Rov Los nrog Vajtswv Sib Raug Zoo

Thaum kuv kawm cov vaj lug kub, kuv nyeem tej lus uas ua rau kuv tsom ntsoov rau, qhov tseem ceeb yog vim tej lus no muaj lub ntsiab tshwj xeeb rau kuv los ntawm kuv lub neej. Kuv twb ua txoj hauj lwm ua ib tug kws tshuaj ntsuam kev khaws ntaub ntawv txog nyiaj txiag. Vim kuv tau ua txoj hauj lwm ntawd, lo lus reconcile twb ua rau kuv tsom ntsoov thaum kuv nyeem cov vaj lug kub. Kuv txoj hauj lwm yog kom cov najnpawb uas nyob hauv cov ntaub ntawv txog nyiaj txiag sib haum thaum kuv siv tej txuj ci suav nyiaj, kev tshuaj xyuas, thiab kev ntsuam xyuas. Los yog hais tias, kuv lub hom phiaj yog kom cov ntawv qhia tias tau siv nyiaj li cas yog cov ntawv raug lawm thiab kom sib haum nrog cov ntaub ntawv txog nyiaj txiag. Kuv twb rau siab siv zog kom kho tej yam yuas tau sau ua yuam kev, thiab feem ntau kuv twb siv sij hawm ntev kom kho tej yam uas tsis raug me me heev.

Tus Thwj Tim Povlauj tau thov cov neeg Kauleethaus kom lawv “los nrog Vajtswv sib raug zoo.” Qhov uas yus nrog Vajtswv sib raug zoo txhais tias yus rov qab nrog Vajtswv sib haum xeeb los sis txhais tias yus rov qab koom siab nrog Vajtswv vim yus tau ua txhaum los ua tej yam kom yus tsis nrog Nws sib raug zoo. Los yog hais tias, kev rov qab nrog Vajtswv sib raug zoo txhais tias peb ywj siab rau Vajtswv lub siab nyiam thiab ua raws li Nws qhia, los yog raws li Thawj Tswj Hwm Russell M. Nelson, qhia, cia Vajtswv yeej hauv peb lub neej.

Raws li qhia hauv cov vaj lug kub, peb muaj kev ywj siab xaiv ua rau peb tus kheej, “xaiv txoj kev tuag uas kav mus ib txhis los sis xaiv txoj sia nyob mus ib txhis.” Tiam sis yog peb tsis rau siab, txoj kev ywj siab kom ua rau peb xaiv tus kheej cia peb ua tej yam kom tsis txhob ua raws li Vajtswv lub siab xav.

Tus yaj saub qhia tias thaum peb tsis ua raws li Vajtswv lub siab xav los sis tsis ua raws li Vajtswv nyiam, ces tib txoj kev uas peb yuav rov qab los nrog Nws sib raug zoo yog txoj kev “los sib raug zoo nrog [Vajtswv] los ntawm Khetos … txoj kev theej txhoj.” Peb yuav tsum paub tias kev rov qab nrog Vajtswv sib raug zoo nyob ntawm kev muaj siab hlub tshua, uas txhais tias yog Yexus Khetos txoj kev ua siab dawb theej peb lub txhoj uas tau qhib kev rau peb nrog Vajtswv sib raug zoo.

Thaum nej xav txog nej lub neej, cia li xav txog ib lub sij hawm thaum nej tsis muab siab npuab Leej Txiv Saum Ntuj Ceeb Tsheej vim nej tau txav mus deb ntawm Nws. Piv txwv hais tias, tej zaum nej tsis tshua rau siab thov Nws los yog tsis tshua ua raws li Nws cov lus txib. Ib yam li peb xaiv kom nyob deb zog ntawm Vajtswv, peb yuav tsum xaiv kom pib ua hauj lwm rov qab nrog Nws sib raug zoo. Tus Tswv tau qhia txog peb txoj kev lav ris no thaum Nws hais tias, “Txav los nyob ze kuv ces kuv yuav txav los nyob ze nej; rau siab ntso nrhiav kuv ces nej yuav ntsib kuv; thov, ces nej yuav tau txais; khob, ces yuav qhib rau nej.”

Tus Cawm Seej pab peb li cas kom rov qab nrog Vajtswv sib raug zoo? Rau kuv mas, qhov uas pab kuv ntau heev kom rov qab nrog Vajtswv sib thaum zoo yog thaum kuv ua raws li Thawj Tswj Hwm Nelson qhia thiab hloov siab lees txim txhua hnub. Yog vim hais tias yuav tsum kho qhov uas ua rau tib neeg tsis nrog Vajtswv sib raug zoo lawm, thaum muab kev txhaum uas khuam peb tshem mus.

Ib lub sij hawm zoo nyob hauv cov vaj lug kub thaum ib tug neeg rov qab nrog Vajtswv sib raug zoo yog zaj dab neeg txog Enos. Muaj ib yam hauv nws lub neej uas nws ua tsis raws li Vajtswv qhia. Nws coj yam ntxwv txog kev muab siab npuab Yexus Khetos txoj Kev Theej Txhoj kom rov qab nrog Vajtswv sib raug zoo. Nws tau piav txog nws txoj kev xav hloov siab lees txim, nws txoj kev txo hwj chim, nws tsom ntsoov rau dab tsi, thiab nws txoj kev mob siab. Vajtswv twb pom zoo rau nws thaum nws hnov ib lub suab hais rau nws hais tias, “Enos, twb zam txim rau koj tej kev txhaum lawm, thiab koj yuav tau koob hmoov.” Enos to taub kev hloov siab lees txim thiab kev nrog Vajtswv sib raug zoo muaj nqis npaum li cas thaum nws hais tias, “Thiab kuv, Enos, paub tias Vajtswv yeej dag tsis taus; yog li ntawd, kuv txoj kev muaj txim ploj huv tib si.”

Kev rov qab nrog Vajtswv sib raug zoo pab peb txais kev nplij siab kom txhob raug mob vim peb tau ua txhaum tiam sis kuj ua rau peb tus kheej thiab lwm tus txais kev kaj siab lug. Yeej yuav kho peb txoj kev ua phooj ywg, ua rau peb lub siab mos siab muag, thiab peb haj yam yuav rau siab ua cov thwj tim, peb thiaj li tso siab rau Vajtswv ntxiv. Qhov uas ua rau kuv muaj kev cia siab thiab kev tso siab heev yog ib yam uas los ntawm kev nrog Vajtswv sib raug zoo xws li Enos piav thaum nws hais tias, “Thiab tom qab kuv, Enos, tau hnov tej lus no, kuv txoj kev ntseeg tus Tswv pib ruaj khov kho.”

Thaum kuv yog ib tug me nyuam tub, kuv yawm txiv muaj ib daim tiaj cog txiv ntoo raum qaib loj heev. Kuv twb muaj cib fim ua hauj lwm hauv daim tiaj cog txiv ntoo ntawd, feem ntau hauv thaum lub caij sov sov thaum yuav muab sau cov txiv raum qaib ntawd. Thaum kuv yog ib tug me nyuam tub, kuv kawm tias lawv muab ib lub thoob rau kuv ces xa kuv mus nce ntoo kom de cov txiv raum qaib.

Kev sau cov txiv raum qaib hloov hlo thaum kuv yawm txiv yuav ib lub tshuab hu ua tshuab co txiv ntoo. Lub tshuab no nyem cev ntoo thiab muab co co, ua rau cov txiv raum qaib poob tawm tus ntoo los rau tej vas uas siv kom muab cov txiv raum qaib khaws cia. Kuv pom tias thaum lub tshuab ntawd pib muab tus ntoo co co, ces yuav luag txhua lub txiv raum qaib poob tawm ntawm tus ntoo sai sai heev. Kuv kuj pom tias txawm yog cia tus ntoo co co rau 10 chib los sis ib feem tag nrho, ib co txiv raum qaib yuav tsis poob. Co npaum li cas los cov txiv no yeej khov kho.

Yus ua rau cov txiv raum qaib poob tawm ib tug ntoo thaum muab co co vim yog twb muaj tshuaj uas tawm haud cov txiv hu ua ethylene. Cov tshuaj no ua rau tus kav tsis muaj zog txaus kom lub txiv raum qaib thiab tus ntoo sib txuas. Yog li ntawd, tus kav ntawm ib lub txiv raum qaib uas siav lawm los yooj yim muab tu vim tias qhov sib txuas ntawd tsis muaj zog li.

Nyob hauv cov vaj lug kub, peb kawm tias Yexais tus kav yog ib qho piv txwv txog tus Mexiyas, Yexus Khetos, uas cov yaj saub qhia tias yuav los ntawm Yexais cov xeeb ntxwv,tus uas yog Vaj Ntxwv Daviv leej txiv. Ib yam li ethylene ua rau tus kav ntawm ib lub txiv raum qaib siav tsis muaj zog, kev tsis mloog lus, kev ua xyem xyav, thiab kev ntshai mas ntse ua rau peb nyob tsis khov rau Yexais tus kav, los yog Yexus Khetos, ntshe yooj yim muab peb co co thiab poob ntawm Nws mus. Txawm peb rau siab ntseeg npaum li cas los, peb yuav tsum tiv thaiv kom txhob cia peb txoj kev nrog Yexus Khetos sib raug zoo qaug zog zuj zus.

Nyob hauv phau Lus Qhuab Qhia thiab Kev Khi Lus, tus Tswv ceeb toom cov neeg uas rau siab ntseeg: “Tiam sis tej zaum yeej yuav muaj tib neeg poob ntawm txoj kev tshav ntuj thiab khiav tawm ntawm tus Vajtswv uas muaj sia zees nyob mus.” Tus Tswv hais ntxiv tias, “Muaj tseeb tiag, … kom cov uas twb hloov ua dawb huv lawm ua zoo xyuas thiab.” Xwv kom tsis txhob poob mus, tus Tswv ntuas hais tias, “Yog li ntawd kom cov ntseeg ua zoo xyuas thiab thov Vajtswv tas mus li, tsam lawv poob mus rau txoj kev ntxias.”

Tej zaum peb yuav xav muab qhov uas yooj yim rau yus raug co co thiab poob mus piv rau qhov uas cov vaj lug kub hais tias yus siav rau txoj kev puas tsuaj, vim yuav raug tej xwm txheej tsis zoo rau yus tej kev txhaum. Cov lus no los kuj siv kom piav txog kev lwj, kev ua phem, los yog kev ploj zuj zus, uas ua yooj yim rau ib yam raug poob mus los sis raug puas tsuaj.

Qhov siav no piv txog dab tsi? Qhov no puas txhais tias yuav mus txog ib lub sij hawm thaum peb hloov tsis taus? Tsis yog, kuv xav tias yuav txog ib lub sij hawm thaum peb tsis kam hloov siab. Qhov uas cawm tau peb kom txhob siav rau kev puas tsuaj yog kom ua tej yam uas yuav pab peb sib raug zoo nrog Yexus Khetos. Ib yam li kuv hais lawm, kev hloov siab lees txim tau pab Enos muaj kev ntseeg uas ruaj khov kho. Kev hloov siab lees txim ua rau yus muaj zog—yog tias yus hloov siab lees txim sai sai thiab ua ntau zaus. Ib yam li Thawj Tswj Hwm Nelson qhia peb hais tias, “Tsis muaj ib yam dab tsi uas pab yus dim txim, pab yus ua zoo, los yog tseem ceeb rau peb txoj kev vam meej npaum li kev hloov siab lees txim txhua hnub.”

Ntxiv rau kev tshaj tawm txog kev hloov siab lees txim, tus yaj saub Yakhauj qhia tias thaum peb paub txog qhov uas Vajtswv tau pab peb lub neej, thaum peb nrhiav thiab txais kev tshwm sim, thiab mloog Vajtswv lus thaum Nws hais lus rau peb ces tej no pab peb kom nyob ruaj khov kho. Yakhauj kuj qhia tias, “Yog li ntawd, peb kawm tej uas cov yaj saub tau sau, thiab peb muaj ntau yam kev tshwm sim thiab muaj lub txiaj ntsim qhia tau tej yuav muaj los yav tom ntej; thiab vim peb muaj tag nrho tej pov thawj no peb thiaj tau txais kev cia siab, thiab peb txoj kev ntseeg hloov kom ua khov kho.” Kev mloog thiab ua raws li cov yaj saub thiab cov thwj tim tej lus caw yuav ua rau peb muaj kev cia siab, ua siab loj, thiab muaj zog, peb txoj kev ntseeg thiaj li yuav ruaj khov kho.

Kuv tau kawm hais tias yog yus xav nrog Vajtswv sib raug zoo ces yus kuj yuav tsum xav hloov siab lees txim. Kev hloov siab lees txim thiab kev txais cov koob hmoov uas los ntawm Yexus Khetos txoj Kev Theej Txhoj ua rau yus txoj kev ntseeg nyob ruaj khov kho. Kev ntseeg ruaj khov kho ua rau yus xav nrog Vajtswv sib raug zoo tas mus li. Yeej yog ib tus txheej txheem uas ib qho txhawb nqa ib qho.

Cov kwv tij thiab cov muam, kuv caw nej rov qab nrog Vajtswv sib raug zoo dhau los ntawm Yexus Khetos txoj Kev Theej Txhoj. Kuv ua tim khawv tias kev ua raws li peb tej kev khi lus pab kom peb txoj kev nrog tus Cawm Seej sib raug zoo muaj zog peb thiaj li yuav tsis siav rau kev puas tsuaj. Kuv ua tim khawv hais tias txoj kev rov qab nrog Vajtswv sib raug zoo, dhau los ntawm Yexus Khetos txoj Kev Theej Txhoj, ua rau yus txoj kev ntseeg ruaj khov kho.

Kuv paub tias vim Leej Txiv Saum Ntuj Ceeb Tsheej hlub peb, thiab Nws txib Nws Tib Leeg Tub, Yexus Khetos, los ua peb tus Cawm Seej thiab tus Txhiv Dim. Kuv ua tim khawv txog Yexus Khetos thiab ua li no los ntawm Yexus Khetos lub npe, amees.