Nim No Kuv Pom Kev Lawm Xwb
Qhov uas Phau Ntawv Maumoos twb hloov kuv lub neej los yeej yog ib qho txuj ci tseem ceeb uas loj npaum li qhov uas tau nto qaub ncaug thiab pleev av nkos rau ib tug neeg dig muag ob lub qhov muag.
Peb muaj kev hlub kawg siab kawg ntsws thaum peb nrog Thawj Tswj Hwm Oaks muaj kev hlub hais lus hwm Thawj Tswj Hwm Nelson. Thiab nrog kev hlub thiab kev tu siab kawg, peb nco txog tej xwm txheej ntxhov siab hauv Michigan thiab txhua hnub thoob plaws ntiaj teb. Thaum peb xav txog tej no peb hlub thiab tso siab rau tus Tswv Yexus Khetos.
Yauhas tshooj cuaj hais txog Yexus thiab Nws cov thwj tim thaum lawv tab tom taug kev pom ib tug txiv neej uas dig muag ib txwm nruab thiab los. Tus no ua rau cov thwj tim nug Yexus ob peb yam txog kev teev ntuj uas nyuaj teb thiab vim li cas tus txiv neej no muaj qhov teeb meem no. Tus Xib Hwb teb lawv thaum nws ua ib yam yooj yim thiab ua rau lawv xav tsis thoob. Nws nto qaub ncaug rau hauv av thiab muab do xyaw hmoov av. Ces Nws muab cov av nkos ntawd pleev tus txiv neej ntawd ob lub qhov muag, thiab hais kom nws mus ntxuav muag ntawm lub pas dej Xilau-as. Tus txiv neej dig muag mloog lus ua txhua yam thiab “txawm pom kev lawm,” zoo li vaj lug kub hais. Kev muaj tej yam ua puav pheej yeej tseem ceeb dua li kev xav los sis kev sib cav los sis kev ntxub los yog kev tawm tsam qhov tseeb.
Vim lawv ntshai qhov txuj ci no yuav ua rau tib neeg saib taus Yexus lub hwj chim ntau tshaj txoj cai uas lawv muaj lawm, tus Cawm Seej cov yeeb ncuab tau hais rau tus txiv neej uas nyuam qhuav txawj pom kev thiab chim siab hais tias, “Peb paub hais tias [Yexus] yog ib tug neeg txhaum.” Tus txiv neej ntawd mloog ib me pliag, ces teb hais tias, “Kuv tsis paub hais tias tus ntawd yog ib tug neeg txhaum, … kuv tsuas paub hais tias kuv ib txwm dig muag, tiam sis nim no kuv pom kev lawm xwb.”
Yexus tau qhia lub ntsiab thib ib txog qhov no, thaum Nws qhia Nws cov thwj tim tias tau muaj li no “kom sawv daws pom Vajtswv lub hwj chim xwb.” Nco ntsoov tias muaj ob zaug nyob hauv zaj lus no uas tus Cawm Seej hais tias Nws “pleev” tus txiv neej dig muag ob lub qhov muag, uas yuav tsum muab ntxuav tom qab. Cov lus piav txog qhov uas tau ua “kom sawv daws pom Vajtswv lub hwj chim” los tej zaum qhia tias twb tau ua ib txoj kab ke lawm.
Ib yam tseeb ntxiv uas ua puav pheej yog tej yam uas tus uas Tsim Ntuj Tsim Teb thiab tsim txhua yam nyob haud tau siv kom ua qhov txuj ci tseem ceeb no: qaub ncaug thiab ib co av! Ob qho txawv txav no yeej ua puav pheej tias Vajtswv yuav xaiv tej yam twg raws li Nws xav kom foom tau koob hmoov rau peb. Ib yam li Na-amas txoj kev tsis xav da dej hauv tus Dej Yalaudees, los sis cov neeg Ixayees txoj kev tsis kam ntsia tus nab tooj, yeej yooj yim rau peb xyeej lub hauv paus ntawm peb txoj kev txhiv dim vim tej khoom thiab cuab yeej uas tau siv ntshe zoo li dog dig dhau.
Tiam sis los ntawm Phau Ntawv Maumoos peb nco txog uas meej thiab muaj nqi thiab nco txog qhov uas ua ntej Yexus yug los, ib tug yaj saub tau qhia tias “nws [yuav] tsis muaj lub cev ntaj ntsug zoo saib thiab tsis muaj tus yam ntxwv zoo nyiam; thiab thaum peb pom nws tsis zoo nraug txaus peb xav tau nws.” Vajtswv yeej ib txwm tau xa ib zaj lus zoo kawg nkaus dhau los ntawm Koom Haum Niam Tsev ib tug thawj tswj hwm tshiab los sis ib tug tub uas tsis tau kawm ntaub kawm ntawv nyob hauv ib daim liaj teb hauv New York los sis ib tug tub txib tshiab los sis ib tug me nyuam mos liab hauv ib lub dab nyuj.
Yog li ntawd yuav ua li cas yog tias Vajtswv siv tej yam yooj yim los sis tej yam txawv txav teb peb tej lus thov. Peb puas kam nyiaj mus kom sim ua raws li Khetos txoj moo zoo txawm yog yuav tsum siv qaub ncaug thiab av nkos npaum li cas? Tej lub sij hawm peb tsis paub meej Vajtswv ua dab tsi los yog vim li cas, thiab, muaj tej lub sij hawm uas peb xav zoo li tus poj laug uas hais tias, “Tus Tswv, koj puas kam muab ib txoj koob hmoov uas kuv pom taus?”
Cia li xav txog qhov puav pheej txog ib yam tseeb ntxiv, hais txog lub pov thawj hwj dawb huv. Thaum nws sau ntawv txog kev txhim tsa lub Koom Txoos thaum ub, Lukas thawj cov lus hais tias, “Yexus hu nws kaum ob tug thwj tim los, nws pub hwj chim [thiab txoj cai] rau lawv,” uas tsis yog tej txiaj ntsim uas yus tau vim yus kawm ntaub kawm ntawv tau ib daim ntawv pov thawj los sis vim yog txoj kab lig kev cai los yog muaj txoj cai ntawm tus tub hlob. Tej no los tsis muab vim yus kawm ntawv ua ib tug xib hwb los sis kawm hauv ib lub koom haum qhia txog kev teev ntuj. Tsuas muab lub hwj chim thiab txoj cai no los ntawm kev tso tes saum taub hau ntawm tus uas tau tso cai kom tso tes rau nws mus li ntawd txog thaum tus uas xub tso cai yog lub hauv paus ntawm txoj cai ntawd, tus Tswv Yexus Khetos.
Ces nyob hauv ib lub koom txoos uas to taub lub txiaj ntsim ntawm kev hlub tshua, puas yog ib qhov puav pheej zoo kawg ntxiv hais tias lub koom txoos muaj tseeb, uas peb pom tias peb cov poj koob yawm txwv uas tas sim neej lawm, cov nyob hauv peb tsev neeg uas tau xiam lawm, txais tau cov koob hmoov thiab tej kev khi lus no? Lawv yuav tsum raug txim vim lawv tsis tau muaj cib fim txais txoj moo zoo los sis lawv yug los hauv ib qhov chaw los sis lub sij hawm thaum tsis tau muaj cov kab ke thiab tej kev khi lus ntawd los? Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj tej lub tsev dawb ceev uas tau muab fij rau tus Tswv uas peb siv kom sawv cov neeg tuag no cev ua kab ke cawm seej rau lawv txhua hnub txhua hmo, thiab muab cib fim rau cov neeg ciaj pe hawm Vajtswv thiab ua cov kab ke. Raws li kuv paub lawm, qhov puav pheej txog Vajtswv txoj lus tseeb, Nws txoj kev hlub tshua rau txhua tus uas ciaj thiab txhua tus uas tuag, los tsis muaj nyob hauv lub ntiaj teb no—tsuas yog nyob hauv ib lub koom txoos xwb uas qhia qhov tseeb txog qhov no: Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.
Thawj zaug uas ua rau kuv pom kev thiab muaj sia nyob los ntawm qhov puav pheej txog qhov tseeb tiag yeej tsis yog los ntawm cov av nkos uas muab pleev los sis lub pas dej Xilau-as. Tsis yog, qhov uas tau muab tus Tswv txoj kev kho mob rau kuv yog los ntawm cov ntawv hauv ib phau ntawv, muaj tseeb tiag, yog Phau Ntawv Maumoos: Ib zaj Tim Khawv txog Yexus Khetos! Ib txhia ntawm cov neeg tsis ntseeg twb chim siab xyeej tej lus hais txog phau ntawv no, tej lub sij hawm lawv ua heev npaum li cov neeg chim siab uas qhia tus txiv neej dig muag tias twb tsis tau muaj raws li tej yam uas nws paub tseeb tias twb muaj tiag.
Tau muaj tib neeg cem kuv hais tias txoj kev sau phau ntawv no los twb yog ib txoj kev uas ntseeg tsis taus, ua rau neeg txaj muag, los sis tsis dawb huv. Nov yog tej lus nyaum los ntawm cov neeg uas xav tias lawv paub txoj kev uas tau siv kom muaj phau ntawv ntawd, vim muaj tib zaj lus xwb uas piav txog txoj kev ntawd uas qhia tias twb muab txhais “los ntawm Vajtswv lub txiaj ntsim thiab lub hwj chim.” Yog li ntawd xwb. Li ntawd xwb. Txawm yog li ntawd, qhov uas Phau Ntawv Maumoos twb hloov kuv lub neej los yeej yog ib qho txuj ci tseem ceeb uas loj npaum li qhov uas tau nto qaub ncaug thiab pleev av nkos rau ib tug neeg dig muag ob lub qhov muag. Phau ntawv no yeej yog tus pas ntawm kev nyab xeeb rau kuv lub siab, ib tug duab ntawm kev tshwm sim uas ci ntsa iab rau txhua yam, thiab ci rau kuv txoj kev thaum muaj kev tsaus ntuj uas muaj huab zig niab tuaj. Ib yam li ib txwm muaj thiab yeej yuav muaj los.
Thiab vim ua rau kuv txawj pom tus Cawm Seej txoj kev hlub zoo tag nrho thiab kev tshav ntuj uas txhiv peb dim, kuv thiaj li ua tim khawv rau nej, kuv muaj cai ua li no ib yam li tus txiv neej niam thiab txiv hais tias yuav tsum mloog nkawd tus tub hais vim nws “tiav hluas lawm.” Kuv kuj tiav hluas lawm. Nkawd xav tias nws laus txaus kom muaj neeg ntseeg nws. Kuv kuj tiav hluas lawm. Tshuav ob lub hlis ua ntej kuv muaj 85 xyoos. Kuv twb yuav luag tuag thiab rov qab muaj sia. Kuv twb tau nrog cov vaj ntxwv thiab cov yaj saub, cov thawj tswj hwm thiab cov thwj tim taug kev. Qhov zoo tshaj plaws, tej lub sij hawm kuv tau muaj Vajtswv tus Ntsuj Plig Dawb Huv nplua mias. Kuv ntseeg tias yeej yuav tsum xav txog kuv zaj lus pov thawj no.
Nim no, cov kwv tij thiab cov muam, kuv paub kawg siab kawg ntsws hais tias Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog lub Koom Txoos hauv Phau Tshiab uas tau muab txum tim rov qab los—thiab paub ntxiv—vim kuv xyeej tsis tau qhov puav pheej uas qhia kuv twb muaj li ntawd tiag. Txij thaum xub thawj los, kuv xav seb twb muaj ib txhiab—kaum txhiab?—lub sij hawm uas yog qhov puav pheej ntxiv uas qhia tias tej lus uas kuv tau hais hnub no muaj tseeb. Yog li ntawd, txawm kuv lub suab tsis muaj zog lawm los kuv zoo siab koom nrog kuv tus phooj ywg uas pw hauv Yeluxalees tej kev hu nkauj:
Los ntawm Yexus Khetos lub npe, amees.