Ntsej Muag Luag Nyav thiab Muaj Kev Ris Txiaj
Ib Tsoom Haiv Neeg Ntseeg hauv Afikas haj yam ua zoo thaum lawv tiv tau lub neej no tej kev cov nyom thiab lub Koom Txoos loj hlob tuaj mus.
Ze li ib xyoos tas los lawm, twb tso kuv tawm ntawm kuv txoj hauj lwm hauv Pawg Thawj Tswj Hwm ntawm cov Xya Caum, ib qho uas lawv tshaj tawm txog hauv lub tuam rooj sab laj no. Vim lawv tau hais kuv lub npe ze cov Tuam Thawj Coj uas tau raug tso tawm nrog kev hwm, coob leej xav tias kuv tau ua hauj lwm tiav tas lawm thiab. Tom qab lub rooj sab laj, kuv tau txais ntau zaj xov qhia kev ris txiaj thiab qhia tias lawv cia siab kuv yuav ua tau tej yam zoo rau kuv tej hauj lwm yav tom ntej. Ib txhia hais tias lawv kuj xav yuav kuv lub tsev hauv lub nroog North Salt Lake. Kuv zoo siab pom hais tias tib neeg yuav nco kuv thiab tias thaum kuv ua hauj lwm tiav tas yeej muaj neeg uas xav yuav kuv lub tsev. Tiam sis kuv tsis tau ua tiav tas.
Kuv txoj hauj lwm tshiab ua rau kuv thiab kuv tus poj niam Monica tau mus xyuas Afikas teb, nyob ntawd lub Koom Txoos huaj vam heev. Kuv muaj hmoov vim kuv ua hauj lwm nrog ib Tsoom Haiv Neeg Ntseeg hauv Afikas Sab Qab Teb thiab pom hais tias tus Tswv hlub lawv. Yeej txhawb nqa kuv lub siab thaum pom tej yim neeg hauv ntau haiv neeg, kuj muaj cov mej zeej hauv lub Koom Txoos uas tau kawm ntaub kawm ntawv thiab ua hauj lwm zoo uas siv lawv lub sij hawm thiab tej kev txawj los pab lwm tus neeg.
Tib lub sij hawm no, muaj tej koog chaw no, uas muaj neeg coob uas pluag uas tab tom pib koom lub Koom Txoos thiab tab tom pauv lawv lub neej vim lawv tau koob hmoov thaum lawv them ib feem kaum thiab koom tej kev kawm ntawv hauv lub Koom Txoos. Tej kev pab no muaj li qhov khoos kas Succeed in School, EnglishConnect, BYU–Pathway, thiab Pob Nyiaj Rau Kev Kawm Ntawv uas tau foom koob hmoov rau coob leej, yeej pab tau cov tub ntxhais hluas heev.
Muaj ib zaug uas Thawj Tswj Hwm James E. Faust hais tias, “Luag hais tias lub koom txoos no tsis caw cov neeg tseem ceeb los tiam sis feem ntau lub koom txoos no ua rau tib neeg uas zoo xws luag rais los mus ua neeg tseem ceeb.”
Ib Tsoom Haiv Neeg Ntseeg hauv Afikas haj yam ua zoo thaum lawv tiv tau lub neej no tej kev cov nyom thiab lub Koom Txoos loj hlob tuaj mus. Lawv yeej ua siab loj ua tej hauj lwm no. Lawv ua raws li Thawj Tswj Hwm Russell M. Nelson txoj lus qhuab qhia tias:
“Peb txoj kev xyiv fab yeej tsis nyob ntawm seb peb raug dab tsi hauv peb lub neej tiam sis kev xyiv fab nyob ntawm seb peb tsom ntsoov rau dab tsi hauv peb lub neej.
“Thaum peb tsom ntsoov rau Vajtswv txoj kev cawm seej … thiab Yexus Khetos thiab Nws txoj moo zoo, peb yuav muaj kev xyiv fab txawm peb raug dab tsi los xij nyob hauv peb lub neej.”
Lawv nrhiav tau kev xyiv fab txawm tias lawv muaj kev cov nyom los xij. Lawv twb kawm tau hais tias peb txoj kev nrog tus Cawm Seej sib raug zoo yeej ua rau peb luag nyav thiab muaj kev ris txiaj thaum twg peb ntsib teeb meem dab tsi.
Cia kuv qhia nej txog tej yam uas kuv pom thaum kuv ntsib ib Tsoom Haiv Neeg Ntseeg no, pib hauv teb chaws Mozambique.
Mozambique
Ob peb hlis tas los no, kuv tau saib xyuas ib ceg txheem ntseeg lub rooj sab laj es ceg txheem ntseeg ntawd twb ua tshiab tshiab ib xyoos tas los lawm xwb tiam sis muaj 10 pawg ntseeg lawm. Muaj coob tshaj 2,000 leej neeg tuaj sib txi hauv lub tsev teev ntuj me me thiab peb lub tsev pheeb suab ntaub sab nraum zoov. Ceg txheem ntseeg tus thawj tswj hwm muaj 31 xyoos, nws tus poj niam muaj 26 xyoo, thiab nkawd muaj ob tug me nyuam. Nws tsis yws yws thaum coj kav ceg txheem ntseeg uas tab tom loj tuaj thiab muaj teeb meem ntau—nws tsuas luag nyav thiab muaj kev ris txiaj.
Thaum xam phaj tus yawg suab, kuv kawm tias nws tus poj niam muaj mob heev, es nyuaj rau nws tu nws tus poj niam. Tom qab kuv nrog ceg txheem ntseeg tus thawj tswj hwm tham txog qhov no, wb tau muab lub pov thawj hwj ib txoj koob hmoov rau nws. Kuv nug seb tus yawg suab feem ntau nws muab tus yawg suab txoj koob hmoov rau pes tsawg tus neeg.
Nws teb tias “yim mus rau kaum leej.”
Kuv nug tias, “Tauj ib hlis los?”
Nws teb tias, “Tauj ib lim tiam xwb!” Kuv ntuas nws tias ua ntau npaum li ntawd tauj ib lim tiam yuav tsis zoo.
Nws txawm hais tias “Txwj Laug lawv yeej tuaj txhua lub lim tiam, muaj cov mej zeej tshiab thiab cov tub thiab ntxhais hluas.” Nws yeej tsis yws—tsuas luag nyav thiab muaj kev ris txiaj xwb.
Tom qab txoj kev sib ntsib hmo Saturday rau ceg txheem ntseeg lub rooj sab laj, thaum kuv tab tom mus rau qhov chaw so, kuv pom ib txhia neeg yuav zaub mov noj tom ntug kev. Kuv nug tus neeg tsav tsheb seb vim li cas lawv yuav zaub mov noj thaum tsaus ntuj es tsis yuav thaum nruab hnub. Nws hais tias thaum nruab hnub lawv ua hauj lwm kom muaj nyiaj txaus yuav zaub mov noj thaum yav tsaus ntuj.
Ces kuv hais tias, “Auj, hnub no lawv ua hauj lwm kom tag kis lawv yuav muaj mov noj.”
Tiam sis nws hais tias: “Tsis yog, lawv ua hauj lwm nruab hnub kom lawv thiaj tau mov noj hmo no xwb.” Kuv cia siab hais tias peb cov mej zeej yuav tau noj tau haus txaus dua li ntawd, tiam sis nws hais tias peb cov ntseeg feem coob muaj teeb meem li ntawd hauv lub teb chaws no. Tag kis sawv ntxov, thaum sib sab laj es tsam no kuv to taub tias lawv raug xwm txheej li cas, kuv haj yam xav tsis thoob thaum pom lawv luag nyav thiab muaj kev ris txiaj.
Zambia
Thaum tab tom mus rau kev sib ntsib Hnub Caiv, ceg txheem ntseeg tus thawj tswj hwm thiab kuv pom ib khub niam txiv taug kev nrog ib tug me nyuam mos liab thiab ob tug me nyuam yaus. Wb txawm nres thiab hais tias wb mam li thauj lawv mus. Lawv xav tsis thoob thiab yeej zoo siab heev. Thaum kuv nug seb lawv taug kev deb npaum li cas thiaj txog lub tsev teev ntuj, leej txiv ntawd teb tias yuav siv li 45 feeb mus txog ib teev, nyob ntawm seb cov me nyuam kam taug kev ceev npaum li cas. Lawv taug kev mus los li no, txhua Hnub Caiv, tsis yws yws li—tsuas luag nyav thiab muaj kev ris txiaj.
Malawi
Ib Hnub Caiv ua ntej ceg txheem ntseeg lub rooj sab laj, kuv tau mus xyuas ob ceg ntseeg uas sib ntsib hauv ib lub tsev kawm ntawv ua lawv lub tsev teev ntuj. Kuv xav tsis thoob vim cov tsev no tsis zoo pes tsawg, yeej tsis muaj tej khoom zoo siv li. Thaum kuv ntsib ob peb tug mej zeej ntawd, kuv tab tom yuav hais thov txim vim tej tsev no tsis zoo hlo li, tiam sis lawv yeej zoo siab muaj ib qho chaw rau lawv tau sib ntsib ze ze ntawd, tsis tas yuav taug kev deb deb. Hais ib zaug ntxiv, lawv tsis yws yws—tsuas luag nyav thiab muaj kev ris txiaj.
Zimbabwe
Tom qab kev sib ntsib qhuab qhia cov thawj coj hnub Saturday, ceg txheem ntseeg tus thawj tswj hwm coj kuv mus rau kev teev ntuj Hnub Caiv hauv ib lub me nyuam tsev uas lawv xauj xwb. Muaj 240 leej tuaj koom nrog peb. Ces tus npisov qhia txog 10 tus mej zeej tshiab uas tau ua kev cai raus dej lub lim tiam ntawd. Pawg neeg ntseeg nyob hauv ob chav tsev me me, thiab muaj ib co uas tseem zaum sab nraum zoov, saib txoj kev ntsib ntawd dhau ntawm cov qhov rais thiab cov qhov rooj. Lawv tsis yws yws—tsuas luag nyav thiab muaj kev ris txiaj xwb.
Lesotho
Kuv tau mus xyuas lub teb chaws zoo nkaus no, uas kuj hu ua “lub nceeg vaj saum roob,” es pom lub Koom Txoos ib cheeb tsam tab tom pauv los ua ib ceg txheem ntseeg. Tom qab tej kev sib ntsib hnub Saturday, kuv tau mus koom tej kev teev ntuj Hnub Caiv hauv ib ces ntseeg me me hauv ib lub tsev uas lawv xaub. Chav tsev thaum lawv noj lub cim nco txog yeej puv nkaus, muaj ib co neeg tseem sawv sab nraum zoov xav koom kev sib ntsib thiab. Kuv qhia ceg ntseeg tus thawj tswj hwm ntawd hais tias nws xav tau ib lub tsev loj zog. Kuv txawm xav tsis thoob, vim nws hais tias nov tsuas yog ib nrab ntawm nws cov mej zeej. Nws hais tias lwm cov mej zeej yuav tuaj noj lub cim nco txog hauv xuab moos thib ob. Hais ib zaug ntxiv, lawv tsis yws yws—tsuas luag nyav thiab muaj kev ris txiaj.
Kuv rov qab mus xyuas Lesotho vim muaj kev sib tsoo tsheb es peb ib co tub thiab ntxhais hluas twb tuag, uas Txwj Laug D. Todd Christofferson twb piav txog lawm. Thaum kuv mus xyuas tej yim neeg thiab cov thawj coj, kuv xav tias sawv daws yuav tu siab nrho. Tab sis mas, kuv tsuas pom ib Tsoom Haiv Neeg Ntseeg uas tiv tau thiab nyiaj mus dhau ib lub sij nyuaj kawg uas txhawb nqa thiab txhawb pab tib neeg lub siab.
Mpho Anicia Nku, 14, ib tug neeg uas nyob hauv tsheb thaum sib tsoo tiam sis tsis tau tuag nyob hauv daim duab no, hais ib co lus zoo kawg hais tias: “Tso siab plhuav rau Yexus thiab ntsia ntsoov Nws, vim dhau los ntawm Nws ces koj yuav muaj kev kaj siab lug, thiab Nws yuav pab kho yus lub siab.”
Nov tsuas yog ob peb qhov yam ntxwv zoo txog lawv tej siab zoo vim hais tias lawv tso Yexus Khetos txoj moo zoo hauv nruab plawv lawv lub neej. Lawv paub hais tias lawv yuav nrhiav kev pab thiab kev cia siab rau qhov twg.
Tus Cawm Seej lub Hwj Chim Pab Muab Kho Kom Zoo
Vim li cas tus Cawm Seej thiaj paub nplij lawv thiab peb hauv txhua yam xwm txheej hauv peb lub neej? Yus nrhiav tau lo lus teb ntawd hauv cov vaj lug kub hais tias:
“Thiab nws yuav mus, raug tej kev mob nkeeg thiab tej kev txom nyem thiab tej kev dag ntxias txhua yam. …
“… Thiab nws yuav ris lawv tej kev qaug dag qauj zog, kom nws lub siab thiaj li yuav muaj puv nkaus kev hlub tshua, … xwv kom nws yuav paub … pab nws cov neeg raws li lawv tej kev qaug dag qaug zog.”
Xws li Txwj Laug David A. Bednar qhia, tsis muaj ib yam kev mob, kev nyuaj siab, los sis kev qaug zog uas peb muaj uas tus Cawm Seej tsis paub txog. “Thaum peb qaug zog lawm tej zaum peb qw hais tias, “Tsis muaj leej twg paub [hais tias kuv tab tom raug teeb meem zoo li cas]. …’ Tej zaum, ib tug tib neeg twg, tsis paub. Tiam sis Vajtswv Leej Tub paub thiab to taub tag nrho.” Yog vim li cas? Vim “Vim Nws twb paub thiab ris peb txhua tus tej nra ua ntej peb ris tej ntawd.”
Kuv xaus lus hais lus tim khawv txog Yexus cov lus uas nyob hauv Matthew 11:
“Nej cov uas sab sab vim ris nra hnyav, nej cia li los cuag kuv, kuv yuav cia nej so.
“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”
Zoo li ib Tsoom Haiv Neeg Ntseeg hauv Africa, kuv paub tias kev cog lus no muaj tseeb. Qhov no muaj tseeb nyob ntawd, thiab qhov no muaj tseeb txhua qhov txhia chaw. Kuv ua tim khawv txog qhov no los ntawm Yexus Khetos lub npe, amees.