Lub Txiaj Ntsim Ua Tim Khawv uas Nyob Mus Ib Txhis Li

Nws paub txhua yam thiab muaj hwj chim tag nrho. Dhau los ntawm Khetos txoj Kev Kaj thiab tus Vaj Ntsuj Plig Dawb Huv tej kev tshoov siab, Nws lub hwj huam nyob txhua qhov chaw. Nws yeej muaj siab xav foom koob hmoov rau peb.

Nws txawj pom peb yav tas los, tam sim no, thiab peb txoj hmoov mus ib txhis li. Tsis muaj dab tsi uas muab zais taus kom Nws tsis pom.

Thawj Tswj Hwm Russell M. Nelson txoj kev caw peb kom “xav txog tej yam xilethi-aus” ua rau peb xav coj raws li peb Leej Txiv Saum Ntuj Ceeb Tsheej hom phiaj thiab tej cwj pwm.

Dhau los ntawm Nws tej cwj pwm zoo, peb Leej Txiv Saum Ntuj Ceeb Tsheej muab txhua yam txiaj ntsim zoo rau peb, vim Nws xav ua kom muaj raws li Nws lub zeem muag uas kav mus ib txhis li.

Kev ywj siab xaiv kuj yog kev lav ris kom xaiv zoo.

Yexus Khetos tau them tus nqi loj tshaj plaws uas yog Nws cov ntshav uas muaj nqis heev kom peb siv taus lub txiaj ntsim no.

Tej lub sij hawm peb ntseeg tias kev ywj siab xaiv txhais tias peb ua dab tsi los tau. Tiam sis qhov uas twb them tus nqi lawm txhais hais tias kev ywj siab xaiv yog ib lub txiaj ntsim dawb ceev.

Peb yog cov neeg sawv cev, thiab cov neeg sawv cev yeej lav ris tej yam. Lub sij hawm no, peb lav ris tej yam uas peb xaiv raws li tej yam uas peb paub lawm thiab tej lub txiaj ntsim uas peb tau txais. Yog peb xaiv ua tej yam ces peb yeej yuav tsum raug tej yam uas los ntawm txoj kev xaiv ntawd.

Vim li cas peb muaj kev ywj siab xaiv?

Kom xaiv tau tej yam zoo.

Kom xaiv tus Khetos.

Kom xaiv txoj sia nyob mus ib txhis—thiab rov qab xaiv txhua zaus.

Tus Vaj Ntsuj Plig Dawb Huv txoj kev ua tim khawv yeej muaj nqis tshaj qhov txawj pom kev. Nws yog tus uas ua tim khawv txog Leej Txiv thiab Leej Tub tseem ceeb tshaj plaws. Thawj Tswj Hwm Nelson tau qhia hais tias, “Hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”

Cov kwv tij thiab cov muam, yog li no peb thiaj li xav tau tus Vaj Ntsuj Plig Dawb Huv lub hwj chim niaj hnub no.

Muaj ntau txoj kev uas ib zaj lus tim khawv dhau los ntawm tus Vaj Ntsuj Plig Dawb Huv yuav los. Zoo li ib lub teeb nyob hauv ib chav tsaus ntuj, tej zaum yus tau rau ib me pliag xwb. Tej zaum zoo li lub hnub tuaj es yus tau zuj zus thaum sij hawm dhau mus. Tej zaum yus tau zoo li tej duab tshav ntuj, uas tej lub sij hawm ua rau yus txais kev txawj ntse tseeb. Txawm yog li cas los, yus tau ib zaj lus tim khawv dhau los ntawm tus Vaj Ntsuj Plig Dawb Huv.

Kuv loj hlob tuaj nyob hauv Jamaica; yeej yog ib qho chaw lom zem thiab zoo. Tiam sis, thaum kuv pib kawm high school, cov uas nrog kuv kawm thiab cov phooj ywg lawv tsis to taub kuv txoj kev txiav txim ua ib tug mej zeej hauv Yexus Khetos lub Koom Txoos. “Koj ua li cas ho koom lub koom txoos ntawd?” lawv nug kuv. “Ua cas koj ho ntseeg tau zaj ntawd?”—hais txog Thawj Zaug Ua Yog Toog. “Cas koj ho nyeem tau phau ntawv ntawd?”—hais txog Phau Ntawv Maumoos. “Koj puas ntseeg tej ntawd tiag tiag?” Thiab “Vim li cas koj nkim koj lub neej?”

Ua rau kuv nyuaj siab heev, qhov tseem ceeb yog thaum tib neeg uas kuv hlub hais tej no.

Tiam sis lawv tsis paub qhov no: Tus Vaj Ntsuj Plig Dawb Huv twb ua tim khawv rau kuv. Thaum zaj lus tim khawv ntawd puv kuv lub siab, twb nplij kuv lub siab lawm, thiab “ib me pliag xwb lub ntuj ceeb tsheej tshwm sim rau kuv pom lawm.”

Tej zaum lwm tus twb nug tej lus zoo li no rau nej. Tej zaum lub sij hawm no lawv pheej nug nej zoo li lawv nug kuv.

Lub txiaj ntsim uas yog tus Vaj Ntsuj Plig Dawb Huv thiab Nws tej lus tim khawv los muab tau rau txhua tus.

Kuv xav txog Jamaica ib yam li Joseph Smith xav txog Palmyra. Yog kuv Koog Ntoo Dawb Ceev. Kuv tsis paub Joseph nyob qhov twg hauv Koog Ntoo Dawb Ceev thaum nws txhos caug thov Vajtswv, tiam sis kuv paub kuv nyob qhov twg thaum kuv muaj lub sij hawm zoo li nyob hauv Koog Ntoo Dawb Ceev. Twb yog nyob hauv txoj kev Four Grove Road, Mandeville, Jamaica, nyob hauv kuv chav da dej, thaum 6:00 sawv ntxov, thaum hnub Wednesday, peb xyoos tom qab kuv ua kev cai raus dej. Muaj qhov dawb ceev no vim ob lub lim tiam ua ntej hnub ntawd ib tug ntxhais txib tau txais kev tshoov siab caw kuv nyeem Phau Ntawv Maumoos. Muam Audrey Krauss nrog nws tsev neeg tuaj rau lub rooj sab laj hnub no, thiab kuv yeej hlub nws.

Lub sij hawm ntawd twb hloov kuv siab lawm.

Cov kwv tij thiab cov muam, Vajtswv tsis pub ib zaj lus tim khawv rau peb siv rau ib me pliag xwb. Lub txiaj ntsim los ntawm peb Leej Txiv Saum Ntuj Ceeb Tsheej uas hlub peb no nyob mus ib txhis vim tus uas muab rau peb yeej nyob mus ib txhis li thiab. Tsis tsim nyog uas ib zaj lus tim khawv yuav muaj ib hnub dhau caij lawm. Tsis tsim nyog uas kuv zaj lus tim khawv yuav ploj zuj zus vim muaj tej yam hauv kuv lub neej los sis tej yam hauv lub ntiaj teb no tau hloov. Tsim nyog uas ib zaj lus tim khawv yuav muaj zog tuaj, ib yam li tus tub qhe hauv zaj lus piv txwv txog chob nyiaj, kuv zaj lus tim khawv yog ib lub txiaj ntsim uas yuav tsum loj tuaj—tsis yog ib yam uas yuav tsum muab faus.

Qhov uas kuv nco qab txog tej hnub nyuaj heev thaum kuv yog ib tug me nyuam uas raug kev sim siab thiab kev tsim txom yog ib qho uas tau pab kuv paub ntawm kuv tus kheej. Tsis yog kuv ntseeg, cia siab, los sis tso siab xwb, txawm yog tej no yog tej yam tseem ceeb rau yus txoj kev ntseeg ua ntej yus txais ib zaj lus tim khawv tseeb. Kuv qhuas nej yog nej tab tom muaj lus nug, kawm, thov Vajtswv, yoo mov, thiab xav xav. Thov tsis txhob tsum. Qhov uas yus siv zog ua tej no yeej muaj nqis heev kom thiaj li tau ib zaj lus tim khawv. Nej yuav cia leej twg los sis cia dab tsi tshem qhov ntawd mus? “Koj yuav tau kev ua tim khawv dab tsi uas tseem ceeb tshaj li qhov uas los ntawm Vajtswv?”

Vajtswv txhua tus tub los sis tus ntxhais yeej paub tau tseeb tiag. Ib yam li Joseph Smith uas hais lus tim khawv txawm yog nws raug tawm tsam, peb hais tau tias, “Kuv twb paub, thiab kuv paub hais tias Vajtswv twb paub, thiab kuv xyeej tsis tau, thiab kuv tsis kam ua li ntawd.”

Kuv cov kwv tij thiab cov muam, cia tus yub ntawm ib zaj lus tim khawv loj tuaj hauv nej mus txog thaum nws yog ib tsob ntoo ntawm kev paub tseeb uas muaj yeeb koob uas kav mus ib txhis li.

Rau peb cov uas tau ua kev cai raus dej thiab txais kev pom zoo ua cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tiam sis tseem hais tias, “Xyov kuv puas paub tiag,” thov nco ntsoov txoj lus cog tseg nyob hauv zaj lus thov foom koob hmoov rau lub cim nco txog no: “Kom lawv yuav muaj nws tus Ntsuj Plig nrog lawv nyob tas mus li.” Vim muaj txoj lus cog tseg no peb txhua tus txais tau ib zaj lub tim khawv thiab yuav paub tseeb.

Nov yog ib yam uas muaj tseeb tiag: Txawm yog yus txais ib zaj lus tim khawv li cas los—tsis hais zoo li thaum hnub tuaj los sis thaum ua yog toog—peb tseem yuav tsum xaiv kom txais lub txiaj ntsim uas muaj nqis no.

Thaum yus hais tias “Kuv xaiv kev ntseeg” ces yeej yooj yim dua kom txais ib zaj lus tim khawv uas los ntawm Vajtswv los. Yog peb zaj lus tim khawv qaug zog zuj zus, cia li nco ntsoov tias yeej yog vim peb xaiv tej yam uas ua rau lub hwj chim ntawm peb zaj lus tim khawv ploj mus. Tiam sis peb zaj lus tim khawv tsis tau ploj mus. Peb yuav tsum xaiv kom nco qab xwb.

Kev xaiv kev ntseeg yeej yog ib txoj kev siv nej txoj kev ywj siab xaiv uas muaj hwj chim.

Kuv yeej tsis pom ib txoj kev zoo dua kom siv kuv txoj kev ywj siab xaiv tsuas yog kev tiv thaiv kuv zaj lus tim khawv.

Thawj Tswj Hwm Nelson qhia hais tias: “Kuv thov kom nej lav ris nej zaj lus tim khawv. Ua hauj lwm kom muaj zog. Saib nws rau nqi. Saib xyuas zoo. Pab tu kom yuav loj hlob tuaj. Ntxiv qhov tseeb rau.”

Kuv xav tias tej lus xws li lav ris, ua hauj lwm, saib xyuas, pab tu, thiab ntxiv rau qhia tias peb yog cov uas sawv cev uas txais kev lav ris ib yam uas muaj nqis thiab tseem ceeb.

Nyob hauv lub Koom Txoos yav tas los, Parley P. Pratt npau taws rau tus Yaj Saub Joseph Smith thiab xaiv cem nws thiab cem lub Koom Txoos. Thaum John Taylor uas Parley qhia txoj moo zoo rau tuaj rau nws lub zos, Parley nrog nws tham thiab ceeb toom nws kom tsis txhob coj raws li Joseph. John Taylor tau hais rau Parley hais tias:

“Ua ntej koj tawm Canada mus, koj tau ua tim khawv hais tias Joseph Smith yog Vajtswv ib tug yaj saub, … thiab koj hais tias koj paub tej no dhau los ntawm kev tshwm sim thiab lub txiaj ntsim Vaj Ntsuj Plig Dawb Huv.

“… Tam sim no kuv muaj ib zaj lus tim khawv txog tej yam uas koj hais thaum ntawd. Yog tias txoj hauj lwm muaj tseeb rau lub hlis tas los, ces muaj tseeb hnub no thiab. Yog tias Joseph Smith yog ib tug yaj saub thaum ntawd, nws yog ib tug yaj saub tam sim no.

Kuv ua tim khawv tias Joseph Smith yog Vajtswv ib tug yaj saub thiab tseem muaj ib tug yaj saub zoo li nws niaj hnub no. Yexus Khetos yog tus uas coj txoj hauj lwm no.

Kuv caw nej xav txog nej txoj kev txais tau ib zaj lus tim khawv tseeb txog Yexus Khetos thiab Nws txoj moo zoo. Cia li saib xyuas nej zaj lus tim khawv, siv nej txoj kev ywj siab xaiv zoo thiab lees yuav tus uas muab qhov no rau nej thiab tag nrho Nws tej cwj pwm. Kuv ua tim khawv tias nej muaj hwj chim ua li no nyob hauv nej. Tsis muaj leej twg uas xaiv tau tej yam no rau nej. Tsis muaj leej twg tshem tau lub txiaj ntsim no. Nej muaj peev xwm xaiv kom ntseeg.

Kuv cog lus rau nej hais tias, nej zaj lus tim khawv yuav los ua “cov dej uas muaj sia nyob hauv nws, txhawv tuaj mus rau txoj sia uas kav ib txhis.” Ib zaj lus tim khawv yuav muab nej txheem thiab ua rau nej mob siab, thiab yuav txhawb nqa nej thaum nej raug tej yam nyuaj. Yuav ua rau nej muaj peev xwm txais tau tej txiaj ntsim ntawm sab ntsuj plig. Yuav pab nej thaum nej mus txhawb pab lwm tus. Yuav pab nej tawm tsam Dab Ntxwg Nyoog thiab nej cov yeeb ncuab. Nej zaj lus tim khawv yuav ua rau nej muaj kev xyiv fab thaum nej pom nej cov me nyuam, thiab cov xeeb leej xeeb ntxwv muaj thiab cov uas nej hlub thiab pab muaj thiab. Yuav muaj hwj chim thaum nej qhia thiab ua tim khawv.

Yog tias yus paub, yus paub xwb. Kuv paub tias kuv paub lawm. Peb xav tau tib neeg uas ua tim khawv tseeb txog Yexus Khetos thiab Nws txoj moo zoo. Mus txog ntawd! Nrhiav kom tau! Yeej tseem ceeb! Nov yog lub caij nyoog kawg—lub caij nyoog tso txoj cai uas muaj txhij txhua.

Yexus Khetos tau hais tej lus tseeb no: “Lub ntuj thiab lub ntiaj teb yuav ploj mus, tiam sis kuv tej lus yuav tsis muaj ib los poob li.”

Cov kwv tij thiab cov muam, ib zaj lus tim khawv txog Yexus Khetos los yeej tsis yog ib lub txiaj ntsim uas nyob mus ib ntus xwb. Tsis muaj dab tsi ntawm ib zaj lus tim khawv uas tsuas nyob ib me pliag xwb—tsis yog tus uas muab, lub txiaj ntsim ntawd, tsis yog tus uas lub txiaj ntsim ntawd qhia txog. Thov kom lwm tus yuav hais txog nej zaj lus tim khawv zoo li no. Txawm “lub ntuj thiab lub ntiaj teb yuav ploj mus,” nej zaj lus tim khawv txog Yexus Khetos txoj moo zoo yeej yuav tsis ploj mus. Tam sim no yog lub sij hawm siv txhua lub txiaj ntsim uas muaj nqi no. Los ntawm Yexus Khetos lub npe, amees.