Muaj lub Txiaj Ntsim Kom Tswj Tau Yus Tus Kheej

Hauv lub Tsib Hlis Ntuj 2021, thaum mus xyuas txoj kev kho lub Tuam Tsev Salt Lake, Thawj Tswj Hwm Russell M. Nelson xav tsis thoob txog cov neeg pioneer tej hauj lwm, vim txawm lawv tsis muaj khoom ntau thiab rau siab ntseeg, tau txhim tsa lub tsev loj loj ntawd, uas twb kav ntev lawm. Tiam sis, nws kuj pom tej qhov uas pib lwj, es thiaj muaj tej kis hauv lub hauv paus thiab cov pob zeb tsis tshua khov lawm, yeej pom hais tias yuav tsum muab kho kom nws yuav ruaj thiab khov.

Peb tus yaj saub txawm qhia peb tias yuav tsum muab lub hauv paus kho kom nws yuav sawv ruaj thiab khov es tiv tau tej huab cua, peb kuj yuav tsum ua tej yam loj loj li ntawd—tej zaum yuav tsum ua tej yam uas peb tsis tau ua dua—kom thiaj ntxiv tau zog rau peb sab ntsuj plig lub hauv paus uas yog Yexus Khetos. Nws hais ob lo lus nug rau peb kom xav txog peb tus kheej: “Nej lub hauv paus ruaj nrees npaum li cas? Thiab yuav tsum muab tej yam dab tsi coj los txheem nej zaj lus tim khawv thiab txoj kev to taub txoj moo zoo?”

Yexus Khetos txoj moo zoo pab qhia peb tej yam uas tiv thaiv tsis pub peb sab ntsuj plig puas tsuaj mus, nws pab txheem peb lub hauv paus thiab peb txoj kev ntseeg nyob ruaj khov thiab ntxiv zog rau peb zaj lus tim khawv thiab pab peb to taub tej kev tseeb hauv txoj moo zoo. Muaj ib txoj ntsiab cai uas pab ua li no nyob rau hauv Phau Lus Qhuab Qhia thiab Kev Khi Lus tshooj 12, uas yog ib txoj kev tshwm sim uas tus Yaj Saub Joseph Smith txais rau Joseph Knight, uas yog ib tug neeg ncaj ncees uas xav paub tus Tswv xav li cas rau nws, tsis yog kom hloov nws tus xeeb ceem, tiam sis kom ua ib tug thwj tim uas sawv khov kho—“ruaj nrees npaum li lub ntuj ceeb tsheej.” Tus Tswv qhia tias:

“Saib seb, kuv hais lus rau koj, thiab kuj hais rau tag nrho cov uas muaj tej kev xav pab tsa thiab coj txoj hauj lwm no los;

“Thiab tsis muaj ib tug twg yuav muaj peev xwm pab tau rau txoj hauj lwm no tsuas yog nws yuav txo hwj chim thiab muaj kev hlub puv npo xwb, muaj txoj kev ntseeg, kev cia siab, thiab kev siab hlub, tswj tus kheej txog txhua yam, txhua yam uas yuav muab rau nws saib xyuas.”

Tus Cawm Seej txoj kev cob qhia, raws li sau tseg hauv kev tshwm sim no, rov qab qhia peb tias kev tswj yus tus kheej yog ib yam tseem ceeb kom yus muaj tau ib lub hauv paus ruaj khov los ntawm Yexus Khetos. Kev tswj yus tus kheej yog ib tug cwj pwm tseem ceeb heev, tsis yog rau cov uas Vajtswv hu los ua hauj lwm xwb, tiam sis rau txhua tus uas tau ua tej kev sib khi lus nrog tus Tswv thiab tau lees hais tias lawv yuav rau siab ntso coj raws li Nws. Kev tswj yus tus kheej pab yuav muaj lwm yam cwj pwm zoo li Khetos hauv kev tshwm sim no zoo li: kev txo hwj chim, kev ntseeg, kev cia siab, kev siab hlub, thiab kev hlub dawb paug uas los ntawm Nws los. Tsis tas li ntawd xwb, txoj kev tswj yus tus kheej yog ib yam uas pab pov hwm peb tus ntsuj plig kom txhob puas tsuaj vim muaj tej yam phem hauv ntiaj teb no uas ua rau peb lub hauv paus los ntawm Yexus Khetos qaug zog.

Cov neeg ntseeg Yexus tiag tiag muaj ntau tus cwj pwm, kev tswj yus tus kheej yog ib yam uas ua piv txwv txog tus Cawm Seej Kiag, ib tug cwj pwm los ntawm tus Ntsuj Plig, uas sawv daws uas xav tau yeej txais tau los ntawm lub ntuj ceeb tsheej los. Kev tswj yus tus kheej yog ib txoj kev coj cwj pwm zoo uas ua rau peb muaj kev sib haum xeeb, nws kho tau peb tej kev xav thiab tej kev ntshaw vim peb yuav muaj kev txawj ntse thiab nyob tu tu. Nyob hauv cov vaj lug kub, kev tswj yus tus kheej yog ib qho tseem ceeb hauv peb tus ntsuj plig txoj kev loj hlob tuaj, nws yog yam uas pab peb ua siab ntev, ua neeg zoo li Vajtswv, thiab muaj kev khuv leej, thiab kuj pab kho peb tej kev xav, peb cov lus, thiab tej yam peb ua.

Khetos cov thwj tim uas sim ua kom muaj Khetos tus cwj pwm no yuav haj yam txo hwj chim thiab muaj kev hlub puv npo. Lawv haj yam muaj zog, thiab peem los ua neeg uas tswj tau kev npau taws, ua neeg siab ntev, thiab ua siab zoo, saib tau lwm tus neeg rau nqi, thiab hwm luag tej, tab txawm muaj kev kub kev ntxhov los xij. Lawv tsis lam tau lam ua ib yam dab tsi tiam sis ua tib zoo siv kev txawj ntse ntawm sab ntsuj plig xaiv, ua siab mos siab muag thiab ua raws li tus Vaj Ntsuj Plig Dawb Huv txoj kev cob qhia. Ua li no, lawv sab ntsuj plig thiaj tsis raug kev puas tsuaj, ib yam li tus Thwj Tim Povlauj qhia, lawv thiaj paub tias lawv ua tau txhua yam dhau los ntawm Khetos, tus uas ntxiv dag zog rau lawv tab txawm lawv muaj teeb meem uas txawj ua rau lawv txoj kev ntseeg Nws qaug zog.

Nyob hauv nws tsab ntawv rau Titus, Povlauj qhia txog tej cwj pwm uas cov neeg uas xav sawv tus Cawm Seej cev yuav tsum muaj kom lawv thiaj ua tau raws li Nws lub siab nyiam thiab rau siab ntso muaj kev ntseeg. Nws hais tias lawv yuav tsum ua siab dav, coj tu tu, ua ncaj, thiab dawb huv—uas yog tej cwj pwm ntawm kev tswj yus tus kheej.

Tab sis mas, Povlauj ceeb toom hais tias lawv yuav tsum “tsis txhob khav txiv, tsis chim sai, … [thiab] tsis muaj lub siab heev.” Tej cwj pwm no yeej tsis ua raws li tus Cawm Seej lub siab nyiam thiab tab kaum kev loj hlob ntawm sab ntsuj plig. Nyob hauv vaj lug kub, “tsis khav txiv” hais txog ib tug neeg uas tsis muaj siab hlob thiab khav theeb; “tsis chim sai” hais txog ib tug neeg uas tsis ua siab luv thiab npau taws; thiab “tsis muaj lub siab heev” hais txog ib tug neeg uas tsis kam sib cav, ua heev heev, thiab tsis hais lus phem, ntaus neeg, thiab quab yuam tib neeg Thaum peb txo hwj chim muaj kev ntseeg es sim pauv peb tus xeeb ceem, peb yuav nyob ruaj nrees rau ntawm lub pob zeb uas yog Nws txoj kev tshav ntuj thiab yuav rais los mus ua neeg dawb huv hauv Nws txhais tes.

Thaum xav txog qhov uas peb xav tau kev coj cwj pwm zoo ntawm kev tswj tau peb tus kheej, kuv thiaj nco txog Hanas, uas yog tus yaj saub Xamuyees niam—ib tug poj niam uas rau siab ntseeg, tab txawm nws muaj kev cov nyom ntau los, tau hu nkauj qhuas Vajtswv. Nws hais tias, “Cia li tseg nej tej lus khav theeb; thiab tseg nej tej lus khav txiv: rau qhov tus Tswv yog tus Vajtswv uas paub, thiab tshuaj txhua yam uas neeg ua.” Nws zaj nkauj yeej zoo nkaus li ib zaj lus thov Vajtswv—twb yog caw nws tus kheej kom los txo hwj chim, tswj nws lub siab, thiab coj tu tu. Hanas qhia peb tias lub dag zog ntawm sab ntuj plig tsis yog thaum hais tej lus loj loj, tiam sis yog kom tswj yus tus kheej, ua tib zoo muaj lub siab xav ua raws li tus Tswv txoj kev txawj ntse.

Feem ntau, neeg ntiaj teb nyiam txoj kev ua heev heev, ua siab loj, ua siab luv, thiab xav tau txhua yam tsav, feem ntau tsuas xav tau tej yam hauv lub neej no uas sawv daws pom zoo ua xwb. Thaum peb tsis nco qab txog txoj kev tswj yus tus kheej thiab tsis cuab pob ntseg mloog tus Vaj Ntsuj Plig Dawb Huv tej kev tshoov siab hais txog tej yam peb ua thiab tej lus peb hais, peb yeej raug tus yeeb ncuab kev haub ntxias, uas ua rau peb hais tej lus tsis zoo thiab ua tej yam uas yav tom ntej peb yuav tu siab rau, txawm yog rau peb tej kev sib raug zoo hauv peb tsev neeg, lub xam khoo, los sis tom tsev teev ntuj. Yexus Khetos txoj moo zoo caw peb los ua raws li kev coj cwj pwm zoo no thaum twg peb muaj kev cov nyom, rau qhov thaum muaj teeb meem es yus thiaj pom seb tus neeg ntawd coj cwj pwm zoo li cas tiag. Zoo li Martin Luther King Jr. hais ib zaug tias, “Qhov uas yus paub ib tug neeg tus cwj pwm zoo li cas tsis yog thaum nws xis nyob, tiam sis seb nws ua li cas thaum twg muaj kev cov nyom thiab teeb meem.”

Vim peb yog cov neeg ntawm kev sib khi lus, peb yuav tsum tso siab plhuav ua raws li peb tej kev cog lus rau tus Tswv, thaum peb ua raws li Nws tus yam ntxwv uas Nws tau teem tseg. Nws rov qab cog lus hais tias, “Kuv hais tseeb tseeb rau nej tias, nov yog kuv txoj lus qhuab qhia, thiab tus uas cog rau saum qhov no yog cog rau saum kuv lub pob zeb, thiab tej rooj vag ntawm ntuj txiag teb tsaus yuav kov tsis yeej lawv.”

Tus Cawm Seej txoj kev qhuab qhia hauv ntiaj teb no yeej muaj kev coj cwj pwm zoo uas tau tswj nws tus kheej hauv txhua yam Nws tau ua. Dhau ntawm Nws tus yam ntxwv zoo, Nws qhia peb tias “ua siab ntev thaum muaj teeb meem, tsis txhob tawm tsam cov uas tawm tsam nej.” Thaum Nws qhia tias peb yuav tsum txhob npau taws vim muaj kev sib cav sib ceg thiab tsis sib haum, Nws qhia tias, “Nej yuav tsum hloov siab lees txim, thiab yuav tsum rais los mus zoo li ib tug me nyuam yaus.” Nws kuj qhia tias txhua tus uas xav rau siab ntso los cuag Nws yuav tsum ua kom sib haum nrog cov uas lawv chim rau los yog cov uas twb ua txhaum rau lawv lawm. Thaum tswj yus tus kheej thiab muaj kev khuv leej, Nws qhia peb tias thaum luag tej ua phem, ua tsis ncaj, tsis saib peb rau nqi, los sis tsis quav ntsej peb, Nws txoj kev ua siab zoo tsis tawm ntawm peb, thiab Nws txoj kev kaj siab lug yuav nyob rau hauv peb lub neej.

Ob peb xyoos tas los lawm, kuv thiab kuv tus poj niam tau ntsib ib co mej zeej uas rau siab ntseeg hauv lub Koom Txoos hauv lub Nroog Mexico. Lawv los sis lawv tsev neeg feem coob, tau nyiaj mus dhau ntau yam kev cov nyom, kuj muaj neeg nyiag lawv me nyuam, tua neeg, thiab lwm yam teeb meem loj.

Thaum wb ntsia Tsoom Haiv Neeg Ntseeg ntawd, wb tsis pom kev chim siab, kev npau taws, los sis lub siab uas xav pauj txiaj ntsim hlo li. Tiam sis, wb tsuas pom kev ua siab mos siab muag. Lawv tej ntsej muag ci laim luag, txawm muaj kev nyuaj siab los lawv xav tau kev kho thiab kev nplij siab. Txawm lawv muaj kev nyuaj siab kho siab los, Tsoom Haiv Neeg Ntseeg no tau nyiaj mus tom ntej muaj kev ntseeg Yexus Khetos, lawv tau txiav txim siab tias lawv tej kev cov nyom yuav tsis ua rau lawv txoj kev ntseeg qaug zog los sis ua rau lawv zaj lus tim khawv txog Yexus Khetos txoj moo zoo tsis nyob ruaj khov.

Thaum xaus txoj kev sib ntsib ntawd, wb tau mus ntsib cov neeg no txhua tus. Txhua txoj kev tuav tes, kev sib khawm, tau ua tim khawv tias yog muaj tus Tswv txoj kev pab ces, peb yuav muaj peev xwm tswj peb tus kheej thaum ntsib tej teeb meem thiab tej kev cov nyom hauv lub neej no. Lawv tus yam ntxwv yeej pab tau sawv daws xav los taug tus Cawm Seej txoj hau kev thiab muaj kev tswj lawv tus kheej thaum ua txhua yam tsav. Wb xav tias wb yeej nrog cov tim tswv nyob.

Yexus Khetos, tus uas zoo tshaj plaws, raug kev txom nyem rau peb txhua leej txhia tus thiab los ntshav ntawm txhua lub qhov hws, tab sis mas Nws tsis tau muaj kev chim siab hauv Nws lub siab, nws tsis tau ua heev heev, tub qaug, los sis hais lub phem, tab txawm nws raug kev tsim txom li cas los xij. Nws tau tswj nws tus kheej thiab ua siab mos siab muag, Nws tsis tau xav txog Nws tus kheej tiam sis tau xav txog Vajtswv txhua tus me nyuam—cov neeg thaum ub, niaj hnub nim no, thiab yav tom ntej. Tus Thwj Tim Povlauj hais lus tim khawv txog Khetos tus cwj pwm thaum nws hais tias, “Thaum luag thuam nws, nws tsis teb luag ib los li; thiab thaum luag tsim txom nws, nws tsis foom luag, tiam sis nws muab tej ntawd tso rau Vajtswv tus uas txiav txim ncaj ncees.” Tab txawm Nws raug kev txom nyem kawg nkaus los, tus Cawm Seej tau ua tib zoo tswj nws tus kheej. Nws hais tias, “Txawm li ntawd los, cia Leej Txiv tau lub yeeb koob, thiab kuv tau haus thiab ua tiav kuv tej kev npaj rau noob neej.”

Kuv cov kwv tij thiab cov muam, kuv xav thov caw peb txhua leej txhia tus kom peb yuav kawm tswj peb tus kheej li Khetos ua, thiab ua raws li peb tus yaj saub Thawj Tswj Hwm Russell M. Nelson thov. Thaum peb muaj kev ntseeg thiab rau siab ntso tswj peb tus kheej tej lus thiab tej yam peb ua, kuv hais lus tim khawv tias peb yuav ntxiv zog thiab cog peb lub neej ruaj khov rau ntawm lub hauv paus uas yog peb tus Txhiv Dim.

Kuv hais lus tim khawv tias txoj kev tswj peb tus kheej tsis tu tsis tseg yuav ua rau peb ua neeg dawb huv thiab pauv peb lub siab rau ntawm peb tus Cawm Seej, pab peb txav los nyob ze Nws thiab pab peb muaj kev nyab xeeb thiab cia siab rau hnub zoo kawg uas peb yuav ntsib Nws thaum txog Nws txoj Kev Los Zaum Ob. Kuv tej lus dawb ceev no los ntawm peb tus Cawm Seej, Yexus Khetos lub npe, amees.