Cia Li Mus Ua Ib Yam Li Ntawd
Kuv xav hais me ntsis txog cov uas Vajtswv hu los ua tub txib uas pab ua hauj lwm. Lawv ua yam ntxwv zoo rau peb.
Thaum tus Cawm Seej taug kev dhau Npexaidas, ib co neeg coj ib tug neeg dig muag tuaj rau Nws. Tej zaum lawv cia siab tias lawv yuav pom ib qho txuj ci tseem ceeb. Tus Cawm Seej “tuav tus txiv neej ntawd tes thiab coj nws mus rau tom ntug zos” kom tsis muaj lwm tus pom Nws kho tus neeg mob. Thaum xub thawj, zoo li twb tsis tau kho zoo tag nrho. Tus txiv neej ntawd “tsa qhov muag saib thiab hais tias, kuv pom neeg mus mus los los, tiam sis lawv zoo li tej ntoo.” Yexus, muaj kev siab hlub, “rov cev tes mus kov tus txiv neej ob lub qhov muag dua ib zaug.” Los ntawm tus Cawm Seej txoj kev kov nws ib zaug ntxiv, tus txiv neej dig muag “pom kev tseeb” lawm.
Nov yog ib zaug xwb thaum tus Cawm Seej txo hwj chim pab lwm tus tas nws lub neej. Nws qhia peb tias Nws “los nws tsis tau kom leej twg tu nws, tiam sis nws los tu sawv daws” thiab Nws caw peb kom ua raws li Nws tau ua xws li mus ib mais ntxiv, muab rau tus uas thov, thiab hlub peb cov kwv tij zej zog. Thaum ib tug nug tias “Tus twg tahij yog kuv tej kev tij zej zog?” Yexus hais zaj lus piv txwv txog tus Neeg Xamalis zoo thiab hais kom tus ntawd “cia li mus ua ib yam li ntawd.”
Cov tub txib hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yeej yog cov neeg uas coj yam ntxwv txog tus Neeg Xamalis zoo uas Yexus Khetos caw peb ua. Kuv xav hais me ntsis txog cov uas Vajtswv kom ua tub txib uas pab ua hauj lwm. Lawv yog cov neeg uas coj yam ntxwv zoo rau peb hais tias txoj kev pab lwm tus (1) qhib neeg lub siab kom txais tau Yexus Khetos txoj moo zoo, (2) cia peb sawv daws txhawb pab lwm tus tsis hais peb lub neej zoo li cas los, thiab (3) ua rau peb txais tau Yexus Khetos lub hwj chim hauv peb lub neej.
Qhov thib Ib, Txoj Kev Pab Lwm Tus Qhib Neeg lub Siab Kom Txais Tau Yexus Khetos Txoj Moo Zoo
Nyob rau xyoo 91 ua ntej Yexus yug los, Amoos qhia txog nws tus kheej rau Vaj Ntxwv Lamaunais hais tias, “Kuv xav nyob nrog cov neeg no ib ntus; … [thiab] kuv yuav ua koj tus tub qhe.” Vim nws tau ua hauj lwm pab tus vaj ntxwv, Amoos muaj cib fim kom “hais tsis ntshai, … thiab qhia [Vaj Ntxwv Lamaunais] saib los ntawm lub hwj chim dab tsi” nws thiaj ua tau nws txoj hauj lwm. Ces yog Amoos ua li ntawd, tus vaj ntxwv cog lus tias “[Amoos] xav tau dab tsi los [tus vaj ntxwv] yuav muab rau [nws].” Amoos tsuas thov kom tus vaj ntxwv mloog zaj lus txog Yexus Khetos txoj moo zoo. Amoos txoj kev pab twb coj “txhiab txhiab leej los rau txoj kev hloov siab lees txim.”
Niaj hnub no, txoj kev pab lwm tus tseem coj lwm tus los ntseeg txoj moo zoo. Muam Bevan yog ib tug ntxhais txib thaum nws raug mob ua rau nws yuav tsum rov qab mus tsev los txais kev kho mob. Tiam sis tsis tau tso nws tawm ua ib tug ntxhais txib, nws ua tau ib tug ntxhais txib uas ua hauj lwm pab lwm tus nyob hauv tsev.
Thaum nws mus tom ib tshav ua si, Muam Bevan thiab ib tug phooj ywg txais kev tshoov siab sib tham nrog ib tug niam tsev uas muaj plaub tug me nyuam yaus, tiam sis nkawd ntshai me ntsis ces tsev neeg ntawd twb tsav tsheb mus. Hnub tom qab ntawd, nkawd tuaj rau tshav ua si, thiab thov Vajtswv tias tsev neeg ntawd nyob ntawd. Yog ib qho txuj ci uas tus niam tsev zaum ntawm tib qho chaw uas nws nyob hnub ua ntej. Lub sij hawm no Muam Bevan thiab nws tus phooj ywg mus nrog tus niam tsev tham, los paub nws, thiab kawm tias nws xav xav tau kev pab ntawm sab cev nqaij daim tawv. Nkawd tau pab nws ces caw nws kawm txog txoj moo zoo.
Vim nkawd pab nws thiab caw nws, tus niam tsev thiab nws tus me nyuam hlob tau ua kev cai raus dej, es ib xyoo tom qab ntawd tus me nyuam thib ob tau ua kev cai raus dej thiab. Niaj hnub no lawv tseem yog cov mej zeej uas muab siab rau ntseeg. Muam Bevan paub tias Vajtswv yog tus uas tshoov nws lub siab thiab ua rau “nws paub tias nws yeej nyob ntawm qhov chaw uas Vajtswv xav kom nws nyob.”
Ib yam li Amoos thiab Muam Bevan, thaum peb pab lwm tus, peb “ua tau yam ntxwv zoo rau lawv pom” thiab lawv xav paub seb “vim li cas [peb] muaj chaw cia siab.”
Yexus caw peb kom “cia li mus ua ib yam li ntawd.”
Qhov thib Ob, Txoj Kev Pab Lwm Tus Cia Peb Ua Kev Txhawb Pab Tsis Hais Peb lub Neej Zoo Li Cas Los
Thawj Tswj Hwm Russell M. Nelson tau hais kom “txhua tus tub hluas uas tsim nyog thiab muaj peev xwm kom lawv npaj thiab mus ua tub txib” thiab hais kom txhua tus ntxhais hluas “thov Vajtswv kom paub seb tus Tswv puas xav kom nej ua ntxhais txib.” Nws cog lus tias “nej txoj kev txiav txim ua ib tug tub txib ntxhais txib, tsis hais yog kev mus tshaj tawm los sis kev mus pab neeg, yuav foom koob hmoov rau nej thiab lwm tus coob heev.” Cov tub txib uas pab ua hauj lwm twb hloov lo lus muaj peev xwm. Tam sim no txhua tus tub hluas thiab ntxhais hluas uas xav ua ib tug tub txib rau tus Tswv los yeej muaj peev xwm ua, tshuav tsawg tsawg tus xwb.
Txwj Laug Holgado coj yam ntxwv txog ib tug neeg uas muaj peev xwm pab txawm yog nws raug tej xwm txheej. Nws muaj mob ntawm keeb kwm roj ntshav uas tsawg tus muaj uas ua rau nws tsis muaj peev xwm ua tub txib uas qhia lwm tus neeg. Twb hu Txwj Laug Holgado ua ib tug tub txib pab ua hauj lwm thiab nws ua hauj lwm hauv cov npisov lub tsev rau khoom, nyob ntawd nws tau pab neeg coob txais kev pab raws li lawv xav tau. Nws muab khoom tso rau tej txee, muab zaub ntim hnab, thiab tsuj cov phij xab ntawv.
Zoo li Txwj Laug Holgado hais nyob hauv kev sib ntsib txais lub cim nco txog tom qab nws txoj kev ua tub txib, nws qhia tias, “Vajtswv xav tau cov tub txib pab ua hauj lwm. Nws xav tau tib neeg kom sib hlub thiab pab lwm tus. Cov neeg no tso ntawv hoob nab rau ntawm tej txee, muab zaub ntim hnab, ua rooj tog, thiab ua zoo rau tib neeg.”
Koj tsis tas txais kev txib ua hauj lwm pab lwm tus los sis muaj ib daim npe kom ua tau zoo. Txhua lub sij hawm yus pab lwm tus los tus Cawm Seej pom zoo. Peb txhua tus txawj pab lwm tus los cuag Yexus Khetos thaum peb ua siab zoo ua hauj lwm rau lawv. Peb txhua tus muaj peev xwm ris Yexus Khetos lub npe txhawb pab lwm tus dhau los ntawm tus Vaj Ntsuj Plig Dawb Huv lub hwj chim thiab coj yam ntxwv txog kev ntseeg Yexus Khetos. Kev pab lwm tus ua rau peb muab peb lub cev fij rau Vajtswv kom dawb huv thiab haum Vajtswv siab.
Yexus caw peb kom “cia li mus ua ib yam li ntawd.”
Qhov thib Peb, Txoj Kev Pab Lwm Tus Ua rau Peb Txais Tau Yexus Khetos lub Hwj Chim hauv lub Neej No
Ib tug tub txib hluas uas pib qhia neeg twb hloov los ua tub txib uas pab ua hauj lwm es nws muaj teeb meem uas ua rau nws xav txais tau Yexus Khetos lub hwj chim kho mob. Kev muab nws lub cev fij rau kev pab lwm tus ua rau nws lub neej txais tau lub hwj chim ntawd. Nws hais tias, “Kuv xav tias thaum nyuaj rau kuv, kuv hnov tau Yexus Khetos txhawb nqa kuv. Yeej muaj ib yam tshwj xeeb thaum yus pom Nws foom koob hmoov rau tib neeg nyob hauv ib chav rau khoom noj, nyob hauv lub tuam tsev, thiab los ntawm Nws txoj moo zoo.”
Tus txwj laug no pib muaj kev xyiv fab ntxiv, thiab nws txoj kev zoo siab tshiab no twb foom koob hmoov rau nws thiab nws tsev neeg tag nrho. Lawv lub tsev muaj tus Ntsuj Plig ntau nplua mias, lawv mus rau lub tuam tsev ua ke ntxiv, thiab Yexus Khetos yog tus uas nws tsev neeg tsom ntsoov rau. Tus tub txib no ntseeg tias Yexus Khetos tau cawm nws txoj sia thiab foom koob hmoov rau nws tsev neeg los ntawm lub cib fim pab lwm tus.
Thawj Tswj Hwm Nelson tau qhia tias, “Kev txaus siab pab thiab txhawb nqa lwm tus yeej yog ib lub cim uas qhia tias yus npaj siab txais kev kho mob” dhau los ntawm tus Cawm Seej lub hwj chim uas txhiv neeg dim.
Yexus caw peb kom “cia li mus ua ib yam li ntawd.”
Cov Tub Txib uas Pab Ua Hauj Lwm Yog Yexus Khetos cov Thwj Tim uas Fij Lawv tus Kheej rau Nws
Thaum nej los yog ib tug hauv nej tsev neeg txais kev hu ua ib tug tub txib uas pab ua hauj lwm, nov yog ib lub sij hawm kom ua koob tsheej. Nej tsev neeg yuav muaj tus Tswv Yexus Khetos ib tug sawv cev nyob hauv nej lub tsev. Nov yog hloov nej txhua tus kom ua tau zoo. Yeej tsis tsim nyog muaj kev poob siab yog yus txais kev hu ua hauj lwm. Peb hu nkauj, “kuv yuav mus rau qhov chaw uas koj txib kuv mus” thiab “kuv yeej yuav mloog rau koj txoj lus.” Nov yog ib lub cib fim zoo kom qhia tias peb xav li ntawd tiag!
Rau nej cov uas ua hauj lwm rau tus Tswv, thiab qhov tseem ceeb rau nej 4,000 tus tub txib uas pab ua hauj lwm, peb hlub nej! Yog cov tub txib uas qhia lwm tus neeg yog tus Tswv lub qhov ncauj, ces nej, cov tub txib uas pab ua hauj lwm, yog tus Tswv txhais tes, thiab nej tsis yog cov tub txib theem thib ob. Nej txhua tus tseem ceeb rau txoj kev muab Ixayees sau los ua ke. Thawj Tswj Hwm Nelson qhia hais tias “txhua lub sij hawm peb ua ib yam dab tsi pab lwm tus kom ua raws li lawv tej kev khi lus rau Vajtswv … peb pab muab Ixayees sau los ua ke.”
Nej cov tub txib uas pab ua hauj lwm ua ntau yam kom muab Ixayees sau los ua ke, thiab nej txoj kev pab hloov tib neeg lub neej. Feem ntau nej tsis paub leej twg yog tus uas txais nej txoj kev pab, tiam sis Vajtswv paub. Cia li nco ntsoov tias “Thaum uas nej tau pab ib tug, … txawm yog tus ntawd muaj hwj chim yau dua cov los nej tseem pab nws thiab, qhov uas nej pab tus ntawd, twb yog nej pab [Vajtswv].” Peb hnov nej lub suab thaum nej ua siab dawb ua hauj lwm hauv lub Koom Txoos tej qhov chaw hu tuaj; peb pom nej luag nyav hauv nej zej zog tej lub koom haum; thiab peb pom nej txoj kev kaj thaum nej ua hauj lwm hauv lub tuam tsev. Nej muab mov rau cov tshaib plab noj, muab khaub ncaws rau cov liab qab hnav, thiab muab dej rau tus uas nqhis haus.
Peb txhua tus yuav tsum mus ua ib yam li ntawd.
Kev Pab Lwm Tus Yeej Yog Qhov uas Yexus Khetos cov Thwj Tim Nyiam Ua Tshaj
Kev pab lwm tus muaj hwj chim qhib neeg lub siab kom txais tau txoj moo zoo thiab cia peb txhua tus muab peb lub siab lub ntsws rau Yexus Khetos. Ua rau peb hloov siab los ua neeg zoo li Nws ntxiv, thiab thaum peb ua li ntawd, peb txhawb nqa lwm tus. Muaj ib zaug uas Thawj Tswj Hwm Nelson nug hais tias, “Nyob hauv lub ntiaj teb uas tib neeg lub siab lwj, neeg puas muaj peev xwm pab?” Nws teb hais tias, “Yeej muaj peev xwm pab! … ‘Tus Tswv cov neeg khi lus, … [uas muaj] Vajtswv lub hwj chim uas muaj yeeb koob heev los ua ntaj riam thaiv lawv’ … yeej muaj peev xwm txhawb nqa txhua tus neeg lub neej.” Dhau los ntawm kev pab lwm tus peb hloov lawv lub siab—thiab hloov lub ntiaj teb.
Yexus Khetos “mus thoob plaws qhov txhia qhov chaw ua tej hauj lwm zoo.” Nws kho neeg mob, ua rau cov dig muag pom kev, thiab mus xyuas cov neeg txom nyem. Nws tau ua mov, pab thaum muaj rooj tshoob, thiab pab ntau txhiab tus neeg uas tshaib plab. Thaum peb ris Yexus Khetos lub npe ua hauj lwm rau ib tug neeg, peb los ua neeg dawb huv zuj zus thiab tsim nyog txais lub txiaj ntsim uas yog txoj sia nyob mus ib txhis li. Yexus Khetos muaj txoj sia nyob. Nws yog kuv tus Cawm Seej thiab nej li. Nws yog peb tus Txhiv Dim. Nws coj yam ntxwv zoo rau peb txog kev txhawb pab. Kuv caw peb txhua tus kom cia li mus ua ib yam li ntawd thiab. Los ntawm Yexus Khetos lub npe, amees.