Neeg Txo Hwj Chim Txhos Caug rau ntawm cov Thaj
Thaum peb ua raws li peb tej kev khi lus, peb muab peb tus kheej khi rau tus Cawm Seej, txais tau Nws txoj kev hlub tshua, kev pov hwm, kev hloov ua neeg dawb huv, kev kho mob, thiab kev so.
Pawg hu nkauj, ua nej tsaug, vim nej ua tim khawv los ntawm zaj nkauj qhuas Vajtswv tshiab ntawd.
Zaj nkauj tshiab uas peb hu nkauj thaum txais lub cim nco txog hu ua “Cov Mov thiab Dej Cawm Txoj Sia” ua rau kuv lub siab puv npo. Muaj ib kab lus hauv zaj nkauj no uas hais tias, “Nim no kuv txhos caug ntawm lub thaj, muab kuv lub siab mob rau nws.”
Kuv haj yam to taub tej lus no tsis ntev tom qab wb tsev neeg tsiv ntawm Newbury Park, California, mus ua hauj lwm hauv Qhov Chaw Tshaj Tawm Txoj Moo Zoo Utah Ogden nyob rau xyoo 2015. Kuv tau txais kev caw mus saib Hill Air Force Base nyob ze Layton, Utah. Kuv yeej ib txwm tsis tau nyob hauv qhov chaw rau cov tub rog, thiab tsis tau ntsib tus xib hwb rau cov tub rog los sis cov txiv neej thiab poj niam uas ua hauj lwm saib xyuas thiab pov hwm lawv lub teb chaws.
Tus Xib Hwb Chaplain Harp, ib yam li txhiab txhiab tus xib hwb rau cov tub rog uas ua hauj lwm pub dawb nyob hauv tej tsev kaw, tej tsev kho mob, thiab tej qhov chaw rau cov tub rog nyob thoob plaws lub ntiaj teb, yeej tshoov kuv lub siab thiab txhawb nqa kuv. Qhov chaw kawg uas peb nres hauv cov tub rog qhov chaw no yog lub tsev teev ntuj. Kuv nug tus xib hwb seb nws puas tswj hwm tej kev teev ntuj rau tag nrho cov neeg uas xav thov, xav ntsoov, thiab pe hawm Vajtswv. Nws mus rau ntawm phab ntsa tom hauv ntej ntawm chav teev ntuj thiab rho ib tug ntoo khaub lig tawm ntawm daim ntaub npog. Nws hais tias nws tau siv tus ntoo khaub lig thaum ua kev teev ntuj Protestant thiab Catholic. Kuv nug nws seb nws siv dab tsi thaum ua rau peb cov kwv tij thiab cov muam uas yog Kev Ntseeg Yudais, thiab nws mus rau sab tod ntawm phab ntsa thiab rho ib lub Hnub Qub Daviv tawm.
Ces kuv nug hais tias, “Koj siv dab tsi thaum ua kev teev ntuj rau Haiv Neeg Ntseeg hauv Hnub Nyoog Kawg?” Nws tau muab tej lub cim ntawd cia thiab taw tes rau lub thaj ntoo nyob nruab plawv chav teev ntuj ntawd. Nws hais tias cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg npaj thiab foom koob hmoov rau cov mov mog thiab cov dej saum lub thaj. Kuv nug seb yog tias nws muab lub thaj loj tshem mus ua ntej ua kev teev ntuj rau peb cov kwv tij thiab cov muam Yudais, Muslim, Catholic, los sis Protestant. Nws tau hais tias lub thaj yeej nyob ntawd, vim ob peb txoj kev ntseeg kuj siv lub thaj thiab.
Anplaham tau ua ib lub thaj, muab Ixaj khi, thiab npaj kom muab nws tib leeg tub txi, tiam sis thaum kawg nws tsis tas ua li ntawd, thiab nws tshaj tawm hais tias, ib yam li tus Tswv tau tshaj tawm, “Kuv nyob ntawm no”! Muaj pes tsawg zaus uas tus Kuv Yeej Yog los sis nws ib tug yaj saub hais tias, “Kuv nyob ntawm no”?
Nyob hauv Nws Zaj Lus Qhia Pem Roob, tus Cawm Seej caw peb rov qab nrog peb cov kwv tij thiab cov muam sib raug zoo ua ntej peb mus rau ntawm lub thaj. Povlauj qhia hais tias peb “hloov ua neeg dawb huv” rau ntawm lub thaj dhau los ntawm Yexus Khetos txoj Kev Theej Txhoj.
Tus yaj saub Lihais “tau tso nws lub vaj lub tsev tseg … thiab nws tej khoom muaj nuj nqis. … [Ces] nws tsa ib lub thaj … thiab nws ua kev tiam pub rau tus Tswv, thiab ua tus Tswv … tsaug.”
Phau Vaj Lug Kub Npaivnpaum thiab Phau Ntawv Maumoos qhia kom peb teev tiam Vajtswv Leej Tub nyob rau ntawm tej lub thaj. Vim li cas?
Peb thawj niam thiab txiv, Adas thiab Evas, tau ua thiab pe hawm Vajtswv rau ntawm tej lub thaj. Tom qab nkawd raug ntiab tawm ntawm lub Vaj Edees thiab tau pe hawm Vajtswv “ntau hnub,” ib tug tim tswv tau tuaj thiab nug ib lo lus tseem ceeb uas yuav tsum nug rau peb txhua tus: “Vim li cas [nej] thiaj li ua kev txi rau tus Tswv?”
Adas teb hais tias, “Kuv tsis paub.”
Tus Tswv tej lus teb rau Adas txoj kev txo hwj chim qhia tseeb yeej ua rau peb xav tsis thoob: “Qhov no yog ib tug yam ntxwv txog kev txi ntawm Leej Txiv Tib Leeg Tub. … Yog li ntawd, koj yuav tsum ua tag nrho tej yam uas koj ua los ntawm Leej Tub lub npe, thiab koj yuav tsum hloov siab lees txim thiab hu Vajtswv los ntawm Leej Tub lub npe tas mus li.”
Lub rooj ua lub cim nco txog thiab tej lub thaj hauv lub tuam tsev yog ib lub cim txog Yexus Khetos txoj kev txi thiab Nws txoj Kev Theej Txhoj uas nyob mus ib txhis li.
Thaum peb ua raws li peb tej kev khi lus, txais cov kab ke ntawm lub cim nco txog hauv lub tsev koom txoos thiab txais lub vaj txiaj ntsim thiab kev cai sib khi hauv lub tuam tsev, peb muab peb tus kheej khi rau tus Cawm Seej, txais tau Nws txoj kev hlub tshua, kev pov hwm, kev hloov ua neeg dawb huv, kev kho mob, thiab kev so.
Kev Hlub Tshua thiab Kev Pov Hwm Dhau Los ntawm tej Kev Khi Lus
Thaum kuv muaj 15 xyoos, kuv nug kuv txiv seb nws puas kam kuv tsis mus rau kev sib ntsib txais lub cim nco txog—rau ib Hnub Caiv thaum lub Ib Hlis Ntuj kom saib ib txoj kev sib tw Amelikas football uas tshwj xeeb. Nws hais rau kuv tias kuv laus txaus txiav txim siab rau kuv tus kheej thiab thov kom kuv yuav xav txog ib yam uas nws yuav qhia rau kuv. Nws hais tias, “Yog koj xaiv kom tsis mus txais lub cim nco txog ib zaug xwb, ces haj yam yooj yim rau koj xaiv rov qab ua li ntawd dua.”
Yog tus Cawm Seej yog tus uas muab peb koom ua ke, ces tus yeeb ncuab yeej yog tus uas muab peb sib faib. Dab Ntxwg Nyoog xav kom muab peb nrug mus deb ntawm peb tej qhov chaw pe hawm Vajtswv uas tau muab fij tseg thiab deb ntawm Yexus Khetos txoj kev pov hwm. Thaum peb pe hawm tus Cawm Seej, peb txais “hwj chim taug txoj kev txawv ntawm txoj kev uas txhua tus nyiam mus.” Thaum peb siv sij hawm nrog Nws koom ua ke, tus Tswv cog lus tias peb yuav “dim Dab Ntxwg Nyoog.” “Ces thaum peb ua raws li peb tej kev khi lus, Nws pub txiaj ntsim rau peb los ntawm Nws lub hwj chim uas txhawb peb dag zog.” Kuv yeej zoo siab thaum kuv nrog tus Cawm Seej koom siab dhau los ntawm kuv tej kev khi lus nyob rau ntawm tej thaj dawb huv.
Kev to taub tus Cawm Seej txoj Kev Theej Txhoj uas nyob mus ib txhis li ib nqe lus ntxiv rau ib nqe lus, ib ntsiab cai ntxiv rau ib ntsiab cai ua rau peb sab ntsuj plig tiv taus tus yeeb ncuab tej kev ntxias. Txwj Laug Jaggi nyob hauv Mev Teb, Zuster Jaggi nyob hauv Belgium, thiab lwm tus tub txib nyob thoob plaws lub ntiaj teb yeej yuav pom lawv cov phooj ywg txais cov koob hmoov ntawm txoj kev cai raus dej thiab kev txais lub txiaj ntsim Vaj Ntsuj Plig Dawb Huv yog tias lawv cov phooj ywg yuav tuaj rau kev sib ntsib txais lub cim nco txog thawj lub lim tiam uas lawv sib ntsib.
Ib tug tub hluas los ntxhais hluas nyob hauv Tonga los sis Samoa yeej yuav ua kev cai sib khi hauv tus Tswv lub tsev yog tias lawv npaj thiab txais lawv vaj txiaj ntsim tsis ntev tom qab lawv kawm ntawv tiav. Nyob hauv lub vaj txiaj ntsim, tus mej zeej txais kev caw kom ua neej raws li tsib txoj kev cai uab muab hwj chim thiab kev pov hwm rau lawv lub neej. Thaum peb nrog tus Tswv khi lus, ces peb pib nrog Nws sib raug zoo. Peb qhia Nws tias peb muab siab npuab Nws thiab hlub Nws. Peb lub dag zog thiab lub hwj chim loj tuaj txhua zaus peb cog lus thiab ua raws li tej lus cog tseg ntawd.
Kev Xav thiab Kev Hloov Ua Dawb Huv
Thaum peb txo hwj chim thiab txhos caug rau ntawm tus Tswv tej lub thaj, yeej yog ib lub cib fim rau peb xav ntsoov, “xav txog [peb] lub siab muab hlob, … txo [peb] lub hwj chim rau Vajtswv.” Thaum kuv tseem hluas ua ntej kuv nrog kuv cov phooj ywg mus, kuv niam pheej yuav hais rau kuv tias, “Nco ntsoov koj yog leej twg, thiab qhia kuv thaum koj los tsev lawm.” Muaj tej hmo kuv tuaj lig dhau kuv thiaj li tsis qhia nws. Kuv khuv xim vim kuv tsis nrog kuv Niam tham txog tej yam tseem ceeb ntawd.
Hnub no kuv zoo siab nrog kuv Leej Txiv Saum Ntuj Ceeb Tsheej tham. Thaum kuv ua kuv tus txheej txheem pe hawm Vajtswv txhua hnub, kuv txhos caug thov Vajtswv, rau ntawm kuv lub txaj los sis nrog kuv tsev neeg, kuv xav tias kuv txhos caug rau ntawm ib lub thaj, xav txog thiab ntsuam xyuas kuv lub neej. Kuv xav txog lub cim nco txog, thiab tej daim mov mog, uas muab ntais thiab tu rau peb txhua tus, txhua daim yog ib lub cim txog tus Cawm Seej lub cev. Ua rau kuv xav txog Thawj Tswj Hwm Dallin H. Oaks tej lus qhia tias “txhua daim yeej tsis zoo ib yam, ib yam li tib neeg uas txais yeej tsis zoo ib yam.” Thaum kuv txhos caug thov Vajtswv, kuv xav seb kuv yuav ua li cas kom kuv yuav ua li Vajtswv lub siab nyiam.
Txwj Laug David A. Bednar qhia hais tias “txoj kab ke txais lub cim nco txog yog kev dawb huv uas caw peb hloov siab lees txim tiag tiag thiab rov qab ua neeg tshiab ntawm sab ntsuj plig. Qhov uas peb txais lub cim nco txog, tsis ua rau peb txais kev zam txim rau peb tej kev txhaum. Tiam sis thaum peb ua tib zoo koom siab ua txoj kab ke dawb huv no nrog rau ib lub siab mob thiab lub siab xav ua zoo, ces peb txais lo lus cog tseg hais tias peb yuav muaj nws tus Ntsuj Plig niaj hnub nrog peb nyob. Thiab dhau los ntawm tus Vaj Ntsuj Plig Dawb Huv lub hwj chim uas ua kom peb dawb huv uas niaj hnub nrog peb nyob, ces peb niaj hnub txais tau kev zam txim rau peb tej kev txhaum.”
Thaum Amy thiab kuv xav txog wb lub neej, wb ua koob tsheej txog lub txiaj ntsim uas yog Yexus Khetos txoj kev hlub thiab txoj kev txi zoo tag nrho. Wb kuj pom tias ntuj txiag teb tsaus txoj kev chim siab qhib lawm. Peb ho yuav kov yeej tau luag txoj kev txiav txim, kev nyuaj siab txhawj xeeb, mob kheesxaws los ntshav qab zib, raug kev tsim txom online, kev nyiag yus ntiag tug, kev nchuav me nyuam, thiab kev xiam ib tug me nyuam, tus kwv tij, thiab ib leej txiv? Vim Yexus tau haus lub khob ntawm txoj kev chim siab—rau kuv, kuv tsev neeg, thiab rau peb txhua tus!
Gethsemane, los ntawm Adam Abram, tso cai los ntawm altusfineart.com © 2025
“Lub khob dej iab” uas nws haus nyob hauv lub Vaj Khexemanes thiab Nws txoj kev raug txom nyem “loj zuj zus” saum tus ntoo khaub lig nyob ntawm Khaulakhauthas ua rau peb tso tej kev chim siab, kev npau taws, thiab kev saib tsis taus rau ntawm tus Tswv tej lub thaj thiab “tus Vaj Ntsuj Plig Dawb Huv yuav muab nej hloov ua neeg dawb huv,” tas mus li.
Muam Patricia Holland hais tias, “Hnub no kuv thov kom nej thiab kuv tus kheej kom peb yuav muab peb tus kheej tag nrho tso rau ntawm lub thaj ntawm Vajtswv tej lus cog tseg thiab kev kaj siab lug txawm yog peb nyob qhov twg los xij thiab peb tau ua dab tsi los xij.”
Ib Qhov Chaw rau Kev Kho Mob thiab Kev So
Thaum peb los rau ntawm lub thaj, peb tsis txais ib lub nqi zog; peb kawm txog tus uas Muab Txiaj Ntsim rau peb. Thaum peb kawm thiab khi lus peb thiaj li txais kev kho mob. Nifais hais tias, “Nws tau pub nws txoj kev hlub rau kuv puv npo, twb ua rau kuv lub cev kub lug.” Thiab peb tus Cawm Seej uas hlub peb caw peb hais tias, “Nim no nej puas tseem tsis kam tig rov los cuag kuv, thiab hloov siab lees txim rau nej tej kev txhaum, thiab hloov siab los ntseeg, xwv kom kuv yuav kho tau nej?”
Thaum kuv ob tug ntxhais hlob, Mackenzie thiab Emma, tseem me me, zaj dab neeg uas nkawd nyiam tshaj yog The Chronicles of Narnia: The Lion, the Witch and the Wardrobe. Peb txhua tus nyiam tus tsov ntxhuav, Aslan. Ib hmo uas peb nco ntsoov thaum peb nyeem phau ntawv no yog thaum tus tsov ntxhuav txo nws txoj sia kom cawm Edmund. Peb nco zaum no vim tus txiv tsev no, tus niam tsev, thiab ob tug ntxhais twb los kua muag thaum tus Poj Dab muab tus tsov ntxhuav tua saum lub Rooj Pob Zeb. Peb nco qab vim tias peb muaj kev cia siab, txawm yog nws raug txom nyem, mus txog thaum qhov txuj ci tseem ceeb tshwm sim. Peb qw zoo siab nyob hauv chav pw me me ntawd thaum Aslan sawv rov los thiab hais tias, “Yog t[us Poj Dab paub tias kev txi muaj lub ntsiab dab tsi tiag tiag], … nws yuav [paub] tias [yog] ib tug uas tsis tau ua txhaum yuav txaus siab sawv ib tug neeg ntxeev siab cev, ces lub Rooj [Pob Zeb] yuav tawg pleb, thiab kev tuag yuav ploj mus.”
Yexus Khetos kho txhua tus mob. Yexus Khetos ua rau peb yuav rov qab muaj txoj sia.
Nyob hauv lub rooj sab laj thaum lub Kaum Hli Ntuj 2022 Thawj Tswj Hwm Russell M. Nelson tau hais lus piav txog ib pawg uas los saib kev qhib lub tuam tsev. Ib tug me nyuam tub nyob ntawd. Thawj Tswj Hwm Nelson qhia tias:
“Thaum pawg neeg ntawd nkag hauv chav txais vaj txiaj ntsim, tus tub hluas taw tes rau lub thaj, yog qhov chaw uas tib neeg txhos caug khi lus nrog Vajtswv, thiab hais tias, ‘Auj, zoo heev. Nov yog ib qho chaw rau tib neeg tau so thaum lawv taug kev hauv lub tuam tsev.’
“… Nyaj nws tsis paub hlo li hais tias qhov uas yus nrog Vajtswv khi lus txuas rau qhov uas tus Cawm Seej cov lus cog tseg li no:
“‘Nej cov uas sab sab vim ris nra hnyav, nej cia li los cuag kuv, kuv yuav cia nej so.
“‘Nej cia li los kwv kuv tus quab thiab kawm tej uas kuv qhia, nej thiaj yuav tau so.”
“‘Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav’ [Mathais 11:28–30; ntxiv qhov uas ntawv qaij].”
“Neeg Leej Tub tsis muaj chaw pw,” tiam sis Nws tau caw Nws cov thwj tim, uas yog nej thiab kuv, los rau lub rooj rau lub cim nco txog kom nrog Nws so nyob ntawd. Thaum “neeg txo hwj chim txhos caug” rau ntawm lub thaj ces yeej muaj kev kaj siab lug. Peb tus Cawm Seej yeej xyab nws ob txhais tes; twb npaj Nws lub rooj lawm. Cia li los pe hawm Vajtswv Leej Tub nyob ntawm Nws tej lub thaj dawb huv. Los ntawm Yexus Khetos lub npe, amees.