Phau Ntawv Maumoos—Ib Yam uas Muaj Nqis Tshaj hauv Peb lub Neej

Los ntawm Txwj Laug Ozani Farias

Ntawm Pawg Xya Caum

Thaum peb mloog ntsoov Khetos tej lus nyob hauv Phau Ntawv Maumoos, tus Ntsuj Plig yuav pab peb to taub tej lus tseeb mus ib txhis li.

Nej puas nco txog ib lub sij hawm thaum ib tug neeg muab ib lub txiaj ntsim rau nej uas hloov nej lub neej? Lub Kaum Hli Ntuj no yog 40 xyoo tom qab kuv tau txais ib qho khoom plig zoo tshaj plaws hauv kuv lub neej. Thaum kuv tseem kawm high school, kuv pom hais tias ib tug tub kawm ntawv muaj ib txoj kev kaj uas txawv ntawm lwm tus tub hluas ntxhais hluas. Kuv nyiam nrog nws nyob. Muaj ib hnub nws qhia kuv tias nws yog ib tug mej zeej ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Ces nws muab ib qho khoom plig rau kuv: ib Phau Ntawv Maumoos. Nws caw kuv nyeem ob peb phab ntawv thiab nrog ob tug phooj ywg tham uas teb tau kuv tej lus nug. Ob tug phooj ywg ntawd yog ob tug tub txib.

Ces kuv nrog ob tug tub txib tham, es nkawd tau qhia kuv txog Khetos cov lus qhuab qhia thiab caw kuv ua raws li tus yaj saub Maulaunais tej lus caw no: “Thiab thaum nej yuav tau txais tej no, kuv xav ntuas nej kom nej thov Vajtswv, Leej Txiv tus uas Nyob Mus Ib Txhis, los ntawm Khetos lub npe, saib tej no puas muaj tseeb; thiab yog nej thov nrog lub siab dawb paug, nrog kev mob siab tiag, thiab muaj kev ntseeg Khetos, nws yuav qhia rau nej tias tej no muaj tseeb, los ntawm tus Vaj Ntsuj Plig Dawb Huv lub hwj chim” (Maulaunais 10:4).

Kuv tau nyeem ob peb phab ntawv ntawm Phau Ntawv Maumoos thiab thov Vajtswv. Txawm yog kuv tsis to taub txhua yam txog tej yam uas ob tug tub txib qhia kuv, kuv xav hauv kuv lub siab hais tias tej yam kuv nyeem yeej zoo thiab los ntawm Vajtswv. Kuv tau txais kev pom zoo raws li Maulaunais cog lus tias: “Thiab los ntawm tus Vaj Ntsuj Plig Dawb Huv lub hwj chim nej yuav paub qhov tseeb ntawm txhua yam” (Maulaunais 10:5).

Tom qab kuv ua kev cai raus dej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, ib co phooj ywg sim ntxias kuv hais tias kuv twb xaiv ib yam tsis zoo. Tiam sis txhua zaus kuv ua xyem xyav los sis raug kev tawm tsam, kuv tau txais kev pom zoo dhau los ntawm kev kawm vaj lug kub thiab kev thov Vajtswv kom pab kuv ua raws li kuv tej kev khi lus nrog Nws. Txij thaum ntawd los, Phau Ntawv Maumoos tau pab kuv thiab yog ib yam uas muaj nqis heev hauv kuv lub neej.

Phau Ntawv Maumoos tsis yog ib phau ntawv xwb. Yog ib zaj lus tim khawv txog Yexus Khetos ntxiv, uas cov yaj saub sau puag thaum ub dhau los ntawm lub hwj chim ntawm kev qhia tej uas yuav muaj los yav tom ntej thiab kev tshwm sim.

Lub sij hawm tseem ceeb uas nyob hauv Phau Ntawv Maumoos yog tus Tswv Yexus Khetos txoj kev txhawb pab cov neeg Nifais tsis ntev tom qab Nws txoj Kev Sawv Rov Los. Phau Ntawv Maumoos “piav txog txoj moo zoo tej lus qhuab qhia, qhia txog txoj kev cawm seej, thiab qhia rau tib neeg kom paub tias lawv yuav tsum ua li cas thiaj yuav tau txais txoj kev kaj siab lug hauv lub neej no thiab tau txoj kev cawm seej nyob mus ib txhis nyob hauv lub neej yuav los yav tom ntej” (zaj lus piav txog Phau Ntawv Maumoos)

Thawj Phau Ntawv Maumoos: Ib zaj Tim Khawv Ntxiv txog Yexus Khetos los twb muab luam tawm hauv ib lub zos nyob hauv lub xeev New York thaum lub Peb Hlis Ntuj xyoo 1830. Tus Yaj Saub Joseph Smith tsuas muaj 23 xyoos lawm thaum nws txhais phau ntawv no tiav nyob rau xyoo 1829. Nws tau siv tsawg dua li 75 hnub kom muab phau ntawv no txhais tag nrho, thiab twb siv xya lub hli kom muab luam tawm.

Niaj hnub no, kwv yees li 80,000 tus tub txib nyob hauv 150 lub teb chaws ua hauj lwm pub dawb, muab lawv lub neej fij rau txoj kev ua pov thawj hais tias Phau Ntawv Maumoos muaj tseeb thiab phau ntawv no ua tim khawv txog Yexus Khetos.

Nyob hauv kev sib ntsib rau tej qhov chaw tshaj tawm txoj moo zoo cov thawj coj tshiab thaum lub Rau Hli Ntuj xyoo no, Thawj Tswj Hwm Russell M. Nelson ua tim khawv txog Phau Ntawv Maumoos hais tias: “Phau Ntawv Maumoos yog … Vajtswv txoj lus. Phau ntawv no qhia txog Khetos cov lus qhuab qhia thiab piav ntxiv txog tus Cawm Seej txoj Kev Theej Txhoj ntau tshaj lwm phau ntawv.”

Kuv xav hais peb lub tswv yim uas pab tau peb hloov siab los ntseeg Yexus Khetos ntxiv dhau los ntawm kev kawm Phau Ntawv Maumoos:

1. Rau Siab Kawm Txhua Hnub

Ib yam li Amas thiab Mauxiyas cov tub, peb yuav tsum “rau siab ntso tshawb xyuas cov vaj lug kub, xwv kom [peb] yuav paub Vajtswv txoj lus” (Amas 17:2).

Thaum kuv thiab kuv tus poj niam ua thawj coj rau Qhov Chaw Tshaj Tawm Txoj Moo Zoo Georgia Atlanta, wb tsom ntsoov rau kev pab txhua tus tub txib kawm Phau Ntawv Maumoos 30 feeb txhua hnub. Kev cog lus ntawd twb pab peb txoj kev ntseeg thiab pab peb nrhiav thiab tos ntsoov tej txuj ci tseem ceeb.

Tej zaum tom qab peb ua tub txib tag lawm peb tsis muaj sij hawm ntev npaum li ntawd kom kawm cov vaj lug kub txhua hnub, tiam sis kuv cog lus tias yog nej mob siab cuab hom phiaj kawm Phau Ntawv Maumoos txhua hnub, ces nej sab ntsuj plig yuav muaj zog ntxiv thiab nej yuav cia siab rau tus Tswv thiab Nws tej lus cog tseg.

2. Pab Txhawb Nqa Nej txoj Kev Kawm Vaj Lug Kub Vim Nej Mloog Ntsoov Khetos tej Lus

Nifais tau qhia tias, “Mloog ntsoov Khetos tej lus; vim saib seb, Khetos tej lus yuav qhia nej txhua yam uas nej yuav tsum ua” (2 Nifais 32:3).

Kev mloog ntsoov tsis yog kev nyeem ntawv xwb—yuav tsum ua tib zoo xav thiab ua raws li tej lus ntawd. Thaum nej kawm Phau Ntawv Maumoos, xav seb nej yuav ua li cas kom nej txoj kev kawm vaj lug kub yuav muaj nqis ntxiv. Piv txwv hais tias:

Siv tej kev pab uas nyob hauv qhov app Txoj Moo Zoo cov Ntawv.
Nrhiav tej lus tseeb mus ib txhis li uas pab peb to taub Vajtswv txoj hau kev thiab coj peb khi lus thiab ua raws li tej kev khi lus ntawd nrog peb Leej Txiv Saum Ntuj Ceeb Tsheej.
Kos xim rau tej lus tseem ceeb thiab sau ntawv txog nej tej kev xav kom ceev tej yam uas nej kawm cia.

Phau Ntawv Maumoos muaj hwj chim teb nej tej lus nug tseem ceeb. Ib yam li Nifais hais tias, “Kuv tau muab tag nrho tej vaj lug kub coj los piv rau peb, kom thiaj muaj nqis rau peb thiab kom peb kawm tau” (1 Nifais 19:23).

Thaum peb mloog ntsoov Khetos tej lus, ces tej lus ntawd yuav qhib kev tshwm sim rau peb thiab qhia peb kom paub ua dab tsi hauv peb lub neej kom los nyob ze Nws ntxiv.

3. Ua Tim Khawv txog Qhov uas Phau Ntawv Maumoos Muaj Tseeb

Ib yam li Lihais xav kom muab cov txiv ntawm tsob ntoo uas cawm neeg txoj sia rau nws tsev neeg (saib 1 Nifais 8:12), thaum peb muaj ib zaj lus tim khawv txog Phau Ntawv Maumoos, peb xav xav qhia txog kev xyiv fab uas los ntawm txoj kev paub Yexus Khetos txoj moo zoo.

Wb ib tug ntxhais txib, Muam Benson, uas koom nrog peb hauv tuas rooj sab laj no, tau qhia kuv tias nws xav pab nws tus nus. Thaum lub sij hawm ntawd, nws npaj mus kawm ntawv qib siab thiab nws tsis paub tseeb nws puas xav mus ua tub txib. Ua rau kuv txais kev tshoov siab caw Muam Benson nyeem Phau Ntawv Maumoos thaum thawj plaub lub hlis ntawm nws txoj kev ua ntxhais txib, kos xim rau tej nqe uas nws nyiam tshaj, ces xa phau ntawv ntawd rau nws tus nus.

Muam Benson tau xa Phau Ntawv Maumoos uas nws kos xim rau thiab caw nws tus nus nyeem txhua hmo. Ces tom qab ntawd nws qhia rau kuv tias: “Ua ntej kuv yuav ua ib tug ntxhais txib, kuv tus nus tsis paub xyov nws puas xav ua ib tug tub txib. Thaum nws nyeem Phau Ntawv Maumoos, nws maj mam muaj kev xyiv fab hauv nws lub neej thiab pib xav tias nws yuav mus ua tub txib.”

Ob lub lim tiam ua ntej Muam Benson ua ib tug ntxhais txib tag, nws tus nus txais nws tsab ntawv hu nws ua tub txib. Tam sim no nws ua hauj lwm hauv Qhov Chaw Tshaj Tawm Txoj Moo Zoo Mexico Tuxtla Gutiérrez. Dhau los ntawm Phau Ntawv Maumoos, Txwj Laug Benson tab tom txawj pom nws lub neej raws li sab ntsuj plig, uas ua rau nws txiav txim siab ua hauj lwm rau tus Tswv thiab cia siab hais tias yav tom ntej yuav zoo. Kev txiav txim ntawd yeej yog ib qho txuj ci tseem ceeb—vim Khetos tej lus muaj hwj chim hloov nws lub siab.

Cov kwv tij thiab cov muam uas kuv hlub es, kuv thov kom nej rau siab kawm Phau Ntawv Maumoos. Kuv paub tias thaum peb mloog ntsoov Khetos tej lus nyob hauv Phau Ntawv Maumoos, tus Ntsuj Plig yuav pab peb to taub tej lus tseeb mus ib txhis li thiab muaj hwj chim ua tim khawv rau cov uas tus Tswv tau npaj lawv lub siab kom hnov Nws zaj lus. Tus Tswv qhia hais tias, “Kuv cov neeg tau xaiv tseg hnov kuv lub suab thiab tsis ua lawv lub siab tawv qhawv” (Lus Qhuab Qhia thiab Kev Khi Lus 29:7). Kuv ua tim khawv hais tias cov neeg uas muaj kev ntseeg thov Vajtswv yuav txais ib zaj lus tim khawv txog qhov tseeb thiab qhov uas Phau Ntawv Maumoos los ntawm Vajtswv los dhau los ntawm tus Vaj Ntsuj Plig Dawb Huv lub hwj chim. Kuv ua tim khawv txog qhov no los ntawm Yexus Khetos lub npe, amees.