Yexus Khetos txoj Kev Hlub uas Theej Peb lub Txhoj

Yog tias nej tau ua txhaum loj heev thiab tab tom hloov siab lees txim los sis xav hloov siab lees txim thiaj li muaj kev xyiv fab uas los ntawm kev zam txim, thov nej paub tias nej txais tau qhov txuj ci tseem ceeb no. Tus Cawm Seej ib sij hu nej, “Los cuag kuv.”

Yog nej txhawb nqa nej txoj kev ntseeg peb tus Cawm Seej, Yexus Khetos, ces nej yuav haj yam xav paub Nws, ntseeg Nws, thiab ywj nej lub siab rau Nws. Enos tau nug txog kev zam nws lub txim hais tias, “Tus Tswv, ua li cas thiaj ua tau li ntawd?” Tus Tswv teb hais tias, “Vim yog koj txoj kev ntseeg Khetos, tus uas yav tas los koj ib txwm tsis tau hnov los sis pom dua li.”

Thiab Maulaunais hais tias, “Yog nej yuav xyeej txhua yam uas tsis los ntawm Vajtswv tawm ntawm nej tus kheej mus, thiab hlub Vajtswv kawg nej lub siab thiab lub dag lub zog, ces nws txoj kev tshav ntuj yeej txaus rau nej.”

Kev tso kev txhaum tseg, kev tig mus rau Vajtswv, thiab kev siv zog ua kom nej txoj kev ntseeg Yexus Khetos muaj zog zuj zus yeej yog ib txoj kev zoo kom pib ua li no. Yog nej txo nej lub hwj chim rau Vajtswv los yuav tsum lees nej tej kev txhaum loj heev rau nej tus npisov los sis ceg ntseeg tus thawj tswj hwm, tiam sis kev zam txim tag nrho yuav los ntawm nej tus Cawm Seej. Kev zam txim yog ib lub txiaj ntsim uas Vajtswv muab dhau los ntawm Yexus Khetos txoj kev tshav ntuj.

Tus uas xav rov qab mus cuag Vajtswv tiag tiag mas tus ntawd yuav rau siab xav ua siab ncaj rau nws Leej Txiv Saum Ntuj Ceeb Tsheej, nws tus kheej, cov uas raug mob vim nws ua txhaum, thiab nws tus thawj coj pov thawj hwj. Nej Leej Txiv Saum Ntuj Ceeb Tsheej zoo siab thaum nej rau siab los cuag Nws nrog ib lub siab mob thiab lub siab xav ua zoo. Qhov uas nej muaj ib lub siab xav ua zoo yog kev txo hwj chim muab nej tus kheej tso rau Vajtswv txhais tes; kev muaj ib lub siab mob yog qhov uas tus Thwj Tim Povlauj hais tias yog “qhov uas Vajtswv cia nej tu siab,” uas yog ib txoj kev muaj siab xav rov qab mus cuag Nws txawm yog nej yuav tsum ua dab tsi los yog.

Nej txoj kev xav tau no yuav ua rau nej xav kho tej yam uas nej ua xiam. Tiam sis muaj tej yam uas nej tsis muaj hwj chim kho, thiab nej mob siab thov Vajtswv, ntau zaus mus ib xyoo dhau ib xyoo, hais tias tus Tswv, dhau los ntawm Nws txoj kev tshav ntuj, yuav pab kho cov neeg uas raug mob vim nej tau ua txhaum.

Tej yam uas lwm tus raug vim nej ua txhaum loj heev los yeej nyuaj rau nej kov yeej. Nej puas ua raws li Mauxiyas cov tub tus yam ntxwv, vim lawv “rau siab ntso kho tag nrho tej uas lawv tau ua piam”? Cia li nrog cov neeg uas nej saib taus tham seb nej tsis pom dab tsi.

Thaum kuv npaj zaj lus no, kuv tau txais email los ntawm ib tug neeg uas tab tom hloov siab lees txim thiab xav rov qab los rau lub Koom Txoos. Nws tus poj niam uas nws nrauj lawm tseem nyuaj siab heev vim twb ua xiam “[nkawd] txoj kev sib yuav mus ib txhis li, [nyuaj tu cov me nyuam], tsis muaj nyiaj txiag ntau, … tsis [tshua] muaj txaus them tej nqi, [thiab] tej kev xav hauv nws lub siab tias nws tus qub txiv ntxeev siab rau nws.”

Nws qhia kuv tias nws tus thawj coj pov thawj hwj “txais kev tshoov siab [hais kom] nws thov Vajtswv thiab xav tias [nws ua tau li cas kom pab nws tus qub poj niam thiab cov me nyuam].” Nws tso cai rau kuv qhia ib feem ntawm nws tsab email no:

“[Thaum xub thawj] kuv xav tias [cov nyiaj] uas kuv them thaum sib nrauj yeej ntau heev, tiam sis kuv ceg ntseeg tus thawj tswj hwm hais kom kuv yoo mov thiab thov Vajtswv. …

“Thaum pib ua li no, nyuaj rau kuv xav txog qhov uas kuv yuav them nyiaj ntxiv. Vim kuv tej kev txhaum tsis yog nyob ntawm nyiaj txiag, kuv xav paub seb ‘ua siab dawb kho kev txhaum’ txhais li cas … [tiam sis] tsis ntev ces kuv kawm tias tsis yog hais txog nyiaj txiag xwb.

“Kuv cov thawj coj pov thawj hwj ntsib [tus poj niam uas kuv nrauj lawm] thiab kuv cov me nyuam thiab kawm tias lawv tseem nyuaj siab thiab tsis tau txais kev nplij siab lawm. …

“Kuv lub hom phiaj yog kom muaj kev ntseeg mus tom ntej. … Kuv tsuas hais tias kuv xav pab lawv es tsis tas txais dab tsi. … Kuv txiav txim siab [xa nyiaj rau tus poj niam uas kuv nrauj] txhua lub sij hawm txhua zaus kuv tau nyiaj ua hauj lwm, uas yog ib feem loj ntawm kuv cov nyiaj uas them rau kuv. Ua ntej kuv yuav them zaum thib ib, tus Tswv [tshoov kuv lub siab kom kuv yuav tsum] them [ob npaug qhov kuv xav].

“Kuv tau kawm tias kev kho kom zoo li qub tsis yog hais txog nyiaj xwb. Yeej yog kev txo hwj chim muab kuv lub neej fij rau tus Tswv. … Cov nyiaj yuav pab pauv tej yam uas kuv tshem ntawm kuv tsev neeg vim kuv xaiv ua tej yam tsis zoo. Qhov no yuav pab kuv ua raws li kuv tau cog lus tsis tas txais dab tsi rov qab los thiab pab nws tsis txhawj txog kev them nqi nws thiaj li yuav hnov tau tus Ntsuj Plig.”

Nej tej kev xav kom kho tej yam uas nej tau ua kom puas tsuaj lawm los tej zaum tsis nyob ntawm nyiaj txiag, tiam sis thaum nej txo hwj chim thov tus Tswv, tej zaum nej yuav kawm tias muaj dab tsi ntxiv uas nej ua tau.

Thaum nej thov tus Tswv zam nej lub txim, ua siab ntev thaum nej tos txais Nws txoj kev pom zoo rau nej. Cia li xav txog nqe vaj lug kub no:

“Lawv tau txo lawv lub hwj chim twb txo hwj chim kom kawg siab kawg ntsws; thiab … thov kawg siab kawg ntsws rau Vajtswv; muaj tseeb tiag, lawv twb thov tas hnub. … [Tiam sis] tus Tswv qeeb hnov lawv tej lus thov vim yog lawv tej kev ua phem.”

“Txawm li ntawd los tus Tswv yeej hnov lawv tej lus thov, thiab … pib … kom lawv tej nra sib me ntsis; … thiab … lawv maj mam pib vam meej.”

Ua siab ntev thaum tus Tswv foom koob hmoov rau nej thiab maj mam pom zoo rau nej.

Raws li tus Tswv lub sij hawm, nej yuav hnov Nws lub suab qhia nej hais tias, “Tsis txhob cia tej yam no xeeb txob koj ntxiv lawm.” Muaj ib hnub, thaum nej tseem tig mus rau tus Cawm Seej, nej Leej Txiv Saum Ntuj Ceeb Tsheej yuav “tshem [nej] lub txim tawm hauv [nej] lub siab mus, los ntawm tej yam zoo uas nws Leej Tub ua.”

Rau nej cov uas raug mob vim lwm tus tau ua txhaum loj heev rau nej, kuv xav xav kom nej txais tus Cawm Seej txoj kev hlub thiab kev khuv leej, Nws txoj kev nplij siab thiab kev kaj siab lug.

Kev tu siab, kev nyuaj siab, kev poob siab, thiab kev xav tias lwm tus tau ntxeev siab rau nej, qhov uas nej lub neej tsis zoo li nej tau xav—kuv qhia nej paub tseeb tias, tus Cawm Seej paub nej thiab hlub nej. Cia li thov Nws. Nws yuav nplij nej lub siab thiab muab dag zog rau nej; Nws yuav xa Nws cov tim tswv tuaj kom txhawb nqa nej. Thaum twg nej yuav tsis hnov mob, nej yuav tsis nyuaj siab, tej yam uas nej tsis xav nco yuav ploj mus? Kuv tsis paub. Tiam sis kuv paub li no; Nws muaj hwj chim muab kev zoo siab pauj kev quaj ntsuag.

Peb cov kwv tij thiab cov muam ntawm Grand Blanc, Michigan, nrog lawv txoj kev ntseeg Yexus Khetos uas tsis tu tsis tseg, uas ua siab loj thiab muaj siab dawb siab zoo, twb tau txais thiab tseem yuav txais tus Cawm Seej txoj kev hlub thiab kev tshav ntuj uas tsis paub kawg ntau nplua mias.

Thaum nej tseem tso siab rau nws mus, ces cov huab tsaus ntuj thiab nej txoj kev quaj thaum tsaus ntuj yuav hloov los ua kua muag ntawm kev xyiv fab thiab kev kaj siab lug uas muaj thaum lub hnub tuaj. “Nej tej kev nyuaj siab ntawd yuav hloov ua kev zoo siab. … [Nej] txoj kev xyiv fab tsis muaj leej twg txeeb tau ntawm [nej] mus li.” Yeej yuav muaj ib lub sij hawm zoo li ntawd. Kuv ua tim khawv yuav muaj.

Peb yuav nrhiav tau Yexus Khetos txoj kev hlub uas theej peb lub txhoj thaum raug tej xwm txheej nyuaj tshaj plaws, tiam sis peb txhua tus yeej xav tau peb tus Cawm Seej txoj kev theej txhoj tsis tu tsis tseg. Thawj Tswj Hwm Dallin H. Oaks tau qhia tias: “Vim Nws theej peb lub txhoj nyob hauv lub neej no, peb tus Cawm Seej muaj peev xwm nplij, kho thiab txhawb nqa tag nrho cov txiv neej thiab cov poj niam nyob txhua qhov chaw, tiam sis kuv ntseeg tias Nws ua li ntawd rau cov uas nrhiav Nws thiab thov Nws pab lawv xwb. Tus Thwj Tim Yakaunpaus qhia hais tias, ‘Nej cia li txo nej lub hwj chim tab meeg Vajtswv, Vajtswv thiaj yuav tsa nej lub hwj chim’ (Yakaunpaus 4:10). Peb tsim nyog txais txoj koob hmoov ntawd thaum peb ntseeg Nws thiab thov Nws pab peb.”

Ib tug phooj ywg thiab tus Tuam Thawj Coj Xya Caum uas tos nrog kev hawm, Txwj Laug Robert E. Wells, uas muaj 97 xyoo lawm, tau tso rau kuv qhia nws zaj lus uas muaj 60 xyoo dhau los:

Nyob hauv Paraguay nyob rau xyoo 1960, tus uas yog ib tug tswv cia nyiaj thoob ntiaj teb no, Robert Wells, uas thaum ntawd muaj 32 xyoos, thiab nws tus poj niam, Meryl, nyias tsav nyias nyab hoom, es nkawd tsav nyab hoom los ntawm Uruguay mus tsev rau Paraguay. Muaj cov huab tuab heev, es Robert thiab Meryl tsis sib pom thiab ib leeg hu tsis tau ntawm xov tooj cua rau ib leeg. Robert tsaws nyab hoom, es nws kawm tias nws tus poj niam nyab hoom twb poob tawg lawm. Nws tus poj niam thiab ob tug phooj ywg uas nrog nws caij nyab hoom tau tuag lawm. Nws cov me nyuam, nyob hauv tsev hauv lub nroog Asunción, muaj xya xyoo, tsib xyoo, thiab ob xyoos.

Txwj Laug Wells hais txog nws txoj kev nyuaj siab:

“Tsis muaj lus txaus hais tias kuv nyuaj siab npaum li cas, ua rau kuv tu siab kawg thiab tsis txawj hnov dab tsi. Kuv los kua muag vim nyuaj siab kawg nkaus li tsis tu tsis tseg. Tsis tas li ntawd xwb, thaum kuv sim xav txog qhov uas kuv tus poj niam tau tso lub ntiaj teb no tseg, kuv xav tias kuv yog tus uas ua txhaum vim nws nyab hoom raug tsoo.”

Robert liam nws tus kheej vim nws tsis tau ntsuam xyuas lub nyab hoom txaus ua ntej thiab tsis qhia nws tus poj niam txog tej cuab yeej uas siv thaum tsav nyab hoom txaus. Nws xav tias nws twb tsis saib xyuas zoo.

Robert hais tias:

“Ua rau kuv lub siab tsaus ntuj. … Kuv tsuas nyob ntawd—[vim yuav tsum tu cov me nyuam xwb,] tsis muaj dab tsi ntxiv.”

“Ua rau kuv … tsis xav nyob ntxiv.”

Sij hawm dhau mus, ces Robert tau koob hmoov ntawm sab ntsuj plig uas tseem ceeb heev. Nws hais tias:

“Muaj ib hmo, kwv yees li ib xyoos tom qab ntawd, thaum kuv txhos caug thov Vajtswv, muaj ib qho txuj ci tseem ceeb. Thaum kuv thov kuv Leej Txiv Saum Ntuj Ceeb Tsheej, ua rau kuv xav tias zoo li tus Cawm Seej los rau kuv ib sab thiab kuv hnov ib lub suab nrov hais tej lus no rau kuv lub siab thiab rau kuv pob ntseg hnov: ‘Robert, kuv txoj kev theej txhoj twb them tus nqi rau koj tej kev txhaum thiab tej yam koj ua yuam kev. Koj tus poj niam zam txim rau koj. Koj cov phooj ywg zam txim rau koj. Kuv yuav ev koj lub nra. …’

“Txij thaum ntawd los, lub txim [thiab kev poob siab] los twb raug tshem mus. Twb cawm kuv dim lawm! Kuv to taub kiag txog lub hwj chim ntawm tus Cawm Seej txoj Kev Theej Txhoj thiab … to taub tias Nws tau ua rau kuv thiab. … Kuv … tau txais txoj kev kaj thiab kev xyiv fab ntau dua li kuv paub ua ntej. … Kuv tau txais ib lub txiaj ntsim uas kuv tsis tau ua dab tsi kom tau—tus Tswv lub txiaj ntsim kev tshav ntuj. … Kuv tsis tsim nyog txais—kuv tsis tau ua dab tsi kom txais tau, tiam sis txawm yog li ntawd Nws tau muab rau kuv.”

Cov kwv tij thiab cov mum, thov kom peb txhua tus yuav “hloov ua dawb huv los ntawm Khetos, los ntawm qhov uas Khetos cov ntshav nrog, … [thiaj li] yuav dawb huv, tsis muaj qhov phem.”

Kuv ua tim khawv txog kev hlub, kev hlub tshua, thiab kev tshav ntuj ntawm peb tus Cawm Seej thiab tus Txhiv Dim. Nws muaj txoj sia nyob. Peb yog Nws li; peb yog cov me nyuam khi lus. Thaum peb ntseg nws, coj raws li nws, thiab tso siab rau Nws, Nws yuav muab peb tsa tawm ntawm kev tu siab thiab peb tej kev txhaum. Ces, nyob hauv lub neej tom ntej, nyob hauv peb Txiv lub tsev, peb yuav nrog Nws nyob tas mus ib txhis li. Los ntawm Yexus Khetos lub npe, amees.