Txawm peb nyob qhov twg hauv peb txoj kev ua ib tug thwj tim los, peb lub neej yuav hloov los ua qhov zoo yog peb to taub ntxiv tias peb yog leej twg tiag tiag. Kuv xav hais txog ob yam uas yuav pab peb to taub ntxiv.
Yam thib Ib, Thov Vajtswv
Thaum tus Cawm Seej pib ua Nws txoj hauj lwm qhuab qhia hauv ntiaj teb no, Nws tau mus rau hauv hav zoov mus “nyob nrog Vajtswv.” Tej zaum peb yuav tsum hloov pej tej kev lam thov Vajtswv xwb thiab siv sij hawm sib txuas lus tiag tiag thiab “nyob nrog Vajtswv” txhua hnub.
Kuv tau kawm tias yog kuv siv ob peb feeb npaj nrog kuv Txiv sib tham, tau pab kuv tej lus thov Vajtswv. Cov vaj lug kub qhia peb tias tus txheej txheem no yeej zoo. Txawm tias yog Joseph Smith; Nifais, Hilamas tus tub; los yog Enos, txhua tus no tau xav txog thiab tsom ntsoov ua ntej lawv sib tham nrog Vajtswv. Enos tau hais tias nws tus ntsuj plig ntshaw thaum nws txiv tej lus nkag mus tob rau hauv nws lub siab. Tej yam ntxwv no qhia peb tias peb yuav tsum npaj peb sab ntsuj plig rau peb txoj kev siv sij hawm txhua hnub “nyob nrog Vajtswv.”
Tus Cawm Seej hais rau cov neeg Nifais tias, “Thaum nej thov Vajtswv, cia li nkag mus rau hauv nej chav tsev teev tiam, thiab thaum nej kaw nej lub qhov rooj lawm, mam li thov nej Leej Txiv.”
Txawm yog chav tsev teev tiam los chav pw los, lub ntsiab cai yog nrhiav ib qhov chaw uas nej nyob nej ib leeg xwb thaum nej thov Vajtswv, kom cia nej tus ntsuj plig Nyob ntsiag to, thiab hnov tej lus qhia ntawm “lub suab yau yau.” Peb npaj tau thaum peb xav txog tej yam uas peb zoo siab tau txais thiab tej lus nug los tej kev txhawj xeeb uas peb xav qhia rau peb Leej Txiv. Peb yuav tsum sim tsis hais zoo ib yam li qub thaum thov Vajtswv, tiam sis nrog peb Leej Txiv sib tham, hais lus nrov yog ua tau.
Kuv paub tias vim peb lub neej muaj tej kev kub ntxhov, thaum peb zov cov me nyuam me, los khiav mus ub mus no, tej zaum tsis muaj sij hawm nrhiav chav dai khaub ncaws thiab tej sij hawm npaj xav txog—tiam sis tej kev thov Vajtswv ntsiag to, sai, thiab tseem ceeb muaj zog tshaj yog peb tau siv sij hawm kom “nyob nrog Vajtswv” ua ntej lub sij hawm ntawd.
Tej zaum muaj ib txhia uas tsis tau thov Vajtswv tau ntev lawm los sis ib txhia uas xav tias tsis muaj leej twg hnov lawv tej lus thov. Kuv cog lus rau nej tias nej Leej Txiv Saum Ntuj Ceeb Tsheej paub nej, hlub nej, thiab xav hnov nej tej lus. Nws xav nrog nej sib txuas lus. Nws xav kom nej nco qab tias nej yog leej twg.
Tsis ntev tas los Txwj Laug Jeffrey R. Holland tau qhia tias, “Txawm nej thov Vajtswv npaum li cas los, thov ntxiv. Txawm nej siv zog thov li cas los, siv zog thov ntxiv.”
Ntxiv rau txoj kev siv zog thov Vajtswv ntxiv, kev kawm Phau Ntawv Maumoos txhua hnub thiab kev teev tiam hauv lub tuam tsev yuav pab peb npaj peb lub siab txais kev tshwm sim. Thaum peb rau siab sib tham nrog peb Leej Txiv Saum Ntuj Ceeb Tsheej kom zoo dua, Nws yuav foom koob hmoov rau peb kom peb paub tias peb yog Nws cov me nyuam tiag tiag.
Yam thib Ob, Los Paub tias Yexus Yog tus Khetos
Qhov uas qhia tias Vajtswv hlub peb uas yog Nws cov me nyuam ntau tshaj plaws yog qhov uas Nws tau txib Nws Leej Tub, peb tus Cawm Seej, los pab peb rov qab los tsev. Vim li ntawd, peb yuav tsum los paub Nws.
Ntau xyoo tas los, thaum kuv ua ib ceg txheem ntseeg tus thawj tswj hwm, kuv tau sau ntawv pom zoo rau ib tug kwv tij kom ua hauj lwm coj kab ke hauv lub tuam tsev. Tom qab kuv tau sau tias nws yuav ua hauj lwm coj kab ke zoo heev, kuv tsis txhob txwm nias nias qhov uas hais tias “tsis pom zoo” es cia li xa ntawv ntawd lawm. Tom qab kuv sim muab kev xa daim ntawv thim, kuv hu lub tuam tsev tus thawj tswj hwm thiab hais tias, “Kuv tau ua yuam kev loj heev.” Lub tuam tsev tus thawj tswj hwm zoo no hais tias “Thawj Tswj Hwm Eyre, tsis muaj dab tsi koj tau ua uas zam txim tsis tau thiab peb kho tau.” Qhov tseeb no zoo heev. Muaj tseeb tiag, Yexus Khetos yog “tus uas muaj hwj chim cawm tau neeg.”
Nyob rau xyoo 2019 tau hloov loj cov lus nug kom txais tau ib daim ntawv tso cai nkag tuam tsev. Ua ntej tau pauv, ib los lus nug yog koj puas muaj ib zaj lus tim khawv txog Yexus Khetos lub luag hauj lwm ua tus Cawm Seej thiab tus Txhiv Dim. Tam sis no los lus nug yog koj puas muaj ib zaj lus tim khawv txog Nws lub luag hauj lwm ua koj tus Cawm Seej thiab tus Txhiv Dim. Yexus Khetos txoj Kev Theej Txhoj tsis yog rau lwm tus xwb; kuj yog rau nej thiab kuv ib yam thiab. Nws yog kuv tus Cawm Seej. Nws yog nej tus Cawm Seej. Tus Cawm Seej rau txhua leej txhua tus. Los ntawm Nws ib leeg xwb nej thiab kuv rov qab los nyob nrog peb Leej Txiv los tau.
Yog li ntawd, cov kwv tij thiab cov muam, cia peb nrhiav Nws. Cia peb kawm Nws txheeb ze Leej Txiv thiab txheeb ze peb li cas. Cia peb hu zaj nkauj txog txoj kev hlub uas txhiv dim uas los rau peb txhua tus los ntawm peb tus Txhiv Dim thaum peb hloov siab lees txim. Thaum peb los paub “tus uas muaj hwj chim cawm tau neeg,” peb yuav nkag siab tias vim peb yog Vajtswv cov me nyuam, peb yog Nws txoj kev zoo siab—cov tseem ceeb tshaj plaws rau Nws—thiab peb txhua tus tsim nyog txais kev cawm seej.
Kuv ua tim khawv tias peb muaj ib Leej Txiv Saum Ntuj Ceeb Tsheej uas hlub peb. Thaum peb los paub qhov tseeb mus ib txhis los ntawm kev thov Vajtswv, txais tau kev tshwm sim, thiab los cuag Yexus Khetos, peb paub tau tam sim no thiab tshaj tawm tias, “Kuv yog Vajtswv tus me nyuam.” Los ntawm Yexus Khetos lub npe, amees.